അര്‍ഹരായ മുഴുവന്‍ ഭവന രഹിതര്‍ക്കും കിടപ്പാടം ലഭ്യമാക്കുക എന്ന  ലക്ഷ്യത്തോടെ  ആവിഷ്‌കരിച്ചിട്ടുളള സംസ്ഥാന സര്‍ക്കാരിന്റെ വികസന മിഷനുകളില്‍ പ്രമുഖമായ ലൈഫ് മിഷന്‍ പ്രവര്‍ത്തനങ്ങളില്‍ പത്തനംതിട്ട ജില്ല ശ്രദ്ധേയമായ നേട്ടങ്ങള്‍ കൈവരിച്ചു.

ജില്ലാ ആസൂത്രണ സമിതി യോഗം ജില്ലാ പഞ്ചായത്ത് പ്രസിഡന്റ് പി കെ ഡേവീസ് മാസ്റ്ററുടെ അധ്യക്ഷതയിൽ നടന്നു. യോഗത്തിൽ ഏഴ് തദ്ദേശ സ്വയംഭരണ സ്ഥാപനങ്ങളുടെ 2023 -24 വാർഷിക പദ്ധതിക്ക്    അംഗീകാരം നൽകി. ഇതോടെ ജില്ലയിലെ മുഴുവൻ തദ്ദേശ സ്വയംഭരണ സ്ഥാപനങ്ങളുടെ വാർഷിക പദ്ധതികൾക്കും ജില്ലാ ആസൂത്രണ സമിതി അംഗീകാരം നൽകി.

തൃശൂർ ഗവൺമെന്റ് എൻജിനീയറിങ് കോളേജിൽ സ്മോൾ ഇൻഡസ്ട്രീസ് ഡെവലപ്പ്മെന്റ് ബാങ്ക് ഓഫ് ഇന്ത്യയുടെ (സിഡബ്) പിന്തുണയോടെ നടപ്പിലാക്കുന്ന സ്വാവലംബൻ ചെയർ ഫോർ എംഎസ്എംഇ സൊല്യൂഷൻസ്, ജ്വല്ലറി വസ്തുക്കളുടെ നിർമ്മാണത്തിൽ 10 ദിവസത്തെ സൗജന്യ പരിശീലനം നൽകുന്നു. ഏപ്രിൽ 24ന് ആരംഭിക്കുന്ന പരിശീലന പരിപാടിയിലേക്ക് സ്വന്തമായി ബിസിനസ്സ് തുടങ്ങാൻ താൽപര്യമുള്ളവരിൽ നിന്നും അപേക്ഷ ക്ഷണിച്ചു. ഫോൺ: 7559857601, 7558868317

 പോസ്റ്റ് ഓഫീസ് ആര്‍ ഡി ലഘുസമ്പാദ്യ പദ്ധതിയിൽ ഏജന്റിന്റെ കൈവശം തുക ഏല്‍പ്പിക്കുമ്പോള്‍ ഉടന്‍ തന്നെ ഇന്‍വെസ്റ്റേഴ്‌സ് കാര്‍ഡില്‍ ഏജന്റിന്റെ കൈയ്യൊപ്പ് വാങ്ങേണ്ടതാണെന്ന് ദേശീയ സമ്പാദ്യ പദ്ധതി ഡെപ്യൂട്ടി ഡയറക്ടർ അറിയിച്ചു. നിക്ഷേപകന്‍ നല്‍കിയ തുക പോസ്റ്റ് ഓഫീസില്‍ ഒടുക്കിയതിനുള്ള ആധികാരികമായ രേഖ പോസ്റ്റ്മാസ്റ്റര്‍ ഒപ്പിട്ട് സീല്‍ വെച്ച് നല്‍കുന്ന പാസ്ബുക്ക് മാത്രമാണ്. ഇത്തരം രേഖപ്പെടുത്തലുകള്‍ യഥാസമയം നടത്തുന്നുണ്ടെന്ന് നിക്ഷേപകര്‍ പരിശോധിച്ച് ബോധ്യപ്പെടണമെന്നും ഡെപ്യൂട്ടി ഡയറക്ടർ അറിയിച്ചു.

കേരള വന ഗവേക്ഷണ സ്ഥാപനത്തിൽ മൂന്ന് വർഷം കാലാവധിയുള്ള പ്രൊജക്റ്റിൽ പ്രൊജക്ട് ഫെല്ലോ ഒഴിവ്. അഭിമുഖം മെയ് 19ന് രാവിലെ 10 മണിക്ക് പീച്ചി കേരള വനഗവേഷണ സ്ഥാപന ഓഫീസിൽ നടക്കും. യോഗ്യത: ഒന്നാം ക്ലാസ് എം എസ് സി സുവോളജി. പ്രാണി വളർത്തൽ, വിഷബാധ പഠനം, സ്ഥിതിവിവരകണക്ക് എന്നിവയിൽ പരിജ്ഞാനം അഭികാമ്യം. യോഗ്യതയുള്ളവർ അസൽ സർട്ടിഫിക്കറ്റുകൾ സഹിതം ഹാജരാകണം. വിശദവിവരങ്ങൾക്ക് www.kfri.res.in. ഫോൺ 0487 2690100

കേരള വന ഗവേഷണ സ്ഥാപനത്തിൽ പ്രോജക്ട് അസിസ്റ്റന്റ് തസ്തികയിലേക്ക് അപേക്ഷ ക്ഷണിച്ചു. തസ്തികയിലേക്ക് ഉള്ള അഭിമുഖം ഏപ്രിൽ 26ന് രാവിലെ പത്ത് മണിക്ക് നടക്കും. വിശദ വിവരങ്ങൾക്ക് www.kfri.res.in എന്ന വെബ് സൈറ്റ് സന്ദർശിക്കുക.

