ഹരിത കര്‍മ്മസേനാംഗങ്ങള്‍ കൃഷി ചെയ്ത പൂക്കളും പച്ചക്കറികളും വിളവെടുത്തു. പുതുക്കോട് എം.സി.എഫ് കെട്ടിടത്തിന്റെ പരിസരത്തായി വനിതകള്‍ക്ക് പച്ചക്കറി കൃഷി 2025-26 പദ്ധതിയുടെ ഭാഗമായാണ് പൂന്തോട്ടവും പച്ചക്കറിത്തോട്ടവും ഒരുക്കിയത്. ഗ്രാമപഞ്ചായത്ത് പ്രസിഡന്റ് ഐ. ഹസീന ടീച്ചര്‍ വിളവെടുപ്പ് ഉദ്ഘാടനം ചെയ്തു. കൃഷിഭവന്‍ നല്‍കിയ വെണ്ട, വഴുതന, പച്ചമുളക്, ചെണ്ടുമല്ലി എന്നിവയാണ്  കൃഷി ചെയ്തത്. പൂര്‍ണമായും ജൈവവളം ഉപയോഗിച്ച് ജൂണ്‍ മാസത്തിലാണ് കൃഷി ഇറക്കിയത്. ഒഴിവ് സമയങ്ങളിലായി ഹരിത കര്‍മ്മസേനാംഗങ്ങള്‍ കൂട്ടായി പരിശ്രമിച്ചാണ് ഈ നേട്ടം കൈവരിച്ചത്.

  വണ്ടാഴി ഗ്രാമപഞ്ചായത്തിന്റെ നേതൃത്വത്തിൽ ‘ജലമാണ് ജീവന്‍' എന്ന പേരില്‍ കിണര്‍ ക്ലോറിനേഷന്‍ ക്യാമ്പയിന്‍ നടത്തുന്നു.  അമീബിക് മസ്തിഷ്‌കജ്വരം തടയുന്നതിനുള്ള പ്രതിരോധ നടപടികളുടെ ഭാഗമായി  ആഗസ്റ്റ് 30, 31 തീയതികളിലാണ് ക്യാമ്പയിന്‍ നടക്കുക. ഗ്രാമ പഞ്ചായത്ത് വൈസ് പ്രസിഡന്റ് പി. ശശികലയുടെ അധ്യക്ഷതയിൽ ചേർന്ന ക്ലോറിനേഷൻ കൂടിലോചന യോഗത്തിലാണ് തീരുമാനം. ക്യാമ്പയിന്റെ ഭാഗമായി 998 സ്വകാര്യ കിണറുകളും 22 പൊതു കിണറുകളും ക്ലോറിനേറ്റ് ചെയ്യും.

നാഗലശ്ശേരി ഐ.ടി.ഐയിൽ ഗസ്റ്റ് ഇൻസ്ട്രക്ടർമാരെ താൽക്കാലികമായി നിയമിക്കുന്നതിനുള്ള അഭിമുഖം നടത്തുന്നു. ഡ്രാഫ്റ്റ്‌സ്‌മാൻ സിവിൽ, ഇൻഫർമേഷൻ ടെക്നോളജി, അഡിറ്റീവ് മാനുഫാക്ചറിങ് (3D പ്രിന്റിംഗ്) ടെക്നീഷ്യൻ, കമ്പ്യൂട്ടർ എയ്‌ഡഡ് എംബ്രോയിഡറി ആൻഡ് ഡിസൈനിങ് എന്നീ നാല് ട്രേഡുകളിലേക്കാണ് നിയമനം. ആഗസ്റ്റ്  27 രാവിലെ 10 മണിക്ക് ഐ.ടി.ഐ ഓഫീസിൽ വെച്ചാണ് അഭിമുഖം. താൽപര്യമുള്ള ഉദ്യോഗാർത്ഥികൾ യോഗ്യത തെളിയിക്കുന്ന അസ്സൽ രേഖകളും അവയുടെ പകർപ്പുകളുമായി നേരിട്ട് ഹാജരാകണം. വിവരങ്ങളും യോഗ്യത സംബന്ധിച്ചുള്ള വിവരങ്ങൾ www.cstaricalcutta.gov.in എന്ന വെബ്സൈറ്റില്‍ ലഭിക്കും.

