കുഴല്‍മന്ദം ശിശു വികസന പദ്ധതി ഓഫീസിന് കീഴിലുള്ള കുഴല്‍മന്ദം, കോട്ടായി, മാത്തൂര്‍, പെരിങ്ങോട്ടുകുറിശ്ശി, കണ്ണാടി, തേങ്കുറിശ്ശി, കുത്തന്നൂര്‍ എന്നീ പഞ്ചായത്തുകളിലെ 166 അങ്കണവാടികളിലേക്ക് പാല്‍ മുട്ട എന്നിവ വിതരണം ചെയ്യുന്നതിന് ടെന്‍ഡര്‍ ക്ഷണിച്ചു. ടെന്‍ഡര്‍ ഫോമുകള്‍ ഒക്ടോബര്‍ 29 ന് ഉച്ചയ്ക്ക രണ്ട് വരെ ലഭിക്കും. അന്നേ ദിവസം മൂന്നുവരെ പൂരിപ്പിച്ച ടെന്‍ഡറുകള്‍ സ്വീകരിക്കും. ലഭിച്ച ടെന്‍ഡറുകള്‍ ഒക്ടോബര്‍ 30 ന് രാവിലെ 11 ന് തുറക്കുമെന്ന് കുഴല്‍മന്ദം ശിശു വികസന പദ്ധതി ഓഫീസര്‍ അറിയിച്ചു.

പാലക്കാട് ബ്ലോക്ക് പഞ്ചായത്ത് ഭിന്നശേഷി വിദ്യാര്‍ത്ഥികള്‍ക്കായി നടത്തിയ കലോത്സവം ബ്ലോക്ക് പഞ്ചായത്ത് പ്രസിഡന്റ് വി സേതുമാധവന്‍ ഉദ്ഘാടനം ചെയ്തു. 2025-26 വാര്‍ഷിക പദ്ധതിയില്‍ ഉള്‍പ്പെടുത്തിയാണ് പരിപാടി സംഘടിപ്പിച്ചത്.

കോങ്ങാട് ഗ്രാമപഞ്ചായത്ത് വാര്‍ഷിക വികസന പദ്ധതിയില്‍ ഉള്‍പ്പെടുത്തി വാങ്ങിയ വാട്ടര്‍ ടാങ്കുകള്‍ വിതരണം ചെയ്തു. ഗ്രാമപഞ്ചായത്ത് പ്രസിഡന്റ് ടി അജിത് ഉദ്ഘാടനം ചെയ്തു. ഗ്രാമപഞ്ചായത്തിന്റെ 2024-25 വാര്‍ഷിക വികസന പദ്ധതിയില്‍ ഉള്‍പ്പെടുത്തി മൂന്നുലക്ഷം രൂപ ഫണ്ട് വകയിരുത്തി 141 ഗുണഭോക്താക്കള്‍ക്കാണ് വാട്ടര്‍ ടാങ്കുകള്‍ വിതരണം ചെയ്തത്.

കേരള സര്‍ക്കാര്‍ വാണിജ്യ വ്യവസായ വകുപ്പ്, ജില്ലാ വ്യവസായ കേന്ദ്രം, ആലത്തൂര്‍ താലൂക്ക് വ്യവസായ ഓഫീസ് എന്നിവയുടെ സംയുക്താഭിമുഖ്യത്തില്‍ ബാങ്കേഴ്‌സ് മീറ്റ് സംഘടിപ്പിച്ചു. പരിപാടിയുടെ ഉദ്ഘാടനം ലീഡ് ഡിസ്ട്രിക് മാനേജര്‍ പി.ടി അനില്‍കുമാര്‍ നിര്‍വഹിച്ചു. ബാങ്കുകള്‍ നയിക്കുന്ന വിവിധ ക്ലാസുകള്‍, സംരംഭകര്‍ക്ക് ആവശ്യമായ ഹെല്‍പ്പ് ഡെസ്‌ക്, ഉദ്യം രജിസ്‌ട്രേഷന്‍, കെ സ്വിഫ്റ്റ് മുതലായ ലൈസന്‍സ് എടുക്കുന്നതിനും അവസരം ഒരുക്കുക എന്നിവയാണ് ബാങ്കേഴ്സ് മീറ്റിലൂടെ നടത്തിയത്.

ലോക പരിസ്ഥിതി ദിനത്തോടനുബന്ധിച്ചു ജില്ലാ ഭരണകൂടവും ജില്ലാ ശുചിത്വ മിഷനും സംയുക്തമായി വിദ്യാലയങ്ങള്‍ കേന്ദ്രീകരിച്ചു നടത്തിയ 'പ്ലാസ്റ്റിക് ഉപയോഗം കുറക്കാം പ്രകൃതിയെ ഒപ്പം കൂട്ടാം' ക്യാമ്പയിനില്‍ പങ്കെടുത്തവരെ അസിസ്റ്റന്റ് കളക്ടര്‍ രവി മീണ  അനുമോദിച്ചു. 15 സ്‌കൂളുകള്‍ക്കും  30 വിദ്യാര്‍ഥികള്‍ക്കുമാണ്  അനുമോദന പത്രം നല്‍കിയത്. പി.എ.യു ഹാളില്‍ കൂടിയ യോഗത്തില്‍ ജില്ലാ ശുചിത്വ മിഷന്‍ കോര്‍ഡിനേറ്റര്‍ ജി വരുണ്‍, അസിസ്റ്റന്റ്  കോര്‍ഡിനേറ്റര്‍ സി ദീപ  എന്നിവര്‍ പങ്കെടുത്തു.

