ഇത്തിക്കര ബ്ലോക്ക് പഞ്ചായത്തില്‍ തദ്ദേശ തിരഞ്ഞെടുപ്പ് സെക്ടറല്‍ മജിസ്‌ട്രേറ്റുമാര്‍ക്ക്, ബയോ മെഡിക്കല്‍ മെറ്റീരിയല്‍ ശേഖരണം എന്നിവയ്ക്ക്  ഉപയോഗിച്ച സ്വകാര്യ വാഹനങ്ങളുടെ വാടക തുക വിതരണം ഇന്ന്(ഫെബ്രുവരി 8) രാവിലെ 10 ന് ബ്ലോക്ക് ഓഫീസില്‍ നടക്കും. തിരിച്ചറിയല്‍ കാര്‍ഡ്, ആര്‍ സി ബുക്ക് തുടങ്ങിയവയുമായി ബന്ധപ്പെട്ടവര്‍ എത്തണമെന്ന് ബ്ലോക്ക് പഞ്ചായത്ത് സെക്രട്ടറി അറിയിച്ചു.  
(പി.ആര്‍.കെ നമ്പര്‍.315/2021)

ജില്ലയില്‍ ഇന്നലെ(ഫെബ്രുവരി 7) 824 പേര്‍ക്ക് കോവിഡ് സ്ഥിരീകരിച്ചു. 552 പേര്‍ രോഗമുക്തി നേടി. മുനിസിപ്പാലിറ്റികളില്‍ കരുനാഗപ്പള്ളി, പുനലൂര്‍, കൊട്ടാരക്കര ഭാഗങ്ങളിലും ഗ്രാമപഞ്ചായത്തുകളില്‍ തൊടിയൂര്‍, വിളക്കുടി, കുളക്കട, ചവറ, തഴവ, തലവൂര്‍, തേവലക്കര, വെളിനല്ലൂര്‍, നെടുവത്തൂര്‍, പെരിനാട്, തെ•ല, മൈനാഗപ്പള്ളി, തൃക്കരുവ, മയ്യനാട്, ശാസ്താംകോട്ട, കരീപ്ര, അഞ്ചല്‍, പട്ടാഴി വടക്കേകര, മൈലം, പിറവന്തൂര്‍, കുലശേഖരപുരം, കല്ലുവാതുക്കല്‍, ഇടമുളയ്ക്കല്‍, എഴുകോണ്‍ എന്നിവിടങ്ങളിലുമാണ് രോഗബാധിതര്‍ കൂടുതലുള്ളത്.

ജില്ലയില്‍ ഇതുവരെ 16106 പേര്‍ക്ക് കോവിഡ് വാക്സിന്‍ നല്‍കി. ഇന്നലെ(ഫെബ്രുവരി 7) 106 പേര്‍ക്കാണ് വാക്സിന്‍ നല്‍കിയത്. കേന്ദ്രം, വാക്സിന്‍ നല്‍കിയ കണക്ക് എന്ന ക്രമത്തില്‍ ചുവടെ.
അസീസിയ മെഡിക്കല്‍ കോളജ്-106.
(പി.ആര്‍.കെ നമ്പര്‍.313/2021)

ശ്രീഭൂതനാഥ പാടശേഖര സമിതിയുടെ നേതൃത്വത്തില്‍ തരിശ് നെല്‍കൃഷിയുടെ കൊയ്ത്തു മഹോത്സവം സംഘടിപ്പിച്ചു. ശ്രീഭൂതനാഥ ക്ഷേത്രം ആറാട്ടുകുളത്തിന് സമീപം നടന്ന ചടങ്ങില്‍ മുഖത്തല ബ്ലോക്ക് പഞ്ചായത്ത് പ്രസിഡന്റ് ബി യശോദ, തൃക്കോവില്‍വട്ടം ഗ്രാമപഞ്ചായത്ത് പ്രസിഡന്റ് ജലജകുമാരി, തൃക്കോവില്‍വട്ടം ഗ്രാമപഞ്ചായത്ത് അംഗം വസന്താ ബാലചന്ദ്രന്‍ എന്നിവര്‍ ചേര്‍ന്നു ഉദ്ഘാടനം ചെയ്തു.

കോവിഡ് മാനദണ്ഡങ്ങള്‍ പാലിക്കുന്നത് ഉറപ്പാക്കുന്നതിനു വേണ്ടി സബ് കലക്ടര്‍ ശിഖാ സുരേന്ദ്രന്റെ നേതൃത്വത്തില്‍ വിവിധ സ്ഥലങ്ങളില്‍ ഇന്നലെ(ഫെബ്രുവരി 7) ഉദ്യോഗസ്ഥ സംഘം പരിശോധന നടത്തി. ചാമക്കട മാര്‍ക്കറ്റ്,  തുണിക്കടകള്‍, മറ്റു വ്യാപാര സ്ഥാപനങ്ങള്‍ എന്നിവയ്ക്കുപുറമേ ആശ്രാമത്ത് നടക്കുന്ന പ്രദര്‍ശന സ്ഥലത്തും പരിശോധന നടത്തി. നിയമലംഘനം കണ്ടെത്തിയ സംഭവങ്ങളില്‍  പിഴ ചുമത്തി താക്കീത് നല്‍കി വിട്ടയച്ചു. രണ്ടാഴ്ച കര്‍ശന നിയന്ത്രണങ്ങള്‍ ഏര്‍പ്പെടുത്തിയാല്‍  പ്രതിരോധം ശക്തിപ്പെടുത്താനാകുമെന്ന് സബ് കലക്ടര്‍ പറഞ്ഞു.
(പി.ആര്‍.കെ നമ്പര്‍.311/2021)

ഇന്‍ഫര്‍മേഷന്‍-പബ്ലിക് റിലേഷന്‍സ് വകുപ്പിന്റെ ആഭിമുഖ്യത്തില്‍ സംസ്ഥാന സര്‍ക്കാരിന്റെ വികസന നേട്ടങ്ങള്‍ ജനങ്ങളിലേക്കെത്തിക്കുന്ന 'വികസന പെരുമയില്‍ കൊല്ല'മെന്ന പേരില്‍ ചിത്രപ്രദര്‍ശനം നടന്നു. കൊല്ലം ബീച്ച് പരിസരത്ത് കോവിഡ് മാനദണ്ഡം പാലിച്ച് സംഘടിപ്പിച്ച ചിത്രപ്രദര്‍ശനം മേയര്‍ പ്രസന്ന ഏണസ്റ്റ് ഉദ്ഘാടനം ചെയ്തു.

