ജല അതോറിറ്റി, മലപ്പുറം പി.എച്ച് ഡിവിഷന്റെ ഉടമസ്ഥതയിലുള്ള നിലവില്‍ പെരിന്തല്‍മണ്ണ സെക്ഷന്‍ ഓഫീസ് ആവശ്യങ്ങള്‍ക്കായി ഉപയോഗിച്ചു വരുന്ന കെ.എല്‍ 10 എജെ 2359 ടാറ്റ 207 പിക് അപ് ട്രക്ക് പുനര്‍ലേലം ഒക്ടോബര്‍ 18ന് ഉച്ചക്ക് 2.30ന്  ജല അതോറിറ്റി, മലപ്പുറം പി.എച്ച് ഡിവിഷന്റെ ഓഫീസില്‍  നടക്കും. ഫോണ്‍-0483 2734891.

സംസ്ഥാന ന്യൂനപക്ഷ കമ്മീഷന്റെ മലപ്പുറം ജില്ലാ സിറ്റിംഗ് നാളെ (ബുധന്‍) രാവിലെ 10.30 മുതല്‍ തിരൂര്‍ പി.ഡബ്ല്യു.ഡി റസ്റ്റ് ഹൗസ് കോണ്‍ഫറന്‍സ് ഹാളില്‍ നടക്കും. കമ്മീഷന്‍ ചെയര്‍മാന്‍ അഡ്വ. എ.എ. റഷീദ് ഹര്‍ജികള്‍ പരിഗണിക്കും. നിലവിലുള്ള പരാതികള്‍ പരിഗണിക്കുന്നതോടൊപ്പം പുതിയ പരാതികളും സ്വീകരിക്കും. കമ്മീഷന്റെ 9746515133 നമ്പറിലെ വാട്സാപ്പിലേക്കും പരാതികള്‍ അയയ്ക്കാം.

കൊണ്ടോട്ടി നഗരസഭയിലെ ചാരംകുത്ത്-ചെറുപറമ്പ് റോഡ് വെള്ളപ്പൊക്ക ദുരിതാശ്വാസ പദ്ധതിയില്‍ ഉള്‍പ്പെടുത്തി 10 ലക്ഷം രൂപയ്ക്ക് നവീകരിക്കുന്നതിന് ജില്ലാ കളക്ടര്‍ നിര്‍വഹണാനുമതി നല്‍കി.

കേരള ഫെഡറേഷന്‍ ഓഫ് ദി ബ്ലെന്‍ഡ് ജില്ലാ കമ്മിറ്റിയുടെയും ജില്ലാ സാക്ഷരതാമിഷന്റെയും സംയുക്ത ആഭിമുഖ്യത്തില്‍ അന്താരാഷ്ട്ര വൈറ്റ് കെയിന്‍ ദിനാചരണം നടത്തും. നാളെ (ഒക്ടോബര്‍ 15ന് ) രാവിലെ 10ന് കോട്ടപ്പടി ഗവ. ആശുപത്രി പരിസരത്ത് നിന്ന് ആരംഭിക്കുന്ന വൈറ്റ് കെയിന്‍ റാലി മുന്‍സിപ്പല്‍ ബസ്സ്റ്റാന്റ് പരിസരത്ത് സമാപിക്കും. തുടര്‍ന്ന് നടക്കുന്ന വൈറ്റ് കെയിന്‍ ദിനാചരണം മുന്‍സിപ്പല്‍ ചെയര്‍മാന്‍ മുജീബ് കാടേരി ഉദ്ഘാടനം ചെയ്യും. പരിപാടിയുടെ ഭാഗമായി വൈറ്റ് കെയിന്‍ (വെള്ള വടി) വിതരണവും നടക്കും.

ജില്ലയിലെ സമഗ്ര ശിക്ഷാ കേരളം പ്രൊജക്റ്റ് ഓഫീസില്‍ പ്രൊജക്റ്റ് എഞ്ചിനീയര്‍ തസ്തികയിലേക്ക് അപേക്ഷ ക്ഷണിച്ചു. സിവില്‍ എന്‍ജിനീയറിംഗില്‍ ബിടെക്/ബിഇ യോഗ്യതയുള്ളവര്‍ക്ക് അപേക്ഷിക്കാം. താത്പര്യമുള്ളവര്‍ യോഗ്യത തെളിയിക്കുന്ന രേഖകളുടെ അസല്‍ പകര്‍പ്പ് സഹിതം ഒക്ടോബര്‍ 22ന് വൈകിട്ട് അഞ്ചിന് മുന്‍പായി സമഗ്ര ശിക്ഷാ കേരളം, മലപ്പുറം ജില്ലാ പ്രോജക്ട് കോഓര്‍ഡിനേറ്ററുടെ കാര്യാലയത്തില്‍ അപേക്ഷിക്കണം. ഫോണ്‍-0483 2736953.

