നെല്‍വയലുകള്‍ രൂപമാറ്റം വരുത്താതെ  സംരക്ഷിക്കുകയും കൃഷി നടത്തുകയും ചെയ്യുന്ന കര്‍ഷകര്‍ക്ക് റോയല്‍റ്റിക്ക്  അപേക്ഷിക്കാം. നിലം ഉടമകള്‍ക്ക് അക്ഷയ കേന്ദ്രം മുഖേനയോ  സ്വന്തമായോ വ്യക്തിഗത ലോഗിന്‍ ഉപയോഗിച്ച്   www.aims.kerala. gov. in.പോര്‍ട്ടല്‍ വഴി ഓണ്‍ലൈനായി അപേക്ഷ സമര്‍പ്പിക്കാം. ഒരു ഹെക്ട്ടറിന്  ഓരോ സാമ്പത്തിക വര്‍ഷവും 2000 രൂപ നിരക്കില്‍ സംസ്ഥാന സര്‍ക്കാര്‍ റോയല്‍റ്റി നല്‍കുന്നുണ്ട്. ഹ്രസ്വകാല  വിളകളായ പയറുവര്‍ഗ്ഗങ്ങള്‍, പച്ചക്കറികള്‍,എള്ള്, നിലക്കടല തുടങ്ങിയവ കൃഷി ചെയ്യുന്ന ഭൂവുടമകള്‍ക്ക്   റോയല്‍റ്റിക്ക് അപേക്ഷിക്കാം. ഫോണ്‍ :0491-2505075.

ആലപ്പുഴ: ഭക്ഷ്യ പൊതുവിതരണ വകുപ്പ്, ഉപഭോക്തൃ സംരക്ഷണ വകുപ്പ്, ജില്ല സപ്ലൈ ഓഫീസ് എന്നിവയുടെ നേതൃത്വത്തില്‍ ദേശീയ ഉപഭോക്തൃ ദിനാചരണം നടത്തി. കളക്ടറേറ്റ് കോണ്‍ഫറന്‍സ് ഹാളില്‍ നടന്ന ചടങ്ങ് ലീഗല്‍ മെട്രോളജി ഡെപ്യൂട്ടി കണ്‍ട്രോളര്‍ എസ്. ഷെയ്ക് ഷിബു ഉദ്ഘാടനം ചെയ്തു. ജില്ല സപ്ലൈ ഓഫീസ് സീനിയർ സൂപ്രണ്ട് എം സുൾഫിക്കർ അധ്യക്ഷത വഹിച്ചു. ജി. ഓമനക്കുട്ടന്‍, ശ്രീലക്ഷ്മി എസ് വാസവന്‍, അജി പി.ബി., ജലജ എ.കെ., ഹക്കീം എം.കെ. മുഹമ്മദ് രാജ, അമ്പിളി ആര്‍ എന്നിവര്‍ പങ്കെടുത്തു. ഉപഭോക്തൃ നിയമത്തിന്റെ പ്രാധാന്യം സാധാരണ ജനങ്ങളിലേക്ക് എത്തിക്കാനും ഉപഭോക്തൃ ജാഗ്രതയ്ക്കുമായാണ് ഉപഭോക്തൃ ദിനാചരണം നടത്തുന്നത്.

ആലപ്പുഴ: ജില്ലാ അഗ്രി ഹോർട്ടി കൾച്ചറൽ സൊസൈറ്റിയുടെ ആഭിമുഖ്യത്തിൽ സംഘടിപ്പിച്ചു വന്നിരുന്ന കാർഷിക വ്യാവസായിക പ്രദർശനം കോവിഡിന്റെ പ്രത്യേക പശ്ചാത്തലത്തിൽ മറ്റൊരു അവസരത്തിലേക്ക് മാറ്റിയതായി സൊസൈറ്റി സെക്രട്ടറി രവി പാലത്തിങ്കൽ അറിയിച്ചു. എന്നാൽ ജില്ലാ അഗ്രി ഹോർട്ടി സൊസൈറ്റി പ്രതിവർഷം കാർഷിക വ്യവസായിക പ്രദർശനത്തോടനുബന്ധിച്ച് ജില്ലയിലെ മികച്ച കർഷകനെ തിരഞ്ഞെടുത്ത് നൽകിവന്നിരുന്ന കർഷക ശ്രേഷ്ഠ പുരസ്കാരം ഇത്തവണ നൽകാന്‍ ഇതുസംബന്ധിച്ച യോഗം തീരുമാനിച്ചു. പുരസ്കാരത്തിലേക്ക് പരിഗണിക്കപ്പെടാൻ താല്പര്യമുള്ള കർഷകർ വിശദവിവരങ്ങൾക്ക് 9447225408 എന്ന നമ്പറില്‍ ഡിസംബർ 31 ന് മുമ്പ് ബന്ധപ്പെടണം.

ജില്ലാ വികസന സമിതി യോഗം ജനുവരി ഒന്നിന് രാവിലെ 10:50 ന് ഗൂഗിള്‍ മീറ്റ് മുഖേന നടക്കുമെന്ന് ജില്ലാ കലക്ടര്‍ ഡി.ബാലമുരളി അറിയിച്ചു.

ആലപ്പുഴ: ഡിസംബര്‍ മുതല്‍ 2021 മാര്‍ച്ച് 31വരെയുള്ള പ്രധാന്‍മന്ത്രി കിസാന്‍ സമ്മാന്‍ നിധി (പി.എം. കിസാന്‍) യോജന സഹായധനത്തിന്റെ ഏഴാം ഗഡു (2000 രൂപ പ്രകാരം) വിതരണം ഉദ്ഘാടനം ഇന്ന് (ഡിസംബര്‍ 25) ഉച്ചക്ക് 12 മണിക്ക് പ്രധാനമന്ത്രി നരേന്ദ്ര മോദി ഓണ്‍ലൈനായി നിര്‍വ്വഹിക്കും. സമൂഹമാധ്യമങ്ങളിലൂടയും ടി.വി. ചാനലുകളിലൂടെയും കര്‍ഷകര്‍ക്ക് ഈ ചടങ്ങ് തത്സമയം വീക്ഷിക്കാമെന്ന് പ്രിന്‍സിപ്പല്‍ കൃഷി ഓഫീസര്‍ അറിയിച്ചു.