ആയഞ്ചേരി ഗ്രാമ പഞ്ചായത്തിൻ്റെ ആഭിമുഖ്യത്തിൽ 'വൃദ്ധർക്ക് കട്ടിൽ' പദ്ധതി പ്രകാരം പഞ്ചായത്തിലെ 80 പേർക്ക് കട്ടിൽ വിതരണം ചെയ്തു. 

2022-23 വാർഷിക പദ്ധതിയിൽ ഉൾപ്പെടുത്തി ഗ്രാമസഭയിൽ നിന്നും തെരഞ്ഞെടുക്കപ്പെട്ട ഗുണഭോക്താക്കൾക്കാണ് കട്ടിൽ വിതരണം നടത്തിയത്. 

പ്രസിഡൻ്റ് കാട്ടിൽ മൊയ്തു മാസ്റ്റർ ഉദ്ഘാടനം ചെയ്തു. അടുത്ത തവണ പുതുമയുള്ള പദ്ധതികൾ വയോജനങ്ങൾക്ക് വേണ്ടി തയ്യാറാക്കുമെന്ന് പ്രസിഡൻ്റ് പറഞ്ഞു. വൈസ് പ്രസിഡൻ്റ് സരള കൊള്ളിക്കാവിൽ അധ്യക്ഷയായി.

ജൈവ മാലിന്യം ഉറവിടത്തിൽ സംസ്കരിക്കാൻ വിപുലമായ പദ്ധതിയുമായി കോഴിക്കോട് കോർപ്പറേഷൻ

മാലിന്യ സംസ്ക്കരണം ഒരു സംസ്കാരമായി രൂപപ്പെടണമെന്നും പൗരബോധം അത്തരത്തിലേക്ക് ഉയരണമെന്നും തുറമുഖ പുരാവസ്തു വകുപ്പ് മന്ത്രി അഹമ്മദ് ദേവർ കോവിൽ. കോർപ്പറേഷൻ നടപ്പിലാക്കുന്ന അഴക് - ശുചിത്വ പ്രോട്ടോക്കോൾ പദ്ധതിയുടെ ഭാഗമായി വീടുകളിലെ ജൈവ മാലിന്യങ്ങൾ ഉറവിടത്തിൽ തന്നെ സംസ്ക്കരിക്കുന്നതിന് വിവിധ മാലിന്യ സംസ്ക്കരണ ഉപാധികൾ വിതരണം ചെയ്യുന്നതിന്റെ ഉദ്ഘാടനം നിർവഹിക്കുകയായിരുന്നു മന്ത്രി. മേയർ ഡോ. എം ബീന ഫിലിപ്പ് അധ്യക്ഷത വഹിച്ചു.

1991 ഏപ്രിൽ 18 ന് കോഴിക്കോട് മാനാഞ്ചിറ മൈതാനത്ത്  നടന്ന സമ്പൂർണ്ണ സാക്ഷരത പ്രഖ്യാപന വാർഷികത്തിന്റെ ഭാഗമായി 
കോഴിക്കോട് ജില്ലാ പഞ്ചായത്ത് പദ്ധതിയിൽ ഉൾപ്പെടുത്തി നവീകരിച്ച സമ്പൂർണ്ണ സാക്ഷരതാ പ്രഖ്യാപന സ്മാരക ഹാളിന്റെ
ഉദ്ഘാടനം നാളെ രാവിലെ 10 ന് ജില്ലാ പഞ്ചായത്ത് ഹാളിൽ നടക്കും. 

ഇ.കെ.നായനാർ സ്മാരക ലൈബ്രറിയുടെയും, ചേലക്കോടൻ ആയിഷുമ്മ സ്മാരക മ്യൂസിയത്തിന്റെയും നിയമസഹായ കേന്ദ്രത്തിന്റെയും ഉദ്ഘാടനവും ചടങ്ങിൽ നടക്കും.

