തിരുവല്ല മാമ്മന്‍ മത്തായി ഹാളില്‍ നടന്ന വനിതാ കമ്മിഷന്‍ അദാലത്തില്‍ 15 പരാതി തീര്‍പ്പാക്കി. ആകെ 47 പരാതി  ലഭിച്ചു. അഞ്ചെണ്ണം പോലിസ് റിപ്പോര്‍ട്ടിനും രണ്ടെണ്ണം ജാഗ്രതാസമിതി റിപ്പോര്‍ട്ടിനും അയച്ചു. മൂന്ന് പരാതി ജില്ലാ നിയമ സേവന അതോറിറ്റിക്ക് കൈമാറി. 22 കേസുകള്‍ അടുത്ത സിറ്റിംഗിലേക്ക് മാറ്റി. കമ്മീഷന്‍ അംഗം അഡ്വ. എലിസബത്ത് മാമ്മന്‍ മത്തായി നേതൃത്വം നല്‍കി. പാനല്‍ അഭിഭാഷക സീമ, പോലിസ് ഉദ്യോഗസ്ഥരായ കെ.ജയ, റ്റി.കെ സുബി എന്നിവര്‍ പങ്കെടുത്തു.
 

അട്ടപ്പാടിയിലെ ആദ്യത്തെ മാ കെയര്‍ സെന്റര്‍ ഷോളയൂര്‍ ഗവ. ട്രൈബല്‍ ഹയര്‍ സെക്കന്‍ഡറി സ്‌കൂളില്‍ പ്രവര്‍ത്തനമാരംഭിച്ചു. വിദ്യാര്‍ഥികള്‍ക്ക് കുറഞ്ഞ വിലയില്‍ ലഘുഭക്ഷണമുള്‍പ്പടെയുള്ള സാധനങ്ങള്‍ ലഭ്യമാക്കാനാണ് മാ കെയര്‍ സെന്റര്‍ ആരംഭിച്ചത്. പൊതു വിദ്യാഭ്യാസവകുപ്പിന്റെ നേതൃത്വത്തില്‍ നടപ്പാക്കുന്ന കുടുംബശ്രീ സംരംഭമാണ് മാ കെയര്‍ സെന്റര്‍. കുടുംബശ്രീ അട്ടപ്പാടി സമഗ്ര ആദിവാസി വികസന പദ്ധതിയുടെ കീഴില്‍ ഷോളയൂര്‍ ഊരുസമിതിയിലെ രാധ രാഹുല്‍, അനിത പഴനിസ്വാമി, രാജേശ്വരി മണികണ്ഠന്‍, ജയലക്ഷ്മി രാജന്‍ എന്നിവര്‍ ആണ് പദ്ധതിക്ക് നേതൃത്വം നല്‍കുന്നത്.

ശുചിത്വോത്സവത്തിന്റെ ഭാഗമായി മലമ്പുഴ ബ്ലോക്ക് പഞ്ചായത്ത് പരിധിയിലെ വിദ്യാര്‍ഥികള്‍ക്കായി സംഘടിപ്പിക്കുന്ന ക്വിസ് മത്സരം ഇന്ന് (സെപ്റ്റംബര്‍ 25) രാവിലെ 11ന് ബ്ലോക്ക് പഞ്ചായത്ത് ഹാളില്‍ നടക്കും. ഏഴാം ക്ലാസ് വരെയുള്ള വിദ്യാര്‍ഥികള്‍ക്കാണ് മത്സരം സംഘടിപ്പിക്കുന്നത്. മലമ്പുഴ ബ്ലോക്ക് പഞ്ചായത്ത് പരിധിയിലുള്ള വിദ്യാര്‍ഥികള്‍ പങ്കെടുക്കണമെന്ന് മലമ്പുഴ ബ്ലോക്ക് പഞ്ചായത്ത് സെക്രട്ടറി അറിയിച്ചു.

ഒറ്റപ്പാലം താലൂക്ക് ആശുപത്രിയില്‍ ജെ എസ് എസ് കെ പദ്ധതിയുടെ ഭാഗമായി അമ്മയേയും കുഞ്ഞിനേയും വീടുകളില്‍ എത്തിക്കുന്നതിന് അഞ്ച് സീറ്റുള്ള (1500 സി സി യില്‍ താഴെ) വാഹന ഉടമകളില്‍ നിന്ന് ടെന്‍ഡര്‍ ക്ഷണിച്ചു. ടെന്‍ഡര്‍ ഫോമുകള്‍ സെപ്റ്റംബര്‍ 29 ന് രാവിലെ 11 വരെ ഓഫീസില്‍ നിന്നും ലഭിക്കും. ടെന്‍ഡര്‍ സ്വീകരിക്കുന്ന അവസാന തീയതി സെപ്റ്റംബര്‍ 30 ഉച്ചയ്ക്ക് ഒരു മണി. അന്നേ ദിവസം വൈകീട്ട് മൂന്നിന് ടെന്‍ഡറുകള്‍ തുറന്ന് പരിശോധിക്കും. ഫോണ്‍: 0466 2344053.  

