ജില്ലയില്‍ മാലിന്യ നിക്ഷേപം പലയിടങ്ങളിലും തുടര്‍ക്കഥയാവുന്ന സാഹചര്യത്തില്‍ കര്‍ശന നടപടി സ്വീകരിക്കാന്‍ ജില്ലാ കളക്ടര്‍ ഭണ്ഡാരി സ്വാഗത് രണ്‍വീര്‍ചന്ദ് തദ്ദേശ സ്ഥാപന അധ്യക്ഷന്‍മാര്‍ക്ക് നിര്‍ദേശം നല്‍കി. മാലിന്യ നിക്ഷേപം ശ്രദ്ധയില്‍പ്പെട്ടിട്ടും നിയമനടപടി സ്വീകരിച്ചില്ലെങ്കില്‍ തദ്ദേശ സ്ഥാപനങ്ങള്‍ക്കെതിരെ ദുരന്ത നിവാരണ നിയമപ്രകാരം നടപടിയെടുക്കുമെന്ന് കളക്ടര്‍ പറഞ്ഞു. ജില്ലയെ മാലിന്യ മുക്തമാക്കുന്ന പ്രവര്‍ത്തനങ്ങള്‍ ചര്‍ച്ച ചെയ്യാന്‍ കളക്ടറേറ്റ് മിനി കോണ്‍ഫറന്‍സ് ഹാളില്‍ ചേര്‍ന്ന ജില്ലയിലെ തദ്ദേശ സ്ഥാപന അധ്യക്ഷന്‍മാരുടെ യോഗത്തില്‍ സംസാരിക്കുകയായിരുന്നു കളക്ടര്‍.

സംസ്ഥാന സര്‍ക്കാരിന്റെ രണ്ടാം വാര്‍ഷികാഘോഷത്തോടനുബന്ധിച്ച് സംഘടിപ്പിക്കുന്ന എന്റെ കേരളം പ്രദര്‍ശന വിപണനമേള 2023ല്‍ 174 സ്റ്റാളുകള്‍ ഒരുക്കുമെന്ന് ജില്ലാതല സംഘാടക സമിതി യോഗം അറിയിച്ചു. മെയ് മൂന്ന് മുതല്‍ ഒന്‍പത് വരെ കാഞ്ഞങ്ങാട് ആലാമിപ്പള്ളിയില്‍ നടക്കുന്ന പരിപാടിയില്‍ വിവിധ വകുപ്പുകളുടെ പ്രദര്‍ശന-വിപണന സ്റ്റാളുകള്‍ ഒരുക്കും. അതില്‍ 103 വിപണന സ്റ്റാളുകളും 70 പ്രദര്‍ശന സ്റ്റാളുകളും ഉണ്ടായിരിക്കും. മെയ് മൂന്നിന് കാഞ്ഞങ്ങാട് പഴയ ബസ്സ്സ്റ്റാന്റില്‍ നിന്നും ആലാമിപ്പള്ളി വരെ വര്‍ണ്ണാഭമായ വിളംബര ഘോഷയാത്ര സംഘടിപ്പിക്കും.  

കേരള തീരത്ത് ഏപ്രില്‍ 21 രാത്രി 11.30 വരെ 0.5 മുതല്‍ 1.0 മീറ്റര്‍ വരെ ഉയര്‍ന്ന തിരമാലയ്ക്കും കടലാക്രമണത്തിനും സാധ്യതയുണ്ടെന്നും ആയതിന്റെ വേഗത സെക്കന്റില്‍ 5 - 25 സെന്റിമീറ്റര്‍ വരെ മാറിവരുവാന്‍ സാധ്യതയുണ്ടെന്നും ദേശീയ സമുദ്രസ്ഥിതിപഠന ഗവേഷണ കേന്ദ്രം.  ഈ സാഹചര്യത്തില്‍ മത്സ്യത്തൊഴിലാളികള്‍ക്കും തീരദേശവാസികള്‍ക്കും സംസ്ഥാന ദുരന്തനിവാരണ അതോറിറ്റി ജാഗ്രതാ നിര്‍ദേശം നല്‍കി. മത്സ്യബന്ധന യാനങ്ങളുടെയും ഉപകരണങ്ങളുടെയും സുരക്ഷ ഉറപ്പാക്കണമെന്നും ബീച്ചിലേയ്ക്കുള്ള യാത്രകളും കടലില്‍ ഇറങ്ങിയുള്ള വിനോദങ്ങളും പൂര്‍ണമായും ഒഴിവാക്കണമെന്നും മുന്നറിയിപ്പുണ്ട്.

മുൻകാലങ്ങളിൽ പോലീസ് സേന ഉപയോഗിച്ചിരുന്ന ആയുധങ്ങൾ മുതൽ അത്യാധുനിക യന്ത്രത്തോക്കുകളും വനിതകൾക്ക് സ്വയം സുരക്ഷ ഒരുക്കുന്നതിനുള്ള ആയോധന മുറകളുടെ പരിശീലനവും ഉൾപ്പെടുന്നതാണ് എൻറെ കേരളം മേളയിലെ കേരള പോലീസിൻറെ സ്റ്റാൾ. രണ്ടാം പിണറായി സർക്കാരിന്റെ രണ്ടാം വാർഷികത്തോടനുബന്ധിച്ച് ഏപ്രിൽ 23 വരെ ആലപ്പുഴ ബീച്ചിൽ നടക്കുന്ന എന്റെ കേരളം പ്രദർശന വിപണന മേളയിലാണ് പോലീസ് വകുപ്പിൻറെ സ്റ്റാൾ സജ്ജീകരിച്ചിട്ടുള്ളത്. മേളയിലെ പ്രധാന ആകർഷണം കൂടിയാണ് ഈ പരിശീലന പരിപാടി. സ്ത്രീ സുരക്ഷയ്ക്ക് പ്രത്യേക പരിഗണന നൽകിയാണ് സ്റ്റാൾ തയ്യാറാക്കിയിട്ടുള്ളത്.

