പകര്‍ച്ചവ്യാധി പ്രതിരോധ പ്രവര്‍ത്തനങ്ങള്‍ ഊര്‍ജിതമാക്കി ഷോളയൂര്‍ ഗ്രാമപഞ്ചായത്ത്. കൊതുക് ജന്യ രോഗങ്ങള്‍ തടയാനായി ആഴ്ചയില്‍ ഒരിക്കല്‍ ഡ്രൈ ഡേ ആയി ആചരിക്കണമെന്ന് ഗ്രാമപഞ്ചായത്ത് പ്രസിഡന്റ് പി.രാമമൂര്‍ത്തി പറഞ്ഞു. ഗ്രാമപഞ്ചായത്തിന്റെ പ്രാദേശിക പൊതുജനാരോഗ്യ സമിതി യോഗം ഉദ്ഘാടനം ചെയ്ത് സംസാരിക്കുകയായിരുന്നു പ്രസിഡന്റ്. ഈ വര്‍ഷം പകര്‍ച്ചവ്യാധി രോഗങ്ങള്‍ മൂലമുള്ള മരണം കുറയ്ക്കുകയാണ് ലക്ഷ്യമെന്നും പ്രസിഡന്റ് കൂട്ടിചേര്‍ത്തു.

തൃത്താല മണ്ഡലത്തിലെ വിദ്യാഭ്യാസ ഉന്നമനത്തിനായി മന്ത്രി എം ബി രാജേഷ് നടപ്പാക്കുന്ന എന്‍ലൈറ്റ് പദ്ധതിയുടെ ഭാഗമായി പ്രതിഭാ സംഗമവും വിജയോത്സവവും നടത്തി. ചാലിശ്ശേരി അന്‍സാരി കണ്‍വെന്‍ഷന്‍ സെന്ററില്‍ നടന്ന പരിപാടി തദ്ദേശ സ്വയംഭരണ എക്സൈസ് പാര്‍ലമെന്ററി കാര്യ വകുപ്പ് മന്ത്രി എം ബി രാജേഷ് ഉദ്ഘാടനം ചെയ്തു. വിദ്യാഭാസ മേഖലയില്‍ നടത്തുന്ന മുതല്‍ മുടക്കാണ് നാളത്തെ സമൂഹത്തെ മുന്നോട്ടു നയിക്കുന്നത്.അതുകൊണ്ടാണ് വിദ്യാഭാസ മേഖലയ്ക്ക് മണ്ഡലത്തില്‍ മുന്‍ഗണന നല്‍കുന്നതെന്നും മന്ത്രി പറഞ്ഞു.

വിവാഹത്തിനു മുമ്പ് ദമ്പതികള്‍ നിര്‍ബന്ധമായും പ്രീ മാരിറ്റല്‍ കൗണ്‍സിലിങിന് വിധേയമാവണമെന്ന് വനിത കമ്മീഷന്‍ അംഗം വി.ആര്‍ മഹിളാമണി പറഞ്ഞു. പാലക്കാട് ഗസ്റ്റ് ഹൗസ് കോണ്‍ഫ്രന്‍സ് ഹാളില്‍ നടത്തിയ വനിതാ കമ്മീഷന്‍ മെഗാ അദാലത്തിന് ശേഷം സംസാരിക്കുകയായിരുന്നു അവര്‍. മെച്ചപ്പെട്ട കുടുംബാന്തരീക്ഷം സൃഷ്ടിക്കാന്‍ എല്ലാവരും ശ്രമിക്കണം. കുടുംബപരമായ നിസാര പ്രശ്നങ്ങള്‍ കാരണം വിവാഹമോചനത്തിനായി നിരവധിപേരാണ് കമ്മിഷനു മുന്നില്‍ വരുന്നത്. ഇത് ഗൗരവമായി എടുത്ത് ദമ്പതികള്‍ വിവാഹ പൂര്‍വ്വ കണ്‍സിലിങിനു വിധേയമാവണമെന്നും അവര്‍ നിര്‍ദ്ദേശിച്ചു.

പാലക്കാട് ബ്ലോക്ക് പഞ്ചായത്ത് പരിധിയില്‍ പറളി ഗ്രാമപഞ്ചായത്തിലെ തേനൂരിലെ ഗവ നഴ്സറി സ്‌കൂളില്‍ ടീച്ചര്‍ ഒഴിവിലേക്ക് താല്‍കാലിക നിയമനം നടത്തുന്നു. പാലക്കാട് ബ്ലോക്ക് പരിധിയില്‍ താമസമുള്ളവര്‍ക്ക് മുന്‍ഗണന. അപേക്ഷകര്‍ പ്രീ പ്രൈമറി ടീച്ചേഴ്സ് ട്രെയിനിങ് കോഴ്സ് പൂര്‍ത്തിയാക്കിയവരാവണം. യോഗ്യതയുള്ളവര്‍ രേഖകള്‍ സഹിതം ജൂണ്‍ 30 ന് വൈകീട്ട് അഞ്ചിനകം പാലക്കാട് ബ്ലോക്ക് പട്ടിക ജാതി വികസന ഓഫീസില്‍ അപേക്ഷിക്കണം. ഫോണ്‍: 8547630126

