ഇന്‍ഡ്യന്‍ കൗണ്‍സില്‍ ഓഫ് ഫോറസ്ട്രി റിസര്‍ച്ച് ആന്‍ഡ് എഡ്യൂക്കേഷന്റെ (ഐ.സി.എഫ്.ആര്‍.ഇ) നേതൃത്വത്തില്‍ ഇന്‍സ്റ്റിറ്റ്യൂട്ട് ഓഫ് ഫോറസ്റ്റ് ജനിറ്റിക്സ് ആന്‍ഡ് ട്രീ ബ്രീഡിംഗ് (ഐ.എഫ്.ജി.ടി.ബി), കേരള വനം വന്യജീവി വകുപ്പ് എന്നിവര്‍ സംയുക്തമായി സംഘടിപ്പിച്ച  'ട്രീ ഗ്രോവേര്‍സ് മേള 2025' ശ്രദ്ധേയമായി. പരിപാടി കെ. ബാബു എം.എല്‍.എ ഉദ്ഘാടനം ചെയ്തു. മരങ്ങള്‍ നടുന്നതിലൂടെ സമൂഹത്തിനും പരിസ്ഥിതിക്കും ഗുണമുണ്ടാവുന്നുണ്ടെന്നും നമുക്ക് വരുമാന സ്രോതസ്സ് ഉണ്ടാക്കാന്‍ കഴിയുമെന്നും എം.എല്‍.എ പറഞ്ഞു. കാലാവസ്ഥാ വ്യതിയാനത്തെ തരണം ചെയ്യാനുള്ള പ്രവര്‍ത്തനങ്ങള്‍ ഒരോ വര്‍ഷവും നടന്നുകൊണ്ടിരിക്കുകയാണ്.

ജലസ്രോതസ്സുകള്‍ കൂടുതലുള്ള ജില്ല എന്നത് കണക്കിലെടുത്തും രണ്ട് പേര്‍ക്ക് അമീബിക് മസ്തിഷ്‌ക ജ്വരം റിപ്പോര്‍ട്ട് ചെയ്ത സാഹചര്യം കണക്കിലെടുത്തും തദ്ദേശ സ്വയംഭരണ സ്ഥാപനങ്ങളുടെ നേതൃത്വത്തില്‍ ജില്ലയില്‍ നീന്തല്‍ പരിശീലനം നടക്കുന്ന ജലസ്രോതസ്സുകളിലുള്‍പ്പെടെ ശുചീകരണം  ഊര്‍ജ്ജിതമാക്കും. ജില്ലാ കളക്ടര്‍ എം എസ് മാധവിക്കുട്ടിയുടെ അധ്യക്ഷതയില്‍ കളക്ടറേറ്റ് കോണ്‍ഫറന്‍സ് ഹാളില്‍ നടന്ന അമീബിക് മസ്തിഷ്‌ക ജ്വരം സംബന്ധിച്ച ആര്‍ ആര്‍ ടി ( റാപിഡ് റെസ്പോണ്‍സ് ടീം)  മീറ്റിങ്, ജില്ലാതല ടാസ്‌ക് ഫോഴ്സ് മീറ്റിങ്ങ്  എന്നിവയിലാണ് തീരുമാനം.

 
പത്തിരിപ്പാല മൗണ്ട് സീന സ്‌പെഷല്‍ സ്‌കൂളില്‍ നടന്ന പാലക്കാട് റവന്യു ജില്ലാ സ്‌പെഷ്യല്‍ സ്‌കൂള്‍ കലോത്സവം അഡ്വ. കെ.പ്രേംകുമാര്‍  എം.എല്‍എ ഉദ്ഘാടനം ചെയ്തു. പത്ത് കോടി രൂപ ചെലവില്‍ ഒറ്റപ്പാലം ഡെഫ് സ്‌കൂള്‍ ഇന്‍ഡോര്‍ സ്റ്റേഡിയം സ്ഥാപിക്കുമെന്ന്  എംഎല്‍എ പറഞ്ഞു.13 സ്‌പെഷല്‍ സ്‌ക്കൂള്‍, 27 ബഡ്‌സ് സ്‌കൂളുകളില്‍ നിന്നുമായി 350 ലേറെ വിദ്യാര്‍ത്ഥികള്‍ പങ്കെടുക്കുന്ന പരിപാടി ജൂനിയര്‍ , സീനിയര്‍ തലങ്ങളിലായി നാല് സ്റ്റേജുകളിലായി ഒന്‍പത് ഇനങ്ങളിലാണ് മത്സരം.