ഓപ്പറേഷൻ ബ്രേക്ക് ത്രൂവിന്റെ മൂന്നാംഘട്ട പ്രവർത്തനങ്ങളുടെ ഭാഗമായി മുല്ലശേരി കനാലിൽ നടത്തിവരുന്ന നവീകരണ പ്രവർത്തനങ്ങളുടെ പുരോഗതി വിലയിരുത്തി. ജില്ലാ കളക്ടർ എൻ.എസ്.കെ ഉമേഷിന്റെ നേതൃത്വത്തിലായിരുന്നു വിവിധ വകുപ്പുകളിലെ ഉദ്യോഗസ്ഥർ സ്ഥലത്തെത്തി പ്രവർത്തനങ്ങൾ  പരിശോധിച്ചത്.

കെ.എസ്.ആർ.ടി.സി ബസ് സ്റ്റാൻഡ് മുതൽ ടി.ഡി റോഡ് വരെയുള്ള കനാലിന്റെ ഭാഗങ്ങളിൽ ജല അതോറിറ്റിയുടെ പൈപ്പ് ലൈനുകൾ മാറ്റുന്നതിനുള്ള പ്രവർത്തനങ്ങളാണ് നടന്നു വരുന്നത്. ഈ ഭാഗങ്ങളിലായിരുന്നു കളക്ടറും സംഘവും സന്ദർശിച്ചത്. മഴക്കാലത്തിന് മുൻപ് പ്രവർത്തനങ്ങൾ പൂർത്തിയാക്കണമെന്ന് കളക്ടർ നിർദ്ദേശം നൽകി. 

കേന്ദ്ര സർക്കാർ പദ്ധതിയായ പ്രധാൻ മന്ത്രി ആവാസ് യോജനയുടെ മുളന്തുരുത്തി ബ്ലോക്കിൽ നിർമ്മിച്ച 40 വീടുകളുടെ താക്കോൽ ദാനം മുളന്തുരുത്തി ബ്ലോക്ക് പഞ്ചായത്ത് പ്രസിഡന്റ് രാജു പി. നായർ നിർവഹിച്ചു. മുളന്തുരുത്തി ബ്ലോക്കിൽ അനുവദിച്ച 45 വീടുകളിൽ 40 വീടുകളുടെ നിർമ്മാണവും പൂർത്തിയാക്കാൻ സാധിച്ചത് അഭിമാനാർഹമായ നേട്ടമാണെന്ന് അദ്ദേഹം പറഞ്ഞു. 

നാടകക്കളരി സംഘടിപ്പിച്ചു 

ബാലസഭയിലെ കുട്ടികള്‍ക്ക് അവധിക്കാല പരിശീലനമായി നാടകക്കളരി സംഘടിപ്പിച്ച് കുടുംബശ്രീ. കുഴുപ്പിള്ളി ഗ്രാമപഞ്ചായത്ത് കുടുംബശ്രീ സി.ഡി.എസിന്റെ നേതൃത്വത്തില്‍ സംഘടിപ്പിച്ച പരിപാടി പഞ്ചായത്ത് പ്രസിഡന്റ് കെ.എസ് നിബിന്‍ ഉദ്ഘാടനം ചെയ്തു. പഞ്ചായത്തിലെ വിവിധ വാര്‍ഡുകളിലെ കുട്ടികളുടെ സര്‍ഗ്ഗാത്മകതയും നേതൃത്വ നൈപുണ്യവും വര്‍ദ്ധിപ്പിക്കുന്നതിനായി ജില്ലാ മിഷന്റെ നിര്‍ദേശപ്രകാരമാണ് പരിപാടി നടത്തുന്നത്.

വൈപ്പിന്‍: നായരമ്പലം ഗ്രാമപഞ്ചായത്തില്‍ വിവിധ റോഡുകളുടെ നിര്‍മ്മണത്തിനായി 28 ലക്ഷം രൂപയുടെ ഭരണാനുമതി ലഭിച്ചതായി കെ.എന്‍ ഉണ്ണിക്കൃഷ്ണന്‍ എം.എല്‍.എ അറിയിച്ചു. എംഎല്‍എയുടെ പ്രത്യേക വികസന നിധിയില്‍ നിന്നാണ് റോഡ് നിര്‍മ്മാണത്തിന് തുക അനുവദിച്ചത്. 

വാര്‍ഡ് 13ലെ സാഞ്ചോപുരം ലിങ്ക് റോഡ്, നമ്പ്രാട്ടിതറ കോളനി റോഡ് എന്നിവയുടെ നിര്‍മ്മാണത്തിന് 15ലക്ഷം രൂപ വിനിയോഗിക്കും. ബ്ലോക്ക് ഡെവലപ്പ്‌മെന്റ് ഓഫീസർക്കാണ് പദ്ധതിയുടെ നിര്‍വ്വഹണ ചുമതല.