കല്‍പ്പാത്തി റോഡില്‍ പുതിയപാലത്ത് അപ്രോച്ച് റോഡില്‍ അറ്റകുറ്റപ്പണി നടക്കുന്നതിനാല്‍ ഇന്ന് (ജൂണ്‍ 22) രാവിലെ ഏഴ് മുതല്‍ വൈകീട്ട് നാല് വരെ ഗതാഗതം പൂര്‍ണമായി നിരോധിച്ചു. ഇതുവഴി കടന്നുപോകുന്ന വാഹനങ്ങള്‍ ചുണ്ണാമ്പുതറ വഴിയോ ആണ്ടിമഠം വഴിയോ പോകണമെന്ന് പൊതുമരാമത്ത് വകുപ്പ് നിരത്ത് സെക്ഷന്‍ (നമ്പര്‍ 2) വിഭാഗം അസിസ്റ്റന്റ് എഞ്ചിനീയര്‍ അറിയി

പാലക്കാട് ഗവ വിക്ടോറിയ കോളേജില്‍ കഫറ്റീരിയ നിര്‍മ്മിക്കാന്‍ ഉദ്ദേശിക്കുന്ന കോളേജിന്റെ ഉടമസ്ഥതയിലുള്ള സ്ഥലത്ത് നില്‍ക്കുന്ന നീര്‍മരുത് മരം ജൂണ്‍ 24ന് ഉച്ചയ്ക്ക് രണ്ടിന് കോളേജ് പ്രിന്‍സിപ്പലുടെ ഓഫീസില്‍ ലേലം ചെയ്യും.

കുഴല്‍മന്ദം കോളേജ് ഓഫ് അപ്ലൈഡ് സയന്‍സില്‍ അടുത്ത അധ്യായന വര്‍ഷത്തേക്ക് വിവിധ ബിരുദ കോഴ്‌സുകളിലേക്ക് അപേക്ഷിക്കാം. കാലിക്കറ്റ് യൂണിവേഴ്‌സിറ്റി അഫിലിയേറ്റ് ചെയ്ത നാല് വര്‍ഷത്തെ ഓണേഴ്‌സ് ബിരുദ പ്രോഗ്രാമുകളായ ബി.എസ്.സി കമ്പ്യൂട്ടര്‍ സയന്‍സ്, ബി.എസ്.സി ഇലക്ട്രോണിക്‌സ്, ബി.കോം കമ്പ്യൂട്ടര്‍ അപ്ലിക്കേഷന്‍ എന്നീ കോഴ്‌സുകളിലേക്കാണ് അപേക്ഷിക്കേണ്ടത്. ഐ.എച്ച്.ആര്‍.ഡി ക്വാട്ട സീറ്റുകളിലേക്ക് ihrdadmissions.org ല്‍ അപേക്ഷിക്കണം.

അന്താരാഷ്ട്ര യോഗ ദിനത്തോടനുബന്ധിച്ച് പുതുക്കോട് ഗ്രാമപഞ്ചായത്ത്, നാഷണല്‍ ആയുഷ് മിഷന്‍, സര്‍ക്കാര്‍ ഹോമിയോ ഡിസ്‌പെന്‍സറി എന്നിവയുടെ സംയുക്ത ആഭിമുഖ്യത്തില്‍ യോഗ ദിനാചരണം നടത്തി. പുതുക്കോട് ഗ്രാമപഞ്ചായത്ത് പ്രസിഡന്റ് ഐ. ഹസീന പരിപാടി ഉദ്ഘാടനം ചെയ്തു. പുതുക്കോട് ഗവ. ഹോമിയോ ഡിസ്‌പെന്‍സറി യോഗ ഇന്‍സ്‌പെക്ടര്‍ വി.ഐശ്വര്യ യോഗയുടെ പ്രാധാന്യത്തെക്കുറിച്ച് ബോധവല്‍ക്കരണ ക്ലാസ് എടുത്തു. തുടര്‍ന്ന് യോഗ പരിശീലനവും നടന്നു. ആരോഗ്യപരിപാലനത്തെ പ്രോത്സാഹിപ്പിക്കുക എന്നതാണ് പരിപാടിയുടെ ലക്ഷ്യം.

തേങ്കുറിശ്ശി ഗ്രാമപഞ്ചായത്ത്, കുടുംബശ്രീ സി.ഡി.എസ് എന്നിവയുടെ നേതൃത്വത്തില്‍ സമുന്നതി പദ്ധതിയുടെ ഭാഗമായി നടീല്‍ ഉത്സവം നടത്തി. തേങ്കുറിശ്ശി ഗ്രാമപഞ്ചായത്ത് പ്രസിഡന്റ് ആര്‍. ഭാര്‍ഗവന്‍ പരിപാടി ഉദ്ഘാടനം ചെയ്തു. നടീല്‍ ഉത്സവത്തിന്റെ ഭാഗമായി കൂര്‍ക്ക തൈകളാണ് നട്ടത്.