സ്വച്ഛ് ഭാരത് മിഷന്‍ ഗ്രാമീണ്‍ പ്രവര്‍ത്തനങ്ങളിലെ മികച്ച പ്രകടനത്തിനുളള ദേശീയ അവാര്‍ഡ് നേട്ടത്തില്‍ വയനാട് ജില്ല. സംസ്ഥാനതലത്തില്‍ നടത്തിയ വിവിധ പ്രവര്‍ത്തനങ്ങളിലും 4+1 എന്ന വിവര വിജ്ഞാന പരിപാടിയിലും പ്രാദേശിക ശുചിത്വം ഉറപ്പുവരുത്തുന്നതിനായുളള മാനദണ്ഡങ്ങള്‍ കൈവരിച്ചതുമാണ് ജില്ലയെ  പുരസ്‌കാരത്തിന് അര്‍ഹമാക്കിയത്. തദ്ദേശ ഭരണ സ്ഥാപനങ്ങളുടെ സഹകരണത്തോടെ വ്യക്തിഗത ശൗചാലയങ്ങളും അനുബന്ധ വിവര വിജ്ഞാന പ്രവര്‍ത്തനങ്ങള്‍ സംഘടിപ്പിക്കുന്നതില്‍  മികവ് പുലര്‍ത്തിയതും ജില്ലയ്ക്ക് നേട്ടമായി. ദേശീയ പുരസ്‌ക്കാരം ലോക ടോയ്‌ലറ്റ് ദിനമായ നവംബര്‍ 19 ന് ജില്ലാ കലക്ടര്‍ ഏറ്റുവാങ്ങും.

തദ്ദേശ സ്വയംഭരണ തെരഞ്ഞെടുപ്പിന് ഉപയോഗിക്കുന്നതിനുള്ള ഫസ്റ്റ് ലെവല്‍ ചെക്കിങ് പൂര്‍ത്തീകരിച്ച മള്‍ട്ടി പോസ്റ്റ്, സിംഗിള്‍ പോസ്റ്റ് വോട്ടിങ് മെഷീനുകളില്‍ മോക്ക് പോള്‍ നടത്തി. സിവില്‍ സ്റ്റേഷനിലെ വോട്ടിങ് മെഷീന്‍ സൂക്ഷിച്ചിരിക്കുന്ന വെയര്‍ ഹൗസിലാണ് മോക്ക് പോള്‍ നടത്തിയത്. ഇ.സി.ഐ.എല്‍ എഞ്ചിനീയര്‍മാര്‍ പരിശോധിച്ചതിനു ശേഷമാണ് മോക്‌പോള്‍ നടത്തിയത്. ആകെയുള്ള കണ്‍ട്രോള്‍, ബാലറ്റ് യൂനിറ്റുകളുടെ ഒരു ശതമാനം മെഷീനുകളിലാണ് മോക്ക് പോള്‍ നടന്നത്. രാഷ്ട്രീയ പാര്‍ട്ടി പ്രതിനിധികള്‍, ഇലക്ഷന്‍ ഡെപ്യൂട്ടി കലക്ടര്‍, ഉദ്യോഗസ്ഥര്‍ തുടങ്ങിയവരുടെ സാന്നിധ്യത്തിലാണ് മോക്ക് പോള്‍ സംഘടിപ്പിച്ചത്.

തദ്ദേശ സ്വയംഭരണ സ്ഥാപനങ്ങളിലേക്കുള്ള തെരഞ്ഞടുപ്പിൽ തിരുവനന്തപുരം ജില്ലയിൽ ഇന്നലെ (16 നവംബർ) മാത്രം ലഭിച്ചത് 2682 നാമനിർദേശ പത്രികകൾ. 

