ചാലില്‍ ഗോപാലപ്പേട്ട നിവാസികളുടെ ചിരകാല സ്വപ്നമായിരുന്ന ഫിംഗര്‍ ജെട്ടിക്ക് ഫിഷറീസ് വകുപ്പ് മന്ത്രി ജെ മേഴ്‌സി കുട്ടിയമ്മ തറക്കല്ലിട്ടു. 3.71 കോടി രൂപ ചെലവില്‍ നിര്‍മിക്കുന്ന ബോട്ട് ജെട്ടിയുടെ നിര്‍മാണം പൂര്‍ത്തിയാവുന്നതോടെ മേഖലയിലെ മല്‍സ്യത്തൊഴിലാളികള്‍ക്ക് വലിയ ആശ്വാസമാവുമെന്ന് മന്ത്രി പറഞ്ഞു. 

ജില്ലാ ആശുപത്രിയില്‍ പുതുതായി നിര്‍മ്മിച്ച കുട്ടികളുടെ വാര്‍ഡിന്റെ ഉദ്ഘാടനം ജില്ലാ കലക്ടര്‍ മീര്‍ മുഹമ്മദ് അലി നിര്‍വഹിച്ചു. മൂന്ന് ലക്ഷം രൂപ ചെലവഴിച്ചാണ് കുട്ടികള്‍ക്കായി അത്യാധുനിക സൗകര്യങ്ങളോട് കൂടിയ ആകര്‍ഷകമായ വാര്‍ഡ് തയ്യാറാക്കിയത്. കളിപ്പാട്ടങ്ങള്‍, പ്ലേ ഏരിയ, ചുമര്‍ ചിത്രങ്ങള്‍ തുടങ്ങി ശിശു സൗഹൃദ അന്തരീക്ഷത്തിലാണ് വാര്‍ഡ് നിര്‍മ്മിച്ചിരിക്കുന്നത്. ഇതിന് പുറമെ ചുമരില്‍ നിറയുന്ന കാര്‍ട്ടൂണ്‍ കഥാപാത്രങ്ങളും അക്ഷരമാലകളും ആശുപത്രിയിലെത്തുന്ന കുട്ടികള്‍ക്ക് സാന്ത്വനമേകും. കളിസ്ഥലത്തിന് പുറമെ ഭക്ഷണം കഴിക്കാനുള്ള ഇടവും വാര്‍ഡില്‍ ഒരുക്കിയിട്ടുണ്ട്. 

മലബാര്‍ റിവര്‍ ക്രൂയിസ് ടൂറിസം പദ്ധതിയുടെ ഭാഗമായി, മയ്യഴിപ്പുഴയോട് ചേര്‍ന്ന് ചൊക്ലി ഗ്രാമ പഞ്ചായത്തിലെ ഒളവിലം പ്രദേശത്ത് കക്കടവ്, പാത്തിക്കല്‍ ബോട്ട് ടെര്‍മിനലുകളുടെ നിര്‍മാണ പ്രവൃത്തി ഫിഷറീസ് വകുപ്പ് മന്ത്രി ജെ മേഴ്‌സിക്കുട്ടിയമ്മ ഉദ്ഘാടനം ചെയ്തു. 1.75 കോടി രൂപ ചെലവിലാണ് പാത്തിക്കലില്‍ ബോട്ട് ജെട്ടി നിര്‍മിക്കുന്നത്. 49.5 മീറ്റര്‍ നീളത്തില്‍ പരമ്പരാഗത രീതിയിലുള്ള മേല്‍ക്കൂരയോട് കൂടിയുള്ളതായിരിക്കും ബോട്ട് ജെട്ടി. 

തലശ്ശേരി നഗരസഭയില്‍ പിഎംഎവൈ-ലൈഫ് പദ്ധതിയിലുള്‍പ്പെടുത്തി പൂര്‍ത്തീകരിച്ച 56 വീടുകളുടെ താക്കോല്‍ ദാനവും നഗരസഭയുടെ വാര്‍ഷിക പദ്ധതിയില്‍ ഉള്‍പ്പെടുത്തി പട്ടികജാതി വിഭാഗത്തിന് വയലളം ഉക്കണ്ടന്‍ പീടികയില്‍ നിര്‍മ്മിച്ച് നല്‍കുന്ന ഫ്‌ളാറ്റിന്റെ ശിലാസ്ഥാപനവും ഫിഷറീസ് വകുപ്പ് മന്ത്രി ജെ മേഴ്‌സിക്കുട്ടിയമ്മ നിര്‍വഹിച്ചു. നഗരസഭയുടെ വാര്‍ഷിക പദ്ധതിയിലുള്‍പ്പെടുത്തി മത്സ്യത്താഴിലാളികള്‍ക്ക് മോട്ടോര്‍ സൈക്കിളും ഐസ് ബോക്‌സും വിതരണം ചെയ്തു. 

