കേരള സർക്കാർ സ്ഥാപനമായ അസാപ് കേരള ഗ്രാജ്വേറ്റ് ഇന്റേൺ തസ്തികയിലേക്ക് നിയമനം നടത്തുന്നു. അസാപ്പിന്റെ തിരുവല്ല കുന്നന്താനത്ത് കിൻഫ്ര പാർക്കിൽ പ്രവർത്തിക്കുന്ന കമ്യൂണിറ്റി സ്കിൽ പാർക്കിലേയ്ക്കാണ് നിയമനം. ഒരു വർഷത്തേക്ക് കരാർ നിയമനമാണ്. ഏതെങ്കിലും വിഷയത്തിലുള്ള ബിരുദം/ബിരുദാനന്തര ബിരുദമാണ് യോഗ്യത. എംബിഎ ബിരുദമുള്ളവർക്ക് മുൻഗണന ലഭിക്കും.  ഉയർന്ന പ്രായപരിധി 30 വയസ്സ്. വാക്ക് ഇൻ ഇന്റർവ്യൂ സെപ്റ്റംബർ 27ന് കുന്നന്താനം അസാപ്പ് കമ്യൂണിറ്റി സ്കിൽ പാർക്കിൽ നടക്കുന്ന തൊഴില്‍മേളയോടൊപ്പം നടത്തും. കൂടുതൽ വിവരങ്ങൾക്കും രജിസ്ട്രേഷനും ഫോണ്‍: 9495999688, 9496085912.

വിദ്യാഭ്യാസ, ആരോഗ്യ രംഗങ്ങളിൽ ജില്ല നേടിയത് വലിയ വികസന മുന്നേറ്റമെന്ന് പട്ടിക ജാതി പട്ടിക വർഗ പിന്നാക്കക്ഷേമ വകുപ്പ് മന്ത്രി ഒ ആർ കേളു. പേരിയ സാമൂഹ്യ ആരോഗ്യ കേന്ദ്രത്തിലെ കെട്ടിടോദ്ഘാടനം നിര്‍വഹിച്ച് സംസാരിക്കുകയായിരുന്നു മന്ത്രി. പേരിയ സിഎച്ച്സിയിൽ അത്യാധുനിക സൗകര്യങ്ങൾ ഉൾപ്പെടുത്തിയാണ് പുതിയ വനിത വാർഡ് ഒരുക്കിയതെന്നും മന്ത്രി പറഞ്ഞു. 

വയനാട് കളക്ടറേറ്റിൽ സര്‍വീസ് നടത്തുന്ന 2010 മോഡൽ കെഎൽ 12 ഇ 7272 മാരുതി എസ്എക്സ് 4 വിഎക്സ്ഐ (ബിഎസ് -4) പെട്രോൾ വാഹനം ലേലം ചെയ്യുന്നു. സെപ്റ്റംബര്‍ 26ന് രണ്ട് മണി ടെണ്ടറുകൾ സ്വീകരിക്കും. മൂന്ന് മണിക്കായിരിക്കും ലേലം. 1,05,000 രൂപയും നികുതിയുമാണ് അടിസ്ഥാനവില. സീൽ ചെയ്ത ക്വട്ടേഷനുകൾ ജില്ലാ കളക്ടര്‍, വയനാട് എന്ന വിലാസത്തിൽ ലഭിക്കണം. കൂടുതൽ വിവരങ്ങൾക്ക്, ഫോൺ: 04936 202251.

ജലസേചന വകുപ്പ് സുൽത്താൻ ബത്തേരി മൈനര്‍ ഇറിഗേഷൻ സബ് ഡിവിഷൻ അസിസ്റ്റന്റ് എക്സിക്യൂട്ടീവ് എഞ്ചിനീയറുടെ ഓഫീസിൽ ഉപയോഗിച്ചിരുന്ന കെഎൽ 12 എഫ് 1853 നമ്പറിലുള്ള 2011 മോഡൽ ടാറ്റ സ്പാസിയോ ഗോൾഡ് വാഹനം ലേലം ചെയ്യുന്നു. വിൽപനയ്ക്ക് ശേഷം അഞ്ച് വര്‍ഷത്തേക്ക് ഇതേ ഓഫീസിൽ തന്നെ വാടകയ്ക്ക് എടുക്കാനാണ് ദര്‍ഘാസ് നോട്ടീസ് പുറത്തിറക്കിയത്. വാഹനം വാങ്ങാൻ ഉദ്ദേശിക്കുന്ന തുകയും മാസ വാടകയും തമ്മിലുള്ള അനുപാതം അടിസ്ഥാനപ്പെടുത്തിയായിരിക്കും ലേലം അംഗീകരിക്കുന്നത്. 