മലമ്പുഴ ഗവ. ഐ ടി ഐ യില്‍ ടര്‍ണര്‍ ട്രേഡില്‍ ഗസ്റ്റ് ഇന്‍സട്രക്ടറെ നിയമിക്കുന്നതിന് സെപ്റ്റംബര്‍ 29 ന് രാവിലെ 11 ന് കൂടിക്കാഴ്ച നടത്തും. ടര്‍ണര്‍ ട്രേഡില്‍ എന്‍ ടി സി യും ഒരു വര്‍ഷത്തെ പ്രവൃത്തി പരിചയവും അല്ലെങ്കില്‍ ബന്ധപ്പെട്ട എഞ്ചിനീയറിങ് ബ്രാഞ്ചില്‍ മൂന്ന് വര്‍ഷ ഡിപ്ലോമയോ ഡിഗ്രിയോ ഉള്ളവര്‍ക്ക് കൂടിക്കാഴ്ചയില്‍ പങ്കെടുക്കാം. താല്‍പര്യമുള്ള ഉദ്യോഗാര്‍ഥികള്‍ അസ്സല്‍ സര്‍ട്ടിഫിക്കറ്റുകള്‍ സഹിതം എത്തിച്ചേരണം. ഫോണ്‍: 0491 2815161.

ജില്ലയിലെ 120 പ്രീ പ്രൈമറി സ്‌കൂളുകള്‍ 'വര്‍ണ്ണക്കൂടാരം' പദ്ധതിയിലൂടെ ആധുനിക നിലവാരത്തിലെത്തി.  പ്രീ പ്രൈമറി വിദ്യാലയങ്ങളുടെ ആധുനീകവും ശാസ്ത്രീയവുമായ നവീകരണത്തിനായി സംസ്ഥാന സര്‍ക്കാര്‍ നടപ്പിലാക്കുന്ന പദ്ധതിയാണ് വര്‍ണ്ണക്കൂടാരം. 12 കോടി രൂപയാണ് പദ്ധതിക്കായി ജില്ലയ്ക്ക് ഇതുവരെ അനുവദിച്ചത്. സ്റ്റാര്‍സ്( STARS -STRENGHTHENING TEACHING LEARNING AND RESULTS FOR STATES)  പദ്ധതിയുടെ  ഭാഗമായി സമഗ്ര ശിക്ഷാ കേരളമാണ് മോഡല്‍ പ്രൈമറി സ്‌കൂള്‍ പദ്ധതി നടപ്പിലാക്കുന്നത്.

വണ്ടാഴി ഗ്രാമപഞ്ചായത്തില്‍ നിര്‍മ്മാണം പൂര്‍ത്തിയാക്കിയ മാത്തൂര്‍, പെരണംകാട് മാലിന്യ സംസ്‌കരണ പ്ലാന്റ്, ജൈവ അജൈവ വളം നിര്‍മ്മാണ യൂണിറ്റ് എന്നിവയുടെ ഉദ്ഘാടനം ഇന്ന്(സെപ്റ്റംബര്‍ 25ന്) രാവിലെ 11ന് തദ്ദേശ സ്വയംഭരണ എക്സൈസ് വകുപ്പ് മന്ത്രി എം.ബി രാജേഷ് നിര്‍വഹിക്കും. കെ.ഡി പ്രസേനന്‍ എം.എല്‍.എ അധ്യക്ഷനാകും. വണ്ടാഴി ഗ്രാമപഞ്ചായത്ത് സെക്രട്ടറി കെ.ജി സജീവ് കുമാര്‍ റിപ്പോര്‍ട്ട് അവതരിപ്പിക്കും. പരിപാടിയില്‍ നെന്മാറ ബ്ലോക്ക് പഞ്ചായത്ത് പ്രസിഡന്റ് സി. ലീലാമണി, വണ്ടാഴി ഗ്രാമപഞ്ചായത്ത് പ്രസിഡന്റ് കെ.എല്‍ രമേശ്, ജനപ്രതിനിധികള്‍, മറ്റ് ഉദ്യോഗസ്ഥര്‍ എന്നിവര്‍ പങ്കെടുക്കും.

പത്താമത് ആയുര്‍വേദ ദിനാചരണത്തിന്റെ ജില്ലാതല ഉദ്ഘാടനം കാതോലിക്കേറ്റ് കോളജില്‍ ഭാരതീയ ചികിത്സാ വകുപ്പും ദേശീയ ആയുഷ് വകുപ്പും സംയുക്തമായി സംഘടിപ്പിച്ചു. ജില്ലാ പഞ്ചായത്ത് പ്രസിഡന്റ് ജോര്‍ജ് എബ്രഹാം ഉദ്ഘാടനം നിര്‍വഹിച്ചു. ജില്ലാ പഞ്ചായത്ത് ആരോഗ്യ സ്റ്റാന്‍ഡിംഗ് കമ്മിറ്റി ചെയര്‍മാന്‍ ആര്‍. അജയകുമാര്‍ അധ്യക്ഷനായി. ഹോമിയോ ജില്ലാ മെഡിക്കല്‍ ഓഫീസര്‍ ഡോ. ബിജുകുമാര്‍ മുഖ്യ പ്രഭാഷണം നടത്തി. ഭാരതീയ ചികിത്സാ വകുപ്പ് ജില്ലാ മെഡിക്കല്‍ ഓഫീസര്‍ ഡോ. ജെ മിനി ആയുര്‍വേദ ദിന സന്ദേശം നല്‍കി. ആയുഷ് മിഷന്‍ ജില്ലാപ്രോഗ്രാം മാനേജര്‍ ഡോ. എസ് അഖില, കോളജ് മലയാള വിഭാഗം മേധാവി ഡോ.