ഭൂമിയില്ലാത്ത, വീടില്ലാത്ത ആദിവാസി കുടുംബങ്ങള്‍ക്ക് മേല്‍വിലാസമുണ്ടാക്കുകയാണ് ലക്ഷ്യമെന്ന് ഒ.ആര്‍.കേളു എംഎല്‍എ പറഞ്ഞു. മൂഴിയാര്‍ സായിപ്പന്‍കുഴി ആദിവാസി കോളനി സന്ദര്‍ശിച്ച ശേഷം സംസാരിക്കുകയായിരുന്നു നിയമസഭയുടെ പട്ടികജാതി പട്ടികവര്‍ഗ ക്ഷേമം സംബന്ധിച്ചുള്ള സമിതിയുടെ ചെയര്‍മാന്‍.

ജില്ലാ ഭരണകൂടത്തിന്റെയും റിസർവ് ബാങ്കിന്റെയും നേതൃത്വത്തിൽ നബാർഡിന്റെ സാമ്പത്തിക സഹായത്തോടെ നടപ്പാക്കുന്ന ജൻ സുരക്ഷ-2023 പദ്ധതി  ജില്ലാ വികസന കമ്മീഷണർ ഡി ആർ മേഘശ്രീ ഉദ്ഘാടനം ചെയ്തു. ജില്ലയിലെ യോഗ്യരായ മുഴുവൻ ആളുകളെയും സാമൂഹ്യ സുരക്ഷാ പദ്ധതികളിൽ ചേർക്കുക എന്നതാണെന്ന് പദ്ധതിയുടെ ലക്ഷ്യം. രണ്ട് ലക്ഷം രൂപ വരെ ലഭിക്കുന്ന പിഎംഎസ്ബിവൈ, പിഎംജെജെബിവൈ എന്നിവയാണ് പദ്ധതിയിൽ ഉൾപ്പെടുത്തിയിരിക്കുന്നത്. പിഎംഎസ്ബിവൈക്ക് 20 രൂപയും പിഎംജെജെബിവൈക്ക് 436 രൂപയും ആണ് വാർഷിക വരിസംഖ്യ. ജൂൺ 30 വരെയാണ് പദ്ധതിയുടെ കാലാവധി.

കുടുംബശ്രീ കൂട്ടായ്മയില്‍ സ്ത്രീശക്തിയുടെ ദീര്‍ഘവീക്ഷണം നമുക്ക് കാണാന്‍ സാധിക്കുമെന്ന് ഡെപ്യൂട്ടി സ്പീക്കര്‍ ചിറ്റയം ഗോപകുമാര്‍ പറഞ്ഞു. ഈ കൂട്ടയ്മകള്‍ വിജയത്തിന്റെ പുതു അധ്യായങ്ങള്‍ രചിക്കുകയാണെന്നും അദ്ദേഹം പറഞ്ഞു. കൊടുമണ്‍ കിഴക്ക് ഗവണ്‍മെന്റ് എല്‍പി സ്‌കൂളില്‍ ഗ്രാമപഞ്ചായത്തിലെ പതിനൊന്നാം വാര്‍ഡിലെ കുടുംബശ്രീ വാര്‍ഷിക ആഘോഷം ഉദ്ഘാടനം ചെയ്ത് സംസാരിക്കുകയായിരുന്നു ഡെപ്യൂട്ടി സ്പീക്കര്‍.

ആലപ്പുഴ ബീച്ചിൽ നടക്കുന്ന എൻ്റെ കേരളം പ്രദർശന വിപണന മേളയിൽ കൈ നിറയെ സമ്മാന പദ്ധതികളുമായി കെ.എസ്.എഫ്.ഇ.യുടെ സ്റ്റാൾ. സ്റ്റാളിൽ എത്തി ചിട്ടിയിൽ ചേർന്ന് പണമടയ്ക്കുന്നവർക്ക് അപ്പോൾ തന്നെ ഒരു നോൾട്ട ഫ്ലാസ്ക്ക് സമ്മാനമായി ലഭിക്കും. 

