ഈഴുവത്തിരുത്തി പ്രാഥമികാരോഗ്യ കേന്ദ്രം കുടുംബാരോഗ്യ കേന്ദ്രമായി ഉയർത്തുന്നു. ഏപ്രിൽ 17ന് മുഖ്യമന്ത്രി പിണറായി വിജയൻ ഓൺലൈനായി കേന്ദ്രം ഉദ്ഘാടനം ചെയ്യും. സെന്റർ പരിസരത്ത് നടക്കുന്ന ചടങ്ങിൽ പി.നന്ദകുമാർ എം.എൽ.എ അധ്യക്ഷത വഹിക്കും. സംസ്ഥാന സർക്കാരിന്റെ 100 ദിന കർമ്മ പരിപാടികളുടെ ഭാഗമായാണ് പദ്ധതി നടപ്പാക്കിയത്. നിരവധി രോഗികൾ ആശ്രയിക്കുന്ന പൊന്നാനി ഈഴുവത്തിരുത്തി പ്രാഥമികാരോഗ്യ കേന്ദ്രത്തിലെ സേവനങ്ങൾ മെച്ചപ്പെടുത്തുന്നതിന്റെ കൂടി ഭാഗമായാണ് കുടുംബാരോഗ്യ കേന്ദ്രമായി ഉയർത്തുന്നത്. ഇതിന്റെ ഭാഗമായി ആശുപത്രിയിലെ നവീകരണ പ്രവൃത്തികൾ പൂർത്തിയായി.

മലപ്പുറം കത്തി മുതൽ അൾട്രാ മോഡൽ മെഷീൻ ഗൺ വരെ...ഇത് പഴയൊരു സിനിമ ഡയലോഗാണെങ്കിലും പിസ്റ്റൾ മുതൽ എ കെ 47 വരെ എന്നത് വെറും ഡയലോഗല്ല. എന്റെ കേരളം മെഗാ എക്‌സിബിഷനിൽ കണ്ണൂർ സിറ്റി പൊലീസ് ഒരുക്കിയ സ്റ്റാളിൽ എത്തിയാൽ ഇത് കാണാം.
എ കെ 47, താർ, ഇൻസാസ്, യു ബി ജി എൽ, ഇന്ത്യൻ നിർമ്മിത സ്‌നൈപ്പർ, മൾട്ടി ഷെൽ ലോഞ്ചർ, മെഷീൻ ഗൺ, പിസ്റ്റൾ തുടങ്ങിയ ആയുധങ്ങളും വിവിധ തരത്തിലുള്ള ഗ്രനേഡുകളും തോക്കിന്റെ തിരകളുമാണ് പ്രദർശനത്തിനുള്ളത്. ഏറ്റവും തിരക്കേറിയ സ്റ്റാളുകളിൽ ഒന്നാണിത്. ആയുധങ്ങൾ അടുത്തറിയാം എന്നതിനാലാണ് കൂടുതൽ പേരും ഇവിടെയെത്തുന്നത്.

സർക്കാർ സ്വയംഭരണസ്ഥാപനമായ കേരള മീഡിയ അക്കാദമിയുടെ തിരുവന്തപുരം സെന്ററിൽ അടുത്ത മാസം തുടങ്ങുന്ന വീഡിയോ എഡിറ്റിങ് സർട്ടിഫിക്കറ്റ് കോഴ്സിന് അപേക്ഷ ക്ഷണിച്ചു.  തിയറിയും പ്രാക്ടിക്കലും ഉൾപ്പെടെ ആറ് മാസമാണ് കോഴ്സിന്റെ കാലാവധി. 30 പേർക്കാണ് പ്രവേശനം. നൂതന സോഫ്റ്റ്വെയറുകളിൽ പരിശീലനം നൽകും. കോഴ്സിന്റെ ഭാഗമായി പ്രായോഗിക പരിശീലനവും നൽകും. സർക്കാർ അംഗീകാരമുള്ള കോഴ്സിന് 30,000 രൂപയാണ് ഫീസ്.  പട്ടികജാതി/പട്ടികവർഗ/ഒ.ഇ.സി വിദ്യാർഥികൾക്ക് അർഹമായ ആനുകൂല്യങ്ങൾ ലഭിക്കും.

