പോത്തുണ്ടി പദ്ധതിയുടെ വലതുകര കനാല്‍ ഇന്ന് ( സെപ്റ്റംബര്‍ 26) രാവിലെ പത്തിന് നിയന്ത്രണ അളവില്‍ തുറക്കുന്നതാണെന്ന് എക്‌സിക്യൂട്ടീവ് എഞ്ചിനീയര്‍ അറിയിച്ചു.

 തൃക്കൊടിത്താനം ഗവൺമെന്‍റ് ഹയർ സെക്കൻഡറി സ്‌കൂളിൽ 2.12 കോടി ചെലവിട്ടു പൂർത്തിയാക്കിയ വിവിധ പദ്ധതികൾ പൊതുവിദ്യാഭ്യാസ -തൊഴില്‍ വകുപ്പുമന്ത്രി വി. ശിവൻകുട്ടി നാടിനു സമർപ്പിച്ചു.

ലിംഗനീതി, സാമൂഹിക നീതി, ഭരണഘടനാ മൂല്യങ്ങള്‍ തുടങ്ങിയവയുടെ പ്രാധാന്യം വിദ്യാര്‍ഥികള്‍ക്ക് മനസിലാകുന്ന രീതിയിലാണ് പുതിയ പാഠ്യപദ്ധതി ചിട്ടപ്പെടുത്തുന്നതെന്ന് മന്ത്രി പറഞ്ഞു. വിദ്യാഭ്യാസ മേഖലയിലെ അടിസ്ഥാന സൗകര്യ വികസനത്തിൽ കേരളം രാജ്യത്ത് മുൻനിരയിലാണ്. പഠന നിലവാരത്തിലും ദേശീയ തലത്തിൽ മുന്നിലെത്താന്‍ നമുക്ക് കഴിഞ്ഞു-അദ്ദേഹം കൂട്ടിച്ചേര്‍ത്തു. 

വ്യവസായ വകുപ്പിന് കീഴില്‍ പാലക്കാട് താലൂക്കില്‍ പുതുശ്ശേരി വെസ്റ്റ് വില്ലേജിലെ ബ്ലോക്ക് 30, സെന്‍ട്രല്‍ വില്ലേജില്‍ ബ്ലോക്ക് 34ല്‍ വ്യവസായ ആവശ്യങ്ങള്‍ക്കായി ഭൂമി ആവശ്യമുള്ള സംരഭകരില്‍ നിന്ന് അപേക്ഷ ക്ഷണിച്ചു. അപേക്ഷകള്‍ ഒക്ടോബര്‍ 14 വൈകീട്ട് അഞ്ചിന് മുന്‍പ് പാലക്കാട് ജില്ലാ വ്യവസായ കേന്ദ്രത്തില്‍ ലഭ്യമാക്കണമെന്ന് ജനറല്‍ മാനേജര്‍ അറിയിച്ചു.
 

കേരള സര്‍ക്കാരിന്റെ 'വിഷന്‍ 2031' എന്ന പരിപാടിയുടെ ഭാഗമായി പൊതു വിതരണ ഉപഭോക്തൃകാര്യ വകുപ്പ് ഒക്ടോബര്‍ 10 ന് നിശാഗന്ധി ഓഡിറ്റോറിയത്തില്‍ സംഘടിപ്പിക്കുന്ന സെമിനാറിന് ലോഗോ ക്ഷണിച്ചു. ' ഭക്ഷ്യ ഭദ്രതയില്‍ നിന്നും പോഷക ഭദ്രതയിലേക്ക്' എന്ന ആശയത്തെ അടിസ്ഥാനമാക്കിയാണ് ലോഗോ തയ്യാറാക്കേണ്ടത്. തിരഞ്ഞെടുക്കപ്പെടുന്ന ലോഗോ തയ്യാറാക്കുന്ന വ്യക്തിക്ക് ഭക്ഷ്യ പൊതു വിതരണ ഉപഭോക്തൃകാര്യ വകുപ്പു മന്ത്രി ഉപഹാരം നല്‍കും.  ലോഗോ ഡിസൈന്‍ ചെയ്ത് എച്ച് ഡി ക്വാളിറ്റിയിലുള്ള ജെ പി ജി / പി എന്‍ ജി ഫോര്‍മാറ്റില്‍ ccsdsection@gmail.com ല്‍ അയക്കണം.

