ജില്ലയിലെ വിവിധ വികസനപദ്ധതികളുടെ പുരോഗതി വിലയിരുത്തുന്നതിനായി ജില്ലാ കളക്ടർ ശിഖ സുരേന്ദ്രന്റെ അധ്യക്ഷതയില്‍ ജില്ലാ വികസന സമിതി യോഗം ചേര്‍ന്നു. യോഗത്തിൽ പുതിയ എം.എൽ.എ മാരെ  ജില്ലാ കളക്ടർ ആദരിച്ചു.

പാചകവാതകം, പെട്രോള്‍, ഡീസല്‍ ഉത്പ്പന്നങ്ങള്‍, വിതരണക്കാര്‍ സംബന്ധിച്ച് ഉപഭോക്താക്കള്‍ക്കുള്ള പരാതികള്‍ പരിഹരിക്കുന്നതിന് ജില്ലാ കലക്ടറുടെ അധ്യക്ഷതയില്‍ എല്‍ പി ജി ഓപ്പണ്‍ ഫോറം & പെട്രോ പ്രൊഡക്ട്‌സ് ഗ്രീവന്‍സ് റീഡ്രസല്‍ ഫോറം കലക്ടറേറ്റ് കോണ്‍ഫറന്‍സ് ഹാളില്‍ ജൂണ്‍ 10ന് രാവിലെ 11ന് ചേരും. ഗ്യാസ് ഏജന്‍സി അസോസിയേഷന്‍ പ്രതിനിധികള്‍, പെട്രോളിയം ഡീലേഴ്‌സ് അസോസിയേഷന്‍ പ്രതിനിധികള്‍, ഓയില്‍ കമ്പനി പ്രതിനിധികള്‍, ഉപഭോക്താക്കള്‍, ജനപ്രതിനിധികള്‍ എന്നിവര്‍ പങ്കെടുക്കും. പരാതികള്‍ ജൂണ്‍ എട്ട് വൈകീട്ട് 5 വരെ തപാല്‍ മുഖേനയോ നേരിട്ടോ അതത് താലൂക്ക് സപ്ലൈ ഓഫീസുകളില്‍ സമര്‍പ്പിക്കാം.

വിവേചനങ്ങള്‍ ഇല്ലാത്ത, തുല്യതയുള്ള, സുരക്ഷിതമായ പഠനാന്തരീക്ഷം ഓരോ കുട്ടിക്കും ഉറപ്പാക്കുകയാണ് സര്‍ക്കാരിന്റെ ലക്ഷ്യമെന്ന് പൊതുവിദ്യാഭ്യാസ, ന്യൂനപക്ഷ ക്ഷേമ വകുപ്പ് മന്ത്രി എന്‍. ഷംസുദ്ദീന്‍. പൊറ്റശ്ശേരി ഗവ. ഹയര്‍ സെക്കന്‍ഡറി സ്‌കൂളില്‍ സംഘടിപ്പിച്ച ജില്ലാതല പ്രവേശനോത്സവത്തില്‍ വീഡിയോ സന്ദേശം മുഖേന സംസാരിക്കുകയായിരുന്നു അദ്ദേഹം.

പെരിന്തൽമണ്ണ സബ് കളക്ടർ സാക്ഷി മോഹന്റെ നേതൃത്വത്തിൽ മഴക്കാല മുന്നൊരുക്കങ്ങളുമായി ബന്ധപ്പെട്ട് ഐ.ആർ.എസ്. ടീം (ഇൻസിഡന്റ് റെസ്പോൺസ് സിസ്റ്റം) അവലോകന യോഗം ചേർന്നു. താലൂക്ക് തലത്തിൽ സ്വീകരിച്ചിട്ടുള്ള മുന്നൊരുക്കങ്ങൾ യോഗം വിലയിരുത്തി. 

മണ്ണിടിച്ചിൽസാധ്യതയുള്ളപ്രദേശങ്ങൾ, വെള്ളപ്പൊക്ക ഭീഷണിയുള്ള വില്ലേജുകൾ, ദുരിതാശ്വാസ ക്യാമ്പുകളുടെ മുന്നൊരുക്കങ്ങൾ, പകർച്ചവ്യാധി പ്രതിരോധ മരുന്നുകളുടെ ലഭ്യത, മറ്റു ചികിത്സാ സൗകര്യങ്ങൾ എന്നിവ യോഗം വിലയിരുത്തി. അപകടഭീഷണിയുള്ള മരങ്ങൾ മുറിച്ച് മാറ്റുന്നതിന് സബ് കളക്ടർ പഞ്ചായത്ത് സെക്രട്ടറിമാർക്ക് നിർദേശം നൽകി. 

ദേശീയ തൊഴില്‍ സേവനകേന്ദ്രത്തിന്റെ ആഭിമുഖ്യത്തില്‍ പട്ടികജാതി/പട്ടികവര്‍ഗ്ഗ വിഭാഗത്തില്‍പ്പെട്ട ഉദ്യോഗാര്‍ത്ഥികള്‍ക്കായി സൗജന്യ കംപ്യൂട്ടര്‍ പരിശീലന കോഴ്‌സിന് അപേക്ഷ ക്ഷണിച്ചു. കേന്ദ്രസര്‍ക്കാരിന്റെ കീഴിലുള്ള എന്‍.ഐ.ഇ.എല്‍.ഐ.ടി. നടത്തുന്ന ഒരു വര്‍ഷത്തെ സൈബര്‍ സെക്വേഡ് വെബ് ഡവലപ്‌മെന്റ് അസോസിയേറ്റ് കോഴ്‌സിലേക്കാണ് പ്രവേശനം. കെല്‍ട്രോണിന്റെ കോഴിക്കോട്ടുള്ള നോളഡ്ജ് സെന്ററിലാണ് കോഴ്‌സ് നടത്തുന്നത്. 30 വയസ്സില്‍ താഴെയുള്ള മൂന്ന് ലക്ഷത്തില്‍ താഴെ വാര്‍ഷിക വരുമാനമുള്ള പ്ലസ്ടു പാസ്സായ എസ്.സി/എസ്.ടി വിഭാഗത്തില്‍പ്പെട്ടവര്‍ക്ക് അപേക്ഷിക്കാം.

