സ്‌കോൾ-കേരളയുടെ 2020-22 ബാച്ചിലേക്കുള്ള ഒന്നാം വർഷ ഹയർ സെക്കൻഡറി കോഴ്‌സുകൾക്കും വി.എച്ച്.എസ്.ഇ അഡീഷണൽ മാത്തമാറ്റിക്‌സ് കോഴ്‌സിനും മാർച്ച് 20 വരെ രജിസ്റ്റർ ചെയ്യാം.

സംസ്ഥാനത്തിന്റെ വികസന പ്രവർത്തനങ്ങളുടെ ധനശേഖരണാർഥം 1000 കോടി രൂപയുടെ കടപ്പത്രം പുറപ്പെടുവിക്കുന്നു. ഇതിനായുള്ള ലേലം മാർച്ച് 16ന് റിസർവ് ബാങ്കിന്റെ മുംബൈ ഫോർട്ട് ഓഫീസിൽ ഇ-കുബേർ സംവിധാനം വഴി നടക്കും. ലേലം സംബന്ധിച്ച വിജ്ഞാപനത്തിനും (നമ്പർ: എസ്.എസ്-1/71/2021 ഫിൻ. തിയതി 10.03.2021) വിശദാംശങ്ങൾക്കും ധനവകുപ്പിന്റെ വെബ്‌സൈറ്റ്  (www.finance.kerala.gov.in) സന്ദർശിക്കുക.
പി.എൻ.എക്സ്.1172/2021

നിയമസഭാ തിരഞ്ഞെടുപ്പ് നടത്തിപ്പ് നിരീക്ഷിക്കാൻ തിരഞ്ഞെടുപ്പ് കമ്മീഷൻ സംസ്ഥാനതലത്തിൽ മൂന്ന് പ്രത്യേക നിരീക്ഷകരെ നിയമിച്ചു. ജില്ലാതലങ്ങളിലും മണ്ഡലതലങ്ങളിലും നിയോഗിച്ച പൊതു, ചെലവ്, പോലീസ് നിരീക്ഷകർക്ക് പുറമേയാണ് ഇത്തവണ സംസ്ഥാനതലത്തിൽ മൂന്ന് നിരീക്ഷകരെ കൂടി കേന്ദ്ര തിരഞ്ഞെടുപ്പ് കമ്മീഷൻ നിയോഗിച്ചിട്ടുള്ളതെന്ന് മുഖ്യ തിരഞ്ഞെടുപ്പ് ഓഫീസർ ടിക്കാറാം മീണ അറിയിച്ചു.

കേരളത്തില്‍ വ്യാഴാഴ്ച 2133 പേര്‍ക്ക് കോവിഡ്-19 സ്ഥിരീകരിച്ചു. കോഴിക്കോട് 261, പത്തനംതിട്ട 206, എറണാകുളം 205, കണ്ണൂര്‍ 200, കോട്ടയം 188, മലപ്പുറം 179, തൃശൂര്‍ 172, ആലപ്പുഴ 168, കൊല്ലം 152, കാസര്‍ഗോഡ് 117, തിരുവനന്തപുരം 116, പാലക്കാട് 88, ഇടുക്കി 46, വയനാട് 35 എന്നിങ്ങനേയാണ് ജില്ലകളില്‍ രോഗ ബാധ സ്ഥിരീകരിച്ചത്.

നിയമസഭാ തിരഞ്ഞെടുപ്പിന്‍റെ ചിലവു നിരീക്ഷകരായി കേന്ദ്ര തിരഞ്ഞെടുപ്പ് കമ്മീഷന്‍ നിയോഗിച്ച രണ്ട് ഉദ്യോഗസ്ഥര്‍ ജില്ലയില്‍ എത്തി. ചങ്ങനാശേരി, കാഞ്ഞിരപ്പള്ളി, പൂഞ്ഞാര്‍ മണ്ഡലങ്ങളുടെ ചുമതലയുള്ള സുമന്ത് ശ്രീനിവാസ്,  പാലാ, കടുത്തുരുത്തി, വൈക്കം മണ്ഡലങ്ങളിലെ ചിലവ് നിരീക്ഷകനായ ഷെയ്ഖ് അമീന്‍ഖാന്‍ യാസിന്‍ ഖാന്‍ എന്നിവരാണ് എത്തിയത്. 

ഏറ്റുമാനൂര്‍,കോട്ടയം, പുതുപ്പള്ളി മണ്ഡലങ്ങളുടെ ചുമതലയുള്ള ആഷിഷ് കുമാര്‍ ഇന്ന്(മാര്‍ച്ച് 12) എത്തിച്ചേരും.