ഫറോക്ക് പുതിയപാലം നവീകരണത്തിന്  1,68,50,000 രൂപയുടെ ഭരണാനുമതി  ലഭിച്ചതായി പൊതുമരാമത്ത് ടൂറിസം വകുപ്പ് മന്ത്രി പിഎ മുഹമ്മദ് റിയാസ് അറിയിച്ചു. പെയിന്റിംഗ് നടത്തി നവീകരിക്കുന്ന പാലത്തിന്റെ ഇരു ഭാഗത്തും കേബിൾ ഡറ്റോടുകൂടിയ ഫുട്‌പാത്തും നിർമ്മിക്കും. കൂടാതെ ആകർഷകങ്ങളായ ലൈറ്റുകളും കാൽനട യാത്രക്കാരുടെ സുരക്ഷ മുൻ നിർത്തി കൈവരികളും സ്ഥാപിക്കും.

10 മാസമാണ് നിർമ്മാണ കാലാവധി. നടപടികൾ പൂർത്തീകരിച്ച് എത്രയും വേഗം പ്രവൃത്തി ആരംഭിക്കാൻ നിർദ്ദേശം നൽകിയതായും മന്ത്രി അറിയിച്ചു.

മൂടാടി ഗ്രാമപഞ്ചായത്തിൽ 2022-23 ജനകീയാസൂത്രണ പദ്ധതിയുടെ ഭാഗമായി പട്ടിക ജാതി വിദ്യാർത്ഥികൾക്ക്‌ ലാപ്ടോപ് വിതരണം ചെയ്തു. മൂടാടി ഗ്രാമപഞ്ചായത്ത്‌ പ്രസിഡൻ്റ് സി.കെ. ശ്രീകുമാർ വിതരണോദ്‌ഘാടനം നിർവഹിച്ചു. 5.5 ലക്ഷം രൂപയുടെ 18 ലാപ്ടോപ്പുകളാണ് വിതരണം ചെയ്തത്.

ക്ഷേമകാര്യ സ്റ്റാൻ്റിംഗ് കമ്മിറ്റി ചെയർ പേഴ്സൺ എം.പി. അഖില അധ്യക്ഷത വഹിച്ച ചടങ്ങിൽ സ്ഥിരം സമിതി അധ്യക്ഷന്മാരായ ടി.കെ. ഭാസ്കരൻ, എം.കെ. മോഹനൻ, മെമ്പർമാരായ റഫീഖ് പുത്തലത് ലതിക പുതുക്കുടി രവീന്ദ്രൻ വി.കെ, പഞ്ചായത്ത്‌ സെക്രട്ടറി എം.ഗിരീഷ് എന്നിവർ സംസാരിച്ചു.

സംസ്ഥാന മന്ത്രിസഭയുടെ രണ്ടാം വാർഷികാഘോഷ പരിപാടികളുടെ ഭാഗമായി മെയ് 12 മുതൽ 18 വരെ ജില്ലയിൽ നടക്കുന്ന എന്റെ കേരളം പ്രദർശന വിപണന മേളയുടെ പ്രചരണാർത്ഥം കോഴിക്കോട് ബീച്ചിൽ 
ഒരുക്കിയ മണൽ ശിൽപ്പം നാളെ (ഏപ്രിൽ 18) രാവിലെ 11മണിക്ക് പൊതുമരാമത്ത് ടൂറിസം വകുപ്പ് മന്ത്രി പി.എ മുഹമ്മദ് റിയാസ് അനാഛാദനം ചെയ്യും. 

പബ്ലിസിറ്റി കമ്മിറ്റിയുടെ ആഭിമുഖ്യത്തിൽ ബേപ്പൂർ ഉരു മോഡലാണ് മണൽശില്പമായി നിർമ്മിക്കുന്നത്. ചടങ്ങിൽ എംഎൽഎമാർ, ജനപ്രതിനിധികൾ, രാഷ്ട്രീയപാർട്ടി പ്രതിനിധികൾ, ഉദ്യോഗസ്ഥർ തുടങ്ങിയവർ പങ്കെടുക്കും.

