ലോക്‌സഭ തെരഞ്ഞെടുപ്പിന്റെ വോട്ടെടുപ്പില്‍ കണ്ണൂര്‍ ജില്ലയിലെ ചില ബൂത്തുകളില്‍ കള്ളവോട്ട് നടന്നുവെന്ന ആരോപണം സംബന്ധിച്ച് വീഡിയോ ദൃശ്യങ്ങള്‍ പരിശോധിച്ചതിന്റെ അടിസ്ഥാനത്തിലുള്ള പ്രാഥമിക റിപ്പോര്‍ട്ട് ചീഫ് ഇലക്ടറല്‍ ഓഫീസര്‍ക്ക് സമര്‍പ്പിച്ചതായി ജില്ലാ തെരഞ്ഞെടുപ്പ് ഓഫീസര്‍ കൂടിയായ ജില്ലാ കലക്ടര്‍ മീര്‍ മുഹമ്മദലി അറിയിച്ചു. തുടര്‍ നടപടികള്‍ ചീഫ് ഇലക്ടറല്‍ ഓഫീസറുടെ നിര്‍ദേശപ്രകാരം കൈക്കൊള്ളുന്നതാണെന്നും കലക്ടര്‍ അറിയിച്ചു.

സാങ്കേതിക പരീക്ഷാ കൺട്രോളർ നടത്തുന്ന 2019 ഏപ്രിൽ മാസത്തെ ഡിപ്ലോമ പരീക്ഷയുടെ മേയ് 13ന് നടത്താൻ നിശ്ചയിച്ചിരുന്ന പരീക്ഷ മേയ് 16ന് നടത്തുമെന്ന് പരീക്ഷാ കൺട്രോളർ അറിയിച്ചു.

പി.എൻ.എക്സ്. 1202/19

കേരളത്തിലെ തൊഴിലെടുക്കുന്ന മുഴുവൻ ജനവിഭാഗങ്ങൾക്കും മുഖ്യമന്ത്രി പിണറായി വിജയൻ മെയ്ദിനാശംസ നേർന്നു. തങ്ങളുടെ ജീവനോപാധി സംരക്ഷിക്കാനും നവലിബറൽ നയങ്ങളുടെ ആക്രമണങ്ങളെ ചെറുക്കാനും തൊഴിലാളികളും കർഷകരും നടത്തുന്ന പോരാട്ടത്തോട് മുഖ്യമന്ത്രി ഐക്യദാർഢ്യം പ്രകടിപ്പിച്ചു. 

മാന്യമായി തൊഴിലെടുത്ത് ജീവിക്കാനുള്ള സമരങ്ങളോടൊപ്പം മതത്തിന്റെയും ജാതിയുടെയും പേരിൽ ജനങ്ങളെ ഭിന്നിപ്പിക്കുന്ന വർഗീയതക്കെതിരായ പോരാട്ടവും തൊഴിലാളികൾ ശക്തിയായി മുമ്പോട്ടുകൊണ്ടുപോകണമെന്ന് മുഖ്യമന്ത്രി പറഞ്ഞു. 

പി.എൻ.എക്സ്. 1200/19

നെല്ല് ഉൽപാദനം ഗണ്യമായി വർധിച്ച സാഹചര്യത്തിലുള്ള സംഭരണപ്രശ്‌നങ്ങൾ ഫലപ്രദമായി കൈകാര്യം ചെയ്യാൻ മുഖ്യമന്ത്രി പിണറായി വിജയന്റെ അധ്യക്ഷതയിൽ ചേർന്ന ഉന്നതതല യോഗം തീരുമാനിച്ചു.

റെക്കോഡ് വിളവാണ് ഈ വർഷം ലഭിച്ചത്. ഒരു ലക്ഷം ടൺ കൂടി ഇനി കൃഷിക്കാരിൽ നിന്ന് സംഭരിക്കാനുണ്ട്. വേനൽ മഴ വരുന്നതിനു മുമ്പ് മുഴുവൻ നെല്ലും സംഭരിക്കുന്നതിന് കൂടുതൽ ഗോഡൗണുകൾ ഏർപ്പെടുത്തും. നെല്ല് സംഭരണവും സംസ്‌കരണവും സുഗമമായി നടത്തുന്നതിന് മില്ലുടമകളുടെയും കർഷകരുടെയും പ്രതിനിധികളുമായും ഭക്ഷ്യ-സിവിൽ സപ്ലൈസ് മന്ത്രി ചർച്ച നടത്തും.

