അഗതിമന്ദിരത്തിലെ താമസക്കാര്‍ക്ക് വസ്ത്രങ്ങള്‍ വിതരണം ചെയ്തു. മയ്യനാട് എസ് എസ് സമിതിയില്‍ ജില്ലാ പഞ്ചായത്ത് പ്രസിഡന്റ് ആര്‍. ലതാദേവി ഉദ്ഘാടനം നിര്‍വഹിച്ചു.  വയോജനക്ഷേമ പദ്ധതികളുടെ ഭാഗമായി സംഘടിപ്പിച്ച പരിപാടിയില്‍ 40 ക്ഷേമസ്ഥാപനങ്ങളിലെ 3310 താമസക്കാര്‍ക്ക് വസ്ത്രങ്ങള്‍ നല്‍കി.  
ക്ഷേമകാര്യ സ്ഥിരംസമിതി ചെയര്‍പേഴ്‌സണ്‍  ജി. സരസ്വതി അധ്യക്ഷയായി. ജില്ലാ സാമൂഹ്യനീതി ഓഫീസര്‍ എ. കെ. ഹരികുമാരന്‍ നായര്‍, ജില്ലാ പഞ്ചായത്ത് സെക്രട്ടറി ടി. കെ. സയൂജ, എസ്.എസ്.സമിതി മാനേജിംഗ് ഡയറക്ടര്‍ ഫ്രാന്‍സിസ് സേവ്യര്‍, ജില്ലാ പഞ്ചായത്ത് അംഗങ്ങള്‍ തുടങ്ങിയവര്‍ പങ്കെടുത്തു.
 
 

സെന്‍സസ് പ്രവര്‍ത്തനങ്ങളുടെ ഭാഗമായി ഫീല്‍ഡ് ട്രെയിനര്‍മാര്‍ക്ക് സംഘടിപ്പിച്ച രണ്ടാംഘട്ടപരിശീലനം സമാപിച്ചു. കലക്ട്രേറ്റ് ഐ ടി ട്രെയിനിംഗ് ഹാളില്‍ ജില്ലാ സെന്‍സസ് ഓഫീസറായ എ.ഡി.എം ടി.കെ വിനീത് ഉദ്ഘാടനം ചെയ്തു.  രണ്ട് ഘട്ടങ്ങളിലായി 87 ഫീല്‍ഡ് ട്രെയിനര്‍മാര്‍ക്ക് പരിശീലനം നല്‍കി. ഹയര്‍ സെക്കന്‍ഡറി അധ്യാപകര്‍, വകുപ്പുതല ഉദ്യോഗസ്ഥര്‍ തുടങ്ങിയവരാണ് ഫീല്‍ഡ് ട്രെയിനര്‍മാര്‍. ഫീല്‍ഡ് ട്രെയിനര്‍മാരുടെ നേതൃത്വത്തില്‍ സൂപ്പര്‍വൈസര്‍ - എന്യൂമറേറ്റര്‍ ബാച്ചുകള്‍ക്ക്  മെയ് 28 മുതല്‍ ജൂണ്‍ 23  കാലയളവില്‍ പരിശീലനം നടത്തും.
 

മഴക്കാലമുന്നൊരുക്കത്തിനൊപ്പം നടത്തുന്ന ദുരന്തനിവാരണതയ്യാറെടുപ്പുകളിലും അനുബന്ധയോഗങ്ങളിലും പൊലിസ്, ഗതാഗതവകുപ്പുകള്‍ നിസഹകരിക്കരുതെന്ന് മുന്നറിയിപ്പ്. അടിയന്തരദുരന്തപ്രതികരണം, ദുരിതാശ്വാസപ്രവര്‍ത്തനങ്ങളും വിലയിരുത്തുന്നതിന് ചേര്‍ന്ന യോഗത്തില്‍നിന്ന് വിട്ടുനിന്ന പശ്ചാത്തലത്തിലാണ് ഇരുവകുപ്പുകള്‍ക്കും പുനലൂര്‍ ആര്‍.ഡി.ഒ ബീന എസ്. ഹനീഫ് കര്‍ശന നിര്‍ദേശം നല്‍കിയത്.  

ജൂലൈ ഒന്ന് മുതൽ ആരംഭിക്കുന്ന സെൻസസ് 2027 ൻ്റെ ഭാഗമായ ഫീൽഡ് ട്രെയിനർമാർക്കുള്ള രണ്ടാംഘട്ട ജില്ലാതല പരിശീലനം പൂർത്തിയായി. കളക്ടറേറ്റ് കോൺഫറൻസ് ഹാളിൽ നടന്ന പരിശീലനത്തിൽ ദുരന്ത നിവാരണ വിഭാഗം ഡെപ്യൂട്ടി കളക്ടർ എം റഹീം ഉദ്യോഗസ്ഥർക്കാവശ്യമായ നിർദ്ദേശങ്ങൾ നൽകി. മാസ്റ്റർ ട്രെയിനർമാരായ വിഷ്ണു ശ്രീവൽസൻ, കെ ശ്രീകുമാർ എന്നിവർ ക്ലാസുകൾക്ക് നേതൃത്വം നൽകി. ഫീൽഡ് ട്രെയിനർമാരുടെ ആദ്യഘട്ട പരിശീലനം ബുധനാഴ്ച (മേയ് 20) പൂർത്തിയായിരുന്നു. മേയ് 21 ന് ആരംഭിച്ച രണ്ടാം ബാച്ചിൻ്റെ പരിശീലനത്തിൽ 38 പേരാണ് പങ്കെടുത്തത്. രണ്ട് ബാച്ചുകളിലുമായി ആകെ 76 പേർക്ക് പരിശീലനം നൽകി.