ഗോത്രകലകളെ അടയാളപ്പെടുത്താൻ  ജന ഗൽസ പദ്ധതിയുമായി കുടുംബശ്രീ. ജില്ലയിലെ 26 സിഡിഎസുകളിലായി തെരഞ്ഞെടുത്ത  റിസോഴ്സ് പേഴ്സൺമാര്‍ക്കായി ഏകദിന പരിശീലനം സംഘടിപ്പിച്ചു.  കൽപ്പറ്റ ഗ്രീൻ ഗേറ്റ്സ് ഹോട്ടലിൽ നടന്ന പരിശീലന പരിപാടി അസിസ്റ്റന്റ് ജില്ലാ മിഷൻ കോഓർഡിനേറ്റർ വി കെ റജീന ഉദ്ഘാടനം ചെയ്തു. ജനങ്ങളുടെ ആഘോഷം എന്ന പേരിൽ തദ്ദേശീയ ജനവിഭാഗങ്ങളുടെ കലാ ആചാര അനുഷ്ഠാനങ്ങളുടെ വിവരങ്ങൾ ശേഖരിച്ച് ഡയറക്ടറി തയ്യാറാക്കുകയും  തെരഞ്ഞെടുക്കപ്പെടുന്ന കലാരൂപങ്ങളെ പൊതുജനങ്ങളുടെ മുന്നിൽ അവതരിപ്പിച്ച് വരുമാനം ലഭ്യമാക്കുന്നതിന് ആവശ്യമായ ഇടപെടലുകൾ നടത്തുകയുമാണ് ജൻ ഗൽസ പദ്ധതിയിലൂടെ ചെയ്യുന്നത്.

കേരള മോട്ടോർ തൊഴിലാളി ക്ഷേമനിധി ബോർഡിന്റെ നേതൃത്വത്തിൽ  സെപ്റ്റംബർ 22, 23 തിയ്യതികളിൽ നടത്തപ്പെടുന്ന കുടിശ്ശിക നിവാരണ ക്യാമ്പുകളുടെ പ്രചാരണാർഥം ജില്ലയിൽ നടത്തുന്ന വാഹന പ്രചാരണ ബോധവത്കരണ റാലിക്ക് തുടക്കമായി. രാവിലെ ഒൻപതിന് കൽപ്പറ്റ പുതിയ ബസ് സ്റ്റാന്റ് പരിസരത്തുനിന്ന്  അംരംഭിച്ച റാലിയുടെ ഉദ്ഘടനം കൽപ്പറ്റ മുനിസിപ്പൽ ചെയർമാൻ ടി ജെ ഐസക്ക് നിർവഹിച്ചു.

സുൽത്താൻ ബത്തേരി നഗരസഭയുടെ ടിഎസ്പി ഫണ്ടിൽ നിന്ന് 25 ലക്ഷം രൂപ ചെലവഴിച്ച് നിർമ്മിച്ച വെള്ളപ്പാട്ട് അങ്കണവാടി നഗരസഭ ചെയർപേഴ്സൺ ടി കെ. രമേശ് ഉദ്ഘാടനം ചെയ്തു. പരിപാടിയിൽ  നഗരസഭ ഡെപ്യൂട്ടി ചെയർപേഴ്സൺ എൽസി പൗലോസ് അധ്യക്ഷത വഹിച്ചു. ഡിവിഷൻ കൗൺസിലർ ഷീബ ചാക്കോ, സ്റ്റാൻഡിങ് കമ്മിറ്റി ചെയർപേഴ്സൺമാരായ കെ റഷീദ്, ഷാമില ജുനൈസ്, സിഡിപിഒ ബിന്ദു കെ, എടിഡിഒ രാജശ്രീ, കൗൺസിലർമാരായ കെ സി യോഹന്നാൻ, പ്രിയ വിനോദ്, സംഷാദ്, എ സി ഹേമ, ഐസിഡിഎസ് സൂപ്പർവൈസർ കെ വി ശ്രുതി എന്നിവർ പങ്കെടുത്തു.

പട്ടികവർഗ വികസന വകുപ്പിനു കീഴിൽ ജില്ലയിൽ പ്രവർത്തിക്കുന്ന കണിയാമ്പറ്റ ഗവ. മോഡൽ റസിഡൻഷ്യൽ ഹയർ സെക്കന്ററി സ്‌കൂളിൽ നിർമ്മിച്ച പുതിയ ഹയർ സെക്കന്ററി ബ്ലോക്ക് ഇന്ന് (സെപ്റ്റംബർ 23) രാവിലെ 10.30ന് പട്ടികജാതി പട്ടികവർഗ പിന്നാക്ക ക്ഷേമ വകുപ്പ് മന്ത്രി  ഒ ആർ കേളു ഉദ്ഘാടനം ചെയ്യും. ഒപ്പം ഹയർ സെക്കൻഡറി ഹോസ്റ്റൽ ബ്ലോക്കിന്റെ ശിലാസ്ഥാപനവും, സിഎസ്ആർ ഫണ്ട് ഉപയോഗിച്ച് സ്കൂളിനായി അനുവദിച്ച കായിക ഉപകരണങ്ങളുടെ വിതരണവും, പോസ്റ്റ് മെട്രിക് കോഴ്‌സുകളിൽ പഠിക്കുന്ന വിദ്യാർത്ഥികൾക്ക് പ്രാരംഭ ചെലവുകൾക്കുള്ള ധനസഹായ വിതരണ പരിപാടിയുടെ ഉദ്ഘാടനവും മന്ത്രി നിര്‍വഹിക്കും.