മഞ്ചേശ്വരം ഗ്രാമപഞ്ചായത്തിലെ മെറ്റിരിയല്‍ കളക്ഷന്‍ സെന്ററിന്റെ ത്രീ ഫേയ്‌സ് വൈദ്യൂതികരണ പ്രവൃത്തിക്കും ഹോസബെട്ടു കടപ്പുറം മണല്‍ ഡ്രഡ്ജിംഗ് സെന്ററിലെ കെട്ടിട വൈദ്യൂതികരണ പ്രവൃത്തിക്കും ടെണ്ടര്‍ ക്ഷണിച്ചു.ടെണ്ടര്‍ ജൂലൈ അഞ്ചിന് വൈകിട്ട് മൂന്നിനകം സമര്‍പ്പിക്കണം.കൂടുതല്‍ വിവരങ്ങള്‍ക്ക് മഞ്ചേശ്വരം ഗ്രാമപഞ്ചായത്ത് ഓഫീസുമായി ബന്ധപ്പെടുക.

ജില്ല വ്യവസായ കേന്ദ്രത്തിന്റെ കീഴിലുളള ഡെവലപ്പ്‌മെന്റ് പ്ലോട്ട് ചട്ടഞ്ചാല്‍, ഡെവലപ്പ്‌മെന്റ് ഏരിയ അനന്തപുരം, ഡെവല പ്പ്‌മെന്റ് പ്ലോട്ട് അനന്തപുരം, എന്നീ വ്യവസായ എസ്റ്റേറ്റുകളിലെ യൂണിറ്റുടമകളുടെ സാന്നിദ്ധ്യത്തില്‍ നടന്നുവന്നിരുന്ന ഭൂമി സര്‍വ്വെ പ്രവര്‍ത്തനങ്ങള്‍ പൂര്‍ത്തികരിച്ചു. പൂര്‍ത്തികരിച്ച പ്ലാന്‍ പരിശോധനയ്ക്കായി നാളെ (27 ) മുതല്‍ ജില്ലാ വ്യവസായ കേന്ദ്രത്തില്‍ ലഭ്യമാണ്.  ഇതു സംബന്ധിച്ച കൂടുതല്‍ വിവരങ്ങള്‍ക്ക് ജില്ലാ വ്യവസായ കേന്ദ്രവുമായി ബന്ധപ്പെടണം.

 ജില്ലയുടെ സമഗ്ര വികസനത്തിനായി രൂപം കൊടുത്ത കാസര്‍കോട് വികസന പാക്കേജില്‍ പദ്ധതികളുടെ വിശദമായ പ്രോജക്ട് റിപ്പോര്‍ട്ട് തയ്യാറാക്കുന്നതുമായി ബന്ധപ്പെട്ട് ഏകദിന ശില്‍പശാല  നാളെ (27 രാവിലെ പത്തിന് കളക്ടറേറ്റ് മിനി കോണ്‍ഫറന്‍സ് ഹാളില്‍ നടത്തും. ഏകദിന ശില്‍പശാല ജില്ലാ കളക്ടര്‍ ഡോ.ഡി.സജിത് ബാബു ഉദ്ഘാടനം ചെയ്യും. ശില്‍പശാല ദേശീയതലത്തിലെ വിദഗ്ദ്ധര്‍ കൈകാര്യം ചെയ്യും. കാസര്‍കോട് വികസന പാക്കേജ് പദ്ധതികളുടെ നിര്‍വ്വഹണവുമായി ബന്ധപ്പെട്ട വിവിധ വകുപ്പുതല ഉദ്യോഗസ്ഥര്‍ ശില്പശാലയില്‍ പങ്കെടുക്കും.                           

