ആലപ്പുഴ: നിയമസഭ തിരഞ്ഞെടുപ്പിന്റെ ഭാഗമായി സിവിൽ സ്റ്റേഷനിലെ തിരഞ്ഞെടുപ്പ് കമ്മീഷന്റെ ഗോഡൗണിൽ സൂക്ഷിച്ചിരുന്ന വോട്ടിങ് യന്ത്രങ്ങൾ അതത് മണ്ഡലങ്ങളിലെ 
വിതരണ കേന്ദ്രങ്ങളിലെ റിട്ടേണിങ് ഓഫീസര്‍മാര്‍ക്ക് കൈമാറി. രാവിലെ 9 ന് ജില്ല കളക്ടർ എ അലക്സാണ്ടർ എത്തി ഗോഡൗൺ തുറന്ന് ആദ്യ പെട്ടി ജീവനക്കാർക്ക് കൈമാറി. വോട്ടിങ് യന്ത്രങ്ങളുടെ കൈമാററത്തിനുള്ള ഒരുക്കങ്ങൾ കളക്ട്രേറ്റിൽ രണ്ടു ദിവസമായി നടന്നുവരുകയായിരുന്നു.

ആലപ്പുഴ : കോവിഡ് 19 രോഗ വ്യാപനം തടയുന്നതിനും നിയന്ത്രിക്കുന്നതിനും ജില്ലാകളക്ടർ കണ്ടെയ്ൻമെൻറ് സോൺ ആയി പ്രഖ്യാപിച്ചിരുന്ന 
പെരുമ്പളം വാർഡ് രണ്ട് കണ്ടെയ്ൻമെന്റ് സോണിൽ നിന്ന് ഒഴിവാക്കി ഉത്തരവായി .

ആലപ്പുഴ:വനിത ശിശു വികസന വകുപ്പിന്റെ ആഭിമുഖ്യത്തിൽ സ്ത്രീകളുടെ പ്രശ്‌നങ്ങൾ ഓൺലൈനായി കേൾക്കുന്നതിനും 48 മണിക്കൂറിനുള്ളിൽ ആവശ്യസേവനങ്ങൾ ലഭ്യമാക്കുന്നതിനമുള്ള പുതിയ സംവിധാനം  കാതോർത്ത് പദ്ധതിക്ക് തുടക്കമായി.  കൗൺസിലിങ്, നിയമസഹായം, പൊലീസ് സഹായം എന്നിവയാണ് ഈ പദ്ധതി മുഖാന്തിരം ഓൺലൈനായി ലഭിക്കുന്നത്. കൂടുതൽ വിവരങ്ങൾക്ക് kathorthu.wcd.kerala.gov.in സന്ദർശിക്കുക.ഫോൺ: 8330883545.
 

ആലപ്പുഴ: 2021ലെ നിയമസഭ തിരഞ്ഞെടുപ്പുമായി ബന്ധപ്പെട്ട് തിരഞ്ഞെടുപ്പ് കമ്മീഷന്റെ നിർദ്ദേശങ്ങൾക്ക് വിരുദ്ധമായി സർക്കാർ സ്ഥാപനങ്ങൾ, പൊതുസ്ഥലങ്ങൾ എന്നിവിടങ്ങളിൽ പരസ്യങ്ങൾ, അനധികൃത ബോർഡുകൾ തുടങ്ങിയവ പതിക്കുകയോ സ്ഥാപിക്കുകയോ ചെയ്തിട്ടുണ്ടെങ്കിൽ ആയത് സ്വന്തം ചെലവിൽ നീക്കം ചെയ്യണം. അല്ലാത്തപക്ഷം ആയത് മാനുവൽ ഓഫ് മോഡൽ കോഡ് ഓഫ് കോൺടക്ട് പ്രകാരം നീക്കം ചെയ്യുന്നതിനുള്ള ചെലവ് ഉത്തരവാദികളിൽ നിന്നും ഈടാക്കുന്നതും, ഈ  തുക സ്ഥാനാർഥികളുടെ ചെലവായി കണക്കാക്കുന്നതുമാണെന്ന് എക്‌സപെൻഡിച്ചർ നോഡൽ ഓഫീസർ ആൻഡ് ഫിനാൻസ് ഓഫീസർ അറിയിച്ചു.

