സംസ്ഥാനത്ത് വിവിധ വകുപ്പുകളിലായി 3051 തസ്തികകൾ സൃഷ്ടിക്കാൻ മന്ത്രിസഭായോഗം തീരുമാനിച്ചതായി മുഖ്യമന്ത്രി പിണറായി വിജയൻ വാർത്താസമ്മേളനത്തിൽ അറിയിച്ചു. ഇതോടെ ഈ സർക്കാർ സൃഷ്ടിച്ച പുതിയ സ്ഥിരം തസ്തികകളുടെ എണ്ണം മുപ്പതിനായിരം കടന്നു. താൽക്കാലികമടക്കം അത് അരലക്ഷത്തോളമാണ്.

സാംസ്‌കാരിക വകുപ്പിന് കീഴിലുള്ള കേരള സാംസ്‌കാരിക പ്രവർത്തക ക്ഷേമനിധി ബോർഡ് നൽകുന്ന കലാകാര പെൻഷൻ നിലവിലുള്ള 3000  രൂപയിൽ നിന്ന് 4000  രൂപയായി വർധിപ്പിക്കാൻ തീരുമാനിച്ചു. 1000  രൂപയായിരുന്ന ക്ഷേമനിധി പെൻഷൻ സർക്കാർ നേരത്തെ 3000  രൂപയാക്കി ഉയർത്തിയിരുന്നു. ഇപ്പോൾ 1000  രൂപ കൂടി വർധിപ്പിച്ച്  4000  രൂപയാക്കി.  സാംസ്‌കാരിക വകുപ്പ് വഴി നൽകുന്ന കലാകാര പെൻഷൻ 1500  രൂപയിൽ നിന്ന് 1600  രൂപയാക്കി വർധിപ്പിച്ചു. നിലവിൽ മൂവായിരത്തോളം പേർക്കാണ് സാംസ്‌കാരിക വകുപ്പിൽ നിന്നും കലാകാര പെൻഷൻ അനുവദിച്ചു വരുന്നത്.
പി.എൻ.എക്സ്. 896/2021

2018-19, 2019-20 വർഷങ്ങളിൽ എസ്.ജി.എഫ്.ഐ നടത്തിയ ദേശീയ സ്‌കൂൾ മത്സരങ്ങളിൽ ആദ്യ മൂന്ന് സ്ഥാനങ്ങൾ കരസ്ഥമാക്കിയ കുട്ടികൾക്ക് ക്യാഷ് അവാർഡ് നൽകുന്നു.  dpisports.in ൽ 27 ന് മുൻപ് രജിസ്റ്റർ ചെയ്യണം. രജിസ്ട്രേഷൻ നടത്താനുള്ള യൂസർ ഗൈഡ് വെബ്സൈറ്റിൽ ലഭിക്കും.
പി.എൻ.എക്സ്. 895/2021

* 'ഇൻസ്റ്റിറ്റിയൂഷണൽ ഹിസ്റ്ററി ഓഫ് കേരള പോലീസ്' പ്രകാശനം ചെയ്തു
  പൊതുജനങ്ങളോട് മനുഷ്യത്വപരമായ സമീപനം സ്വീകരിക്കുന്ന കാര്യത്തിൽ കേരള പോലീസിന് രാജ്യത്ത് ഒന്നാം സ്ഥാനമാണെന്ന് ഗവർണർ ആരിഫ് മുഹമ്മദ് ഖാൻ പറഞ്ഞു. പൊതുജനസൗഹൃദപരമായ സമീപനം, കമ്മ്യൂണിറ്റി പോലീസിംഗ് മുതലായവയിലും കേരള പോലീസിന് ഒന്നാം സ്ഥാനമാണ് ഉള്ളതെന്നും അദ്ദേഹം ചൂണ്ടിക്കാട്ടി. കേരള പോലീസിന്റെ ചരിത്രം പ്രതിപാദിക്കുന്ന 'ഇൻസ്റ്റിറ്റിയൂഷണൽ ഹിസ്റ്ററി ഓഫ് കേരള പോലീസ്' പുസ്തകത്തിന്റെ പ്രകാശനം മുഖ്യമന്ത്രി പിണറായി വിജയന് നൽകി നിർവഹിച്ച് സംസാരിക്കുകയായിരുന്നു അദ്ദേഹം.

