ലൈഫ് മിഷന്‍ ഗുണഭോക്തൃസംഗമം ജില്ലയിലെ 38 ഗ്രാമപഞ്ചായത്തുകളിലും മൂന്ന് നഗരസഭകളിലും ജനുവരി 28ന്  രാവിലെ 10.30ന് നടക്കും. ലൈഫ് മിഷനിലൂടെ രണ്ടര ലക്ഷം വീടുകള്‍ പൂര്‍ത്തിയാക്കിയതിന്റെ സംസ്ഥാനതല പ്രഖ്യാപനം  മുഖ്യമന്ത്രി പിണറായി വിജയന്‍ നിര്‍വ്വഹിക്കും. ജില്ലയില്‍ തദ്ദേശ സ്വയംഭരണസ്ഥാപനതലത്തില്‍ ലൈഫ് മിഷന്‍ അദാലത്തും സംഗമത്തിന്റെ ഭാഗമായി നടക്കും. പരാതികള്‍ ജില്ലാ കളക്ടറുടെ പരാതി പരിഹാര അദാലത്തിലേക്ക് കൈമാറും.

ജില്ലയിലെ ക്ഷീരമേഖലയ്ക്ക് മുതല്‍ക്കൂട്ടായി ചിത്താരി ക്ഷീരവ്യവസായ സംഘത്തിന്റെ കിടാരി പാര്‍ക്ക്. കര്‍ഷകര്‍ക്കും ക്ഷീരമേഖലയിലേക്ക് കടന്നുവരുന്നവര്‍ക്കും ഇടനിലക്കാരെ ഒഴിവാക്കി മികച്ച ഗുണമേന്മയുള്ള പശുക്കളെ ഇവിടെ നിന്ന് വാങ്ങാം. 2018-2019 വര്‍ഷം ക്ഷീരവികസന വകുപ്പ് സംസ്ഥാനത്ത് അനുവദിച്ച രണ്ട് കിടാരി പാര്‍ക്കില്‍ ഒന്നാണ് ചിത്താരി ക്ഷീരവ്യവസായ പാര്‍ക്ക്.  ഏഴ് മുതല്‍ 15 മാസം വരെ പ്രായമുള്ള കിടാരികളെ വാങ്ങി വളര്‍ത്തി പ്രസവിക്കുമ്പോള്‍ പശുവിനെയും കിടാവിനെയും ക്ഷീരകര്‍ഷകര്‍ക്ക് വില്‍ക്കുന്ന പദ്ധതിയാണിത്. 

കേരളത്തിലുള്ള 14239 റേഷന്‍ കടകളും ഇന്ന് മുഴുവന്‍ ജനങ്ങളുടെയും അത്താണിയായി മാറിയതായി ഭക്ഷ്യ-പൊതുവിതരണ വകുപ്പ് മന്ത്രി പി. തിലോത്തമന്‍ പറഞ്ഞു. കാസര്‍കോട് നഗരസഭാ കോണ്‍ഫറന്‍സ് ഹാളില്‍ സംസ്ഥാന ഭക്ഷ്യ കമ്മീഷന്റെ ബോധവത്കരണ, പൊതുജന സമ്പര്‍ക്ക പരിപാടിയുടെ സംസ്ഥാനതല ഉദ്ഘാടനം നിര്‍വഹിച്ച് സംസാരിക്കുകയായിരുന്നു മന്ത്രി. കോവിഡ്-19 കാലത്ത്, നിശ്ചയിച്ച ഭക്ഷ്യവസ്തുക്കള്‍ കൃത്യതയോടെ ജനങ്ങളിലെത്തിക്കുന്ന ഏറ്റവും പ്രധാനപ്പെട്ട കേന്ദ്രങ്ങളായി റേഷന്‍ കടകള്‍ മാറി. പകുതിയോളം ഉപഭോക്താക്കള്‍ മാത്രം റേഷന്‍ വാങ്ങിയിരുന്നിടത്ത് ഇന്നത് 97 ശതമാനത്തിലേക്കെത്തിക്കാനായി.

