അശാസ്ത്രീയമായ കൃഷിരീതികൾ ഉപേക്ഷിക്കണമെന്നും ശ്രദ്ധയോടും ശാസ്ത്രീയമായും കൃഷി ചെയ്താൽ മികച്ച വരുമാനം ലഭിക്കുമെന്നും ജലസേചന വകുപ്പ് മന്ത്രി കെ കൃഷ്ണൻകുട്ടി. കുറുമാത്തൂർ പഞ്ചായത്തിലെ മണിയറവയൽ, കാപ്പിൻകര, പൊന്തംകുണ്ട് ബന്ദാര തടയണ നിർമ്മാണ പ്രവൃത്തി ഉദ്ഘാടനം നിർവഹിച്ച് സംസാരിക്കുകയായിരുന്നു മന്ത്രി.

ജില്ലയിലെ ഹോട്ടലുകളിൽ ഹരിതപെരുമാറ്റച്ചട്ടം നടപ്പിലാക്കുന്നതിന്റെ ഭാഗമായി ഡിസ്‌പോസിബിൾ പ്ലേറ്റുകളും ഗ്ലാസുകളും ജ്യൂസ് നൽകുന്ന പാത്രങ്ങളും സ്‌ട്രോയും പൂർണ്ണമായി ഒഴിവാക്കുവാൻ ധാരണയായി. ഹോട്ടൽ ആന്റ് റസ്റ്റോറന്റ് അസോസിയേഷൻ, വ്യാപാരി വ്യവസായി സമിതി, വ്യാപാരി വ്യവസായി ഏകോപന സമിതി  തുടങ്ങിയ സംഘടന പ്രതിനിധികളുമായി ജില്ലാ കലക്ടർ മീർ മുഹമ്മദ് അലി നടത്തിയ ചർച്ചയിലാണ് തീരുമാനം.

ഡിസ്‌പോസിബിൾ വസ്തുക്കൾ ഒഴിവാക്കുന്നത് പ്രോത്സാഹിപ്പിക്കുന്നതിന് വേണ്ടി പാത്രങ്ങളിൽ ഭക്ഷണം പാർസൽ വാങ്ങുന്നവർക്ക് വിലയിൽ 10 ശതമാനം  കിഴിവ് നൽകുന്ന സംവിധാനവും പുനഃസ്ഥാപിക്കുന്ന കാര്യം സജീവമായി പരിഗണിക്കും.

സംസ്ഥാനത്തെ വ്യവസായ സംരംഭകർ ജില്ലാ വ്യവസായ കേന്ദ്രങ്ങൾ മുഖേന എടുത്ത മാർജിൻ മണി വായ്പയുടെ പിഴപ്പലിശ പൂർണമായി ഒഴിവാക്കാനും 50 ശതമാനം പലിശയിളവ് അനുവദിക്കാനും മന്ത്രിസഭായോഗം തീരുമാനിച്ചതായി വ്യവസായ മന്ത്രി ഇ പി ജയരാജൻ അറിയിച്ചു. ഈ വർഷം ഏപ്രിൽ 30നകം ഒറ്റത്തവണയായി കുടിശ്ശിക അടച്ചുതീർക്കുന്നവർക്കാണ് ഈ ആനുകൂല്യം ലഭിക്കുക. സംസ്ഥാന മന്ത്രിസഭയുടെ ആയിരം ദിനാഘോഷ സമ്മാനമായാണ് ആയിരക്കണക്കിന് ചെറുകിട വ്യവസായികൾക്ക് ആശ്വാസമാവുന്ന തീരുനാനമെന്നും അദ്ദേഹം പറഞ്ഞു. കണ്ണൂർ പിആർഡി ചംബറിൽ വിളിച്ചുചേർത്ത വാർത്താസമ്മേളനത്തിൽ സംസാരിക്കുകയായിരുന്നു അദ്ദേഹം. 

കിഫ്ബി ഫണ്ട് ഉപയോഗിച്ച് 50 ലക്ഷം എൾഇഡി ബൾബുകൾ വീടുകളിൽ വിതരണം ചെയ്യുമെന്ന് വ്യവസായ മന്ത്രി ഇ പി ജയരാജൻ പറഞ്ഞു. ഇതു വഴി സിഎഫ്എൽ ബൾബുകളുടെ ഉപയോഗം കുറച്ച് വൈദ്യുതി സംരക്ഷിക്കാൻ സാധിക്കും. ജില്ലാ പഞ്ചായത്ത് പദ്ധതിയായ സ്‌കൂളുകളിൽ ഗ്രിഡ് ബന്ധിത റൂഫ് ടോപ്പ് സോളാർ പവർ പദ്ധതി എടയന്നൂർ ഗവ. ഹയർ സെക്കൻഡറി സ്‌കൂളിൽ ഉദ്ഘാടനം ചെയ്യുകയായിരുന്നു മന്ത്രി. കിഫ്ബിയിൽ നിന്നും ലഭിക്കുന്ന പണം പെട്ടെന്ന് കൊടുക്കേണ്ട. വൈദ്യുതി ചാർജ്ജിൽ നിന്നും നാലോ അഞ്ചോ വർഷം കൊണ്ട് അടച്ചാൽ മതി. സംസ്ഥാനത്തെ മികച്ച പ്രവർത്തനം കാഴ്ച വെക്കുന്ന ജില്ലാ പഞ്ചായത്തുകളിലൊന്നാണ് കണ്ണൂർ ജില്ലാ പഞ്ചായത്തെന്നും മന്ത്രി അഭിപ്രായപ്പെട്ടു. 

