സര്‍ക്കാര്‍, സ്വകാര്യ ഐ.ടി.ഐകളില്‍ നിന്നും വിജയകരമായി തൊഴില്‍ പരിശീലനം നേടിയ ട്രെയ്‌നികള്‍ക്ക് തൊഴില്‍ സാധ്യത ഉറപ്പ് വരുത്തുന്നതിന്റെ ഭാഗമായി വ്യവസായിക പരിശീലന പരിശീലന വകുപ്പിന്റെ ആഭിമുഖ്യത്തില്‍ സ്‌പെക്ട്രം തൊഴില്‍മേള  സംഘടിപ്പിച്ചു. ജില്ലയില്‍ വിവിധ ഐ.ടി.ഐകളില്‍ നിന്ന് എസ്.ടി.സി, എന്‍.സി.ടി, എന്‍.സി.എ സര്‍ട്ടിഫിക്കറ്റുകള്‍ നേടിയ 375 പേരും കേരളത്തിന് അകത്തും പുറത്തുനിന്നുമുമുള്ള 30 കമ്പനികളും തൊഴില്‍മേളയില്‍ പങ്കെടുത്തു.

മോട്ടോർ വാഹന വകുപ്പിൽ നിന്നും സ്മാർട്ട് മൂവ് സോഫ്റ്റ്വെയറിലൂടെ ലൈസൻസിന് അപേക്ഷിച്ചവരും ലേണേഴ്‌സ് ലൈസൻസ് എടുത്തവരും   എല്ലാ അസ്സൽ സർട്ടിഫിക്കറ്റുകളും  സഹിതം മാർച്ച് 31 നകം സർവ്വീസുകൾ പൂർത്തിയാക്കണം. മാർച്ച് 31 ന് ശേഷം  മറ്റ് സർവ്വീസുകളോ ലൈസൻസ് ടെസ്റ്റ് നടത്തുവാനോ സ്മാർട്ട് മൂവ് സോഫ്റ്റ് വെയറിലൂടെ നൽകിയ അപേക്ഷ പ്രകാരം സാധ്യമാവുകയില്ലെന്ന് കാസർകോട് ആർ ടി ഒ അറിയിച്ചു.  ഫെബ്രുവരി ഒന്നിന് മുൻപ് കാലാവധി തീർന്ന അപേക്ഷകളിൽ മതിയായ ഫീസ് അടച്ചിട്ടുണ്ടെന്ന് ഉറപ്പ് വരുത്തണം. 

കാഞ്ഞങ്ങാട് ജില്ലാ ആശുപത്രിയിൽ എച്ച് എം സി മുഖേന  സെക്യൂരിറ്റി കം ഡ്രൈവർമാരെ നിയമിക്കുന്നു. കൂടിക്കാഴ്ച മാർച്ച് നാലിന് രാവിലെ 10.30 ന് കാഞ്ഞങ്ങാട് ചെമ്മട്ടംവയലിലെ ജില്ലാ ആശുപത്രി ഓഫീസിൽ നടക്കും. എസ് എസ് എൽ സി വിജയിച്ച 50ൽ താഴെ പ്രായമുള്ള ഹെവി ലൈസൻസ് ഉള്ളവർക്ക് പങ്കെടുക്കാം. ഫോൺ: 0467 2217018.

ജില്ലയിൽ ദേശീയ പാതാ വികസനത്തിനുവേണ്ടി ഭൂമിയേറ്റെടുക്കുന്നതിന് ഫണ്ട് അനുവദിച്ച മുഴുവൻ ഭൂവുടമകൾക്കും നോട്ടീസ് അയച്ചിട്ടുണ്ടെന്ന് എൽ എ എൻ എച്ച് സ്‌പെഷ്യൽ ഡെപ്യൂട്ടി കളക്ടർ അറിയിച്ചു. നോട്ടീസ് ലഭിച്ചവർ ആവശ്യപ്പെട്ട രേഖകൾ എത്രയും പെട്ടന്ന് സ്‌പെഷ്യൽ തഹസിൽദാറെ ഏൽപ്പിക്കണം. മുഴുവൻ രേഖകളും സമർപ്പിക്കുന്നവർക്ക് നഷ്ടപരിഹാരത്തുക ഉടനടി നൽകും

