വിവിധ ദേശങ്ങളിൽ നിന്ന് എത്തിയ നർത്തകരുടെ ചുവടുകൾക്ക് ആസ്വാദകർ ഒന്നങ്കടം താളം പിടിക്കുന്ന അത്യപൂർവ്വ നിമിഷങ്ങൾക്കാണ് അങ്കമാലി എ.പി. കുര്യൻ സ്മാരക സി.എസ് എ ഓഡിറ്റോറിയം സാക്ഷ്യം വഹിച്ചത്. കൈയിലെ മൊബൈൽ ഫോണുകൾ നിശബ്ദമാക്കി നൃത്തത്തിൻ്റെ ചുവടുകളിൽ അലിഞ്ഞു ചേരുകയായിന്നു ആസ്വാദകർ.

കേരള സംഗീത നാടക അക്കാദമി സംഘടിപ്പിച്ച ത്രിഭംഗി മധ്യമേഖല ദേശീയ നൃത്തോത്സവത്തിൽ കാവാലം നാരായണപ്പണിക്കർ രചനയും സംഗീതവും നിർവഹിച്ച ശിവഗംഗാതത്വം മോഹിനിയാട്ടമായി വിദ്യാർത്ഥികൾ അരങ്ങിൽ പകർന്നാടി. രാമമംഗലം ഷഡ്കാലഗോവിന്ദമാരാർ കലാസമിതിയിലെ വിദ്യാർത്ഥികളാണ് ഇത് അരങ്ങിൽ അവതരിപ്പിച്ചത്. നർത്തകിയും കേരള സംഗീത നാടക അക്കാദമി അവാർഡ് ജേതാവുമായ സിത്താര ബാലകൃഷ്ണൻ ആണ് നൃത്തത്തിൻ്റെ സംവിധാനം നിർവഹിച്ചത്. ഗംഗദേവിയുടെ ഭൂമിയിലേക്കുള്ള പ്രയാണവും ഭഗവാൻ ദേവിയെ ജടയിലേക്ക് ആവാഹിക്കുന്നതും ദേവിയുടെ സാന്നിധ്യത്തിൽ സംശയം പൂണ്ട പാർവ്വതി ഭഗവാനോട് സംവാദത്തിൽ ഏർപ്പെടുന്നതുമാണ് നൃത്തത്തിൽ ആവിഷ്കരിച്ചത്.

കേരള സംഗീത നാടക അക്കാദമി സംഘടിപ്പിക്കുന്ന ത്രിഭംഗി മധ്യമേഖല ദേശീയ നൃത്തോത്സവത്തിന്റെ ഭാഗമായി ഇന്നും (സെപ്തംബര്‍ 20 ) നാളെയും ( സെപ്തംബർ 21) അങ്കമാലി എ.പി കുര്യന്‍ സ്മാരക സി.എസ്.എ ഓഡിറ്റോറിയത്തില്‍ നൃത്തശില്പശാല നടത്തും.ശില്പശാലയുടെ ഭാഗമായി സോദാഹരണപ്രഭാഷണങ്ങള്‍ ഉണ്ടായിരിക്കും. ഇന്ന് (സെപ്തംബര്‍ 20 ) രാവിലെ 9.30 മുതല്‍ ഉച്ചവരെ കലാമണ്ഡലം സംഗീത, ബി.ആര്‍ വിക്രം കുമാര്‍, കലാമണ്ഡലം ശ്രീരംഗ്, മൈഥിലി, സായ് വെങ്കടേഷ് എന്നിവര്‍ സോദാഹരണപ്രഭാഷണങ്ങള്‍ നടത്തും.