ഷൊർണൂർ ഇൻസ്റ്റിറ്റ്യൂട്ട് ഓഫ് പ്രിന്റിങ് ടെക്നോളജി ആൻഡ് ഗവൺമെൻ്റ് പോളിടെക്നിക് കോളേജിൽ നിലവിൽ ഒഴിവുള്ള ഏതാനും സീറ്റുകളിലേക്ക് റെഗുലർ ഡിപ്ലോമ, ലാറ്ററൽ എൻട്രി സ്പോട്ട് അഡ്മിഷൻ നടത്തുന്നു. ആഗസ്റ്റ് 26-ന് കോളേജിൽ വെച്ചാണ് അഡ്മിഷൻ നടക്കുക. റെഗുലർ ഡിപ്ലോമ അഡ്മിഷൻ രാവിലെ ഒമ്പത് മണി മുതൽ 10 മണി വരെ നടക്കും. റാങ്ക് ലിസ്റ്റിൽ ഒന്ന് മുതൽ 40000 വരെയുള്ള റാങ്കിൽ ഉൾപ്പെട്ടവർക്കും, ടി.എച്ച്.എസ്.എല്‍.സി, വി.എച്ച്.എസ്.ഇ, ഇ.ഡബ്ല്യു.എസ്, മറ്റ് സംവരണ വിഭാഗങ്ങളിൽപ്പെട്ടവർക്കും അഡ്മിഷനിൽ പങ്കെടുക്കാം. ലാറ്ററൽ എൻട്രി ഡിപ്ലോമ അഡ്മിഷൻ രാവിലെ 10 മണി മുതല്‍ 10:30 വരെ നടക്കും.

വ്യവസായ വാണിജ്യ വകുപ്പിന്റെ കീഴിലുള്ള പട്ടാമ്പി കൊപ്പം ഇൻഡസ്ട്രിയൽ ഡെവലപ്‌മെന്റ് പ്ലോട്ടിൽ വ്യവസായ സംരംഭങ്ങൾക്കായി ഭൂമി അനുവദിക്കുന്നതിന് അപേക്ഷ ക്ഷണിച്ചു. 99.73 സെന്റ് വിസ്തീർണമുള്ള വ്യവസായ പ്ലോട്ടാണ് ഇവിടെ ലഭ്യമാക്കിയിട്ടുള്ളത്. താത്പര്യമുള്ള സംരംഭകർക്ക് അപേക്ഷിക്കാം. അപേക്ഷാ ഫോമിനൊപ്പം ആവശ്യമായ രേഖകളും സമർപ്പിക്കണം. അപേക്ഷാ ഫീസായി 5500 രൂപയും ഇഎംഡിയും അടക്കണം. കേരളത്തിലെ ഏതെങ്കിലും ട്രഷറി വഴിയോ അല്ലെങ്കിൽ  https://etreasury.kerala.gov.in എന്ന വെബ് പോർട്ടൽ വഴിയോ ആണ് ഈ തുക അടക്കേണ്ടത്.

ആലത്തൂര്‍ അഡീഷണൽ ഐ.സി.ഡി.എസ് പ്രൊജക്ടിന് കീഴിലെ വിവിധ അങ്കണവാടികളിലേക്ക് മുട്ടയും പാലും വിതരണം ചെയ്യുന്നതിന് പുനർ ദർഘാസ് ക്ഷണിച്ചു. പോഷക ബാല്യം പദ്ധതിയുടെ ഭാഗമായി നാല് ഗ്രാമപഞ്ചായത്തുകളിലെ 121 അങ്കണവാടികളിലേക്ക് മുട്ട വിതരണം ചെയ്യുന്നതിനും 100 അങ്കണവാടികളിലേക്ക് പാൽ വിതരണം ചെയ്യുന്നതിനും വേണ്ടിയുള്ള ദർഘാസാണ് ക്ഷണിച്ചിട്ടുള്ളത്. പൂരിപ്പിച്ച ടെന്‍ഡറുകള്‍ സെപ്റ്റംബര്‍ മൂന്നിന് ഉച്ചയ്ക്ക് ഒരു മണി വരെ ഓഫീസില്‍ സ്വീകരിക്കും. കൂടുതല്‍ വിവരങ്ങള്‍ ഓഫീസില്‍ നിന്നും ലഭിക്കും. ഫോണ്‍:  04922 254007.
 

