നിയമസഭ തിരഞ്ഞെടുപ്പിന്റെ ഭാഗമായി ഭിന്നശേഷിക്കാര്‍ക്ക് തപാല്‍ വോട്ട് നല്‍കുന്നതുമായി ബന്ധപ്പെട്ട സംശയ ദൂരീകരണത്തിനായി കോഴിക്കോട് സിവില്‍ സ്റ്റേഷനില്‍ ജില്ലാ സാമൂഹ്യനീതി ഓഫീസില്‍ കോള്‍ സെന്റര്‍ ആരംഭിച്ചു. 18005990469 എന്ന ടോള്‍ ഫ്രീ നമ്പറില്‍ സൗജന്യമായി രാവിലെ 10  മുതല്‍ വൈകീട്ട് അഞ്ച് വരെ ഭിന്നശേഷിക്കാര്‍ക്ക് അന്വേഷണം നടത്താമെന്ന് ജില്ലാ സാമൂഹ്യനീത് ഓഫീസര്‍ അറിയിച്ചു.

നിയമസഭാ തിരഞ്ഞെടുപ്പുമായി ബന്ധപ്പെട്ട് പോളിങ് ഡ്യൂട്ടിക്കായി നിയോഗിക്കപ്പെട്ട ഉദ്യോഗസ്ഥരുടെ നിയമന ഉത്തരവുകള്‍്  ബുധനാഴ്ച വിതരണം  ചെയ്തുതുടങ്ങി. അവധി ദിവസമായ വ്യാഴാഴ്ച (11.03.2021) ഉള്‍പ്പെടെയുള്ള ദിവസങ്ങളില്‍ പൊതുമേഖല, സര്‍ക്കാര്‍, അര്‍ദ്ധസര്‍ക്കാര്‍ സ്ഥാപന മേധാവികള്‍ ഉത്തരവ് കൈപ്പറ്റാനാവശ്യമായ ക്രമീകരണങ്ങള്‍ ഏര്‍പ്പെടുത്തണമെന്ന് ജില്ലാ തെരഞ്ഞെടുപ്പ്  ഓഫീസര്‍ അറിയിച്ചു.

നിയമസഭ തിരഞ്ഞെടുപ്പിന്റെ നാമനിര്‍ദ്ദേശ പത്രിക നാളെ മുതല്‍ (മാര്‍ച്ച് 12) സ്വീകരിക്കും. മാര്‍ച്ച് 19 -ആണ്
അവസാനതീയതി.  20- ന് സൂക്ഷ്മ പരിശോധന നടക്കും.  22 -ആണ്  പിന്‍വലിക്കാനുള്ള അവസാന തീയതി.   പത്രിക സമര്‍പ്പിക്കാനെത്തുമ്പോള്‍ സ്ഥാനാര്‍ഥിക്കൊപ്പം രണ്ടുപേരെ മാത്രമേ അനുവദിക്കൂ. പത്രികാ സമര്‍പ്പണത്തിനായി ഉപയോഗിക്കുന്ന വാഹനങ്ങളും രണ്ടെണ്ണം മാത്രമേ പാടുള്ളൂ. നാമനിര്‍ദേശപത്രിക ഓണ്‍ലൈനായി സമര്‍പ്പിക്കാം. ഓണ്‍ലൈനായി പത്രിക നല്‍കുന്നവര്‍  ഡൗണ്‍ലോഡ് ചെയ്ത് പകര്‍പ്പ് വരണാധികാരിക്ക് നല്‍കണം. സ്ഥാനാര്‍ഥി കെട്ടിവെയ്ക്കേണ്ട തുകയും ഓണ്‍ലൈനായി അടയ്ക്കാം.

നിയമസഭ തെരഞ്ഞെടുപ്പുമായി ബന്ധപ്പെട്ട് ടെലിവിഷന്‍ ചാനലുകള്‍, കേബിള്‍ നെറ്റ്വര്‍ക്കുകള്‍, റേഡിയോ, പ്രൈവറ്റ് എഫ്എം ചാനലുകള്‍, സിനിമാ തിയറ്ററുകള്‍, സമൂഹ മാധ്യമങ്ങള്‍, പൊതുസ്ഥലങ്ങളില്‍ പ്രദര്‍ശിപ്പിക്കുന്ന രാഷ്ട്രീയ പരസ്യ വീഡിയോ പ്രദര്‍ശനങ്ങള്‍, ബള്‍ക്ക് എസ്എംഎസ്, വോയിസ് മെസേജ്, ഇ-പേപ്പറുകള്‍ എന്നിവയില്‍ നല്‍കുന്ന പരസ്യങ്ങള്‍ എന്നിവയ്ക്ക് ജില്ലാതല മീഡിയ സര്‍ട്ടിഫിക്കേഷന്‍ ആന്‍ഡ് മോണിറ്ററിംഗ് കമ്മിറ്റിയുടെ (എംസിഎംസി  മുന്‍കൂര്‍ അംഗീകാരം നേടണം.

ജില്ലയില്‍ തെരഞ്ഞെടുപ്പ് സുഗമമാക്കുന്നതിന് അവകാശം പോര്‍ട്ടലുമായി ജില്ലാഭരണകൂടം.  അംഗപരിമിതര്‍, 80 വയസും അതില്‍ കൂടുതലുമുള്ള ആളുകള്‍, കോവിഡ് 19 ഉള്ളവര്‍ എന്നിവര്‍ക്കായി പോസ്റ്റല്‍ ബാലറ്റുകള്‍ വിതരണം ചെയ്യുന്നതിന്  രൂപകല്‍പ്പന ചെയ്തിരിക്കുന്ന വെബ് പേജാണിത്. തെരഞ്ഞെടുപ്പ് പ്രക്രിയയില്‍ എല്ലാ ആളുകള്‍ക്കും വോട്ടവകാശം ഉറപ്പുവരുത്തുകയാണ് ലക്ഷ്യം.