ജില്ലയില്‍ ഇന്നലെ(ജനുവരി 26) 597 പേര്‍ക്ക് കോവിഡ് സ്ഥിരീകരിച്ചു. 333 പേര്‍ രോഗമുക്തി നേടി. മുനിസിപ്പാലിറ്റികളില്‍ പുനലൂര്‍, കരുനാഗപ്പള്ളി ഭാഗങ്ങളിലും ഗ്രാമപഞ്ചായത്ത് പ്രദേശങ്ങളില്‍ ഇളമാട്, കുലശേഖരപുരം, ആദിച്ചനല്ലൂര്‍, കുളത്തൂപ്പുഴ, പത്തനാപുരം, വെട്ടിക്കവല, ശാസ്താംകോട്ട, തൃക്കരുവ, മയ്യനാട്, മൈലം, ശൂരനാട് വടക്ക്, ശൂരനാട് തെക്ക്, അഞ്ചല്‍, കരീപ്ര, മൈനാഗപ്പള്ളി,  ഇടമുളയ്ക്കല്‍, ഉമ്മന്നൂര്‍, കരവാളൂര്‍ എന്നിവിടങ്ങളിലുമാണ് രോഗബാധിതര്‍ കൂടുതലുള്ളത്.

മുഖ്യമന്ത്രിയുടെ  പരാതി പരിഹാര അദാലത്ത് സാന്ത്വന സ്പര്‍ശം ഫെബ്രുവരി ഒന്ന്, രണ്ട്, നാലു തീയതികളില്‍ നടക്കുന്നതിന് മുന്നോടിയായി ഒരുക്കങ്ങള്‍ വിലയിരുത്തുന്നതിന് ഇന്ന്(ജനുവരി 27) രാവിലെ 11.30 ന് യോഗം കൂടും. ജില്ലാ കലക്ടര്‍ ബി അബ്ദുല്‍ നാസറിന്റെ അധ്യക്ഷതയില്‍ കൂടുന്ന യോഗത്തില്‍  അദാലത്തില്‍ ലഭിച്ച  അപേക്ഷകള്‍, അവയുടെ ക്രോഡീകരണം, തീര്‍പ്പാക്കല്‍ എന്നിവ വിലയിരുത്തും ഒപ്പം അദാലത്ത് ദിവസം നടത്തേണ്ട ക്രമീകരണങ്ങള്‍, സാങ്കേതിക സഹായം എന്നിവ സംബന്ധിച്ച് ബന്ധപ്പെട്ട ഉദ്യോഗസ്ഥരുമായി ചര്‍ച്ച നടത്തും. അപേക്ഷ ഓണ്‍ലൈനായും അക്ഷയ കേന്ദ്രം വഴിയും ജനുവരി 28 വരെ നല്‍കാം.

ഹരിത ഓഫീസുകളുടെ പ്രഖ്യാപനത്തിന്റെ ജില്ലാതല ഉദ്ഘാടനം ചിറ്റുമല ബ്ലോക്ക് പഞ്ചായത്ത് ഓഫീസില്‍ ഫിഷറീസ് ഹാര്‍ബര്‍ എന്‍ജിനീയറിംഗ് വകുപ്പ് മന്ത്രി ജെ മേഴ്‌സിക്കുട്ടിയമ്മ നിര്‍വ്വഹിച്ചു. നാട് ഹരിതാഭമാക്കുന്നതിനും ശുചിത്വ പൂര്‍ണമായി നിലനിര്‍ത്തുന്നതിനും ഏവരും ശ്രമിക്കണമെന്ന് മന്ത്രി പറഞ്ഞു.
ബ്ലോക്ക് പഞ്ചായത്ത് പ്രസിഡന്റ് ജയദേവി മോഹന്‍ അധ്യക്ഷത വഹിച്ച ചടങ്ങില്‍ ജില്ലാ പഞ്ചായത്ത് പ്രസിഡന്റ് സാം കെ ഡാനിയല്‍ ഘടക സ്ഥാപനങ്ങള്‍ക്കുള്ള പുരസ്‌കാരങ്ങള്‍  വിതരണം ചെയ്തു. ചിറ്റുമല ബ്ലോക്ക് പഞ്ചായത്ത് ഹരിത ഓഫീസ് ആയത് 99 പോയിന്റ് നേടിക്കൊണ്ടാണ്.

സക്കറിയയുടെ രചനകൾ സമൂഹത്തെയും സമുദായങ്ങളെയും ആത്മപരിശോധനയ്ക്ക് പ്രേരിപ്പിക്കുന്നതായി മുഖ്യമന്ത്രി പിണറായി വിജയൻ പറഞ്ഞു. സെക്രട്ടേറിയറ്റ് ഡർബാർ ഹാളിൽ നടന്ന ചടങ്ങിൽ എഴുത്തച്ഛൻ പുരസ്‌കാരം സക്കറിയയ്ക്ക് സമ്മാനിച്ച് സംസാരിക്കുകയായിരുന്നു അദ്ദേഹം.
ഇടത്തരം സാമൂഹ്യ തലങ്ങളിലെ മുഖംമൂടി വച്ചുള്ള പെരുമാറ്റങ്ങളുടെ കാപട്യത്തെ സക്കറിയ തുറന്നു കാണിക്കുന്നു. അധികാരത്തിന്റെ എഴുത്തുകളെ തിരുത്താനും ശ്രമിക്കുന്നു. മൂല്യങ്ങളിൽ നിന്ന് അകന്നു പോകുന്ന വിവിധ മതങ്ങളെ സക്കറിയ വിമർശിക്കുന്നു. സദാ ഉണർന്നിരിക്കുന്ന ഒരു മനസ് അദ്ദേഹം എന്നും സൂക്ഷിച്ചിട്ടുണ്ടെന്ന് മുഖ്യമന്ത്രി പറഞ്ഞു.

കടലിൽ അപകടത്തിൽപ്പെടുന്ന മത്സ്യത്തൊഴിലാളികൾക്ക്  കാര്യക്ഷമമായ രക്ഷാപ്രവർത്തനം ഒരുക്കാൻ സംസ്ഥാന സർക്കാരിന്റെ രണ്ട് മറൈൻ ആംബുലൻസുകളായ പ്രത്യാശയും കാരുണ്യയും കൂടി 28 മുതൽ പ്രവർത്തനം തുടങ്ങും. ഫിഷറീസ് മന്ത്രി ജെ. മേഴ്സിക്കുട്ടി അമ്മ മറൈൻ ആംബുലൻസുകളുടെ ഫ്ളാഗ്  ഓഫ് കൊച്ചിൻ ഷിപ്പ്യാർഡിൽ നടക്കുന്ന ചടങ്ങിൽ രാവിലെ 9.30 ന് നിർവഹിക്കും.  ചടങ്ങിൽ റ്റി.ജെ. വിനോദ് എം.എൽ.എ അദ്ധ്യക്ഷനായിരിക്കും.