ജില്ലാ ദുരന്തനിവാരണ അതോറിറ്റിയുടെ ആഭിമുഖ്യത്തില്‍ സംസ്ഥാന ദുരന്ത ലഘൂകരണ നിധിയെക്കുറിച്ച് ഏകദിന ശില്പശാല സംഘടിപ്പിച്ചു. ജില്ലയില്‍ ദുരന്തസാധ്യതകള്‍ ലഘൂകരിക്കുന്നതിനുള്ള ദീര്‍ഘകാല പദ്ധതികള്‍ക്ക് രൂപം നല്‍കാനും വിവിധ വകുപ്പുകളുടെ ഏകോപനം ഉറപ്പാക്കാനും സംഘടിപ്പിച്ച ശില്പശാല അഡീഷണല്‍ ജില്ലാ മജിസ്ട്രേറ്റ് എന്‍.എം മെഹറലി ഉദ്ഘാടനം ചെയ്തു. ഡെപ്യൂട്ടി കളക്ടര്‍ സ്വാതി ചന്ദ്രമോഹന്‍ അധ്യക്ഷത വഹിച്ചു.

വണ്ടൂര്‍ പോലീസ് സ്റ്റേഷന് പുതിയ കെട്ടിടം നിര്‍മിക്കുന്നതിന് ഈ സ്ഥലത്തെ മൂന്ന് മരങ്ങള്‍ (ചീനി മരം-1, പാറക മരം-2) മുറിച്ചുമാറ്റി ഒക്ടോബര്‍ 23 ന് രാവിലെ 11ന് വണ്ടൂര്‍ പോലീസ് സ്റ്റേഷന്‍ പരിസരത്ത് വെച്ച് ലേലം ചെയ്യും. ലേലത്തില്‍ പങ്കെടുക്കാന്‍ ആഗ്രഹിക്കുന്നവര്‍ ഒക്ടോബര്‍ 22ന് വൈകിട്ട് അഞ്ചിന് മുന്‍പ് ജില്ലാ പൊലിസ് മേധാവിയുടെ പേരില്‍ ദര്‍ഘാസ് നല്‍കണം. ലേല തിയ്യതിക്ക് മുന്നേയുള്ള പ്രവൃത്തി ദിവസങ്ങളില്‍ രാവിലെ 11 മുതല്‍ നാലു വരെ സ്റ്റേഷന്‍ എസ്.എച്ച്.ഒ യുടെ അനുമതിയോടെ മരങ്ങള്‍ പരിശോധിക്കാം. ഫോണ്‍-0483 2734983.

പട്ടികജാതി, പട്ടികകവര്‍ഗ്ഗ പിന്നാക്ക വിഭാഗ വികസന വകുപ്പിന്റെ സാമൂഹ്യ ഐക്യദാര്‍ഢ്യ പക്ഷാചരണം ജില്ലാതല സമ്മേളനവും അതിക്രമം തടയല്‍ നിയമം സെമിനാറും ജില്ലാ ആസൂത്രണ സമിതി ഹാളില്‍ നടന്നു. പരിപാടി മലപ്പുറം മുന്‍സിപ്പാലിറ്റി ചെയര്‍മാന്‍ മുജീബ് കാടേരി ഉദ്ഘാടനം ചെയ്തു. ജില്ലാ പട്ടികജാതി വികസന ഓഫീസര്‍ കെ.പി. ഷാജി അധ്യക്ഷത വഹിച്ചു.

സാമൂഹിക ഐക്യം, ദേശീയോദ്ഗ്രഥനം എന്നിവയെക്കുറിച്ചുള്ള സന്ദേശം ജനങ്ങളിലേക്ക് എത്തിക്കുക, വിവിധ സമുദായങ്ങള്‍ക്കിടയില്‍ സാഹോദര്യവും സ്നേഹവും വളര്‍ത്തുക, സമൂഹത്തില്‍ സഹിഷ്ണുതയും പരസ്പര ധാരണയും വര്‍ധിപ്പിക്കുക തുടങ്ങിയവയാണ് പരിപാടിയുടെ പ്രധാന ലക്ഷ്യങ്ങള്‍.

ജില്ലാ എംപ്ലോയ്മെന്റ് എക്സ്ചേഞ്ച്, എംപ്ലോയബിലിറ്റി സെന്ററിന്റെ ആഭിമുഖ്യത്തില്‍ സംഘടിപ്പിക്കുന്ന ജോബ് ഇന്റര്‍വ്യൂ 2025 ഒക്ടോബര് 18ന് രാവിലെ 10മുതല്‍ 1.30 വരെ മലപ്പുറം എംപ്ലോയബിലിറ്റി സെന്ററില്‍ നടക്കും. നാല് പ്രമുഖ സ്ഥാപനങ്ങളിലേക്കായി നടക്കുന്ന ജോബ് ഫെയറില്‍ 100ലധികം ഒഴിവുകള്‍ റിപ്പോര്‍ട്ട് ചെയ്തിട്ടുണ്ട്.

ജില്ലാ ക്ഷീരകര്‍ഷക സംഗമമായ 'ജീവനീയം 2025-26 ന്റെ ഭാഗമായി അങ്കണവാടി കുട്ടികള്‍ക്കായി സംഘടിപ്പിക്കുന്ന 'നിറക്കൂട്ട്'കളറിങ് മത്സരം ഒക്ടോബര്‍ 20ന് രാവിലെ 10ന് നിറമരുതൂര്‍ സൂര്‍ പാലസ് കണ്‍വെന്‍ഷന്‍ സെന്റര്‍ അങ്കണത്തില്‍ നടക്കും.