വിവിധ ഗ്രാമ പഞ്ചായത്ത് വാർഡുകളിലായി 2060 പേർ നാമനിർദേശ പത്രിക സമർപ്പിച്ചു. ബ്ലോക്ക് പഞ്ചായത്ത് വാർഡുകളിലേക്ക് 177 പേരും ജില്ലാ പഞ്ചായത്ത് വാർഡുകളിലേക്ക് 41 പേരും പത്രിക നൽകി.

തിരുവനന്തപുരം കോർപ്പറേഷനിലെ വിവിധ ഡിവിഷനുകളിലായി 156 പേർ പത്രിക നൽകി. മുനിസിപ്പാലിറ്റികളിൽ 248 പേരും പത്രിക സമർപ്പിച്ചു.

ഉയർന്ന തിരമാലകൾ ഉണ്ടാകാൻ സാധ്യതയുള്ളതിനാൽ ഇന്നും നാളെയും (നവംബർ 16, 17) കേരള തീരത്തുനിന്നു കടലിൽ മത്സ്യബന്ധനത്തിനു പോകരുതെന്ന് സ്റ്റേറ്റ് എമർജൻസി ഓപ്പറേഷൻസ് സെന്ററിൽനിന്ന് അറിയിച്ചു.

തിരുവനന്തപുരത്ത് ഇന്ന് (16 നവംബർ 2020) 204 പേർക്കു കൂടി കോവിഡ് 19 സ്ഥിരീകരിച്ചു. 310 പേർ രോഗമുക്തരായി. നിലവിൽ 

6,229 പേരാണു രോഗം സ്ഥിരീകരിച്ചു ചികിത്സയിൽ കഴിയുന്നത്. ജില്ലയിൽ അഞ്ചു പേരുടെ മരണം കോവിഡ് മൂലമാണെന്നു സ്ഥിരീകരിച്ചു.

വർക്കല സ്വദേശി മഹേഷ് (39), കുളത്തുമ്മൽ സ്വദേശി ഐ. നിസാൻ (84), ചിറയിൻകീഴ് സ്വദേശി രാജൻ പിള്ള (60), ചുള്ളിമാനൂർ സ്വദേശി അപ്പു (82), മടവൂർ സ്വദേശിനി ഷീജ (50) എന്നിവരുടെ മരണമാണു കോവിഡ് മൂലമാണെന്നു സ്ഥിരീകരിച്ചത്. 

ഇന്നു രോഗം സ്ഥിരീകരിച്ചവരിൽ 164 പേർക്കു സമ്പർക്കത്തിലൂടെയാണു രോഗബാധയുണ്ടായത്. ഇതിൽ ആറു പേർ ആരോഗ്യ പ്രവർത്തകരാണ്.

തദ്ദേശ സ്വയംഭരണ സ്ഥാപനങ്ങളിലേയ്ക്കുള്ള പൊതു തിരഞ്ഞെടുപ്പ് നീതിപൂർവ്വവും നിഷ്പക്ഷവുമായി നടത്തുന്നതിന് നിരീക്ഷകരെ നിയമിച്ചുകൊണ്ട് ഉത്തരവായതായി സംസ്ഥാന തിരഞ്ഞെടുപ്പ് കമ്മീഷണർ വി.ഭാസ്‌കരൻ അറിയിച്ചു. നിരീക്ഷകരുടെ പേര്, സ്ഥാനപേര്, നിയമിച്ച ജില്ല എന്നീ ക്രമത്തിൽ പട്ടിക താഴെ കൊടുത്തിരിക്കുന്നു.
ആർ.ഗിരിജ (ഡയറക്ടർ, സർവ്വേ ആന്റ് ലാൻഡ് റെക്കോർഡ്സ് ഡിപ്പാർട്ട്മെന്റ്)- തിരുവനന്തപുരം,
വീണ.എൻ.മാധവൻ (അഡീഷണൽ സെക്രട്ടറി, ഹയർ എഡ്യൂക്കേഷൻ ഡിപ്പാർട്ട്മെന്റ്)-കൊല്ലം.
വി.രതീശൻ (എക്സിക്യൂട്ടീവ് ഓഫീസർ, ശ്രീ പത്മനാഭസ്വാമി ക്ഷേത്രം) -പത്തനംതിട്ട