 പോളിയോ വൈറസ് നിർമാർജനം ലക്ഷ്യമിട്ടു നടത്തുന്ന പൾസ് പോളിയോ ഇമ്മ്യൂണൈസേഷൻ പരിപാടി കോട്ടയം ജില്ലയില്‍  ഞായറാഴ്ച (ഒക്ടോബർ 12 ) നടക്കും. ജില്ലാതല ഉദ്ഘാടനം രാവിലെ 8.30 ന് ഏറ്റുമാനൂർ കുടുംബാരോ​ഗ്യ കേന്ദ്രത്തിൽ  സഹകരണം- തുറമുഖം- ദേവസ്വം വകുപ്പ് മന്ത്രി വി.എൻ. വാസവൻ നിർവഹിക്കും.  ഏറ്റുമാനൂർ ന​ഗരസഭാ അധ്യക്ഷ ലൗലി ജോർജ്ജ് അധ്യക്ഷത വഹിക്കും.

അയ്മനം ഗ്രാമപഞ്ചായത്തിലെ  വികസന സദസ്സ് ഞായറാഴ്ച(ഒക്ടോബർ 12) രാവിലെ 9ന്   സഹകരണം- തുറമുഖം- ദേവസ്വം വകുപ്പ് മന്ത്രി  വി.എൻ. വാസവൻ ഉദ്ഘാടനം ചെയ്യും. പഞ്ചായത്ത് ഹാളിൽ നടക്കുന്ന പരിപാടിയിൽ ഗ്രാമപഞ്ചായത്ത് പ്രസിഡൻറ് വിജി രാജേഷ് ആധ്യക്ഷം വഹിക്കും.

പഞ്ചായത്തിന്റെ  വികസന നേട്ടങ്ങൾ ഗ്രാമപഞ്ചായത്ത് സെക്രട്ടറി മിനി തോമസും. സംസ്ഥാന സർക്കാരിൻ്റെ  വികസന നേട്ടങ്ങൾ റിസോഴ്സ് പേഴ്സൺ ബിലാൽ കെ. റാമും അവതരിപ്പിക്കും. തുടർന്ന് ഭാവി വികസന നേട്ടങ്ങളേക്കുറിച്ച് തുറന്ന ചർച്ചയും നടക്കും. 

കരൂർ ​ഗ്രാമപഞ്ചായത്തിലെ വികസനസദസിന്‍റെ ഉദ്ഘാടനവും ​പ്രോ​ഗ്രസ് റിപ്പോർട്ടിന്റെ പ്രകാശനവും ജോസ് കെ. മാണി എം.പി നിർവഹിച്ചു. വലവൂർ കോ- ഓപ്പറേറ്റീവ് ബാങ്ക് കൺവെഷൻ സെന്‍ററിൽ നടന്ന ചടങ്ങിൽ ​ഗ്രാമപഞ്ചായത്ത് പ്രസിഡന്‍റ് അനസ്യ രാമൻ അധ്യക്ഷത വ​ഹിച്ചു. ​ഗ്രാമപഞ്ചായത്ത് സെക്രട്ടറി സെറീന അബ്ദുൾ അസീസ് പഞ്ചായത്തിലെ വികസന പ്രവർത്തനങ്ങളുടെ അവതരണം നടത്തി.  

​ഗ്രാമീണ മേഖലയിലെ മൺ റോഡുകൾ ടാർ ചെയ്യുക,   കാർഷിക ഓപ്പൺ മാർക്കറ്റ് സ്ഥാപിക്കുക, ലൈഫ് ഭവന പദ്ധതിയുടെ തുക വർധിപ്പിക്കുക, കാർഷിക മേഖലയിൽ തൊഴിൽ സേന  രൂപീകരിക്കുക എന്നീ നിർദേശങ്ങൾ ചർച്ചയിൽ ഉയർന്നു. 

  മുളക്കുളം ഗ്രാമപഞ്ചായത്തിലെ വികസന സദസ് ജില്ലാ പഞ്ചായത്തംഗം ജോസ് പുത്തൻകാലാ ഉദ്ഘാടനം ചെയ്തു.  ഗ്രാമപഞ്ചായത്ത് പ്രസിഡന്‍റ് ടി.കെ. വാസുദേവൻ നായർ അധ്യക്ഷത വഹിച്ചു.  ബ്ലോക്ക് പഞ്ചായത്ത് പ്രസിഡന്‍റ് ജോൺസൺ കൊട്ടുകാപ്പിള്ളി മുഖ്യപ്രഭാഷണം നടത്തി. ഗ്രാമപഞ്ചായത്ത് അസിസ്റ്റന്‍റ് സെക്രട്ടറി കെ. ശ്രീകല റിപ്പോർട്ട് അവതരിപ്പിച്ചു.