തലശ്ശേരി താലൂക്ക് ന്യൂമാഹി വില്ലേജിൽപ്പെട്ട ശ്രീ പരിമഠം ദുർഗാ ക്ഷേത്രത്തിൽ പാരമ്പര്യേതര ട്രസ്റ്റികളാകുന്നതിന് ഹിന്ദുമത വിശ്വാസികളായ ക്ഷേത്ര പരിസരവാസികളിൽ നിന്ന് അപേക്ഷ ക്ഷണിച്ചു. അപേക്ഷകൾ ഒക്ടോബർ ഒമ്പതിന് വൈകിട്ട് അഞ്ചിനകം തലശ്ശേരി അസിസ്റ്റന്റ് കമ്മീഷണറുടെ ഓഫീസിൽ ലഭിക്കണം. അപേക്ഷാ ഫോറം പ്രസ്തുത ഓഫീസിൽ നിന്നും www.malabardevaswom.kerala.gov.in വെബ്‌സൈറ്റിലും ലഭിക്കും. 
 

കണ്ണൂർ റൂറൽ ജില്ല വനിതാ സെല്ലിന്റെ തളിപ്പറമ്പ് ഓഫീസ് കേന്ദ്രീകരിച്ച് പ്രവർത്തിക്കുന്ന ഫാമിലി ആൻഡ് വുമൺ കൗൺസിലിംഗ് സെന്ററിൽ ഫാമിലി കൗൺസിലറെ നിയമിക്കുന്നു. സൈക്കോളജിയിൽ ബിരുദാനന്തര ബിരുദവും രണ്ട് വർഷ പ്രവൃത്തി പരിചയവുമുള്ള വനിതകൾക്ക് അപേക്ഷിക്കാം. അപേക്ഷകൾ ബയോഡാറ്റ, യോഗ്യത സർട്ടിഫിക്കറ്റ് പകർപ്പുകൾ എന്നിവ സഹിതം സെപ്റ്റംബർ 25 നകം ധർമശാല ജില്ലാ പോലീസ് ഓഫീസിൽ പ്രവർത്തിക്കുന്ന സി-ബ്രാഞ്ച് ഡി വൈ എസ് പി ഓഫീസിൽ ലഭിക്കണം

കേരള കള്ള് വ്യവസായ തൊഴിലാളി ക്ഷേമനിധിയിൽ അംഗങ്ങളായ തൊഴിലാളികളുടെ ഐ ടി വിദ്യാർഥികളായ മക്കൾക്ക് ലാപ്‌ടോപ്പ് ലഭ്യമാക്കുന്നിന് അപേക്ഷ ക്ഷണിച്ചു. 2025-26 വർഷത്തിൽ കേരള, കേന്ദ്ര സർക്കാർ എൻട്രൻസുകൾ മുഖേന സർക്കാർ, സർക്കാർ അംഗീകൃത കോളേജുകളിൽ വിവിധ കോഴ്‌സുകളിൽ പ്രവേശനം ലഭിച്ചവർക്ക് അപേക്ഷിക്കാം. സെപ്റ്റംബർ 15 മുതൽ ഒക്ടോബർ 15 വരെ കേരള കള്ള് വ്യവസായ തൊഴിലാളി ക്ഷേമനിധി ജില്ലാ ഓഫീസിൽ അപേക്ഷകൾ നൽകാം. ഫോൺ: 0497 2705182

സംസ്ഥാന വനിതാകമ്മീഷൻ അംഗം അഡ്വ. പി. കുഞ്ഞായിഷയുടെ നേതൃത്വത്തിൽ കലക്ടറേറ്റ് ഓഡിറ്റോറിയത്തിൽ നടന്ന അദാലത്തിൽ 85 കേസുകൾ പരിഗണിച്ചു. ഇതിൽ 21 എണ്ണം പരിഹരിച്ചു. ഒൻപതെണ്ണം പോലീസ് റിപ്പോർട്ടിനായും നാലെണ്ണം ജാഗ്രതാ സമിതിക്കും കൈമാറി. മൂന്നെണ്ണം ജില്ലാ ലീഗൽ സർവ്വീസ് അതോറിറ്റിക്ക് കൈമാറി. 48 പരാതികൾ അടുത്ത സിറ്റിങ്ങിലേക്ക് മാറ്റി. പുതിയതായി ആറ് പരാതികൾ ലഭിച്ചു.

ഹയർ സെക്കൻഡറി തുല്യതാ പരീക്ഷയിൽ എല്ലാ വിഷയങ്ങൾക്കും എ പ്ലസ് നേടിയ രഹന കക്കറയിൽ, പ്രായം കൂടിയ പഠിതാവ് പി ഓമന എന്നിവരെ കണ്ണൂർ കോർപറേഷന്റെ നേതൃത്വത്തിൽ വീട്ടിലെത്തി അനുമോദിച്ചു. കോർപറേഷൻ  വിദ്യാഭ്യാസ സ്ഥിരം സമിതി അധ്യക്ഷൻ സുരേഷ് ബാബു എളയാവൂർ പഠിതാക്കളെ പൊന്നാട അണിയിച്ചു. ഹയർസെക്കൻഡറി തുല്യത വിജയിച്ചവർക്ക് കോർപറേഷന്റെ നേതൃത്വത്തിൽ ബിരുദ പഠനത്തിന് സാമ്പത്തിക സഹായം നൽകുമെന്ന് അദ്ദേഹം അറിയിച്ചു.

