വേങ്ങര നിയോജക മണ്ഡലത്തില്‍  24 റോഡുകളുടെ പുനരുദ്ധാരണ പ്രവൃത്തികള്‍ക്ക് ഒരു കോടി 52 ലക്ഷം രൂപയുടെ ഭരണാനുമതി ലഭിച്ചതായി കെ. എന്‍.എ ഖാദര്‍ എം.എല്‍.എ അറിയിച്ചു. കലാവര്‍ഷ കെടുതി മൂലം ഗതാഗതയോഗ്യമല്ലാതായ റോഡുകളുടെ പുനരുദ്ധാരണ പ്രവൃത്തികള്‍ക്കാണ് ഒരു കോടി 52 ലക്ഷം രൂപയുടെ ഭരണാനുമതി ലഭിച്ചത്.
 

സംസ്ഥാന സര്‍ക്കാര്‍ കഴിഞ്ഞ നാലര വര്‍ഷത്തിനിടെ മലപ്പുറം ജില്ലയില്‍ നടപ്പാക്കിയ പ്രധാന വികസന പ്രവര്‍ത്തനങ്ങളെ ഉള്‍പ്പെടുത്തി ജില്ലാ ഇന്‍ഫര്‍മേഷന്‍ ഓഫീസ് തയ്യാറാക്കിയ 'മുന്നേറുന്ന മലപ്പുറം' വികസന കൈപ്പുസ്തകം പ്രകാശനം ചെയ്തു. മലപ്പുറം പ്രസ് ക്ലബ് ഹാളില്‍ നടന്ന ചടങ്ങില്‍ ഇന്ത്യന്‍ ഫുട്‌ബോള്‍ താരം അനസ് എടത്തൊടിക പ്രസ് ക്ലബ് സെക്രട്ടറി കെ.പി.എം റിയാസിന് പുസ്തകം നല്‍കി പ്രകാശനം ചെയ്തു. ചടങ്ങില്‍ ഇന്‍ഫര്‍മേഷന്‍ ഓഫീസര്‍ പി. റഷീദ് ബാബു, പ്രസ്‌ക്ലബ് പ്രസിഡന്റ് ഷംസുദ്ദീന്‍ മുബാറക്ക്, ട്രഷറര്‍  സി.വി രാജീവ്, മാധ്യമപ്രവര്‍ത്തകര്‍ തുടങ്ങിയവര്‍ പങ്കെടുത്തു.
 

സംസ്ഥാന സര്‍ക്കാര്‍ കഴിഞ്ഞ നാലര വര്‍ഷത്തിനിടെ കൈവരിച്ച നേട്ടങ്ങള്‍ അനാവരണം ചെയ്ത് ഇന്‍ഫര്‍മേഷന്‍ ആന്‍ഡ് പബ്ലിക്ക് റിലേഷന്‍സ് വകുപ്പ് 'മുന്നേറുന്ന മലപ്പുറം' എന്ന പേരില്‍ നടത്തുന്ന ഫോട്ടോ, വീഡിയോ പ്രദര്‍ശനം ഫെബ്രുവരി 26, 27 തീയതികളില്‍ ചെമ്മാട് തൃക്കുളം ഹൈസ്‌കൂളിന് സമീപം നടക്കും.
 

സംസ്ഥാന സര്‍ക്കാരിന്റെ പ്രാദേശിക സുസ്ഥിര വികസന ക്യാമ്പയിനിന്റെ ഭാഗമായി ജില്ലാ ഇന്‍ഫര്‍മേഷന്‍ ഓഫീസിന്റെ നേതൃത്വത്തില്‍ നാളെ (ഫെബ്രുവരി 26)പൂക്കോട്ടൂരില്‍  വികസന ശില്‍പശാല സംഘടിപ്പിക്കും. പള്ളിപ്പടി പള്ളി ഹാളില്‍ വൈകീട്ട് മൂന്നിന് നടക്കുന്ന ശില്‍പശാല മലപ്പുറം ബ്ലോക്ക് പഞ്ചായത്ത് പ്രസിഡന്റ് അഡ്വ.കാരാട്ട് അബ്ദുറഹ്‌മാന്‍ ഉദ്ഘാടനം ചെയ്യും. പൂക്കോട്ടൂര്‍ ഗ്രാമപഞ്ചായത്ത് പ്രസിഡന്റ് കെ. മുഹമ്മദ് ഇസ്മായില്‍ മാസ്റ്റര്‍ അധ്യക്ഷനാകും. ജില്ലാ പഞ്ചായത്ത് അംഗം അഡ്വ. പി.വി മനാഫ് മുഖ്യാതിഥിയാകും.

