ജില്ലയില്‍ ഇന്ന് (മാര്‍ച്ച് 12) കൊയിലാണ്ടി, നാദാപുരം, താലൂക്ക്  ആശുപത്രികളിലും ഒളവണ്ണ സാമൂഹികാരോഗ്യ കേന്ദ്രത്തിലും
കോവാക്‌സിന്‍ ഉപയോഗിച്ചുള്ള കോവിഡ് പ്രതിരോധ വാക്‌സിനേഷന്‍ നടക്കുമെന്ന് ജില്ലാ മെഡിക്കല്‍ ഓഫീസര്‍ ഡോ. ജയശ്രീ വി അറിയിച്ചു.  മറ്റു സര്‍ക്കാര്‍ ആരോഗ്യകേന്ദ്രങ്ങളിലും തിരഞ്ഞെടുത്ത സ്വകാര്യ ആശുപത്രികളിലും കോവിഷീല്‍ഡ് ഉപയോഗിച്ചുള്ള വാക്‌സിനേഷനും നടക്കും. സര്‍ക്കാര്‍ നിര്‍ദ്ദേശപ്രകാരമുള്ള എല്ലാ വിഭാഗം ഗുണഭോക്താക്കള്‍ക്കും ഈ കേന്ദ്രങ്ങളിലെത്തി കോവിഡ് പ്രതിരോധ കുത്തിവയ്‌പ്പെടുക്കാം.

നിയമസഭാ തെരഞ്ഞെടുപ്പ് പ്രചാരണത്തിന്റെ ഭാഗമായി താമരശ്ശേരി താലൂക്ക് തെരഞ്ഞെടുപ്പ് വിഭാഗത്തിന്റെ നേതൃത്വത്തില്‍   വെള്ളിയാഴ്ച (മാര്‍ച്ച് 12)  വിളംബരജാഥ നടത്തും.  വൈകിട്ട് 4.30ന് പഴയ ബസ് സ്റ്റാന്റ് പരിസരത്ത് നിന്നാരംഭിക്കുന്ന ജാഥ കാരാടി ചുറ്റിയശേഷം താലൂക്ക് ഓഫീസ് പരിസരത്ത് സമാപിക്കും.  

പഴയ ബസ് സ്റ്റാന്റ് പരിസരത്ത് നടക്കുന്ന ചടങ്ങില്‍ എ.ഡി.എം എന്‍ പ്രേമചന്ദ്രന്‍ വിളംബര ജാഥ ഫ്‌ളാഗ് ഓഫ് ചെയ്യും. താമരശ്ശേരി ഡിവൈഎസ്പി എന്‍. പി സന്തോഷ്‌കുമാര്‍, തഹസില്‍ദാര്‍ പി. ചന്ദ്രന്‍ തുടങ്ങിയവര്‍ പങ്കെടുക്കും. താലൂക്ക് ഓഫീസ് ജീവനക്കാര്‍ ജാഥയില്‍ അണിനിരക്കും.
 

നിയമസഭാ തെരഞ്ഞെടുപ്പ് ബോധവത്കരണത്തിന്റെ ഭാഗമായി ജില്ലാ ഭരണകൂടത്തിന്റേയും ശുചിത്വമിഷന്റേയും ആഭിമുഖ്യത്തില്‍ സൗഹൃദ ഫുട്ബോള്‍ മത്സരം സംഘടിപ്പിക്കും.  മാര്‍ച്ച് 17-ന് വൈകുന്നേരം 4.30-ന് കോര്‍പറേഷന്‍ സ്റ്റേഡിയത്തില്‍ മുന്‍ ഐ.എസ്.എല്‍ ഫുട്ബോള്‍ താരം സുശാന്ത് മാത്യുവിന്റെ നേതൃത്വത്തിലാണ് മത്സരം. പൊതുജനങ്ങള്‍ക്ക് പ്രവേശനമുണ്ട്. കലക്ടറുടെ ഫേസ്ബുക്ക് പേജില്‍ മത്സരത്തിന്റെ ലൈവ് സ്ട്രീമിങ്ങും ഉണ്ടായിരിക്കും.
 

ജില്ലയില്‍ മാതൃക പെരുമാറ്റ ചട്ടവുമായി ബന്ധപ്പെട്ട്  പൊതു സ്ഥലങ്ങളില്‍ നിന്ന് ഇതുവരെ  43630 പ്രചാരണ സാമഗ്രികള്‍ നീക്കം ചെയ്തു. 265 ചുവരെഴുത്തുകള്‍, 30790 പോസ്റ്ററുകള്‍, 4315 ബാനറുകള്‍, ഫ്ളെക്സ് ബോര്‍ഡുകള്‍, 8260 കൊടി തോരണങ്ങള്‍  എന്നിങ്ങനെയാണ് നീക്കം ചെയ്തത്.
 