കാസർകോട്  എൽ.ബി.എസ് എഞ്ചിനീയറിങ്   സൈറ്റ് സൂപ്പർവൈസറുടെ ഒഴിവുണ്ട്. കൂടിക്കാഴ്ച മാർച്ച് മൂന്നിന് രാവിലെ 11 ന് കോളേജ് ഓഫീസിൽ. സിവിൽ എഞ്ചിനീയറിംഗിൽ ബിരുദമോ ഡിപ്ലോമയോ ഉള്ളവർക്ക് പങ്കെടുക്കാം. ഫോൺ: 04994-250290

സ്‌കൂളുകളിൽ കോവിഡ് -19 വ്യാപനം തടയുക, കൗമാരപ്രായക്കാർക്കിടയിൽ ആരോഗ്യകരമായ ഭക്ഷണക്രമം പ്രോത്സാഹിപ്പിക്കുക എന്നീ ലക്ഷ്യങ്ങൾ മുൻനിർത്തി ജില്ലാ മെഡിക്കൽ ഓഫീസിന്റെ (ആരോഗ്യം) നേതൃത്വത്തിൽ ബളാന്തോട് ഗവ സെക്കന്ററി സ്‌കൂളിലെ ഹയർ സെക്കന്ററി വിദ്യാർത്ഥികൾക്കായി ജില്ലാതല ബോധവത്കരണ  സെമിനാർ സംഘടിപ്പിച്ചു. ജില്ലാ എഡ്യൂക്കേഷൻ ആൻഡ് മീഡിയ ഓഫീസർ അബ്ദുൾ ലത്തീഫ് മഠത്തിൽ ഉദ്ഘാടനം ചെയ്തു. പ്രിൻസിപ്പൽ എം. ഗോവിന്ദൻ അധ്യക്ഷനായി. ശംബുദാസ് ദാസ് പി, ബിജു ജോസഫ്, സുനിൽ കുമാർ വി , ചന്ദ്രൻ ബി, രഞ്ജിത്ത് കെ.പി എന്നിവർ സംസാരിച്ചു.

സംസ്ഥാന ഫിഷറീസ് വകുപ്പിന്റെ കീഴിൽ പ്രവർത്തിക്കുന്ന സൊസൈറ്റി ഫോർ അസിസ്റ്റൻസ് ടു ഫിഷർ വിമൺ (സാഫ്)  തീരമൈത്രി സീ ഫുഡ് റസ്റ്റോറന്റ് പദ്ധതിയിലേക്ക്  ജില്ലയിലെ തീരദ്ദേശ പഞ്ചായത്തുകളിലെ മത്സ്യത്തൊഴിലാളി വനിതകൾക്ക് അപേക്ഷിക്കാം. അഞ്ച് പേർ വീതമുള്ള ഗ്രൂപ്പുകളെയാണ് പദ്ധതിക്കായി പരിഗണിക്കുന്നത്. ഫിഷറീസ് വകുപ്പ് തയ്യാറാക്കിയ ഫിംസിൽ അംഗമായ 20നും 50നും ഇടയിൽ പ്രായമുള്ള മത്സ്യത്തൊഴിലാളി വനിതകളായിരിക്കണം അപേക്ഷകർ. ഒരു ഗ്രൂപ്പിന് റസ്റ്റോറന്റ് ആരംഭിക്കുന്നതിനായി പരമാവധി അഞ്ച് ലക്ഷം രൂപ വരെ അനുവദിക്കും. അപേക്ഷാ ഫോറം അതാത് ജില്ലകളിലെ ഫിഷറീസ് ഡെപ്യൂട്ടി ഡയറക്ടർ ഓഫീസ്  നിന്നും ലഭിക്കും.