വനിതാ കമ്മിഷൻ കോട്ടയം ജില്ലാ അദാലത്ത് ചൊവ്വാഴ്ച(ഓഗസ്റ്റ് 26) രാവിലെ 10.00 മണി മുതൽ ചങ്ങനാശേരി മുനിസിപ്പൽ ടൗൺ ഹാളിൽ നടക്കും.  

 ഇൻഫർമേഷൻ- പബ്ലിക് റിലേഷൻസ് വകുപ്പ് കോട്ടയം ജില്ലയിൽ പ്രിസം പാനലിലെ ഒഴിവുകളിലേക്ക് അർഹരായവരെ തെരഞ്ഞെടുക്കാൻ 2025 ഓഗസ്റ്റ് 26ന് രാവിലെ 10.30ന് വാക്ക് ഇൻ ഇന്റർവ്യൂ കളക്ട്രേറ്റിലെ മേഖലാ ഡെപ്യൂട്ടി ഡയറക്ടർ ഓഫീസിൽ നടക്കും. സബ് എഡിറ്റർ, ഇൻഫർമേഷൻ അസ്സിസ്റ്റന്റ് പാനലുകളിലാണ് തെരഞ്ഞെടുപ്പ്. ജേർണലിസത്തിൽ ബിരുദം/ബിരുദാനന്തര ബിരുദം, അല്ലെങ്കിൽ ബിരുദവും ജേർണലിസം ഡിപ്ലോമയുമാണ് ഇൻഫർമേഷൻ അസിസ്റ്റന്റാകാൻ യോഗ്യത. മേൽയോഗ്യതയ്ക്കൊപ്പം ഒരു വർഷത്തെ ജേർണലിസം പ്രവൃത്തി പരിചയവും ഉള്ളവർക്കു സബ് എഡിറ്ററാകാം. ഉയർന്ന പ്രായപരിധി 35 വയസ്.

 കടുത്തുരുത്തി പോളിടെക്‌നിക്കിൽ ഒഴിവുള്ള സീറ്റുകളിലേക്ക് പ്രവേശനത്തിന് സ്‌പോട്ട് അഡ്മിഷൻ ഓഗസ്റ്റ് 25 മുതൽ ഓഗസ്റ്റ് 30 വരെ നടത്തും. അന്നേ ദിവസങ്ങളിൽ രാവിലെ 11 മണിക്ക് മുൻപായി കോളജിൽ എത്തി റജിസ്റ്റർ ചെയ്യണം. ഡിപ്ലോമ റാങ്ക് പട്ടികയിൽ ഉൾപ്പെട്ടവർക്കും പുതിയ അപേക്ഷകർക്കും പങ്കെടുക്കാം. പുതിയഅപേക്ഷകർക്ക് രാവിലെ പത്ത് മുതൽ കോളജിലെ ഹെൽപ്പ് ഡെസ്‌ക് വഴി അപേക്ഷിക്കാം. സർട്ടിഫിക്കറ്റുകളും പ്രോസ്‌പെക്ടസ് പ്രകാരമുള്ള ഫീസ്, പിടിഎ ഫണ്ട്, യൂണിഫോം ഫീസ് എന്നിവ സഹിതം രക്ഷിതാവിനോടൊപ്പം എത്തണം.

 മത്സ്യബന്ധനവകുപ്പിന്റെ കീഴിൽ പ്രവർത്തിക്കുന്ന സൊസൈറ്റി ഫോർ അസിസ്റ്റന്റ്‌സ് ടു ഫിഷർ വിമൺ (സാഫ്) നടപ്പാക്കുന്ന തീരമൈത്രി പദ്ധതിയിൽ ചെറുകിട തൊഴിൽ സംരംഭങ്ങൾ തുടങ്ങുന്നതിനുള്ള ധനസഹായത്തിനുള്ള അപേക്ഷ ക്ഷണിച്ചു. രണ്ട് മുതൽ അഞ്ച് മത്സ്യത്തൊഴിലാളി വനിതകളടങ്ങുന്ന ഗ്രൂപ്പുകൾക്കും ഒരു കുടുംബത്തിൽ നിന്നും ഒരു ജോലി എന്ന പദ്ധതിക്ക് ഒരാൾക്ക് വീതവും അപേക്ഷിക്കാം. മത്സ്യത്തൊഴിലാളി കുടുംബ രജിസ്റ്ററിൽ അംഗത്വമുള്ള 20-45 വയസ് പ്രായമുള്ളവരായിരിക്കണം.