നൃത്തോത്സവത്തിന്റെ രണ്ടാംദിനമായ ഇന്ന് (സെപ്തംബര്‍ 20 ) ഉച്ചയ്ക്ക് മൂന്ന് മുതല്‍ വൈകീട്ട് അഞ്ചുവരെ യുവനര്‍ത്തകരായ അഞ്ജലി വി.കൃഷ്ണ, നിശ്രയ വരലക്ഷ്മി, സൗഭാഗ്യ ഗൗരി, പൃഥി ജന, തന്‍വി സുരേഷ്, അപര്‍ണ ശര്‍മ (ഗ്രൂപ്പ്),സാത്വിക ഇ.എസ.് എന്നിവര്‍ നൃത്തം അവതരിപ്പിക്കും. വൈകീട്ട് ആറുമുതല്‍ പ്രൊഫഷണല്‍ നര്‍ത്തകരായ സിറാജുദ്ദീനും സംഘവും പെരണിനൃത്തവും ആര്‍.എല്‍.വി.ആനന്ദന്‍, ബദരി ദിവ്യ ഭൂഷണ്‍ എന്നിവര്‍ ഭരതനാട്യവും, അനുപമ മേനോന്‍,കലാമണ്ഡലം പ്രഷീജ ഗോപിനാഥ് എന്നിവര്‍ മോഹിനിയാട്ടവും സന്നിധ രാജസാഗി കുച്ചിപ്പുടിയും സദനം റഷീദ് കേരളനടനവും അവതരിപ്പിക്കും.

ജില്ലയിലെ മരട് എ.യു.ഡബ്ല്യു.എം ക്യാമ്പസിൽ പ്രവർത്തിക്കുന്ന സ്റ്റേറ്റ് ലബോറട്ടറി ഫോർ ലൈവ്സ്റ്റോക്ക് മറൈൻ ആൻഡ് അഗ്രി പ്രൊഡക്ട്സിൽ ലബോറട്ടറി ടെക്നീഷ്യൻ തസ്തികയിൽ ദിവസ വേതനാടിസ്ഥാനത്തിൽ നിയമനം നടത്തുന്നു. 

എം.എസ്.സി. മൈക്രോബയോളജി, എ൯. എ.ബി. എൽ അക്രഡിറ്റേഷൻ, മോളിക്കുലാർ ബയോളജി ലാബുകളിൽ രണ്ട് വർഷത്തെ പ്രവർത്തന പരിചയം എന്നിവ ഉളളവർക്ക് അപേക്ഷിക്കാം. താൽപര്യമുളള ഉദ്യോഗാർത്ഥികൾ വിദ്യാഭ്യാസ യോഗ്യതയും, പ്രവൃത്തി പരിചയവും തെളിയിക്കുന്ന അസൽ രേഖകൾ സഹിതം സെപ്റ്റംബർ 20 രാവിലെ 10.30 ന് നേരിട്ട് ഹാജരാകണം.  

എറണാകുളം സർക്കാർ മെഡിക്കൽ കോളേജ് ആശുപത്രിയിൽ കാത്ത് ലാബ് ടെക്നീഷ്യ൯ തസ്ത‌ികയിലേക്ക് ദിവസ വേതനാടിസ്ഥാനത്തിൽ ആശുപത്രി വികസന സൊസൈറ്റിയുടെ കീഴിൽ താൽകാലിക നിയമനം നടത്തും. യോഗ്യത: പ്ലസ് ടു , കാർഡിയോവാസ്കുലാർ ടെക്നോളജിയിൽ ബിരുദം (ബി.സി.വി.ടി). ബി.സി.വി.ടി.യുള്ള യോഗ്യരായ ഉദ്യോഗാർത്ഥികളുടെ അഭാവത്തിൽ കാർഡിയോവാസ്കുലാർ ഡിപ്ലോമ (ഡി.സി.വി.ടി) യോഗ്യതയുള്ള ഉദ്യോഗാർത്ഥികളെ പരിഗണിക്കും. അപേക്ഷകർ എക്കോ കാർഡിയോഗ്രാഫി ചെയ്യുവാൻ കഴിവുള്ളവരായിരിക്കണം.  

സംസ്ഥാന അസംഘടിത തൊഴിലാളി സാമൂഹ്യ സുരക്ഷാ ബോർഡ് അംഗങ്ങളായവരുടെ മക്കൾക്ക് വിദ്യാഭ്യാസ ആനുകൂല്യങ്ങൾക്കുള്ള അപേക്ഷ സ്വീകരിക്കുന്ന തീയതി ഒക്ടോബർ 10 വരെ ദീർഘിപ്പിച്ചു. 