കായംകുളം  ബോയ്സ് ഹയർ സെക്കൻഡറി സ്കൂളിൽ ഹയർ സെക്കൻഡറി വിഭാഗത്തിൽ നിലവിലുള്ളതും പ്രതീക്ഷിക്കുന്നതുമായ ഒഴിവുകളിലേക്ക് ദിവസവേതന അടിസ്ഥാനത്തിൽ അധ്യാപകരെ നിയമിക്കുന്നു. 

പട്ടികവർഗ വികസന വകുപ്പിന് കീഴിൽ കൊല്ലം ജില്ലയിലെ പുനലൂർ ജില്ലാ പട്ടികവർഗ വികസന ഓഫീസിന്റെ നിയന്ത്രണത്തിൽ പ്രവർത്തിക്കുന്ന അമൃതകുളം, കുളത്തൂപ്പുഴ, അച്ചൻകോവിൽ, ഉറുകുന്ന് എന്നീ ഹോസ്റ്റലുകൾ,  കുളത്തൂപ്പുഴ മോഡൽ റസിഡൻഷ്യൽ സ്കൂൾ എന്നിവിടങ്ങളിലും ആലപ്പുഴ ജില്ലയിൽ പ്രവർത്തിക്കുന്ന മായിത്തറ ഹോസ്റ്റലിലും നിലവിൽ ഒഴിവുള്ളതും 2026-27 അധ്യയന വർഷം ഒഴിവ് വരാൻ സാധ്യതയുള്ളതുമായ കുക്ക്, വാച്ച്മാൻ, ആയ, പി ടി എസ്  എന്നീ തസ്തികകളിലേക്ക് ദിവസവേതനാടിസ്ഥാനത്തിൽ നിയമനം നടത്തുന്നു.

ആലപ്പുഴ ജനറൽ ആശുപത്രിയിലെ ദന്തൽ വിഭാഗത്തിലേക്ക് 'ഹൈ സ്പീഡ് സ്പിൻഡിൽ ആൻഡ് അലോയ് ഗ്രൈൻഡർ ' വാങ്ങുന്നതിന് ക്വട്ടേഷൻ ക്ഷണിച്ചു. ക്വട്ടേഷനുകൾ ജൂൺ അഞ്ചിന്  ഉച്ചയ്ക്ക് ഒരു  മണി വരെ ആശുപത്രി സൂപ്രണ്ട് സ്വീകരിക്കും. ഫോൺ : 0477-2253324

ഭാരതീയ ചികിത്സാ വകുപ്പ് ആലപ്പുഴ ജില്ലാ മെഡിക്കൽ ഓഫീസിൽ മേയ്  25-ന് എംപ്ലോയ്‌മെന്റ് എക്സ്ചേഞ്ച് മുഖേന നടത്താനിരുന്ന ആയുർവേദ മെഡിക്കൽ ഓഫീസർ തസ്തികയിലേക്കുള്ള അഭിമുഖം മാറ്റിവെച്ചു. പുതുക്കിയ തീയതി പിന്നീട് അറിയിക്കും. ഫോൺ: 04772252965.
 

ആലപ്പുഴ എംപ്ലോയബിലിറ്റി സെന്റർ മുഖേന ജില്ലയിൽ പ്രവർത്തിക്കുന്ന സ്വകാര്യ സ്ഥാപനങ്ങളിലേക്ക് നിയമനം നടത്തുന്നു. അഭിമുഖം മേയ് 26-ന് രാവിലെ 9.30-ന് എംപ്ലോയബിലിറ്റി സെന്ററിൽ നടക്കും. എസ്.എസ്.എൽ.സി, പ്ലസ് ടു, ഡിഗ്രി യോഗ്യതയുള്ള, എംപ്ലോയബിലിറ്റി സെന്ററിൽ രജിസ്റ്റർ ചെയ്തവർക്കും ചെയ്യാത്തവർക്കും പങ്കെടുക്കാം. 18-നും 36-നും ഇടയിൽ പ്രായമുള്ള  ഉദ്യോഗാർഥികൾക്കാണ് അവസരം. സ്പോട്ട് രജിസ്ട്രേഷൻ ഉണ്ടായിരിക്കും. ഫോൺ: 0477-2230624, 8304057735.

അമ്പലപ്പുഴ അർബൻ ഹെൽത്ത് ട്രെയിനിങ് സെന്റർ ആശുപത്രിയിലെ സായാഹ്ന ഒ.പി യിലേയ്ക്ക് മെഡിക്കൽ ഓഫീസർ തസ്തികയിലേയ്ക്ക് താൽകാലിക നിയമനം നടത്തുന്നു.   ഉദ്യോഗാർഥികൾ മേയ് 29ന്  രാവിലെ 10ന് കളർകോട് ദേശീയ പാതയ്ക്ക് സമീപമുള്ള അമ്പലപ്പുഴ ബ്ലോക്ക് ഓഫീസിന്റെ കോൺഫറൻസ് ഹാളിൽ ജനനത്തീയതി, മേൽവിലാസം, വിദ്യാഭ്യാസയോഗ്യത, മെഡിക്കൽ കൗൺസിൽ രജിസ്ട്രേഷൻ മുൻപരിചയം എന്നിവ തെളിയിക്കുന്ന അസ്സൽ രേഖകൾ സഹിതം ഹാജരാകണം.