 ഭക്ഷ്യ ഭദ്രതാ നിയമം അടിസ്ഥാനമാക്കി പൊതുവിദ്യാഭ്യാസ വകുപ്പ് നടപ്പാക്കുന്ന ഉച്ചഭക്ഷണ പദ്ധതി നിർവഹണം കൂടുതൽ കാര്യക്ഷമമാക്കുന്നതിന്റെ ഭാഗമായി ക്ലാസ് സംഘടിപ്പിച്ചു. കാഞ്ഞിരപ്പള്ളി, ഈരാറ്റുപേട്ട ഉപജില്ലകളിൽ ഉച്ചഭക്ഷണ പദ്ധതി നടപ്പാക്കുന്ന വിദ്യാലയങ്ങളിലെ പ്രഥമാധ്യാപകർക്കും പദ്ധതിയുടെ ചുമതലയുള്ള അധ്യാപകർക്കുമായി കാഞ്ഞിരപ്പള്ളി സെന്റ് ഡൊമനിക് എച്ച്.എസ്.എസ് ഓഡിറ്റോറിയത്തിൽ നടന്ന ക്ലാസ് സംസ്ഥാന ഭക്ഷ്യ കമ്മീഷൻ അംഗം അഡ്വ. സബിത ബീഗം നയിച്ചു. ജില്ലാ ഉച്ചഭക്ഷണ സൂപ്പർവൈസർ ഡാലിയ, ഉപജില്ലാ വിദ്യാഭ്യാസ ഓഫീസർമാരായ സുൽഫിക്കർ, ഷംല, ഉച്ചഭക്ഷണ ഓഫീസർമാരായ രഞ്ജിത്ത് മാത്യു, ഉല്ലാസ് എന്നിവർ പങ്കെടുത്തു

1888.63 കോടിയുടെ നിക്ഷേപം

വ്യവസായ വാണിജ്യ വകുപ്പിന്റെ ആഭിമുഖ്യത്തില്‍ ഒരു വര്‍ഷം ഒരു ലക്ഷം സംരംഭം പദ്ധതിയിലൂടെ ജില്ലയില്‍ കഴിഞ്ഞ മൂന്നു വര്‍ഷത്തിനിടെ ആരംഭിച്ചത് 31,401 സംരംഭങ്ങള്‍. 2022-2023 സാമ്പത്തിക വര്‍ഷത്തിലാണ് ഒരു വര്‍ഷം ഒരു ലക്ഷം സംരംഭങ്ങള്‍ പദ്ധതിയ്ക്ക് തുടക്കമിട്ടത്. 2025 വരെ ആരംഭിച്ച സംരംഭങ്ങളിലൂടെ 1888.63 കോടിയുടെ നിക്ഷേപമാണുണ്ടായത്.  കുടുംബശ്രീ-സഹകരണ-കൃഷി-ഫിഷറീസ് തുടങ്ങി വിവിധ വകുപ്പുകളുടെ സഹകരണത്തോടെയാണ് ജില്ലാ വ്യവസായ കേന്ദ്രത്തിന്റെ ആഭിമുഖ്യത്തില്‍ പദ്ധതി നടപ്പാക്കുന്നത്.

വര്‍ഷങ്ങളായി ഭൂരഹിതരായി തുടരുന്ന പട്ടികവര്‍ഗ്ഗ കുടുംബങ്ങള്‍ക്ക് സ്വന്തമായി ഒരു തുണ്ട് ഭൂമി എന്ന സ്വപ്നം യാഥാര്‍ത്ഥ്യമാക്കി സംസ്ഥാന സര്‍ക്കാരിന്റെ ലാന്‍ഡ് ബാങ്ക് പദ്ധതി. ഇടനിലക്കാരുടെ ചൂഷണങ്ങളില്ലാതെ, സുതാര്യവും കാര്യക്ഷമവുമായ ഇടപെടലുകളിലൂടെ ഗുണനിലവാരമുള്ള ഭൂമി നല്‍കുന്ന ഈ പദ്ധതി വഴി ജില്ലയില്‍ ഇതു വരെ 25.42 ഏക്കര്‍ ഭൂമിയാണ് വിതരണം ചെയ്തത്. 107 കുടുംബങ്ങള്‍ക്കായാണ് ഈ ഭൂമി നല്‍കിയത്. പദ്ധതി ആരംഭിച്ച 2019-20 സാമ്പത്തിക വര്‍ഷം മുതല്‍ ഇതു വരെയുള്ള കണക്കാണിത്.  

 ജില്ലയിലെ മൈനിങ് ആൻഡ് ജിയോളജി വിഭാഗം ഓഫീസിന്റെ പ്രവർത്തനത്തിനാവശ്യമായി വാഹനങ്ങൾ വാടകയ്ക്ക് എടുക്കുന്നതിലേക്ക് ക്വട്ടേഷൻ ക്ഷണിച്ചു. ഓഗസ്റ്റ് 30 വൈകുന്നേരം മൂന്നു മണി വരെ ക്വട്ടേഷനുകൾ സ്വീകരിക്കും. അന്നേ ദിവസം 3.30ന് തുറക്കും. വിശദവിവരങ്ങൾക്ക് ഫോൺ: 04812301405.