പട്ടികജാതി പട്ടികവർഗ വികസന കോർപ്പറേഷൻ നടപ്പിലാക്കുന്ന വിവിധ വായ്‌പാ പദ്ധതികളിൽ ജാമ്യമായി സ്വീകരിക്കുന്ന വസ്തുവിന്റെ വില നിർണയം നടത്തുന്നതിലേക്കായി വാല്യുവേഷൻ പാനൽ രൂപീകരിക്കും. റവന്യൂ സർവീസിൽ നിന്നും വിരമിച്ച വില്ലേജ് ഓഫീസർ, ഡെപ്യൂട്ടി തഹസിൽദാർ, തഹസിൽദാർ എന്നിവർക്ക് അപേക്ഷിക്കാം. അപേക്ഷകർ ബയോഡാറ്റ, ആധാർ കാർഡ്, സർവീസ് സർട്ടിഫിക്കറ്റ് എന്നിവ സഹിതം പട്ടികജാതി പട്ടികവർഗ വികസന കോർപ്പറേഷന്റെ എറണാകുളം ജില്ലാ കാര്യാലയവുമായി ബന്ധപ്പെടുക. ഫോൺ -9400068507, 94973326636

വാരപ്പെട്ടിയിലെ കോതമംഗലം നിയോജക മണ്ഡലതല ഐസൊലേഷൻ സെന്ററിന്റെ നിർമ്മാണം അന്തിമഘട്ടത്തിൽ. സെന്ററിന്റെ നിർമ്മാണ പ്രവർത്തനങ്ങൾ 95 ശതമാനം പൂർത്തിയായതായി ആരോഗ്യ വകുപ്പ് മന്ത്രി വീണാ ജോർജ് നിയമസഭയിൽ അറിയിച്ചു. ആന്റണി ജോൺ എം.എൽ.എയുടെ ചോദ്യത്തിന് മറുപടിയായാണ് മന്ത്രി ഇക്കാര്യം സഭയിൽ വ്യക്തമാക്കിയത്.

 പത്ത് ഐ.സി.യു കിടക്കകൾ, ഡോക്ടർമാർക്കുള്ള പ്രത്യേക മുറി, നഴ്സിംഗ് സ്റ്റേഷൻ, ശുചിമുറികൾ, മെഡിക്കൽ ഗ്യാസ് പ്ലാന്റ് തുടങ്ങിയ സൗകര്യങ്ങളോടെയാണ് ഐസൊലേഷൻ സെന്റർ ഒരുങ്ങുന്നത്. എം.എൽ.എ ഫണ്ടും കിഫ്ബി ഫണ്ടും തുല്യമായി വിനിയോഗിച്ച് 1,75,96,748 രൂപ ചെലവിലാണ് പദ്ധതി യാഥാർത്ഥ്യമാക്കുന്നത്.

കാക്കനാട് കിൻഫ്ര എക്സിബിഷൻ സെന്ററിൽ മന്ത്രി പി.രാജീവ് ഉദ്ഘാടനം ചെയ്യും

സംസ്ഥാന വ്യവസായ-വാണിജ്യ വകുപ്പ് സംഘടിപ്പിക്കുന്ന ഏഴാമത് മെഷിനറി എക്‌സ്‌പോ ഇന്ന് (സെപ്റ്റംബർ 20) കാക്കനാട് കിന്‍ഫ്ര ഇന്റര്‍നാഷണല്‍ എക്സിബിഷന്‍ സെന്ററില്‍ ആരംഭിക്കും. രാവിലെ 10.30ന് നിയമ വ്യവസായ കയര്‍ വകുപ്പ് മന്ത്രി പി. രാജീവ് ഉദ്ഘാടനം ചെയ്യും. 

പൊതുജനങ്ങള്‍ എക്‌സ്‌പോയിലേക്ക് സൗജന്യ പ്രവേശനമുണ്ടായിരിക്കും. രാവിലെ 10 മുതല്‍ വൈകുന്നേരം 6 വരെയാണ് പ്രവേശനം.