  വനിതാ ശിശുവികസന വകുപ്പിന് കീഴില്‍ കാലിച്ചാനടുക്കത്ത് പ്രവര്‍ത്തിക്കുന്ന സ്ത്രീകളുടെയും കുട്ടികളുടെയും സംരക്ഷണ സ്ഥാപനത്തില്‍ ക്ലിനിക്കല്‍ സൈക്കോളജിസ്റ്റ് (പാര്‍ട്‌ടൈം),സെക്യൂരിറ്റി എന്നീ ഒഴിവുകളിലേക്ക് കരാര്‍ നിയമനത്തിന് ജൂലൈ  രണ്ടിന്  രാവിലെ 10.30 ന് കാസര്‍കോട് കളക്ടറേറ്റ് മിനി കോണ്‍ഫറന്‍സ് ഹാളില്‍ കൂടിക്കാഴ്ച നടത്തും. ക്ലിനിക്കല്‍ സൈക്കോളജിസ്റ്റ് (പാര്‍ട്‌ടൈം)തസ്തികയില്‍ എം.എസ്.ഡബ്ല്യു/എം.എ സൈക്കോളജിയും സെക്യൂരിറ്റി തസ്തികയില്‍ പത്താംതരവും ആണ് യോഗ്യത. 18 നും 35 നും  ഇടയില്‍ പ്രായമുള്ള  വനിതകള്‍ക്ക് കൂടിക്കാഴ്ചയില്‍ പങ്കെടുക്കാം.

എളേരിത്തട്ട് ഇ.കെ.നായനാര്‍ മെമ്മോറിയല്‍ ഗവണ്‍മെന്റ് കോളേജില്‍ രണ്ട് ലൈബ്രറി ഇന്റേണ്‍സിനെ താത്കാലികമായി നിയമിക്കുന്നതിന്  ജൂലൈ ആറിന് രാവിലെ 11 ന് പ്രിന്‍സിപ്പാളിന്റെ ചേമ്പറില്‍ അഭിമുഖം നടത്തുന്നു.  പ്രതിമാസം 12,000 രൂപയാണ് പ്രതിഫലം.  റഗുലര്‍ പഠനത്തിലൂടെ നേടിയ ബി എല്‍ ഐ എസ് ബിരുദം  ആണ് അടിസ്ഥാന യോഗ്യത.എം എല്‍ ഐ എസ് /രണ്ട് വര്‍ഷ പ്രവര്‍ത്തി പരിചയം എന്നിവ അഭിലഷണീയം.  താല്‍പര്യമുളള ഉദ്യോഗാര്‍ത്ഥികള്‍ അസ്സല്‍ സര്‍ട്ടിഫിക്കറ്റുകള്‍ സഹിതം പ്രിന്‍സിപ്പാളുടെ ചേമ്പറില്‍ അഭിമുഖത്തിന് എത്തണം.വിശദവിവരങ്ങള്‍ക്ക് 0467-2241345 

മദ്യത്തിന്റെയും ലഹരിപദാര്‍ത്ഥങ്ങളുടെയും ഉപയോഗം കാരണം വഴി തെറ്റുന്ന യുവതലമുറയ്ക്കും കുടുംബങ്ങള്‍ക്കുമിടയില്‍ അവബോധം സൃഷ്ടിക്കാന്‍ പതിവു ബോധവത്കരണ ക്ലാസുകളില്‍ നിന്നു വ്യത്യസ്തമായി 'കനലെരിയും ബാല്യം'  എന്ന  സിനിമയൊരുക്കിയിരിക്കുകയാണ് കിനാനൂര്‍-കരിന്തളം ഗ്രാമപഞ്ചായത്ത്. എക്സൈസ്,ആരോഗ്യ,വിദ്യാഭ്യാസ വകുപ്പുകളുടെ സഹകരണത്തോടെ വിബ്ജിയോര്‍ ഫിലിംസിന്റെ് ബാനറില്‍ നിര്‍മ്മിച്ച ചിത്രത്തിന്റെ കഥയും തിരക്കഥയും സംവിധാനവും ഒരുക്കിയിരിക്കുന്നത് അജി കുട്ടമ്മാമനാണ്. 