അതിരപ്പിള്ളിയിൽ വൈശ്ശേരി ഭാഗത്ത് കാട്ടാനയുടെ ആക്രമണത്തിൽ കൊല്ലപ്പെട്ട പുല്ലാർക്കാട്ട് മോഹനന്റെ വീട് വനം-വന്യജീവി വകുപ്പ് മന്ത്രി ഷിബു ബേബി ജോൺ സന്ദർശിച്ചു. പരേതന്റെ കുടുംബാംഗങ്ങളെ മന്ത്രി സമാശ്വസിപ്പിക്കുകയും അഞ്ച് ലക്ഷം രൂപയുടെ ചെക്ക് അടിയന്തര ധന സഹായമായി കൈമാറുകയും ചെയ്തു. വന്യജീവി ആക്രമണത്താൽ ഉണ്ടാകുന്ന നാശ നഷ്ടങ്ങൾക്ക് നൽകി വരുന്ന നഷ്ടപരിഹാരതുക കാലോചിതമായി പരിഷ്കരിക്കുന്നതിനുള്ള നടപടികൾ സ്വീകരിക്കുമെന്നും മന്ത്രി അറിയിച്ചു. വനം വകുപ്പിലെയും ഇതര വകുപ്പുകളിലെയും ഉന്നത ഉദ്യോഗസ്ഥരും, ചാലക്കുടി എം.എൽ.എ. സനീഷ് കുമാർ ജോസഫ് മറ്റ് ജനപ്രതിനിധികൾ എന്നിവർ മന്ത്രിയോടൊപ്പം ഉണ്ടായിരുന്നു.

കാലവര്‍ഷം ശക്തമാകുന്നതോടെ കന്നുകാലികളില്‍ വിവിധ തരത്തിലുള്ള രോഗങ്ങള്‍ പടര്‍ന്നുപിടിക്കാന്‍ സാധ്യതയുള്ളതിനാല്‍ ജില്ലയിലെ ക്ഷീരകര്‍ഷകര്‍ അതീവ ജാഗ്രത പാലിക്കണമെന്ന് മലപ്പുറം ജില്ലാ മൃഗസംരക്ഷണ ഓഫീസര്‍ അറിയിച്ചു. ഈര്‍പ്പമുള്ള കാലാവസ്ഥയായതിനാല്‍ മുടന്തന്‍പനി, കുളമ്പുരോഗം, പൂപ്പല്‍വിഷബാധ, അകിടുവീക്കം, കരളടപ്പന്‍ തുടങ്ങിയ രോഗങ്ങള്‍ വരാന്‍ സാധ്യത കൂടുതലാണ്. പൂര്‍ണ്ണമായ ശുചിത്വം പാലിച്ചുകൊണ്ടുള്ള പരിചരണമാണ് മൃഗങ്ങള്‍ക്ക് അവശ്യം.

 കൊല്ലം താലൂക്ക് വികസനസമിതിയോഗം ജൂണ്‍ ആറ് രാവിലെ 10.30ന് താലൂക്ക് കോണ്‍ഫറന്‍സ് ഹാളില്‍ ചേരും.
 

ജില്ലാ അഴിമതി നിവാരണസമിതി മലപ്പുറം കളക്ടറേറ്റില്‍ സ്ഥാപിച്ചിട്ടുള്ള പരാതിപ്പെട്ടി എ.ഡി.എം.സി.എസ്. രാജേഷ്, റിട്ട. ജില്ലാ ജഡ്ജി പി. നാരായണന്‍കുട്ടി മേനോന്‍, ഹുസൂര്‍ ശിരസ്താര്‍ കെ.രഘുനാഥ്, ജൂനിയര്‍ സൂപ്രണ്ട് അനുജിത്ത് എന്നിവരുടെ സാന്നിധ്യത്തില്‍ തുറന്നു. അഴിമതിയുമായി ബന്ധപ്പെട്ട മൂന്നു പരാതികള്‍ ലഭിച്ചു. തുടര്‍നടപടികള്‍ സ്വീകരിക്കുന്നതിനായി ബന്ധപ്പെട്ട വകുപ്പിലേക്ക് പരാതികള്‍ കൈമാറി. എല്ലാ മാസവും ആദ്യപ്രവൃത്തി ദിവസം തുറക്കുന്ന കളക്ടറേറ്റില്‍ സ്ഥാപിച്ചിട്ടുള്ള പരാതിപ്പെട്ടിയില്‍ ജനങ്ങള്‍ക്ക് സര്‍ക്കാര്‍ ഓഫീസുകളുമായി ബന്ധപ്പെട്ട അഴിമതി സംബന്ധമായ പരാതികള്‍  നിക്ഷേപിക്കാം.

വിദ്യാഭ്യാസ വകുപ്പില്‍ എല്‍.പി സ്‌കൂള്‍ ടീച്ചര്‍ ( മലയാളം മീഡിയം,  തസ്തികമാറ്റം വഴി, കാറ്റഗറി നം.114/2025) തസ്തികയുടെ ചുരുക്ക പട്ടിക പ്രസിദ്ധീകരിച്ചു.