പൊതു തെരഞ്ഞെടുപ്പുമായി ബന്ധപ്പെട്ട് ജില്ലയിലേക്കു നിയോഗിച്ച ചെലവ് നിരീക്ഷകരായ ആഷിഷ് കുമാർ (ഐ. ആർ. എസ് ),സുധേന്ദുദാസ്(ഐ. ആർ. എസ് )എന്നിവർ ജില്ലയിലെത്തി. നിരീക്ഷകർ സ്ഥാനാർത്ഥികളുടെ തെരഞ്ഞെടുപ്പുമായി ബന്ധപ്പെട്ട ചെലവുകൾ പരിശോധിക്കുകയും തെരഞ്ഞെടുപ്പു കമ്മീഷന് റിപ്പോർട്ട് സമർപ്പിക്കുകയും ചെയ്യും. നിരീക്ഷകരുടെ ക്യാമ്പ് ഓഫീസായി കാലിക്കറ്റ് യൂണിവേഴ്സിറ്റി ഗസ്റ്റ് ഹൗസ് പ്രവർത്തിക്കും. പൊതു ജനങ്ങൾക്ക് നേരിട്ടും ഫോൺ മുഖേനയും ഓഫീസ് സമയങ്ങളിൽ നിരീക്ഷകരെ ബന്ധപ്പെടാം.

നീരീക്ഷകർക്ക് അനുവദിച്ച നിയോജക മണ്ഡലവും ബന്ധപ്പെടാനുള്ള ഫോൺ നമ്പറും 

നിയമസഭ, മലപ്പുറം ലോക്‌സഭ ഉപതെരഞ്ഞെടുപ്പ് നടക്കുന്ന പോളിങ് സ്റ്റേഷനുകളില്‍ ഉണ്ടാകുന്ന ബയോ മെഡിക്കല്‍ മാലിന്യങ്ങള്‍ ഹരിത കര്‍മ്മസേനയോ സമാന പ്രാദേശിക സംഘടനകളോ വഴി ശേഖരിക്കും.പോളിങ് ദിവസം പോളിങ് സ്റ്റേഷനുകളില്‍ ഉല്‍പാദിപ്പിക്കുന്ന ബയോ മെഡിക്കല്‍, മറ്റ് മാലിന്യങ്ങള്‍ എന്നിവ ശേഖരിക്കുന്നതിനുള്ള സംവിധാനം തീരുമാനിക്കുന്നതിനായി ചേര്‍ന്ന യോഗത്തിലാണ് തീരുമാനം.

തെരഞ്ഞെടുപ്പുമായി ബന്ധപ്പെട്ട് ജില്ലാ കലക്ടര്‍ കെ. ഗോപാലകൃഷ്ണന്റെ അധ്യക്ഷതയില്‍ ജില്ലയിലെ ബാങ്ക് മാനേജര്‍മാരുടെ യോഗം ചേര്‍ന്നു. നിയമസഭാ/ മലപ്പുറം ഉപതെരഞ്ഞെടുപ്പ് നടക്കുന്ന സാഹചര്യത്തില്‍ ബാങ്കുകളില്‍ സംശയാസ്പദമായി തോന്നുന്ന പണമിടപാടുകള്‍ ശ്രദ്ധയില്‍ പെട്ടാല്‍ ജില്ലാ തെരഞ്ഞെടുപ്പ് ഓഫീസര്‍ കൂടിയായ ജില്ലാ കലക്ടറെ അറിയിക്കണമെന്ന് ഉദ്യോഗസ്ഥര്‍ക്ക് നിര്‍ദേശം നല്‍കി. കലക്ട്രേറ്റ് കോണ്‍ഫറന്‍സ് ഹാളില്‍ നടന്ന യോഗത്തില്‍ ഇലക്ഷന്‍ ഡെപ്യൂട്ടി കലക്ടര്‍ സി. ബിജു, ഇലക്ഷന്‍ എക്‌സ്‌പെന്‍ഡിച്ചര്‍ നോഡല്‍ ഓഫീസര്‍ എന്‍. സന്തോഷ് കുമാര്‍, ലീഡ് ബാങ്ക് മാനേജര്‍ പി.പി ജിതേന്ദ്രന്‍ എന്നിവര്‍ പങ്കെടുത്തു.
 

മലപ്പുറം ലോക്‌സഭാ ഉപതെരഞ്ഞെടുപ്പിനുള്ള നാമനിര്‍ദ്ദേശ പത്രിക ഇന്ന് (മാര്‍ച്ച് 12) മുതല്‍ 19 വരെമലപ്പുറം കലക്ട്രേറ്റില്‍ വരണാധികാരിയായ ജില്ലാ കലക്ടര്‍ മുമ്പാകെയോ എല്‍.ആര്‍ ഡെപ്യൂട്ടി കലക്ടര്‍ മുമ്പാകെയോ സമര്‍പ്പിക്കാം. പൊതു അവധി ദിനങ്ങളില്‍ ഒഴികെ രാവിലെ 11 മുതല്‍ വൈകീട്ട് മൂന്ന് വരെ പത്രിക സമര്‍പ്പിക്കാം. സ്ഥാനാര്‍ത്ഥിക്ക് നേരിട്ടോ പിന്തുണയ്ക്കുന്നയാള്‍ക്കോ നാമനിര്‍ദ്ദേശപത്രിക സമര്‍പ്പിക്കാം.

നാമനിര്‍ദേശ പത്രിക സമര്‍പ്പിക്കുന്നതിനുള്ള നിര്‍ദേശങ്ങള്‍