പത്തനംതിട്ട ജില്ലയിലെ സീതത്തോട് പഞ്ചായത്തിലെ മൂഴിയാര്‍ പ്രദേശത്തെ 45 മലമ്പണ്ടാര വിഭാഗത്തില്‍പ്പെട്ട ആദിവാസി  കുടുംബങ്ങള്‍ക്ക് സ്വന്തമായി സ്ഥലം ലഭ്യമാക്കി വീട് നിര്‍മിച്ചു നല്‍കുന്നതിന് അടിയന്തര നടപടി സ്വീകരിക്കണമെന്ന്  നിയമസഭയുടെ പട്ടികജാതി പട്ടികവര്‍ഗ ക്ഷേമം സംബന്ധിച്ചുള്ള സമിതി ചെയര്‍മാന്‍ ഒ.ആര്‍. കേളു എംഎല്‍എ നിര്‍ദേശിച്ചു. പത്തനംതിട്ട ജില്ലയില്‍ നിന്നും ലഭിച്ചിട്ടുള്ള പരാതികളിന്മേല്‍ ബന്ധപ്പെട്ട ജില്ലാതല ഉദ്യോഗസ്ഥരില്‍ നിന്ന് തെളിവെടുപ്പ് നടത്തുന്നതിന് കളക്ടറേറ്റ് കോണ്‍ഫറന്‍സ് ഹാളില്‍ ചേര്‍ന്ന യോഗത്തില്‍ അധ്യക്ഷത വഹിച്ചു സംസാരിക്കുകയായിരുന്നു അദ്ദേഹം.

ആരോഗ്യ മേഖലകളിലെ പദ്ധതികള്‍ ഏറ്റവും മികച്ച രീതിയില്‍ നടപ്പാക്കിയ ഗ്രാമപഞ്ചായത്തുകള്‍ക്കുള്ള ജില്ലാതല ആര്‍ദ്രകേരളം പുരസ്‌കാരം 2021-22 രണ്ടാം സ്ഥാനം പത്തനംതിട്ട ജില്ലയിലെ വടശേരിക്കര ഗ്രാമപഞ്ചായത്തിന്  ലഭിച്ചു.  പ്രശംസാ പത്രവും മൂന്ന് ലക്ഷം രൂപയും ശില്‍പവും ഗ്രാമപഞ്ചായത്ത് പ്രതിനിധികള്‍ ഏറ്റുവാങ്ങി.

വെണ്ണിക്കുളം എം.വി.ജി.എം ഗവണ്‍മെന്റ് പോളിടെക്‌നിക് കോളജിന്റെ പുതിയ അക്കാഡമിക് ബ്ലോക്ക് ഉദ്ഘാടനം ഏപ്രില്‍ 25ന് ഉച്ചകഴിഞ്ഞ് രണ്ടിന് ഉന്നത വിദ്യാഭ്യാസ- സാമൂഹിക നീതി വകുപ്പ് മന്ത്രി ഡോ. ആര്‍. ബിന്ദു നിര്‍വഹിക്കും. കേരള സര്‍ക്കാരിന്റെ ഉന്നത വിദ്യാഭ്യാസ വകുപ്പ് - സാങ്കേതിക വിദ്യാഭ്യാസ ഡയറക്ടറേറ്റിന് കീഴിലാണ് കോളജ് പ്രവര്‍ത്തിക്കുന്നത്.

വേനല്‍ ചൂട്  വര്‍ധിച്ചു വരുന്ന സാഹചര്യത്തില്‍  പൊതുജനങ്ങള്‍ ജാഗ്രത പാലിക്കണമെന്ന് ജില്ലാ മെഡിക്കല്‍ ഓഫീസര്‍ (ആരോഗ്യം) ഡോ.എല്‍.അനിതകുമാരി അറിയിച്ചു. സൂര്യാഘാതവുമായി ബന്ധപ്പെട്ട ആരോഗ്യപ്രശ്നങ്ങള്‍  യഥാസമയം കണ്ടെത്തി ചികിത്സ ഉറപ്പാക്കണം. രാവിലെ 11 മുതല്‍ വൈകിട്ട് 3 വരെ നേരിട്ട് കൂടുതല്‍ സമയം സൂര്യപ്രകാശം ഏല്‍ക്കുന്നത്  ഒഴിവാക്കുക. പ്രായമായവര്‍, ചെറിയകുട്ടികള്‍, ഗര്‍ഭിണികള്‍, ഗുരുതര രോഗം ഉള്ളവര്‍, വെയിലത്ത് ജോലിചെയ്യുന്നവര്‍ എന്നിവര്‍ പ്രത്യേകം ശ്രദ്ധിക്കണമെന്നും ഡി.എം.ഒ  അറിയിച്ചു.