അര്‍ബുദത്തെ ഭയക്കുന്നതു കൊണ്ടാണ് അതിന്റെ ഭീകരത വര്‍ധിക്കുന്നതെന്ന് ജില്ലാ പഞ്ചായത്ത് പ്രസിഡണ്ട് കെ വി സുമേഷ് പറഞ്ഞു. പാനൂര്‍ ബ്ലോക്ക് പഞ്ചായത്ത് നടപ്പിലാക്കുന്ന സ്‌നേഹസ്പര്‍ശം സമഗ്ര കാന്‍സര്‍ നിയന്ത്രണ പദ്ധതിയുടെ സംഘാടകസമിതി രൂപീകരണവും ബോധവല്‍ക്കരണ ക്ലാസും ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. ഏതൊരസുഖവും പോലെ തുടക്കത്തില്‍ കണ്ടെത്തി ചികിത്സ നല്‍കിയാല്‍ മാറുന്ന രോഗം മാത്രമാണ് കാന്‍സര്‍. അതിനായി നാം ഓരാരുത്തരും പരിശോധനക്ക് തയ്യാറാവണമെന്നും അദ്ദേഹം അഭിപ്രായപ്പെട്ടു.

ജില്ലാ പഞ്ചായത്ത് 2018 -19 വര്‍ഷിക പദ്ധതിയില്‍ ഉള്‍പ്പെടുത്തി നടപ്പാക്കുന്ന വളപ്പ്കൃഷിയുടെ വിളവെടുപ്പ് ഉദ്ഘാടനം ടി വി രാജേഷ് എം എല്‍ എ നിര്‍വഹിച്ചു. കുഞ്ഞിമംഗലം ചങ്കൂരിച്ചാലില്‍ നടന്ന പരിപാടിയില്‍ ജില്ലാ പഞ്ചായത്ത് വൈസ് പ്രസിഡന്റ് പി പി ദിവ്യ അധ്യക്ഷത വഹിച്ചു. സ്ഥിരം സമിതി അധ്യക്ഷനായ വി കെ സുരേഷ്ബാബു, ജില്ലാ പഞ്ചായത്ത് അംഗം ആര്‍ അജിത, ഫിഷറിസ് ഡെപ്യൂട്ടി ഡയറക്ടര്‍ ശ്രീകണ്ഠന്‍, ടി പുരുഷോത്തമന്‍, പി വി ദാമോദരന്‍, സി വി ദാമോദരന്‍ തുടങ്ങിയവര്‍ പങ്കെടുത്തു.
പി എന്‍ സി/2116/2019

ശുചിത്വ മിഷന്‍ ഡയറക്ടറായി സ്ഥലം മാറി പോകുന്ന ജില്ലാ കലക്ടര്‍ മീര്‍ മുഹമ്മദ് അലിക്ക് ജില്ലാ ഇന്‍ഫര്‍മേഷന്‍ ഓഫീസിന്റെ നേതൃത്വത്തില്‍ യാത്രയയപ്പ് നല്‍കി. ഇന്‍ഫര്‍മേഷന്‍ ഓഫീസ് നല്‍കുന്ന ഉപഹാരം ജില്ലാ പഞ്ചായത്ത് പ്രസിഡന്റ് കെ വി സുമേഷ് ജില്ലാ കലക്ടര്‍ക്ക് കൈമാറി. ഇന്‍ഫര്‍മേഷന്‍ ആന്റ് പബ്ലിക്ക് റിലേഷന്‍സ് വകുപ്പ് മേഖല ഡെപ്യൂട്ടി ഡയറക്ടര്‍ കെ പി അബ്ദുള്‍ ഖാദര്‍, ജില്ലാ ഇഫര്‍മേഷന്‍ ഓഫീസര്‍ ഇ കെ പത്മനാഭന്‍, ഓഫീസ് ജീവനക്കാര്‍ തുടങ്ങിയവര്‍ പങ്കെടുത്തു.
പി എന്‍ സി/2115/2019

തെരഞ്ഞെടുപ്പ് അവകാശം ദുരുപയോഗപ്പെടുത്തി ഒരു കള്ളവോട്ടെങ്കിലും നടന്നാല്‍ ശക്തമായ നടപടിയുണ്ടാകുമെന്ന സന്ദേശമാണ് ജില്ലയില്‍ റീ പോളിംഗ് നടത്തിയതിലൂടെ തെരഞ്ഞെടുപ്പ് കമ്മീഷന്‍ നല്‍കിയതെന്ന് ജില്ലാ കലക്ടര്‍ മീര്‍ മുഹമ്മദ് അലി പറഞ്ഞു. തെരഞ്ഞെടുപ്പില്‍ പങ്കാളികളായ ഉദ്യോഗസ്ഥരെ അനുമോദിക്കുന്നതിനായി ചേര്‍ന്ന യോഗത്തില്‍ സംസാരിക്കുകയായിരുന്നു അദ്ദേഹം. തെരഞ്ഞെടുപ്പിന് ശേഷം അക്രമ സംഭവങ്ങള്‍ ഉണ്ടായിട്ടില്ല എന്നുള്ളത് തെരഞ്ഞെടുപ്പ് ഉദ്യോഗസ്ഥരുടെ കൂട്ടായ പരിശ്രമത്തിന്റെ ഫലമാണ്.