തൃത്താല മണ്ഡലത്തില്‍ സമുന്നതി ജീവനോപാധി പദ്ധതിയ്ക്ക് തുടക്കമായി

കല്‍പ്പറ്റ ഗവ കോളജില്‍  ഡിഗ്രി കോഴ്‌സുകളില്‍ സീറ്റൊഴിവ്. ഇ.ഡബ്ല്യൂ.എസ് വിഭാഗത്തിന് ബി.എ ഹിസ്റ്ററി,  ബി.എസ്.സി കമ്പ്യൂട്ടര്‍ സയന്‍സ്, ബി.എസ്.സി കെമിസ്ട്രി, ബി.എ മാസ് കമ്മ്യൂണിക്കേഷന്‍, ബി.എ ഇകണോമിക്സ് വിഷയങ്ങളിലും എസ്.ടി വിഭാഗക്കാര്‍ക്ക്  ബി.എസ്.സി കമ്പ്യൂട്ടര്‍ സയന്‍സ്, ബി.എസ്.സി കെമിസ്ട്രി, ബി.എ മാസ് കമ്മ്യൂണിക്കേഷന്‍, ബി.കോം വിഷയങ്ങളിലും ഒ.ബി എക്‌സ്, ഒ.ബി എച്ച് കാറ്റഗറികളില്‍ ബി.എസ.്‌സി കെമിസ്ട്രിയിലും  ഒബിഎക്‌സ് കാറ്റഗറിയില്‍ ബി.എ മാസ് കമ്മ്യൂണിക്കേഷനിലും സീറ്റൊഴിവുണ്ട്. കാലിക്കറ്റ് സര്‍വകലാശാല ബിരുദ പ്രവേശനത്തിന് രജിസ്റ്റര്‍ ചെയ്ത വിദ്യാര്‍ത്ഥികള്‍ ഓഗസ്റ്റ് 25 ന് ഓഫീസില്‍ എത്തണം.

ജില്ലാ ഭരണകൂടം, ജില്ലാ ടൂറിസം പ്രമോഷന്‍ കൗണ്‍സില്‍, വയനാട് ടൂറിസം അസോസിയേഷന്‍ എന്നിവയുടെ സംയുക്താഭിമുഖ്യത്തില്‍ സെപ്റ്റംബര്‍ മൂന്ന് മുതല്‍ ഒന്‍പത് വരെ ജില്ലയില്‍ ഓണാഘോഷ പരിപാടികള്‍ വിപുലുമായി സംഘടിപ്പിക്കുമെന്ന് ജില്ലാ കളക്ടര്‍ ഡി. ആര്‍ മേഘശ്രീ അറിയിച്ചു.  ഓണാഘോഷ പരിപാടികള്‍ ഹരിതചട്ടം പാലിച്ച് നടത്താനും ജില്ലയിലെ വിനോദസഞ്ചാര കേന്ദ്രങ്ങള്‍  വൈദ്യുതി  ദീപാലങ്കാരം ചെയ്യാനും യോഗത്തില്‍ തീരുമാനിച്ചു. ജില്ലയുടെ പ്രധാന കവാടമായ ലക്കിടി ഗേറ്റില്‍ ദീപാലങ്കാരം ചെയ്യും.

കുറഞ്ഞ വിലയിൽ അവശ്യസാധനങ്ങൾ ലഭ്യമാക്കാൻ ഓഗസ്റ്റ് 26 മുതൽ സെപ്റ്റംബർ നാല് വരെ കൺസ്യുമർഫെഡിന്റെ ഓണചന്തകൾ ഒരുങ്ങുന്നു. ജില്ലാതല ഉദ്ഘാടനം ഓഗസ്റ്റ് 27ന് വൈകിട്ട് നാലിന് കരീപ്ര പഞ്ചായത്തിൽ നെടുമൺകാവ് ഷോപ്പിംഗ് കോംപ്ലക്സ് അങ്കണത്തിൽ ധനകാര്യ വകുപ്പ് മന്ത്രി കെ. എൻ. ബാലഗോപാൽ നിർവഹിക്കും. കൺസ്യുമർഫെഡ് ഡയറക്ടർ ജി. ത്യാഗരാജൻ അധ്യക്ഷനാകും.