കോവിഡിന്റെ പ്രത്യേക സാഹചര്യത്തില്‍ പരീക്ഷയുമായി ബന്ധപ്പെട്ട് കുട്ടികള്‍ക്കുണ്ടാകുന്ന മാനസിക സമ്മര്‍ദ്ദങ്ങള്‍ ഇല്ലാതാക്കി  മാനസിക പിന്തുണ നല്‍കുന്നതിന് ജില്ലാഭരണകൂടത്തിന്റെ നേതൃത്വത്തില്‍ 24 മണിക്കൂറും പ്രവര്‍ത്തിക്കുന്ന ജില്ലാതല കോള്‍ സെന്റര്‍ ആരംഭിച്ചു. 'കൂള്‍ ഓഫ് ടൈം കോള്‍ സെന്റര്‍' എന്ന പേരില്‍ സിവില്‍ സ്റ്റേഷനിലെ ഐ.ടി അറ്റ് സ്‌കൂള്‍ ഹാളില്‍ ആരംഭിച്ച കോള്‍ സെന്റര്‍ ജില്ലാകലക്ടര്‍ കെ. ഗോപാലകൃഷ്ണന്‍ ഉദ്ഘാടനം ചെയ്തു.

ഗോത്രജനതയുടെ  സാമൂഹിക സാമ്പത്തികാവസ്ഥയും ജീവിതാനുഭവങ്ങളും നേരിട്ട് മനസിലാക്കുന്നതിനായി കൊട്ടാരക്കര കില ഇ.റ്റി.സി നേതൃത്വത്തില്‍ ജില്ലയിലെ തെരഞ്ഞെടുത്ത ഗോത്രസങ്കേതങ്ങളില്‍ വി.ഇ.ഒ.മാര്‍ ഗോത്രായനം നടത്തി.   നിലമ്പൂര്‍ ബ്ലോക്കിലെ ചാലിയാര്‍ പഞ്ചായത്തിലെ അകമ്പാടം, വെണ്ണേക്കോട്, അമ്പുമല, വെറ്റിലക്കൊല്ലി, പാലക്കയം എന്നീ ഗോത്രവര്‍ഗ സങ്കേതങ്ങളാണ് വി.ഇ.ഒ.മാര്‍ സന്ദര്‍ശിച്ചു പഠനം നടത്തിയത്.  

ദേശീയവിഭാഗത്തിന്റെ ബൈലൈന്‍ പ്രവൃത്തിയില്‍ ബി.എം, ബി.സി ചെയ്ത് നവീകരിച്ച കോട്ടപ്പടി-ചെറാട്ടുകുഴി-മുണ്ടുപറമ്പ് റോഡ് ഉദ്ഘാടനം ഇന്ന്(ഫെബ്രുവരി 25) വൈകീട്ട് നാലിന് പൊതുമരാമത്ത്, രജിസ്‌ട്രേഷന്‍ വകുപ്പ് മന്ത്രി ജി. സുധാകരന്‍ നിര്‍വഹിക്കും. പി. ഉബൈദുള്ള എം.എല്‍.എ അധ്യക്ഷനാകും. ദേശീയ പാത അസിസ്റ്റന്റ് എക്‌സിക്യൂട്ടീവ് എഞ്ചിനീയര്‍ എം.കെ സിമി റിപ്പോര്‍ട്ട് അവതരിപ്പിക്കും. മലപ്പുറം നഗരസഭ ചെയര്‍മാന്‍ മുജീബ് കാടേരി, നഗരസഭ കൗണ്‍സിലര്‍മാര്‍ എന്നിവര്‍ പങ്കെടുക്കും.

റോഡ് കുഴിക്കുന്നത് പൊതുമരാമത്ത് വകുപ്പിനെ അറിയിക്കാൻ ബി.എസ്.എൻ.എല്ലിന്റെ 24 മണിക്കൂറും പ്രവർത്തിക്കുന്ന  ബി.എസ്.എൻ.എൽ   ഡയൽ  ബിഫോർ ഡിഗ് ടോൾ ഫ്രീ സർവീസ് (1800 425  6677). പദ്ധതിയുടെ ഉദ്ഘാടനം പൊതുമരാമത്ത് മന്ത്രി ജി.സുധാകരൻ നിർവഹിച്ചു. റോഡ് കുഴിക്കുന്നതു ശ്രദ്ധയിൽപ്പെട്ടാൽ ടോൾ ഫ്രീ സംവിധാനം പ്രയോജനപ്പെടുത്തി വിവരങ്ങൾ ബി.എസ്.എൻ.എലിനെയും പൊതുമരാമത്തു വകുപ്പിനെയും അറിയിക്കണമെന്ന് അദ്ദേഹം പറഞ്ഞു.

തിരുവനന്തപുരം, കോഴിക്കോട് സർക്കാർ ഹോമിയോപ്പതിക് മെഡിക്കൽ കോളേജുകളിൽ ഒന്നാംവർഷ പി.ജി(ഹോമിയോ) ക്ലാസ് മാർച്ച് ഒന്നിന് ആരംഭിക്കും. വിദ്യാർത്ഥികൾ രാവിലെ 10ന് കോളേജിൽ എത്തണം.
പി.എൻ.എക്സ്. 1055/2021