സംസ്ഥാന കർഷക കടാശ്വാസ കമ്മീഷൻ വയനാട് സുൽത്താൻ ബത്തേരി സർക്കാർ അതിഥി മന്ദിരത്തിൽ  മെയ് 22 ന് നടത്താൻ നിശ്ചയിച്ചിരുന്ന സിറ്റിംഗ് സാങ്കേതിക കാരണങ്ങളാൽ മാറ്റിവെച്ചു. 

പി.എൻ.എക്സ്. 1198/19

സംസ്ഥാന സഹകരണ യൂണിയന്റെ ആഭിമുഖ്യത്തിൽ ജൂണിൽ ആരംഭിക്കുന്ന ജെ.ഡി.സി കോഴ്‌സിന്റെ പ്രവേശനത്തിന് അപേക്ഷ സമർപ്പിച്ച ജനറൽ/സഹകരണ സംഘം ജീവനക്കാരുടെ പ്രാഥമിക ലിസ്റ്റ് അതത് സഹകരണ പരിശീലന കേന്ദ്രം/കോളേജ്, സംസ്ഥാന സഹകരണ യൂണിയൻ ഹെഡ് ഓഫീസ് എന്നിവിടങ്ങളിൽ പ്രസിദ്ധീകരിച്ചിട്ടുണ്ട്. ഇതിൽ  പരാതിയുള്ള ജനറൽ വിഭാഗക്കാർ അതത് സഹകരണ പരിശീലന കേന്ദ്രം/കോളേജ് പ്രിൻസിപ്പൽമാർക്കും, സഹകരണ സംഘം ജീവനക്കാരുടെ വിഭാഗത്തിലുള്ളവർ അഡീഷണൽ രജിസ്ട്രാർ-സെക്രട്ടറി, സംസ്ഥാന സഹകരണ യൂണിയൻ, കേരള, സഹകരണ ഭവൻ, ഊറ്റുകുഴി, തിരുവനന്തപുരം-695001 എന്ന വിലാസത്തിലും മേയ് എട്ടിന് വൈകിട്ട് നാലിനു മുമ്പ് രേഖാമൂലം നൽകണം.

സംസ്ഥാനത്തെ എല്ലാ സർക്കാർ/എയ്ഡഡ്/അംഗീകൃത അൺ എയ്ഡഡ്, സി.ബി.എസ്.ഇ, ഐ.സി.എസ്.ഇ സ്‌കൂളുകളിൽ ഒന്ന് മുതൽ പത്ത് വരെ ക്ലാസുകളിൽ പഠിക്കുന്ന ഒ.ഇ.സി വിഭാഗം വിദ്യാർത്ഥികൾക്കുള്ള വിദ്യാഭ്യാസാനുകൂല്യം നടപ്പു വർഷം മുതൽ വിദ്യാർത്ഥികളുടെ ബാങ്ക് അക്കൗണ്ടുകളിലേക്ക് നേരിട്ട് നൽകും. ഒ.ഇ.സി വിദ്യാഭ്യാസാനുകൂല്യത്തിന് അർഹരായ വിദ്യാർത്ഥികൾ മേയ് 31നകം അവരവരുടേയും രക്ഷിതാവിന്റേയും പേരിലുള്ള ജോയിന്റ് ബാങ്ക് അക്കൗണ്ടുകൾ ആരംഭിക്കണം. നിലവിൽ അക്കൗണ്ട് ഉള്ളവർ ബാങ്കുമായി ബന്ധപ്പെട്ട്  അക്കൗണ്ട് ലൈവ് ആണെന്ന് ഉറപ്പാക്കണം.

പി.എൻ.എക്സ്. 1196/19

നീലേശ്വരം നഗരസഭയില്‍ ആരോഗ്യ ഇന്‍ഷൂറന്‍സ് കാര്‍ഡ് പുതുക്കുന്നതിനുള്ള നടപടി  മേയ് ആദ്യവാരത്തില്‍ ആരംഭിക്കും.  വിവിധ വാര്‍ഡുകളെ കേന്ദ്രീകരിച്ച് ക്യാമ്പുകള്‍ സംഘടിപ്പിച്ച് ഒരു കുടുംബത്തിന് ഒരു കാര്‍ഡ് എന്നതിനുപകരം ഒരു കുടുംബത്തിലെ ഓരോ അംഗത്തിനും ഓരോ കാര്‍ഡ് വീതം എന്ന വിധത്തിലാണ് കാര്‍ഡുകള്‍ പുതുക്കുന്നത്.