സംസ്ഥാനത്തെ തദ്ദേശ സ്വയംഭരണ സ്ഥാപനങ്ങളിലെ വികസന നേട്ടങ്ങൾ ചർച്ച ചെയ്യുന്ന വികസന സദസ്സിന്റെ ലോഗോ പ്രകാശനം ചെയ്തു. തദ്ദേശ സ്വയംഭരണ വകുപ്പ് മന്ത്രി എം ബി രാജേഷ് റവന്യു പ്രിന്‍സിപ്പല്‍ സെക്രട്ടറി ടിങ്കു ബിസ്വാളിന് നല്‍കിയാണ് പ്രകാശനം നിർവഹിച്ചത്. ഇൻഫർമേഷൻ പബ്ലിക് റിലേഷൻസ് വകുപ്പ് സെക്രട്ടറി എസ് ഹരികിഷോർ, തദ്ദേശ സ്വയംഭരണ വകുപ്പ് സ്‌പെഷ്യൽ സെക്രട്ടറി ടി വി അനുപമ എന്നിവർ സന്നിഹിതരായി.  

നെല്ലിയാമ്പതിയിൽ ദേശീയ പ്രാണി ജന്യ രോഗ നിയന്ത്രണ പരിപാടിയുടെ ഭാഗമായി (നാഷണൽ വെക്ടർ ബോൺ ഡിസീസ് കണ്‍ട്രോള്‍ പ്രോഗ്രാം)  അതിഥി തൊഴിലാളികൾക്ക് മലമ്പനി, ജീവിതശൈലി രോഗ നിയന്ത്രണം എന്നീ വിഷയങ്ങളില്‍ ആരോഗ്യ ബോധവൽക്കരണം നല്‍കി.  കൂടാതെ സ്ത്രീ ക്യാമ്പയിനിന്റെ ഭാഗമായി അഥിതി തൊഴിലാളികളിലെ സ്ത്രീകൾക്ക് ആരോഗ്യ സുരക്ഷ സംബന്ധിച്ച രക്ത പരിശോധനകളും ബോധവത്കരണവും നൽകി. 

കുടുംബശ്രീ ദേശീയ സരസ് മേള ജനുവരിയില്‍ പാലക്കാട് നടക്കും. രാജ്യത്തിന്റെ വിവിധ ഭാഗങ്ങളില്‍ നിന്നുള്ള തദ്ദേശീയവും വൈവിധ്യപൂര്‍ണവുമായ ഉല്‍പ്പന്നങ്ങളും കേരളത്തിലേയും ഇതരസംസ്ഥാനങ്ങളിലെയും ഫുഡ് കോര്‍ട്ടുകളും, വിവിധ വിഷയങ്ങളെ അധികരിച്ചുള്ള സെമിനാറുകള്‍, നാടിന്റെ പൈതൃകവും സംസ്‌കാരവും വിളിച്ചോതുന്ന കലാ-സാംസ്‌കാരിക പരിപാടികളും  മേളയില്‍ അരങ്ങേറും.
കുടുംബശ്രീയുടെ നേതൃത്വത്തില്‍ സംഘടിപ്പിക്കുന്ന  മേളയുടെ മുന്നൊരുക്കങ്ങളും പുരോഗതിയും വിലയിരുത്തുന്നതിനായുള്ള ജില്ലാതല അവലോകന യോഗം രണ്ട് ദിവസങ്ങളിലായി  പാലക്കാട് ഹോട്ടല്‍ ഗസാലയില്‍ നടന്നു.

സ്ത്രീ ക്ലിനിക്കുകളുടെ ജില്ലാതല ഉദ്ഘാടനം ഇന്ന് (സെപ്റ്റംബര്‍ 20) രാവിലെ 11ന് പാലക്കാട് സ്ത്രീകളുടെയും കുട്ടികളുടെയും ആശുപത്രിയില്‍ വി.കെ ശ്രീകണ്ഠന്‍ എം.പി നിര്‍വഹിക്കും. പരിപാടിയില്‍ ജില്ലാ പഞ്ചായത്ത് പ്രസിഡന്റ് കെ.ബിനുമോള്‍ അധ്യക്ഷയാകും. പരിപാടിയുടെ ഭാഗമായി വിളര്‍ച്ച രോഗ നിര്‍ണ്ണയ, ജീവിത ശൈലീ രോഗ നിര്‍ണ്ണയ പരിശോധനകളും ആശ പ്രവര്‍ത്തകര്‍  അവതരിപ്പിക്കുന്ന ബോധവല്‍ക്കരണവും നടക്കും.