മന്ത്രിമാരായ ഇ. ചന്ദ്രശേഖരന്‍, കെ.കെ ശൈലജ ടീച്ചര്‍, രാമചന്ദ്രന്‍ കടന്നപ്പള്ളി എന്നിവരുടെ നേതൃത്വത്തില്‍ ജില്ലയില്‍ 'സാന്ത്വന സ്പര്‍ശം' പൊതുജന പരാതി പരിഹാര അദാലത്തുകള്‍ ഫെബ്രുവരി എട്ട്, ഒമ്പത് തിയ്യതികളില്‍ നടത്തും. ഫെബ്രുവരി എട്ടിന് കാഞ്ഞങ്ങാടും ഒമ്പതിന് കാസര്‍കോടുമാണ് അദാലത്തെന്ന് റവന്യു-ഭവന നിര്‍മ്മാണ വകുപ്പ് മന്ത്രി ഇ ചന്ദ്രശേഖരന്‍ അറിയിച്ചു. 

ജില്ലയില്‍ ഇന്നലെ(ജനുവരി 27) 483 പേര്‍ക്ക് കോവിഡ് സ്ഥിരീകരിച്ചു. 195 പേര്‍ രോഗമുക്തരായി. ഗ്രാമപഞ്ചായത്തുകളില്‍ കുളക്കട, ചവറ, തൃക്കോവില്‍വട്ടം, പവിത്രേശ്വരം, പെരിനാട്, നെടുവത്തൂര്‍, തലവൂര്‍, പ•ന, മയ്യനാട്, ഇട്ടിവ, കരവാളൂര്‍, അഞ്ചല്‍, എഴുകോണ്‍, ക്ലാപ്പന, നീണ്ടകര, ശാസ്താംകോട്ട എന്നിവിടങ്ങളിലാണ് രോഗബാധിതര്‍ കൂടുതലുള്ളത്. വിദേശത്തു നിന്നെത്തിയ  മൂന്നുപേര്‍ക്കും ഇതര സംസ്ഥാനത്തു നിന്നെത്തിയ  ഒരാള്‍ക്കും സമ്പര്‍ക്കം വഴി 475 പേര്‍ക്കും ഉറവിടം വ്യക്തമല്ലാത്ത ഒരാള്‍ക്കും മൂന്നു ആരോഗ്യ പ്രവര്‍ത്തകര്‍ക്കും രോഗം സ്ഥിരീകരിച്ചു.

ജില്ലയില്‍ ഇതുവരെ 6143 പേര്‍ക്ക് കോവിഡ് വാക്‌സിന്‍ നല്‍കി. ഇന്നലെ(ജനുവരി 27) 423 പേര്‍ക്കാണ് വാക്‌സിന്‍ നല്‍കിയത്. കേന്ദ്രം, വാക്‌സിന്‍ നല്‍കിയ കണക്ക് എന്ന ക്രമത്തില്‍ ചുവടെ.
പാരിപ്പള്ളി സര്‍ക്കാര്‍ മെഡിക്കല്‍ കോളജ്-161, ജില്ലാ അയുര്‍വേദ ആശുപത്രി-93, മെഡിസിറ്റി മെഡിക്കല്‍ കോളജ്-70, നായേഴ്‌സ് ആശുപത്രി-99.
 (പി.ആര്‍.കെ നമ്പര്‍.265/2021)