മഹാത്മഗാന്ധി ദേശീയ ഗ്രാമീണ തൊഴിലുറപ്പ് പദ്ധതിയിൽ ജില്ലയിൽ തൊഴിൽദിന പുരോഗതിയിൽ വില്ല്യാപ്പള്ളി ഗ്രാമപഞ്ചായത്തിന് ഒന്നാം സ്ഥാനം. നിശ്ചയിച്ചതിലുമധികം തൊഴിൽ ദിനങ്ങൾ നേടിയാണ് വില്ല്യാപ്പള്ളി ഗ്രാമപഞ്ചായത്ത് നേട്ടം കരസ്ഥമാക്കിയത്. കൂടാതെ 856 കുടുംബങ്ങൾക്ക് 100 തൊഴിൽ ദിനങ്ങൾ നൽകാനും കഴിഞ്ഞു.

ലൈഫ് ഭവനപദ്ധതിയിൽ സർക്കാർ ഇത് വരെ മൂന്ന് ലക്ഷത്തിലധികം വീടുകൾ നിർമിച്ചു നൽകിയതായി പൊതുമരാമത്ത് ടൂറിസം വകുപ്പ് മന്ത്രി പി.എ മുഹമ്മദ് റിയാസ്. കോർപ്പറേഷന്റെ ആഭിമുഖ്യത്തിൽ നടപ്പാക്കുന്ന ഭൂരഹിത -ഭവനരഹിതർക്കുള്ള പാർപ്പിട പദ്ധതിയുടെ ആലോചന യോഗം ഉദ്ഘാടനം ചെയ്ത് സംസാരിക്കുകയായിരുന്നു മന്ത്രി. 
മനുഷ്യനെ സംബന്ധിച്ച് ഏറ്റവും വലിയ സ്വപ്നമാണ് സ്വന്തമായി ഒരു വീട് എന്നത്. പലർക്കും പല സാഹചര്യങ്ങളാൽ ചിലപ്പോൾ അത് സാധിച്ചു എന്ന് വരില്ല. ഈ സ്വപ്നം പൂർത്തീകരിക്കാൻ മുന്നോട്ടുവന്ന കോർപ്പറേഷന്റെ പ്രവൃത്തി അഭിനന്ദനാർഹമാണെന്ന് മന്ത്രി പറഞ്ഞു. 

സ്വാ​ഗത സംഘം രൂപികരിച്ചു

പേരാമ്പ്ര ബെെപാസ് ഏപ്രിൽ 30 ന് മുഖ്യമന്ത്രി പിണറായി വിജയൻ ഉദ്ഘാടനം ചെയ്യും. ഉദ്ഘാടനത്തോടനുബന്ധിച്ച് സ്വാ​ഗത സംഘം രൂപീകരിച്ചു. സ്വാ​ഗത സംഘം രൂപീകരണ യോ​ഗം ടി.പി രാമകൃഷ്ണൻ എം.എൽ.എ ഉദ്ഘാടനം ചെയ്തു. 

റീബിൽഡ് കേരള ഇനിഷ്യേറ്റീവ് പദ്ധതിയിൽ ഉൾപ്പെടുത്തി നിർമ്മിച്ച മുക്കം നഗരസഭയിലെ കുറ്റിപ്പാല - ചേന്ദമംഗല്ലൂർ റോഡിന്റെ ഉദ്ഘാടനം നാളെ (ഏപ്രിൽ 18) നടക്കും. തദ്ദേശ സ്വയം ഭരണ വകുപ്പ് മന്ത്രി എം.ബി. രാജേഷ് ഓൺലൈനായി ഉദ്ഘാടനം നിർവഹിക്കും. ലിന്റോ ജോസഫ് എം. എൽ.എ അധ്യക്ഷത വഹിക്കും. മുൻ എംഎൽഎ ജോർജ് എം തോമസ് മുഖ്യാതിഥിയാകും. മുക്കം നഗരസഭ ചെയർമാൻ പി ടി ബാബു ചടങ്ങിന് സ്വാഗതം പറയും.
 
2.88 കോടി രൂപ ചെലവഴിച്ചാണ് റോഡിന്റെ പ്രവൃത്തി പൂർത്തീകരിച്ചത്.