ജവഹർ നവോദയ വിദ്യാലയത്തിൽ 2026-27 അധ്യയന വർഷത്തേക്കു ഒൻപത്, പതിനൊന്നു ക്ലാസുകളിലേക്കുള്ള ലാറ്ററൽ എൻട്രി പ്രവേശന പരീക്ഷയ്ക്ക് ഒക്ടോബർ ഏഴുവരെ രജിസ്റ്റർ ചെയ്യാം. വിശദവിവരങ്ങൾ navodaya. nic. in എന്ന വെബ്‌സൈറ്റിൽ ലഭിക്കും. ഫോൺ: 9562901232, 04812578402.
 

 കാർഷിക വിജ്ഞാന-വിനോദ-വിപണന പ്രദർശനവും ചർച്ചകളും മത്സരങ്ങളുമായി കോഴാ ഫാം ഫെസ്റ്റ് -'ഹരിതാരവം 2കെ25'  സെപ്റ്റംബർ 27 മുതൽ 30 വരെ കുറവിലങ്ങാട് കോഴായിൽ നടക്കും. കാർഷിക വികസന കർഷക ക്ഷേമ വകുപ്പും ജില്ലാ പഞ്ചായത്തും സംയുക്തമായാണ് പരിപാടി സംഘടിപ്പിക്കുന്നത്. സെപ്റ്റംബർ 27(ശനിയാഴ്ച) വൈകിട്ട് നാലു മണിയ്ക്ക് സഹകരണം-ദേവസ്വം-തുറമുഖ വകുപ്പ് മന്ത്രി വി.എൻ. വാസവൻ ഫാം ഫെസ്റ്റ് ഉദ്ഘാടനം ചെയ്യും. മോൻസ് ജോസഫ് എം.എൽ.എ. ചടങ്ങിൽ അധ്യക്ഷനായിരിക്കും. അഡ്വ. കെ. ഫ്രാൻസിസ് ജോർജ് എം.പി. മുഖ്യപ്രഭാഷണം നടത്തും.
   

കാർഷിക മേഖലയിൽ പുത്തൻ ഉണർവിനായി ജലസേചനവകുപ്പു നടപ്പാക്കുന്ന മൈക്രോ ഇറിഗേഷൻ പദ്ധതിക്കു ജില്ലയിൽ തുടക്കം കുറിക്കുന്നു. മൈനർ ഇറിഗേഷൻ വകുപ്പുവഴി 2.15 കോടി രൂപ ചെലവിട്ടു കുറവിലങ്ങാട് ഗ്രാമപഞ്ചായത്തിലെ ജയ്ഗിരി വാർഡിലാണ് പദ്ധതി നടപ്പാക്കുന്നത്. 

ഓണത്തോടനുബന്ധിച്ചു നടത്തിയ പ്രത്യേക പരിശോധനയിലടക്കം ജില്ലയിൽ 68 പേർ മയക്കുമരുന്നു കേസുകളിൽ അറസ്റ്റിലായതായി എക്സൈസ് വകുപ്പ് അറിയിച്ചു.

ഓഗസ്റ്റ് 27 മുതൽ സെപ്റ്റംബർ 22 വരെയുള്ള കണക്കാണിത്. ഈ കാലയളവിൽ 71 എൻ.ഡി.പി.എസ്. (മയക്കുമരുന്നു ലഹരിപദാർഥ നിയമം) കേസുകളാണ് എടുത്തിട്ടുള്ളത്. രണ്ടുവാഹനങ്ങൾ പിടിച്ചെടുത്തതായും നാർക്കോ കോ- ഓർഡിനേഷൻ ജില്ലാതലയോഗത്തിൽ വകുപ്പ് ഉദ്യോഗസ്ഥർ വ്യക്തമാക്കി.