കുറ്റിക്കോല്‍   ഗവണ്‍മെന്റ് ഐ.ടി.ഐയില്‍  ഡ്രാഫ്റ്റ്മാന്‍ സിവില്‍, ഇലക്ട്രോണിക്‌സ് മെക്കാനിക്  എന്നീ എന്‍.സി.വി.ടി ട്രേഡുകളിലേക്കുളള  പ്രവേശനത്തിന് അപേക്ഷ ക്ഷണിച്ചു.   www.itiadmissions.kerala.gov.in ല്‍ ഈ മാസം 29  നകം അപേക്ഷിക്കണം. കൂടുതല്‍ വിവരങ്ങള്‍ക്ക്, ഫോണ്‍ നമ്പര്‍ 04994 206200

മടിക്കൈ ഗ്രാമപഞ്ചായത്ത്  2018-19 വാര്‍ഷിക പദ്ധതിയിലുള്‍പ്പെടുത്തി നടപ്പിലാക്കിയ വികലാംഗര്‍ക്ക് ഉപകരണം  എന്ന പദ്ധതി പ്രകാരമുളള മുചക്രവാഹനത്തിന്റെ  വിതരണോദ്ഘാടനം ഗ്രാമപഞ്ചായത്ത് വൈസ് പ്രസിഡണ്ട് കെ. പ്രമീള നിര്‍വഹിച്ചു. ക്ഷേമ കാര്യസ്റ്റാന്റിംഗ് കമ്മിറ്റി ചെയര്‍പേഴ്‌സണ്‍ സി. ഇന്ദിര അധ്യക്ഷത വഹിച്ചു. അസി. സെക്രട്ടറി വി. മധുസൂദനന്‍ ഐ.സി.ഡി.എസ് സൂപ്പര്‍വൈസര്‍ എ.ഒ ബിന്ദു, പ്രൊഫ. വി. കുട്ട്യന്‍ എന്നിവര്‍ സംസാരിച്ചു

 കാസര്‍കോട് മുനിസിപ്പല്‍ കൃഷിഭവന്റെ പരിധിയില്‍ വിവിധമേഖലകളില്‍ മികച്ച കാര്‍ഷിക വിജയം കൈവരിച്ചവര്‍ക്കുള്ള ഈവര്‍ഷത്തെ നഗരസഭാ/സംസ്ഥാനപുരസ്‌കാരങ്ങള്‍ക്ക് വ്യക്തികളില്‍ നിന്നും സ്ഥാപനങ്ങളില്‍ നിന്നും അപേക്ഷ സ്വീകരിക്കുന്നു. നിശ്ചിത ഫോമിലുള്ള അപേക്ഷയോടൊപ്പം ആവശ്യമായ വിവരണങ്ങളും ബന്ധപ്പെട്ട ഫോട്ടോ/വീഡിയോ എന്നിവയും വേണം. ഫോണ്‍:04994 230560, 9383472310

ട്രോളിംഗ് നിരോധനത്തെ തുടര്‍ന്ന് തൊഴില്‍ രഹിതരാകുന്ന യന്ത്രവല്‍കൃത മത്സ്യബന്ധന ബോട്ടുകളില്‍ ജോലി ചെയ്യുന്ന മത്സ്യത്തൊഴിലാളികള്‍ക്കും മത്സ്യബന്ധന തുറമുഖങ്ങളില്‍ അനുബന്ധ തൊഴിലിലേര്‍പ്പെട്ടവര്‍ക്കും ട്രോളിംഗ് നിരോധന കാലയളവില്‍ സൗജന്യ റേഷന്‍ അനുവദിക്കുന്നു. അര്‍ഹരായ മത്സ്യത്തൊഴിലാളികളുടെ വിവരങ്ങള്‍ നിശ്ചിത പ്രൊഫോര്‍മ്മയില്‍ ബോട്ടുടമയാണ് സമര്‍പ്പിക്കേണ്ടത്. ബോട്ടിന്റെ രജിസ്‌ട്രേഷന്‍ സര്‍ട്ടിഫിക്കറ്റ്, മത്സ്യത്തൊഴിലാളി പാസ് ബുക്ക്, റേഷന്‍ കാര്‍ഡ് എന്നിവയുടെ പകര്‍പ്പ് സഹിതം ജൂലൈ അഞ്ചിനകം അപേക്ഷ സമര്‍പ്പിക്കണം.