പരിശീലനം പൂർത്തിയായ പതിനഞ്ചു പോലീസ് നായ്ക്കളുടെ പാസിംഗ് ഔട്ട് പരേഡിൽ മുഖ്യമന്ത്രി പിണറായി വിജയൻ അഭിവാദ്യം സ്വീകരിച്ചു. പോലീസ് നായകളുടെ സേവനം ശക്തിപ്പെടുത്തുന്നതിന്റെ ആവശ്യകത തിരിച്ചറിഞ്ഞാണ് പുതിയ നായ്ക്കുട്ടികളെ സേനയിൽ ഉൾപ്പെടുത്തിയതെന്ന് മുഖ്യമന്ത്രി പറഞ്ഞു. എല്ലാ സ്ഥലത്തും നായ്ക്കളുടെ സേവനം ഉപയോഗപ്പെടുത്തുന്നുണ്ട്. കേരള പോലീസിൽ തന്നെ ശ്രദ്ധേയമായ ഒട്ടേറെ കേസുകളിൽ കുറ്റവാളികളെ കണ്ടെത്താൻ പോലീസ് നായ്ക്കൾ സഹായിച്ചിട്ടുണ്ട്. എല്ലാക്കാലത്തും ഇവർക്ക് മികച്ച പരിശീലനത്തിനും പരിപാലനത്തിനും പോലീസ് ശ്രദ്ധിച്ചിട്ടുണ്ടെന്നും അദ്ദേഹം പറഞ്ഞു.

നിയമസഭാ തെരഞ്ഞെടുപ്പ് 2021 നോടനുബന്ധിച്ച് ജില്ലാതല ഓഫീസര്‍മാരുടെ യോഗം ഇന്ന് (ഫെബ്രുവരി 17) രാവിലെ 11.30 ന് കളക്ടറുടെ ചേംബറില്‍ ചേരും.  ജില്ലാതല ഉദ്യോഗസ്ഥര്‍ യോഗത്തില്‍ പങ്കെടുക്കണമെന്ന് ജില്ലാ കളക്ടര്‍ അറിയിച്ചു.

തെരഞ്ഞെടുപ്പുമായി ബന്ധപ്പെട്ട് നിയോഗിക്കപ്പെട്ട നോഡല്‍ ഓഫീസര്‍മാരുടെ യോഗം 19 ന് ഉച്ചയ്ക്ക്ു ശേഷം 2.30 ന് ജില്ലാ കലക്ടറുടെ ചേംബറില്‍ ചേരും.

കല്‍പ്പറ്റ ഗവ.വൊക്കേഷണല്‍ ഹയര്‍ സെക്കന്ററി സ്‌കൂളില്‍ ഹയര്‍ സെക്കന്ററി വിഭാഗത്തിനായി നിര്‍മ്മിച്ച കെട്ടിടത്തിന്റെ ഉദ്ഘാടനം ഉന്നത വിദ്യാഭ്യാസ വകുപ്പ് മന്ത്രി ഡോ.കെ.ടി.ജലീല്‍ ഇന്ന് (ഫെബ്രുവരി 17) ഉച്ചയ്ക്ക് 2 ന് ഓണ്‍ലൈനായി നിര്‍വഹിക്കും.  സി.കെ.ശശീന്ദ്രന്‍ എം.എല്‍.എ. അധ്യക്ഷത വഹിക്കും.  എം.എസ്.ഡി.പി. ഫണ്ട് 1 കോടി 20 ലക്ഷം രൂപ ഉപയോഗിച്ചാണ് കെട്ടിടം നിര്‍മ്മിച്ചത്.