വാർഡ് കൗൺസിലർ സാബിറ ടീച്ചർ, സാക്ഷരതാ മിഷൻ ജില്ലാ കോ ഓർഡിനേറ്റർ ഷാജു ജോൺ, അസിസ്റ്റന്റ് കോ ഓർഡിനേറ്റർ ടി.വി ശ്രീജൻ, കോർപറേഷൻ കൗൺസിൽ സെക്രട്ടറി സവിത, നോഡൽ പ്രേരക് സി വസന്ത എന്നിവർ പങ്കെടുത്തു.

വിഷ രഹിതവും ശുദ്ധവുമായ പപ്പായയും നാടൻ മാങ്ങകളും ഉൽപാദിപ്പിക്കുന്നതിനായി കല്ല്യാശ്ശേരി ബ്ലോക്ക് പഞ്ചായത്തിന്റെ നേതൃത്വത്തിൽ പപ്പായ ഗ്രാമം, മാൻജിഫെറ-നാട്ടുമാവുകളുടെ സംരക്ഷണം പദ്ധതികൾക്ക് തുടക്കമായി. ബ്ലോക്ക് പഞ്ചായത്ത് പ്രസിഡന്റ് പി.പി ഷാജിർ പദ്ധതി ഉദ്ഘാടനം ചെയ്തു. കണ്ണപുരം ഗ്രാമപഞ്ചായത്ത് പ്രസിഡന്റ് കെ രതി അധ്യക്ഷയായി. 

സംസ്ഥാനത്തെ തദ്ദേശ സ്വയംഭരണ സ്ഥാപനങ്ങളിലെ വികസന നേട്ടങ്ങൾ ചർച്ച ചെയ്യുന്ന വികസന സദസ്സിന്റെ ലോഗോ പ്രകാശനം ചെയ്തു. തദ്ദേശ സ്വയംഭരണ വകുപ്പ് മന്ത്രി എം ബി രാജേഷ് തദ്ദേശ സ്വയംഭരണ വകുപ്പ് പ്രിൻസിപ്പൽ സെക്രട്ടറി ടിങ്കു ബിസ്വാളിന് നൽകിയാണ് പ്രകാശനം നിർവഹിച്ചത്. ഇൻഫർമേഷൻ പബ്ലിക് റിലേഷൻസ് വകുപ്പ് സെക്രട്ടറി എസ് ഹരികിഷോർ, തദ്ദേശ സ്വയംഭരണ വകുപ്പ് സ്പെഷ്യൽ സെക്രട്ടറി ടി വി അനുപമ എന്നിവർ സന്നിഹിതരായി.  

അറിവിന്റെ ജനകീയവൽക്കരണവും സ്വതന്ത്ര വിനിമയവും സാധ്യമാക്കുക എന്ന ലക്ഷ്യത്തോടെ കൈറ്റ് സംസ്ഥാനത്തുടനീളം സെപ്റ്റംബർ 20 ന് സോഫ്റ്റ് വെയർ സ്വാതന്ത്ര്യ ദിനാചരണം സംഘടിപ്പിക്കുന്നു. സംസ്ഥാനതല ഉദ്ഘാടനം കേരള പൊതുവിദ്യാഭ്യാസ തൊഴിൽ വകുപ്പ് മന്ത്രി വി ശിവൻകുട്ടി ഓൺലൈനായി നിർവഹിക്കും. കൈറ്റ് സി ഇ ഒ കെ അൻവർ സാദത്ത് ആമുഖ പ്രഭാഷണം നടത്തും.

അറിവിന്റെ ജനകീയവൽക്കരണവും സ്വതന്ത്ര വിനിമയവും സാധ്യമാക്കുക എന്ന ലക്ഷ്യത്തോടെ കൈറ്റ് സംസ്ഥാനത്തുടനീളം സെപ്റ്റംബർ 20 ന് സോഫ്റ്റ് വെയർ സ്വാതന്ത്ര്യ ദിനാചരണം സംഘടിപ്പിക്കുന്നു. സംസ്ഥാനതല ഉദ്ഘാടനം കേരള പൊതുവിദ്യാഭ്യാസ തൊഴിൽ വകുപ്പ് മന്ത്രി വി ശിവൻകുട്ടി ഓൺലൈനായി നിർവഹിക്കും. കൈറ്റ് സി ഇ ഒ കെ അൻവർ സാദത്ത് ആമുഖ പ്രഭാഷണം നടത്തും.

മുഖ്യമന്ത്രിയുടെ തദ്ദേശ റോഡ് പുനരുദ്ധാരണ പദ്ധതിയില്‍ ഉള്‍പ്പെടുത്തി നവീകരിച്ച പിലാത്തറ ഇന്‍ഡോര്‍ സ്റ്റേഡിയം-വീരാണ്ടികളം നബാർഡ്‌ റോഡിന്റെ ഉദ്ഘാടനം സെപ്റ്റംബർ  20 ശനിയാഴ്ച രാവിലെ 10 മണിക്ക് എം വിജിന്‍ എം എല്‍ എ നിര്‍വഹിക്കും.
നവീകരണത്തിനായി സംസ്ഥാന സര്‍ക്കാര്‍ 20 ലക്ഷം രൂപയാണ് അനുവദിച്ചത്.

നവീകരിച്ച വെങ്ങര - പൊടിക്കളം റോഡ്  20ന് വൈകുന്നേരം 5.30 ന് എം വിജിന്‍ എം എല്‍ എ ഉദ്‌ഘാടനം ചെയ്യും.  295 മീറ്റര്‍ നീളത്തിലും മൂന്ന് മീറ്റര്‍ വീതിയിലും ടാറിംഗ് നടത്തി റോഡ് നവീകരിക്കുന്നതിനായി സംസ്ഥാന സര്‍ക്കാര്‍ 15 ലക്ഷം രൂപയാണ് അനുവദിച്ചത്.