സംസ്ഥാന സര്‍ക്കാറിന്റെ രണ്ടാം വാര്‍ഷികാഘോഷ പരിപാടിയുടെ ഭാഗമായി മെയ് 4 മുതല്‍ പൊന്നാനിയില്‍ നടത്തുന്ന പ്രദര്‍ശന- വിപണന മേളയുടെ പ്രചാരണ ബോര്‍ഡുകള്‍ സ്ഥാപിക്കുന്നതിന് പരിചയ സമ്പന്നരായ വ്യക്തികള്‍/ സ്ഥാപനങ്ങളില്‍ നിന്ന് ക്വട്ടേഷനുകള്‍ ക്ഷണിച്ചു. 2023 ഏപ്രില്‍ 18 ന് രാവിലെ 11.30 നകം മലപ്പുറം സിവില്‍ സ്റ്റേഷനിലെ ജില്ലാ ഇന്‍ഫര്‍മേഷന്‍ ഓഫീസില്‍ സമര്‍പ്പിക്കണം. അന്നേദിവസം ഉച്ചയ്ക്ക് 12 ന് തുറന്നു പരിശോധിക്കും. വിശദവിവരങ്ങള്‍ക്ക് ഫോണ്‍- 0483 2734387, diomlpm@gmail.com

പ്രീമിയം സ്വീകരിച്ച ശേഷം ലൈസൻസില്ലെന്ന കാരണത്താൽ ഇൻഷ്വൂറൻസ് നിഷേധിക്കാനാവില്ലെന്ന് ജില്ലാ ഉപഭോക്തൃ കമ്മീഷന്റെ വിധി. നിലമ്പൂർ അമരമ്പലം സ്വദേശി ഏലിയാമ്മ 'ഫ്യൂച്ചർ ജനറലി' ഇൻഷ്വൂറൻസ് കമ്പനിക്കെതിരെ സമർപ്പിച്ച ഹരജിയിലാണ് ജില്ലാ ഉപഭോക്തൃ കമ്മീഷന്റെ വിധി. 'ടവേര' കാറിന്റെ ഉടമയായിരുന്ന ഭർത്താവ് കുര്യൻ 2015 ഡിസംബർ 29ന് രാത്രി 12.15 മണിയോടെ ചോക്കാട് കല്ലാമൂലയിൽ വച്ചുണ്ടായ വാഹന അപകടത്തിൽ മരണപ്പെട്ടിരുന്നു. ഡ്രൈവിംഗ് ലൈസൻസുള്ള പേരമകനായിരുന്നു വാഹനമോടിച്ചിരുന്നത്. വാഹന ഉടമയ്ക്ക് പരിരക്ഷ നൽകുന്ന ഇൻഷ്വൂറൻസ് പോളിസിയുമുണ്ടായിരുന്നു.

ഇംഗ്ലീഷ്, ഹിന്ദി, അറബിക്, തമിഴ് തുടങ്ങിയ ബഹുമുഖ ഭാഷകളിൽ ഗിറ്റാറിൽ വിരലോടിച്ച് സാം ശിവ പാടി...റോക്കും പോപ്പും നിറഞ്ഞപ്പോൾ കണ്ണൂരും ഹാപ്പി. എന്റെ കേരളം മെഗാ എക്സിബിഷന്റെ ഭാഗമായാണ് സാം ശിവ ബാന്റ് മ്യൂസിക് ഷോ അവതരിപ്പിച്ചത്.

കുഴിപ്പുറം-ആട്ടീരി-കോട്ടക്കൽ റോഡിൽ പ്രവൃത്തി നടക്കുന്നതിനാൽ ഇന്ന് (ഏപ്രിൽ 13) മുതൽ പ്രവൃത്തി തീരുന്നത് വരെ ഗതാഗതം ഭാഗികമായി നിരോധിച്ചു. വാഹനങ്ങൾ കോട്ടക്കൽ-പറപ്പൂർ-വേങ്ങര, ഒതുക്കുങ്ങൽ-വേങ്ങര റോഡുകൾ വഴി തിരിഞ്ഞുപോകേണ്ടതാണെന്ന് എക്‌സിക്യുട്ടീവ് എൻജിനീയർ അറിയിച്ചു.