നവകേരളം കര്‍മ്മ പദ്ധതിയുടെ ഭാഗമായി  ഹരിതകേരളം മിഷന്റെയും  ആര്‍ദ്രം മിഷന്റെയും  സംയുക്താഭിമുഖ്യത്തില്‍ നടത്തുന്ന ഹരിതം ആരോഗ്യം പദ്ധതിക്ക് ജില്ലയില്‍ തുടക്കമായി. കോട്ടത്തറ ആനേരി കമ്മ്യൂണിറ്റി ഹാളില്‍ ജില്ലാ പഞ്ചായത്ത് പ്രസിഡന്റ് സംഷാദ് മരക്കാര്‍ ജില്ലാതല ഉദ്ഘാടനം നിര്‍വ്വഹിച്ചു. കോട്ടത്തറ ഗ്രാമപഞ്ചായത്ത് പ്രസിഡന്റ് പി.പി രനീഷ് അധ്യക്ഷത വഹിച്ചു. കണിയാമ്പറ്റ ഗ്രാമപഞ്ചായത്ത് പ്രസിഡന്റ് കമല രാമന്‍ മുഖ്യാതിഥിയായി.

വേളം ഗ്രാമപഞ്ചായത്തിൽ കുടിവെള്ള വിതരണം ആരംഭിച്ചു. കുടിവെള്ള ക്ഷാമം നേരിടുന്ന വേളം പഞ്ചായത്തിലെ ഞള്ളേരിക്കുന്ന്, തുവ്വമല, കോയുറക്കുന്ന്, പാലോടിക്കുന്ന്, പുതുശ്ശേരി കോളനി, മണിമല, കൂളിക്കുന്ന് തുടങ്ങിയ സ്ഥലങ്ങളിലാണ് കുടിവെള്ള വിതരണം ആരംഭിച്ചത്. ഒന്നാം വാർഡിലെ പരാണ്ടി കനാൽ ഭാഗത്ത് പഞ്ചായത്ത് പ്രസിഡന്റ് നയീമ കുളമുള്ളതിൽ കുടിവെള്ള വിതരണം ഉദ്ഘാടനം ചെയ്തു.
 
ഗ്രാമപഞ്ചായത്ത് അംഗങ്ങളായ പി.സൂപ്പി മാസ്റ്റർ, വി.പി സുധാകരൻ, കെ.കെ ഷൈനി തുടങ്ങിയവർ പങ്കെടുത്തു.

പെരുവണ്ണാമൂഴി ടൂറിസം ഫെസ്റ്റിന്റെ ഭാ​ഗമായി ചക്കിട്ടപാറ ഗ്രാമപഞ്ചായത്തിലെ കുടുംബങ്ങൾക്ക് വേണ്ടി തയ്യാറാക്കിയ ഫാമിലി പാസ് വിതരണം ചെയ്തു. പാസിന്റെ പഞ്ചായത്ത്തല വിതരണോദ്ഘാടനം ഗ്രാമപഞ്ചായത്ത് പ്രസിഡൻ്റ് കെ.സുനിൽ നിർവഹിച്ചു. എ.ഡി.എസ് സെക്രട്ടറി സതി ബാബു പ്രസിഡന്റിൽ നിന്നും പാസ് ഏറ്റുവാങ്ങി. 

പനങ്ങാട് ഗ്രാമപഞ്ചായത്ത് ശുചിത്വ സന്ദേശ വാഹന പ്രചരണ ജാഥ സംഘടിപ്പിച്ചു. വൃത്തിയുള്ള വീടും പരിസരവും നാടിന്റെ സമ്പത്ത്, ഖരമാലിന്യ പരിപാലനം ജീവിതചര്യയാവട്ടെ എന്ന മുദ്രാവാക്യം ഉയർത്തിപ്പിടിച്ചാണ് പരിപാടി സംഘടിപ്പിച്ചത്. വർധിച്ച് വരുന്ന ഖരമാലിന്യ വിപത്തിനെ കുറിച്ചും, പരിസര ശുചിത്വത്തിന്റെ പ്രാധാന്യത്തെ കുറിച്ചും പൊതുസമൂഹത്തെ ബോധവൽക്കരിക്കലായിരുന്നു ജാഥയുടെ ലക്ഷ്യം.