നീണ്ട കാലമാണ് പദ്ധതികൾ പൂർത്തീകരിക്കാൻ വേണ്ടിവരുന്നതെന്നും ഈ അവസ്ഥയിൽ മാറ്റമുണ്ടാകണമെന്നും ജലവിഭവ വകുപ്പ് മന്ത്രി കെ കൃഷ്ണൻകുട്ടി. കടന്നപ്പള്ളി പാണപ്പുഴ ഗ്രാമ പഞ്ചായത്തിലെ ഏര്യം പുഴയ്ക്ക് കുറുകെ നിർമ്മിക്കുന്ന പൂരക്കടവ് വിയർ കം ട്രാക്ടർ വേയുടെ പ്രവൃത്തി ഉദ്ഘാടനം ചെയ്ത് സംസാരിക്കുകയായിരുന്നു മന്ത്രി. ഈ പദ്ധതി 2020 മാർച്ച് 31നുള്ളിൽ പൂർത്തിയാകുമെന്നാണ് അറിയിച്ചിരിക്കുന്നത് അത് പോലെ നടക്കണം. പദ്ധതിയുടെ ഗുണം ഓരോ കുടുംബത്തിനും ലഭിക്കണം. അതിനായി കൃത്യമായ കണക്ക് തയ്യാറാക്കണമെന്നും അദ്ദേഹം വ്യക്തമാക്കി. 

എൽ.എസ്.എസ് - യു.എസ്.എസ് പരീക്ഷ നാളെ (ഫെബ്രുവരി 23) സംസ്ഥാനത്തെ 1,391 കേന്ദ്രങ്ങളിലായി രാവിലെ 10.15 മുതൽ 12 മണി വരെയും ഉച്ചയ്ക്ക് 1.15 മുതൽ മൂന്ന് മണി വരെയും നടത്തും. എൽ.എസ്.എസ് പരീക്ഷയ്ക്ക് 88,019 കുട്ടികളും യു.എസ്.എസ് പരീക്ഷയ്ക്ക് 68,847 കുട്ടികളും രജിസ്റ്റർ ചെയ്തിട്ടുണ്ട്.

പി.എൻ.എക്സ്. 660/19

മാലിന്യരഹിത തൃശൂരിന്റെ ഭാഗമായി തദ്ദേശ സ്ഥാപനങ്ങളുമായി ബന്ധപ്പെട്ട്‌ ജില്ലയിലെ വിവിധയിടങ്ങളില്‍ ജൈവ അജൈവ മാലിന്യ സംസ്‌ക്കരണ ഉപാധികള്‍ സ്ഥാപിച്ചു.

വൈവിധ്യം നിറഞ്ഞ കരകൗശല വസ്‌തുക്കളുമായി വിയ്യൂര്‍ സെന്‍ട്രല്‍ ജയിലിന്റെ സ്റ്റാള്‍ ജനശ്രദ്ധ ആകര്‍ഷിക്കുന്നു. മരത്തില്‍ തീര്‍ത്ത പ്രദര്‍ശന വസ്‌തുക്കളും ചിരട്ടയില്‍ തീര്‍ത്ത കരകൗശല വസ്‌തുക്കളും അടുക്കള ഉപകരണങ്ങളും കുട്ടികളുടെ കളിപ്പാട്ടങ്ങളുമാണ്‌ മേളയിലെ ആകര്‍ഷണ ഘടകങ്ങള്‍. സര്‍ക്കാരിന്റെ 1000 ദിനാഘോഷത്തോട്‌ അനുബന്ധിച്ചു തേക്കിന്‍കാട്‌ മൈതാനിയില്‍ ഒരുക്കിയ സ്റ്റാളില്‍ ആണ്‌ ഇവ വില്‍പ്പനക്ക്‌ ഒരുക്കിയിരിക്കുന്നത്‌.

അക്കാദമിക നിലവാരത്തിനൊപ്പം കലാസാംസ്‌കാരിക മേഖലയിലും കലാലയങ്ങളെ ഉയര്‍ത്തുകയാണ്‌ സര്‍ക്കാരിന്റെ ലക്ഷ്യമെന്ന്‌ ഉന്നത വിദ്യാഭ്യാസ- ന്യൂനപക്ഷ ക്ഷേമ വകുപ്പ്‌ മന്ത്രി ഡോ. കെ ടി ജലില്‍ പറഞ്ഞു. പനമ്പിള്ളി സ്‌മാരക സര്‍ക്കാര്‍ കോളേജില്‍ പുതുതായി അനുവദിച്ച കോഴ്‌സുകളുടെയും ലൈബ്രറി മന്ദിരത്തിന്റെയും ഉദ്‌ഘാടനം നിര്‍വ്വഹിച്ചു കൊണ്ട്‌ സംസാരിക്കുകയായിരുന്നു മന്ത്രി. വിദ്യാര്‍ത്ഥികളില്‍ വായനാശീലം വളര്‍ത്തുന്നതിന്റെ ആവശ്യകതയെക്കുറിച്ചും പുതിയ സാഹചര്യങ്ങളില്‍ അധ്യാപകര്‍ അപ്‌ഡേറ്റ്‌ ആകേണ്ടതിനെക്കുറിച്ചും മന്ത്രി പറഞ്ഞു. ബി ഡി ദേവസ്സി എം എല്‍ എ അധ്യക്ഷനായി.