ഉത്തരവ് സ്വീകരിക്കാന്‍ സ്ഥാപനങ്ങള്‍ അവധി ദിവസങ്ങളിലും പ്രവര്‍ത്തിക്കണം

നിയമസഭാ തിരഞ്ഞെടുപ്പ് ജോലിക്ക് നിയോഗിക്കപ്പെട്ട ഉദ്യോഗസ്ഥര്‍ക്ക് നിയമന ഉത്തരവുകള്‍ ഇന്ന്(മാര്‍ച്ച് 12) വിതരണം ചെയ്തു തുടങ്ങും. ബുധനാഴ്ച്ച ആദ്യ ഘട്ട റാന്‍ഡമൈസേഷനിലുടെ തിരഞ്ഞെടുക്കപ്പെട്ട 13492 പേര്‍ക്കുള്ള നിയമന ഉത്തരവുകള്‍ ഇന്നലെ(മാര്‍ച്ച് 11) അതത് വില്ലേജ് ഓഫീസുകളില്‍ എത്തി ഇന്നു മുതല്‍ ഓരോ ഉദ്യോഗസ്ഥര്‍ക്കും സ്ഥാപനങ്ങളില്‍ ഉത്തരവ് ലഭ്യമാക്കും. 

പ്രൊബേഷന്‍ ശാക്തീകരണ പ്രവര്‍ത്തനങ്ങളുടെ ഭാഗമായി ജില്ലാ പ്രൊബേഷന്‍ ഓഫീസ്, ഐ.ടി.ഡി.പി, ജയില്‍ വകുപ്പ്, ജില്ലാ ശിശു സംരക്ഷണ യൂണിറ്റ് എന്നിവയുടെ സഹകരണത്തോടെ താലൂക്ക് തല ബോധവല്‍ക്കരണ സെമിനാര്‍ സംഘടിപ്പിച്ചു. ജില്ലാ സ്പോര്‍ട്സ് കൗണ്‍സില്‍ ഹാളില്‍ നടന്ന പരിപാടി ജില്ലാ പ്രൊബേഷന്‍ ഓഫീസര്‍ കെ.കെ. പ്രജിത്ത് ഉദ്ഘാടനം ചെയ്തു. ഐ.ടി.ഡി.പി പ്രൊജക്റ്റ് ഓഫീസര്‍ കെ.സി. ചെറിയാന്‍ അധ്യക്ഷത വഹിച്ചു.

ഗവ. എഞ്ചിനീയറിംഗ് കോളേജിലേക്ക് കുറഞ്ഞത് മൂന്ന് വര്‍ഷം വാറന്റിയുള്ള യൂണിഫൈഡ് ത്രഡ് മാനേജ്‌മെന്റ് (യു.ടി.എം) വിതരണം ചെയ്യുന്നതിന് മുദ്രവെച്ച ടെണ്ടറുകള്‍ ക്ഷണിച്ചു. ടെണ്ടറുകള്‍ മാര്‍ച്ച് 24ന് ഉച്ചയ്ക്ക് രണ്ടിന് മുമ്പായി പ്രിന്‍സിപ്പാള്‍ ഗവ. എഞ്ചിനീയറിംഗ് കോളേജ് വയനാട്, തലപ്പുഴ (പി.ഒ), മാനന്തവാടി എന്ന വിലാസത്തില്‍ അയച്ചു തരേണ്ടതും കവറിനു പുറത്ത് ടെണ്ടര്‍ നമ്പറും ഇനത്തിന്റെ പേരും രേഖപ്പെടുത്തേണ്ടതുമാണ്. ടെണ്ടറുകള്‍ അന്ന് വൈകീട്ട് 3ന് തുറക്കും. ഫോണ്‍: 04935 257321.
 

പോലീസ് വകുപ്പില്‍ പോലീസ് കോണ്‍സ്റ്റബിള്‍ ഡ്രൈവര്‍ തസ്തികയുടെ തെരഞ്ഞെടുപ്പിനായി ശാരീരിക അളവെടുപ്പ്, പ്രായോഗിക പരീക്ഷ എന്നിവയില്‍ യോഗ്യത നേടിയ ഉദ്യോഗാര്‍ത്ഥികളുടെ അസ്സല്‍ രേഖകകളുടെ പരിശോധന മാര്‍ച്ച് 15, 16 ദിവസങ്ങളില്‍ കേരള പബ്ലിക് സര്‍വീസ് കമ്മീഷന്‍ വയനാട് ജില്ലാ ഓഫീസില്‍ നടക്കും. യോഗ്യരായ ഉദ്യോഗാര്‍ത്ഥികള്‍ക്ക് പ്രൊഫൈല്‍ മെസേജ്, എസ്.എം.എസ് എന്നിവ അയച്ചിട്ടുണ്ട്. ഉദ്യോഗാര്‍ത്ഥികള്‍ ആവശ്യമായ എല്ലാ അസ്സല്‍ രേഖകളും പ്രൊഫൈലില്‍ അപ്‌ലോഡ് ചെയ്ത് യഥാസമയം പരിശോധനയ്ക്കായി ഹാജരാകണം.