മാനന്തവാടി ബ്ലോക്ക് പഞ്ചായത്തിൽ 2023 - 24 വാർഷിക പദ്ധതിയിലുൾപ്പെട്ട വിവിധ പ്രോജക്ടുകളിലേക്ക് ട്രാവലർ (7 സീറ്റ് ), 4 മോട്ടോർ ക്യാബുകൾ എന്നിവ മാസ വാടകയ്ക്ക് ലഭ്യമാക്കുന്നതിന് ക്വട്ടേഷൻ ക്ഷണിച്ചു. ക്വട്ടേഷൻ ഏപ്രിൽ 11 ന് വൈകീട്ട് 5 നകം ലഭിക്കണം. ഫോൺ: 04935 240298.

സംസ്ഥാന പിന്നാക്ക വിഭാഗ വികസന വകുപ്പിന്റെ സഹകരണത്തോടെ എച്ച്.സി. എൽ ടെക്നോളജീസ് പ്ലസ് ടു പാസ്സായ ഐ.ടി മേഖലയിൽ തൊഴിൽ പ്രവേശനം ആഗ്രഹിക്കുന്ന വിദ്യാർത്ഥികൾക്കായി 'ടെക്. ബി' ഏകദിന ശില്പശാല സംഘടിപ്പിക്കുന്നു. തൊഴിലധിഷ്ഠിത പരിപാടിയായ ടെക്.ബി പ്രോഗ്രാമിനെക്കുറിച്ച് അവബോധം നൽകുന്നതിനായി നടത്തുന്ന ശിൽപശാല ഏപ്രിൽ 11 ന് രാവിലെ 10 ന് കോഴിക്കോട് നടക്കാവ് ഗവ. വൊക്കേഷണൽ ഹയർ സെക്കണ്ടറി (ഗേൾസ്) സ്കൂളിൽ നടക്കും. പ്ലസ്ടുവിന് മാത്തമാറ്റിക്സ് വിഷയമായി പഠിച്ച വിദ്യാർഥികൾക്ക് പങ്കെടുക്കാം. ഫോൺ: 0495 2377786.

മഴക്കാല പൂർവ്വ ശുചീകരണ പ്രവർത്തനങ്ങളുടെ ഭാഗമായി സംസ്ഥാന ശുചിത്വ മിഷന്റെ നേതൃത്വത്തിൽ ഒരു മാസം നീണ്ടു നിൽക്കുന്ന “മഴയെത്തും മുമ്പേ മനുഷ്യ ഡ്രോണുകൾ ”എന്ന പേരിൽ സോഷ്യൽ മീഡിയ ജനകീയ ഓഡിറ്റ് സംഘടിപ്പിക്കുന്നു. ജനകീയ ഓഡിറ്റിന്റെ ഭാഗമായി ജില്ലയിലെ പ്രവർത്തനങ്ങൾക്കായി വയനാട് ജില്ലാ “മഴയെത്തും മുൻപേ മനുഷ്യ ഡ്രോണുകൾ ”ഫേസ് ബുക്ക്‌ ഗ്രൂപ്പ്‌ രൂപീകരിച്ചു.

പനമരം ബ്ലോക്ക് പഞ്ചായത്ത് നടപ്പിലാക്കുന്ന സഞ്ചരിക്കുന്ന മൃഗാശുപത്രി സേവനം ഏപ്രിൽ 10 മുതൽ 15 വരെ പുൽപ്പള്ളി ഗ്രാമപഞ്ചായത്തിലെ ക്ഷീര കർഷകർക്ക് ലഭ്യമാകും. പ്രവൃത്തി സമയം രാവിലെ 10 മുതൽ വൈകീട്ട് 5 വരെ. സേവനം ആവശ്യമുള്ള കർഷകർ ക്ഷീരസംഘങ്ങൾ മുഖേനെയോ നേരിട്ടോ ഡ്യൂട്ടി ഡോക്ടറുമായി ബന്ധപ്പെടണം. ഫോൺ: 9074583866.