പട്ടാമ്പി താലൂക്കിലെ ആനക്കര ശിവക്ഷേത്രത്തില്‍ പാരമ്പര്യേതര ട്രസ്റ്റികളായി നിയമിക്കപ്പെടുന്നതിന് അപേക്ഷിക്കാം. പൂരിപ്പിച്ച അപേക്ഷകള്‍ ജനുവരി 29 നകം തിരൂര്‍ മിനി സിവില്‍ സ്റ്റേഷനിലുള്ള മലബാര്‍ ദേവസ്വം ബോര്‍ഡ് മലപ്പുറം അസിസ്റ്റന്റ് കമ്മീഷണറുടെ ഓഫീസില്‍ ലഭിക്കണം. അപേക്ഷ ഫോറവും മറ്റ് വിശദ വിവരങ്ങളും ഈ ഓഫീസിലും വകുപ്പിന്റെ ഗുരുവായൂര്‍ ഡിവിഷന്‍ ഇന്‍സ്പെക്ടറുടെ ഓഫീസിലും ലഭിക്കും.

2020 ഡിസംബര്‍ മാസത്തെ സൗജന്യകിറ്റ് വിതരണം ജനുവരി 23 വരെ ദീര്‍ഘിപ്പിച്ചതായി ജില്ലാ സപ്ലൈ ഓഫീസര്‍ അറിയിച്ചു.

വിവിധ വിഭാഗത്തിലുള്ള പത്രപ്രവര്‍ത്തക, പത്രപ്രവര്‍ത്തകേതര പെന്‍ഷന്‍ പദ്ധതിയിലെ ഗുണഭോക്താക്കള്‍ക്കായി കോവിഡ് പശ്ചാത്തലത്തിലുള്ള പ്രായോഗിക ബുദ്ധിമുട്ട് പരിഗണിച്ച് ലൈഫ് സര്‍ട്ടിഫിക്കറ്റ് സമര്‍പ്പിക്കേണ്ട അവസാന തീയതി ഫെബ്രുവരി 28 വരെ നീട്ടിയതായി ഐ& പി.ആര്‍.ഡി വകുപ്പ് ഡയറക്ടര്‍ എസ്. ഹരികിഷോര്‍ അറിയിച്ചു. എല്ലാ വര്‍ഷവും നവംബര്‍ ആദ്യവാരം അതത് മേഖലാ ഡെപ്യൂട്ടി ഡയറക്ടര്‍/ ജില്ലാ ഇന്‍ഫര്‍മേഷന്‍ ഓഫീസുകളില്‍ സര്‍ട്ടിഫിക്കറ്റുകള്‍  സമര്‍പ്പിക്കുന്നതിനുള്ള സമയപരിധിയാണ് നീട്ടിയത്.

സംസ്ഥാന ചലച്ചിത്ര അക്കാദമി സംഘടിപ്പിക്കുന്ന 25-ാമത് അന്താരാഷ്ട്ര ചലച്ചിത്രോത്സവം മാര്‍ച്ച് ഒന്നു മുതല്‍ അഞ്ച് വരെ പാലക്കാട് നടക്കുന്നതിന്റെ ഭാഗമായുള്ള സംഘാടക സമിതി രൂപീകരണ യോഗം ജനുവരി 24 ന് വൈകീട്ട് നാലിന് ജില്ലാ പബ്ലിക് ലൈബ്രറി ഹാളില്‍ ചേരും. ബന്ധപ്പെട്ടവര്‍ യോഗത്തില്‍ പങ്കെടുക്കണമെന്ന് ചെയര്‍മാന്‍ കമല്‍ അറിയിച്ചു.

മുതുകുളം വാർഡ്-6 കണ്ടൈൻമെൻറ് സോണായി പ്രഖ്യാപിച്ചു

തിരുവൻവണ്ടൂർ വാർഡ് 8 എരമല്ലിക്കര  കണ്ടൈൻ മെൻറ് സോണിൽ നിന്ന് ഒഴിവാക്കി.

കാര്‍ഷിക വികസന കര്‍ഷകക്ഷേമ വകുപ്പ് ഏര്‍പ്പെടുത്തിയ സംസ്ഥാനതല കര്‍ഷക അവാര്‍ഡുകളില്‍ 5 എണ്ണം പാലക്കാട് ജില്ലയ്ക്ക്. കേരകേസരി, പച്ചക്കറി കര്‍ഷനുള്ള അവാര്‍ഡ്, കര്‍ഷക പ്രതിഭ, ക്ലസ്റ്റര്‍, ഓണത്തിന് ഒരു മുറം പച്ചക്കറി അവാര്‍ഡുകളാണ് ജില്ലയ്ക്ക് ലഭിച്ചിരിക്കുന്നത്.

സംസ്ഥാന സര്‍ക്കാരിന്റെ ഏറ്റവും മികച്ച കേരകര്‍ഷകനുള്ള കേരകേസരി അവാര്‍ഡ് മീനാക്ഷിപുരം വടകാട്ടുകുളം ശിവഗണേശനു ലഭിച്ചു. രണ്ട് ലക്ഷം രൂപയും സ്വര്‍ണമെഡലും ഫലകവും സര്‍ട്ടിഫിക്കറ്റും ഉള്‍പ്പെടുന്നതാണ് അവാര്‍ഡ്.