എംപിയുടെ പ്രാദേശിക വികസന നിധിയില്‍ ഉള്‍പ്പെടുത്തി നടപ്പിലാക്കുന്ന പദ്ധതികളില്‍ ഇതിനകം പൂര്‍ത്തീകരിച്ചവയുടെ ബില്ലുകള്‍ മാര്‍ച്ച് 31നകം സമര്‍പ്പിക്കണമെന്ന് കെ കെ രാഗേഷ് എംപി നിര്‍വഹണ ഉദ്യോഗസ്ഥര്‍ക്ക് നിര്‍ദ്ദേശം നല്‍കി.  ജില്ലാ കലക്ടറുടെ ചേംബറില്‍ നടന്ന എംപി ലാഡ്സ് അവലോകന യോഗത്തില്‍ സംസാരിക്കുകയായിരുന്നു അദ്ദേഹം. ബില്ലുകള്‍ മുഴുവന്‍ സമര്‍പ്പിച്ചാല്‍ മാത്രമേ എംപി ഫണ്ടിലേക്കുള്ള അടുത്ത ഗഡു ലഭിക്കുകയുള്ളൂ എന്നും അദ്ദേഹം പറഞ്ഞു. 

അഞ്ച് ഫിഷറീസ് സ്‌കൂളുകള്‍ അന്താരാഷ്ട്ര നിലവാരത്തിലേക്ക്

അഴീക്കല്‍ ഗവ. റീജിയണല്‍ ഫിഷറീസ് ടെക്‌നിക്കല്‍ ആന്റ് വൊക്കേഷണല്‍ ഹയര്‍ സെക്കണ്ടറി സ്‌കൂളില്‍ അടുത്ത അധ്യയന വര്‍ഷം മുതല്‍ പെണ്‍കുട്ടികള്‍ക്കും പ്രവേശനം നല്‍കുമെന്ന് ഫിഷറീസ് വകുപ്പ് മന്ത്രി ജെ മേഴ്‌സിക്കുട്ടിയമ്മ. അഴീക്കല്‍ സ്‌കൂളിനെ മികവിന്റെ കേന്ദ്രമാക്കുന്ന പദ്ധതിയുടെ ഭാഗമായുള്ള നിര്‍മാണ പ്രവര്‍ത്തനങ്ങളുടെ ശിലാസ്ഥാപനം നിര്‍വഹിക്കുകയായിരുന്നു മന്ത്രി. 

കേരളാ സ്റ്റേറ്റ് കൗൺസിൽ ഫോർ സയൻസ്, ടെക്‌നോളജി ആന്റ് എൻവയോൺമെന്റ് 14 പോസ്റ്റ് ഡോക്ടറൽ ഫെല്ലോഷിപ്പ് പ്രഖ്യാപിച്ചു.  ഫിസിക്‌സിൽ ഡോ. രാഹുൽ എസ്, ഡോ. ഭാഗ്യ ഉത്തമൻ, ഡോ. രാജീവ് ആർ. പ്രഭു; എൻവയോൺമെന്റൽ സയൻസിൽ ഡോ. ജയശ്രീ എസ്; ജിയോളജിയിൽ ഡോ. ബബീഷ്. സി; കെമിസ്ട്രിയിൽ ഡോ. ലിൻഷ വാഴയാൽ, ഡോ. ബേബി വിശ്വംഭരൻ, ഡോ. രാജേഷ് പി; ബയോകെമിസ്ട്രി ആന്റ് ബയോഇൻഫർമാറ്റിക്‌സിൽ ഡോ. അരുൺ കെ.ബി, ഡോ. സിനി എസ്, ഡോ. ഷൈൻ വി.ജെ, ഡോ. വിനീത ആർ.സി, ഡോ. ജെസ്‌വിൻ ജോസഫ്; സുവോളജി ആന്റ് മറൈൻ സയൻസിൽ ഡോ. എം.എസ് വിഷ്ണുനായർ എന്നിവർ ഫെല്ലോഷിപ്പിന് അർഹരായി.

പി.എൻ.എക്സ്. 833/19

കേരള വനഗവേഷണസ്ഥാപനത്തിൽ മൂന്ന് വർഷം കാലാവധിയുള്ള സമയബന്ധിത ഗവേഷണപദ്ധതിയിൽ ഒരു ജൂനിയർ റിസർച്ച് ഫെല്ലോയുടെ താൽക്കാലിക നിയമനത്തിന് മാർച്ച് 11ന് രാവിലെ പത്തിന് തൃശൂർ പീച്ചിയിലുള്ള ഓഫീസിൽ വാക്-ഇൻ-ഇന്റർവ്യൂ നടക്കും.  ബോട്ടണിയിലോ പ്ലാന്റ് സയൻസിലോ ഉള്ള ഒന്നാം ക്ലാസ് ബിരുദാനന്തര ബിരുദവും നെറ്റുമാണ് യോഗ്യത.  പ്രതിമാസം 25,000 രൂപ ഫെല്ലോഷിപ്പ് ലഭിക്കും.  പ്രായപരിധി 36 വയസ്.  നിയമാനുസൃത ഇളവ് ലഭിക്കും.  വിശദവിവരങ്ങൾക്ക്: www.kfri.res.in.

പി.എൻ.എക്സ്. 832/19

പൊതുമരാമത്ത് വകുപ്പിലെ 2019 വർഷത്തെ പൊതുസ്ഥലംമാറ്റത്തിനുള്ള അപേക്ഷ മേലധികാരി വഴി നിശ്ചിത ഫോറത്തിൽ മാർച്ച് 20ന് മുമ്പായി സമർപ്പിക്കണം.  അപേക്ഷയുടെ മാതൃക പൊതുമരാമത്ത് വകുപ്പ് വെബ്‌സൈറ്റിൽ ലഭ്യമാണ്.

പി.എൻ.എക്സ്. 831/19