പൊതു വിദ്യാഭ്യാസ സംരക്ഷണ യജ്ഞത്തിന്റെ ഭാഗമായി സംസ്ഥാനത്തെ സര്‍ക്കാര്‍ വിദ്യാലയങ്ങളില്‍ സമാനതകളില്ലാത്ത മുന്നേറ്റം നടത്താന്‍ കഴിഞ്ഞതായി മുഖ്യമന്ത്രി പിണറായി വിജയന്‍ പറഞ്ഞു. മികച്ച വിദ്യാലയങ്ങളും ഉന്നത സൗകര്യങ്ങളും നാടിന്റെ അഭിമാനമാകും.  മികവിന്റെ കേന്ദ്രങ്ങളായി മാറിയ വിദ്യാലയങ്ങളുടെ പുതിയ കെട്ടിടങ്ങള്‍  ഓണ്‍ലൈനായി ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. പണക്കാരനെന്നോ പാവപ്പെട്ട വനെന്നോ ഭേദമില്ലാതെ  സമൂഹത്തിലെ എല്ലാ വിദ്യാര്‍ഥികള്‍ക്കും മികച്ച വിദ്യാഭ്യാസം നേടി കൊടുക്കയെന്നതാണ് സര്‍ക്കാറിന്റെ ലക്ഷ്യം.

ജില്ലയിലെ ജനജീവിതത്തെ ബാധിക്കുന്ന ബഫര്‍ സോണ്‍ പ്രഖ്യാപനത്തിനെതിരെ വയനാട് ജില്ലാ പഞ്ചായത്ത് ഐക്യ കണ്‌ഠേന പ്രമേയം പാസാക്കി. ജില്ലാ പഞ്ചായത്ത് പ്രസിഡന്റ് സംഷാദ് മരക്കാര്‍ അവതരിപ്പിച്ച പ്രമേയത്തെ ജില്ലാ പഞ്ചായത്ത് അംഗം സുരേഷ് താളൂര്‍ പിന്താങ്ങി. മുഴുവന്‍ അംഗങ്ങളും ഐകകണ്‌ഠേന പ്രമേയം അംഗീകരിച്ചു. കേന്ദ്രം വനം പരിസ്ഥിതി മന്ത്രാലയത്തിന് വയനാട് ജില്ലാ പഞ്ചായത്ത് പാസാക്കിയ പ്രമേയം അയച്ചു കൊടുക്കും.

. 340 പേര്‍ക്ക് രോഗമുക്തി

. 173 പേര്‍ക്ക് സമ്പര്‍ക്കത്തിലൂടെ രോഗബാധ

വയനാട് ജില്ലയില്‍ ഇന്ന് (6.02.21) 179 പേര്‍ക്ക് കോവിഡ് സ്ഥിരീകരിച്ചതായി ജില്ലാ മെഡിക്കല്‍ ഓഫീസര്‍ ഡോ. ആര്‍. രേണുക അറിയിച്ചു. 340 പേര്‍ രോഗമുക്തി നേടി. 173 പേര്‍ക്ക് സമ്പര്‍ക്കത്തിലൂടെയാണ് രോഗബാധ. ഇതില്‍ 3 പേരുടെ സമ്പര്‍ക്ക ഉറവിടം ലഭ്യമല്ല. വിദേശത്ത് നിന്നെത്തിയ മൂന്ന് പേര്‍ക്കും ഇതര സംസ്ഥാനത്ത് നിന്നെത്തിയ മൂന്ന് പേര്‍ക്കും രോഗം സ്ഥിരീകരിച്ചിട്ടുണ്ട്. 

തൊഴിൽ മേഖലയിൽ മികച്ച പ്രകടനം കാഴ്ചവെക്കുന്ന തൊഴിലാളികൾക്ക് സംസ്ഥാന സർക്കാർ നൽകുന്ന തൊഴിലാളി ശ്രേഷ്ഠ പുരസ്‌കാരത്തിൽ സംസ്ഥാനത്തെ മികച്ച തയ്യൽ തൊഴിലാളി അവാർഡ് കരസ്ഥമാക്കിയ മാനന്തവാടി പാണ്ടിക്കടവ് സ്വദേശി കുഞ്ഞി മുഹമ്മദിനെ മാനന്തവാടി ബ്ലോക്ക്‌ പഞ്ചായത്ത്‌ ആദരിച്ചു. ബ്ലോക്ക്‌ പഞ്ചായത്ത്‌ പ്രസിഡന്റ് ജസ്റ്റിൻ ബേബി, സ്റ്റാന്റിംഗ് കമ്മിറ്റി അംഗം കെ. വി. വിജോൾ, എടവക ഗ്രാമ പഞ്ചായത്ത്‌ വൈസ്പ്രസിഡന്റ് ശർമിന ശിഹാബ്, വാർഡ് മെമ്പർ മിനി തുളസീധരൻ തുടങ്ങിയവർ സംബന്ധിച്ചു.