 ഫിഷറീസ് വകുപ്പിന്റെ നേതൃത്വത്തിൽ ആലപ്പുഴ മണ്ഡലത്തിൽ നിർമിക്കുന്ന അഞ്ച് തീരദേശ റോഡുകളുടെ നിർമാണോദ്ഘാടനം ഫിഷറീസ് സാംസ്കാരിക മന്ത്രി സജി ചെറിയാൻ ഓൺലൈനായി നിർവഹിച്ചു. മംഗലം യുവരശ്മി വായനശാലയ്ക്ക് സമീപം നടന്ന ചടങ്ങിൽ പി.പി. ചിത്തരഞ്ജൻ എം.എൽ.എ. അധ്യക്ഷത വഹിച്ചു. 

ആലപ്പുഴ ബീച്ചിൽ നടക്കുന്ന എൻറെ കേരളം പ്രദർശന വിപണനമേളയുമായി ബന്ധപ്പെട്ട് അച്ചടി- ദൃശ്യ മാധ്യമങ്ങളിൽ വരുന്ന മികച്ച റിപ്പോർട്ടുകൾക്കും ചിത്ര-ദൃശ്യങ്ങൾക്കും ജില്ലാ ഇൻഫർമേഷൻ ഓഫീസ് അവാർഡുകൾ നൽകാൻ തീരുമാനിച്ച വിവരം അറിഞ്ഞിരിക്കുമല്ലോ. ഏപ്രിൽ 23 
വരെ മേളയെക്കുറിച്ച് അച്ചടി-ദൃശ്യ മാധ്യമങ്ങളിൽ വരുന്ന തനതു വാർത്തകൾക്കാണ് അവാർഡ്.

 സംസ്ഥാന സർക്കാരിന്റെ രണ്ടാം വാർഷികത്തോടനുബന്ധിച്ച് ആലപ്പുഴ ബീച്ചിൽ നടക്കുന്ന എന്റെ
കേരളം പ്രദർശന വിപണന മേളയിൽ വാണിജ്യ വകുപ്പിൻറെ നേതൃത്വത്തിൽ ഇന്ന് (20) വൈകിട്ട് മൂന്നിന് ഓപ്പൺ ഫോറവും പ്രോജക്ട് റിപ്പോർട്ട് ക്യാമ്പും കൃഷിവകുപ്പ് മന്ത്രി പി പ്രസാദ് ഉദ്ഘാടനം ചെയ്യും. വ്യവസായ വകുപ്പിൻറെ ഡി.പി.ആർ ക്ലിനിക്കിലാണ് സംരംഭകർക്ക് കാര്യങ്ങൾ വിശദീകരിച്ച് നൽകുന്നതിനായി പ്രത്യേക പരിപാടി നടത്തുന്നത്. എല്ലാ മാധ്യമ സുഹൃത്തുക്കളെയും ക്ഷണിക്കുന്നു.

 കടലേ.... നീലക്കടലേ ... നിന്നാത്മാവിൽ നീറുന്ന ചിന്തകളുണ്ടോ ...സാഗരം സാക്ഷിയായി ഷഹബാസ് അമൻ പാടി. പെയ്തിറങ്ങിയ സംഗീത മഴയിൽ പുതുമഴ നനഞ്ഞ സുഖത്തിൽ ആലപ്പുഴയിലെ സംഗീത സ്നേഹികളുടെ മനവും മെയ്യും കുളിർത്തു. ഗുലാം അലിയിലൂടെയും മെഹ്ദി ഹസനിലൂടെയും ജഗ്‌ജീത് സിങിലൂടെയും എം.എസ്.ബാബുരാജിലൂടെയും സഞ്ചരിച്ച് ആ മഴയിൽ അവർ അലിഞ്ഞുചേർന്നു. സംസ്ഥാന സർക്കാരിന്റെ രണ്ടാം വാർഷികത്തിന്റെ ഭാഗമായി ആലപ്പുഴ ബീച്ചിൽ നടക്കുന്ന എന്റെ കേരളം പ്രദർശന- വിപണന മേളയുടെ മൂന്നാം ദിനമാണ് ഷഹബാസ് അമന്റെ ഗസൽ സംഗീത പരിപാടി അരങ്ങേറിയത്.

 കുട്ടികളുടെ  അവകാശങ്ങൾ സംരക്ഷിക്കാൻ കഴിയണമെന്ന് സംസ്ഥാന ബാലാവകാശ കമ്മീഷൻ അംഗം ജലജാചന്ദ്രൻ. ആലപ്പുഴ ബീച്ചിൽ നടക്കുന്ന എന്റെ കേരളം പ്രദർശന വിപണന മേളയോടനുബന്ധിച്ച് വനിതാ ശിശു വികസന വകുപ്പ് സംഘടിപ്പിച്ച കുട്ടികളുടെ അവകാശങ്ങളും ശിശു സംരക്ഷണ നിയമങ്ങളും വിഷയത്തിലെ സെമിനാർ ഉദ്ഘാടനം ചെയ്തു സംസാരിക്കുകയായിരുന്നു.