സ്‌കോള്‍-കേരള മുഖേന 2020-22 ബാച്ചില്‍ ഹയര്‍ സെക്കന്‍ഡറി ഓപ്പണ്‍ റെഗുലര്‍ കോഴ്‌സിന് രജിസ്റ്റര്‍ ചെയ്ത് ജനുവരി 23 വരെ നിര്‍ദ്ദിഷ്ട രേഖകള്‍ സമര്‍പ്പിച്ച ഒന്നാംവര്‍ഷ വിദ്യാര്‍ഥികള്‍ക്ക് പഠനകേന്ദ്രം അനുവദിച്ചു. തിരിച്ചറിയല്‍ കാര്‍ഡ് അനുവദിക്കുന്നതിന് മുമ്പ് സബ്ജക്ട് കോമ്പിനേഷന്‍, ഉപഭാഷ എന്നിവയില്‍ മാറ്റം ആവശ്യമുള്ളവര്‍ ജനുവരി 30 നകം scolekerala@gmail.com  എന്ന ഇ-മെയില്‍ വിലാസത്തില്‍ അപേക്ഷ നല്‍കാം. അപേക്ഷയില്‍ മാറ്റം വരുത്തേണ്ടതിന്റെ വിശദാംശങ്ങള്‍, അപേക്ഷയുടെ നമ്പര്‍, ഫോണ്‍ നമ്പര്‍ എന്നിവ രേഖപ്പെടുത്തിയിരിക്കണം.

രാഷ്ട്രപിതാവ് മഹാത്മജിയുടെ രക്തസാക്ഷിദിനമായ ജനുവരി 30 കോവിഡ് സാഹചര്യത്തില്‍ ലളിതമായ ചടങ്ങുകളോടെ ആചരിക്കും. മഹാത്മാവിന്റെ ജീവിത സന്ദേശങ്ങള്‍ പരമാവധി ജനങ്ങളില്‍ എത്തിക്കുന്നതിനുള്ള പ്രവര്‍ത്തനങ്ങള്‍ നടത്തും. 30 ന് രാവിലെ എട്ടിന് ഗാന്ധി പാര്‍ക്കില്‍ മാഹാത്മാഗാന്ധി പ്രതിമയില്‍ ഹാരാര്‍പ്പണം, പുഷ്പാര്‍ച്ചന, ദൃഢപ്രതിജ്ഞ എന്നിവ സംഘടിപ്പിക്കും. ജില്ലയിലെ മന്ത്രിമാരും ജനപ്രതിനിധികളും കോവിഡ് പ്രോട്ടോകോള്‍ പാലിച്ച് പങ്കെടുക്കും. പ്രവേശനം ക്ഷണിക്കപ്പെടുന്ന വ്യക്തികള്‍ക്ക് മാത്രമായിരിക്കും.
(പി.ആര്‍.കെ നമ്പര്‍.263/2021)

എന്‍ കെ പ്രേമചന്ദ്രന്‍ എം പി യുടെ പ്രാദേശിക വികസന ഫണ്ടില്‍ നിന്നും 6.5 ലക്ഷം രൂപ വിനിയോഗിച്ച് അംഗപരിമിതര്‍ക്കായി നിര്‍മിച്ച കൃത്രിമ അവയവങ്ങള്‍ ഗുണഭോക്താക്കള്‍ക്ക് നല്‍കി. ജില്ലാ ആശുപത്രിയില്‍ നടന്ന പരിപാടി എന്‍ കെ പ്രേമചന്ദ്രന്‍ എം പി ഉദ്ഘാടനം ചെയ്തു.
ശാരീരികവും മാനസികവുമായ വെല്ലുവിളികള്‍ നേരിടുന്നവരെ മുഖ്യധാരയിലെത്തിക്കുന്നത് സുസ്ഥിര വികസനത്തിന്റെ ഭാഗമാണ്. കോവിഡ് നിയന്ത്രണ പ്രതിരോധ പ്രവര്‍ത്തനങ്ങളുടെ ബാഹുല്യത്തിലും വികസന ഫണ്ടുകള്‍ സമയബന്ധിതമായി വിനിയോഗിച്ച് അര്‍ഹതപ്പെട്ടവരെ കണ്ടെത്തുന്നതിനും ആരോഗ്യ  വകുപ്പ് നടത്തിയ പ്രവര്‍ത്തനങ്ങള്‍  അഭിനന്ദനാര്‍ഹമാണെന്ന് എം പി പറഞ്ഞു.