ഏറ്റുമാനൂർ ഗവൺമെന്റ് ഐ.ടി.ഐയിൽ വുഡ് വർക്ക് ടെക്‌നീഷ്യൻ,  അപ്‌ഹോൾസ്റ്റർ, ഇൻസ്ട്രുമെന്റ് മെക്കാനിക്ക്, ടൂൾ ആൻഡ് ഡൈ മേക്കർ, ടെക്‌നീഷ്യൻ പവർ ഇലക്ട്രോണിക്‌സ് സിസ്റ്റം, പ്ലംബർ എന്നീ ട്രേഡുകളിൽ ഒഴിവുള്ള സീറ്റുകളിലേക്ക് അപേക്ഷ ക്ഷണിച്ചു. താൽപര്യമുള്ളവർ സെപ്റ്റംബർ 30ന് സ്ഥാപനത്തിൽ നേരിട്ടെത്തി അപേക്ഷിക്കണം. ഫോൺ: 9496800788, 9446 607989, 9496368933, 0481- 2535562.

ജില്ലയിലെ വിവിധ വകുപ്പുകളിലെ ക്ലർക്ക് (കാറ്റഗറി നമ്പർ 207/2019) തസ്തികയിൽ 2022 ഓഗസ്റ്റ് ഒന്നിന് നിലവിൽ വന്ന പട്ടിക മൂന്ന് വർഷക്കാലാവധി പൂർത്തിയാക്കിയതിനാൽ 2025 ജൂലൈ 31 ന് റദ്ദാക്കിയതായി ജില്ല പി.എസ്.സി. ഓഫീസർ അറിയിച്ചു.

പാമ്പാടി അസാപ് കമ്മ്യൂണിറ്റി സ്‌കിൽ പാർക്കിൽ പ്രൊഫഷണൽ ഇൻ ഗ്രാഫിക് ഡിസൈനിംഗ് കോഴ്‌സിലേക്ക് അപേക്ഷ ക്ഷണിച്ചു. വിശദവിവരത്തിന് ഫോൺ: 9495999731.

ഇലക്ട്രിക് സർവീസ് ടെക്‌നീഷ്യൻ കോഴ്‌സിലേക്ക് അസാപ് കേരള ട്രെയിനർമാരെ നിയമിക്കുന്നു. ഇലക്ട്രിക്കൽ ആൻഡ് ഇലക്ട്രോണിക്‌സ്  എഞ്ചിനീയറിങ്ങിൽ ബി.ഇ അല്ലെങ്കിൽ ബിടെക് ( എംടെക് അഭികാമ്യം) ഉള്ളവർക്ക് അപേക്ഷിക്കാം. കുറഞ്ഞത് മൂന്നു വർഷം പ്രവൃത്തിപരിചയം. താൽപര്യമുള്ളവർ സെപ്റ്റംബർ 27ന് തിരുവല്ല കുന്നന്താനത്തെ അസാപ് കമ്മ്യൂണിറ്റി സ്‌കിൽ പാർക്കിൽ നടക്കുന്ന തൊഴിൽമേളയിൽ പങ്കെടുക്കണം. ഫോൺ: 9495999688, 9496085912.

 ജില്ലയിലെ വിവിധ വകുപ്പുകളിലെ ലാസ്റ്റ് ഗ്രേഡ് സെർവന്റ്‌സ് തസ്തികയിലേയ്ക്കുള്ള (കാറ്റഗറി നമ്പർ: 548 / 2019) തിരഞ്ഞെടുപ്പിനായി  2022 ജൂലൈ 18 ന് നിലവിൽ വന്ന റാങ്ക് പട്ടികയിലെ മുഖ്യപട്ടികയിൽ ഉൾപ്പെട്ട എല്ലാ ഉദ്യോഗാർത്ഥികളെയും നിയമന ശുപാർശ ചെയ്തതിനെ തുടർന്ന് 2025 ജൂലൈ 25ന് റദ്ദാക്കിയതായി ജില്ലാ പി.എസ്.സി. ഓഫീസർ അറിയിച്ചു.

സെപ്റ്റംബർ മാസത്തെ ജില്ലാ വികസന സമിതി യോഗം ശനിയാഴ്ച (സെപ്റ്റംബർ 27) രാവിലെ 10.30ന് ജില്ലാ ആസൂത്രണ സമിതി സെക്രട്ടറിയേറ്റ് കോൺ ഫറൻസ് ഹാളിൽ ചേരും.