ആലപ്പുഴ: വാർഷിക സ്റ്റോക്കെടുപ്പ് നടത്തുന്നതിനാൽ ജില്ല സ്റ്റേഷനറി ഓഫീസിൽ നിന്നും ഏപ്രിൽ എട്ട്,ഒമ്പത് തീയതികളിൽ സ്റ്റേഷനറി വിതരണം ഉണ്ടായിരിക്കുന്നതല്ലായെന്ന് ജില്ല സ്റ്റേഷനറി ഓഫീസർ അറിയിച്ചു.

നിയമസഭാ തിരഞ്ഞെടുപ്പിൽ ആബ്സൻറീ വോട്ടർമാർക്ക് തപാൽ വോട്ടിന് തിരഞ്ഞെടുപ്പ് കമ്മീഷൻ അവസരമൊരുക്കിയിട്ടുണ്ടെന്ന് മുഖ്യ തിരഞ്ഞെടുപ്പ് ഓഫീസർ ടീക്കാറാം മീണ അറിയിച്ചു.
80 വയസിനുമുകളിലുള്ള മുതിർന്ന പൗരൻമാർ, വോട്ടർപട്ടികയിൽ ഭിന്നശേഷിക്കാർ എന്ന് രേഖപ്പെടുത്തിയിട്ടുള്ളവർ, കോവിഡ് 19 ബാധിച്ചവരോ, രോഗമുണ്ടെന്ന് സംശയിക്കുന്നവരോ, തിരഞ്ഞെടുപ്പ് ഡ്യൂട്ടിക്ക് നിയോഗിക്കപ്പെട്ട അവശ്യ സർവീസുകളിൽ ഉൾപ്പെട്ടവർ എന്നിവർക്കാണ് തപാൽ ബാലറ്റ് അനുവദിക്കുന്നത്.
തപാൽ വോട്ടിനുള്ള അപേക്ഷ ഫോം 12 ഡി വഴിയാണ് നൽകേണ്ടത്. ഫോം തിരഞ്ഞെടുപ്പ് കമ്മീഷന്റെ വെബ്സൈറ്റിൽ ലഭ്യമാണ്.

കേരളത്തിൽ 1054 പേർക്ക് കൂടി കോവിഡ്-19 സ്ഥിരീകരിച്ചു. തിരുവനന്തപുരം 130, മലപ്പുറം 124, എറണാകുളം 119, കോഴിക്കോട് 117, കൊല്ലം 116, കണ്ണൂർ 74, ആലപ്പുഴ 70, തൃശൂർ 70, കോട്ടയം 68, പാലക്കാട് 50, പത്തനംതിട്ട 42, കാസർഗോഡ് 29, ഇടുക്കി 25, വയനാട് 20 എന്നിങ്ങനെയാണ് ജില്ലകളിൽ രോഗം സ്ഥിരീകരിച്ചത്.
കഴിഞ്ഞ 24 മണിക്കൂറിനിടെ 38,410 സാമ്പിളുകളാണ് പരിശോധിച്ചത്. ടെസ്റ്റ് പോസിറ്റിവിറ്റി നിരക്ക് 2.74 ആണ്. റുട്ടീൻ സാമ്പിൾ, സെന്റിനൽ സാമ്പിൾ, സിബി നാറ്റ്, ട്രൂനാറ്റ്, പി.ഒ.സി.ടി. പി.സി.ആർ., ആർ.ടി. എൽ.എ.എം.പി., ആന്റിജൻ പരിശോധന എന്നിവ ഉൾപ്പെടെ ഇതുവരെ ആകെ 1,23,29,604 സാമ്പിളുകളാണ് പരിശോധനയ്ക്കായി അയച്ചത്.