തദ്ദേശസ്വയംഭരണ സ്ഥാപനങ്ങളിലേക്ക് മത്സരിക്കുന്നതിനുള്ള സ്ഥാനാർത്ഥികളുടെ യോഗ്യതകളും അയോഗ്യതകളും  കേരള പഞ്ചായത്ത് രാജ് ആക്ടിലെ 29 മുതൽ 34 വരെയുള്ള വകുപ്പുകളിലും കേരള മുനിസിപ്പാലിറ്റി ആക്ടിലെ 85 മുതൽ 90 വരെയുള്ള വകുപ്പുകളിലും നിഷ്‌കർഷിച്ചിട്ടുണ്ട്. അവ സംബന്ധിച്ച നിയമങ്ങളും ചട്ടങ്ങളും പരിശോധിച്ച് വേണം വരണാധികാരികൾ സ്ഥാനാർത്ഥികളുടെ യോഗ്യതകളും അയോഗ്യതകളും നിശ്ചയിക്കേണ്ടത് എന്ന് സംസ്ഥാന തിരഞ്ഞെടുപ്പ് കമ്മീഷണർ വി.ഭാസ്‌കരൻ അറിയിച്ചു.  

തദ്ദേശഭരണ പൊതുതിരഞ്ഞെടുപ്പുമായി ബന്ധപ്പെട്ട് രാഷ്ട്രീയ കക്ഷികളും സ്ഥാനാർത്ഥികളും നടത്തുന്ന തിരഞ്ഞെടുപ്പ് പ്രചാരണ പരിപാടികൾ നിയമാനുസൃതമാണോ  എന്ന് പരിശോധിക്കുന്നതിനായി ആന്റി ഡീഫെയ്‌സ്‌മെന്റ് സ്‌ക്വാഡ് രൂപീകരിക്കുവാൻ തിരഞ്ഞെടുപ്പ് കമ്മീഷൻ ജില്ലാ കളക്ടർമാർക്ക് നിർദ്ദേശം നൽകി. ജില്ലാ തലത്തിൽ, വരണാധികാരിയല്ലാത്ത അസിസ്റ്റന്റ് കളക്ടറുടേയോ സബ് കളക്ടറുടേയോ ഡെപ്യൂട്ടി കളക്ടറുടേയോ നേതൃത്വത്തിലുള്ള ഒരു സ്‌ക്വാഡും താലൂക്ക് തലത്തിൽ തഹസിൽദാർ/ഗസറ്റഡ് റാങ്കിലുള്ള ഒരു ഉദ്യോഗസ്ഥന്റെ നേതൃത്വ്ത്തിൽ സ്‌ക്വാഡും രൂപീകരിക്കണം.

    തദ്ദേശ പൊതു തെരഞ്ഞെടുപ്പിൽ മത്സരിക്കുന്ന രാഷ്ട്രീയകക്ഷികളും സ്ഥാനാർത്ഥികളും അച്ചടിശാല ഉടമസ്ഥരും തിരഞ്ഞെടുപ്പിന്റെ ആവശ്യത്തിലേക്കായി അച്ചടിക്കുന്ന ലഘുലേഖകൾ, പോസ്റ്ററുകൾ തുടങ്ങിയവയിൽ അച്ചടിക്കുന്ന ആളിന്റെയും പ്രസാധകന്റെയും പേരും മേൽവിലാസവും ഉണ്ടായിരിക്കണമെന്ന പഞ്ചായത്ത് രാജ്/ മുനിസിപ്പൽ അക്ടിലെ വ്യവസ്ഥകൾ കർശനമായി പാലിക്കണമെന്ന്  സംസ്ഥാന തിരഞ്ഞെടുപ്പ് കമ്മീഷണർ വി.ഭാസ്‌കരൻ അറിയിച്ചു.