ഫിഷറീസ് വകുപ്പ് ഗ്രാമപഞ്ചായത്തുകളുടെ സഹകരണത്തോടെ നടപ്പിലാക്കി വരുന്ന ജനകീയ മത്സ്യകൃഷി പദ്ധതിയുടെ ഭാഗമായി വരാല്‍ മത്സ്യക്കുഞ്ഞുങ്ങളെ തേങ്കുറുശ്ശി ഗ്രാമപഞ്ചായത്തില്‍ വിതരണം ചെയ്തു. തേങ്കുറുശ്ശി ഗ്രാമപഞ്ചായത്ത് വൈസ് പ്രസിഡന്റ് കെ. സ്വര്‍ണ്ണമണി വിതരോണോദ്ഘാടനം ചെയ്തു. തദ്ദേശീയ മത്സ്യോത്പാദനം വര്‍ദ്ധിപ്പിക്കുക എന്നതാണ് പദ്ധതിയുടെ ലക്ഷ്യം. വിവിധ പദ്ധതികളിലായി 30,780 വരാല്‍ മത്സ്യക്കുഞ്ഞുങ്ങളെയാണ് വിതരണം ചെയ്തത്.

സംസ്ഥാന സര്‍ക്കാറിന്റെ ആഭിമുഖ്യത്തില്‍ തദ്ദേശ സ്വയംഭരണ വകുപ്പും ഇന്‍ഫര്‍മേഷന്‍ പബ്ലിക് റിലേഷന്‍സ് വകുപ്പും സംയുക്തമായി സംഘടിപ്പിക്കുന്ന വികസന സദസ് ആലത്തൂര്‍ ഗ്രാമപഞ്ചായത്തില്‍ ഇന്ന് ( ഒക്ടോബര്‍ 17) രാവിലെ പത്തിന് നടക്കും. യു പ്ലസ് ഓഡിറ്റോറിയത്തില്‍ നടക്കുന്ന പരിപാടി

കെ.ഡി പ്രസേനന്‍ എംഎല്‍എ ഉദ്ഘാടനം ചെയ്യും. ആലത്തൂര്‍ ഗ്രാമപഞ്ചായത്ത് പ്രസിഡന്റ് എ.ഷൈനി അധ്യക്ഷയാവും.

സംസ്ഥാന സര്‍ക്കാറിന്റെ ആഭിമുഖ്യത്തില്‍ തദ്ദേശ സ്വയംഭരണ വകുപ്പും ഇന്‍ഫര്‍മേഷന്‍ പബ്ലിക് റിലേഷന്‍സ് വകുപ്പും സംയുക്തമായി സംഘടിപ്പിക്കുന്ന വികസന സദസ്സ് ഇന്ന് (ഒക്ടോബര്‍ 17 ) ഉച്ചയ്ക്ക് രണ്ടിന് മുഹമ്മദ് മുഹ്‌സിന്‍ എം.എല്‍.എ ഉദ്ഘാടനം ചെയ്യും. ഓങ്ങല്ലൂര്‍ ഗ്രാമപഞ്ചായത്ത് കണ്‍വെന്‍ഷന്‍ സെന്ററില്‍ നടക്കുന്ന പരിപാടിയില്‍ ഗ്രാമപഞ്ചായത്ത് പ്രസിഡന്റ് രതി ഗോപാലകൃഷ്ണന്‍ അധ്യക്ഷയാകും. പരിപാടിയില്‍ വൈസ് പ്രസിഡന്റ് ടി.പി. രജീഷ്, വകുപ്പ്  ഉദ്യോഗസ്ഥര്‍, വിവിധ ജനപ്രതിനിധികള്‍, വിവിധ രാഷ്ട്രീയ പാര്‍ട്ടി പ്രതിനിധികള്‍ തുടങ്ങിയവര്‍ പങ്കെടുക്കും.

സംസ്ഥാന സര്‍ക്കാറിന്റെ ആഭിമുഖ്യത്തില്‍ തദ്ദേശ സ്വയംഭരണ വകുപ്പും ഇന്‍ഫര്‍മേഷന്‍ പബ്ലിക് റിലേഷന്‍സ് വകുപ്പും സംയുക്തമായി  സംഘടിപ്പിക്കുന്ന വികസന സദസ് അയിലൂര്‍ ഗ്രാമപഞ്ചായത്തില്‍ ഇന്ന് (ഒക്ടോബര്‍ 17 ) രാവിലെ 10ന് നടക്കും.  കെ. ബാബു എം.എല്‍.എ ഉദ്ഘാടനം ചെയ്യും. അയിലൂര്‍ ഗ്രാമപഞ്ചായത്ത് ഹാളില്‍ നടക്കുന്ന പരിപാടി അയിലൂര്‍ ഗ്രാമപഞ്ചായത്ത് പ്രസിഡന്റ്എസ് വിഘ്നേഷ് അധ്യക്ഷത വഹിക്കും.

സംസ്ഥാന സര്‍ക്കാറിന്റെ ആഭിമുഖ്യത്തില്‍ തദ്ദേശ സ്വയംഭരണ വകുപ്പും ഇന്‍ഫര്‍മേഷന്‍ പബ്ലിക് റിലേഷന്‍സ് വകുപ്പും സംയുക്തമായി സംഘടിപ്പിക്കുന്ന വികസന സദസ്സ് കടമ്പഴിപ്പുറം ഗ്രാമപഞ്ചായത്തില്‍  അഡ്വ. കെ.പ്രേംകുമാര്‍ എം.എല്‍.എ ഉദ്ഘാടനം ചെയ്തു. ഗ്രാമപഞ്ചായത്തിന്റെ വികസനങ്ങള്‍ ഉള്‍പ്പെടുത്തിയ പത്രം എം.എല്‍.എ ബ്ലോക്ക് പഞ്ചായത്ത് പ്രസിഡന്റ് സുനിത ജോസഫിന് നല്‍കി പ്രകാശനം ചെയ്തു.