മാരാരിക്കുളം: നാലുചുവരുകൾക്കുള്ളിൽ ജീവിതമവസാനിച്ചുവെന്ന് കരുതിയിരുന്ന നൂറ് കണക്കിനാളുകൾക്ക് സാന്ത്വന സ്പർശമായി ജീവതാളത്തിന്റെ ആരോഗ്യ പ്രവർത്തകർ രോഗികളെ സന്ദർശിച്ചു. ജീവതാളം പെയിൻ ആന്റ് പാലിയേറ്റീവ് സൊസൈറ്റിയുടെ നേതൃത്വത്തിൽ മാരാരിക്കുളത്ത് നടപ്പാക്കുന്ന സമ്പൂർണ്ണ പാലിയേറ്റീവ് ഗ്രാമം പദ്ധതിയുടെ ഭാഗമായാണ് രോഗികളെ സന്ദർശിച്ചത്.

കിടപ്പുരോഗികൾക്കാവശ്യമായ മരുന്നും ഭക്ഷണവും വസ്ത്രവും  സാന്ത്വനവും ഉറപ്പാക്കുകയാണ് പദ്ധതി ലക്ഷ്യമിടുന്നത്.  

അമ്പലപ്പുഴ: മത്സ്യ തൊഴിലാളി ക്ഷേമനിധി ബോർഡിന്റെ  ആലപ്പുഴ മേഖല മത്സ്യതൊഴിലാളി സംഗമവും, ക്ഷേമപദ്ധതികളുടെ ധനസഹായ വിതരണവും ബോധവത്ക്കരണ പരിപാടിയും നടത്തി. പുറക്കാട് എസ്.എൻ.എം സ്‌കൂളിൽ നടന്ന സംഗമവും ധനസഹായ വിതരണവും മത്സ്യഫെഡ് ചെയർമാൻ പി.പി ചിത്തരഞ്ജൻ ഉദ്ഘാടനം ചെയ്തു. ക്ഷേമ പദ്ധതികളുടെ ഭാഗമായി 1.04 കോടി  രൂപയുടെ സഹായമാണ് വിതരണം ചെയ്തത്.

പറവൂർ: സംസ്ഥാന സർക്കാരിന്റെ ആയിരം ദിനാഘോഷത്തിന്റെ ഭാഗമായി ആധുനിക സജ്ജീകരണത്തോടെ ഒരുക്കിയ ത്രിവേണി മെഗ മാർട്ടിന്റെ ഉദ്ഘാടനം പറവൂർ മേഖല ഓഫീസിൽ നടത്തി. ജില്ല പഞ്ചായത്ത് പ്രസിഡന്റ് ജി. വേണുഗോപാൽ ഉദ്ഘാടനം ചെയ്തു. പൊതു വിപണിയിൽ സാധാരണക്കാർക്ക് വിലക്കുറവിൽ ഗുണമേന്മയുള്ള സാധനങ്ങൾ നൽകുക എന്ന സർക്കാർ നയത്തിന്റെ ഭാഗമായിട്ടാണ് നിത്യോപയോഗ സാധനങ്ങൾ ഒരു കുടകീഴിൽ ഒരുക്കിയിരിക്കുന്നത്. ഓണം-ബക്രീദ് സമ്മാന പദ്ധതിയിൽ വിജയികളായവർക്കുള്ള സമ്മാന വിതരണവും നടന്നു.  

അമ്പലപ്പുഴ: പൊതുമരാമത്ത് വകുപ്പിന്റെ കീഴിലുള്ള വിശ്രമ കേന്ദ്രങ്ങൾ സ്ത്രീ സൗഹൃദ  കേന്ദ്രങ്ങളായി ഉയർത്തുമെന്നും കുറഞ്ഞ ചെലവിൽ സഞ്ചാരികൾക്കും ഉപയോഗ പ്രദമാകുന്ന തരത്തിൽ മാറ്റുമെന്നും പൊതുമരാമത്തുമന്ത്രി ജി. സുധാകരൻ. മഹാത്മാഗാന്ധിയുടെ സന്ദർശനച്ചാൽ പ്രശസ്തമായ അമ്പലപ്പുഴ കരുമാടിയിൽ നിർമ്മിക്കുന്ന പൊതുമരാമത്ത് വകുപ്പ്   വിശ്രമ കേന്ദ്രത്തിന്റെ ശിലാസ്ഥാപനം  നിർവഹിക്കുകയായിരുന്നു അദ്ദേഹം. 

ആലപ്പുഴ: അമ്പലപ്പുഴ ബ്ലോക്ക് പഞ്ചായത്തിന്റെ 65 ലക്ഷത്തിലേറെ രൂപ വരുന്ന വിവിധ പദ്ധതികളുടെ ആനുകൂല്യവിതരണം ഉദ്ഘാടനം ബ്ലോക്ക് പഞ്ചായത്ത് അങ്കണത്തിൽ പൊതുമരാമത്ത് രജിസ്‌ട്രേഷൻ വകുപ്പ് മന്ത്രി ജി. സുധാകരൻ നിർവഹിച്ചു. ഭിന്നശേഷിക്കാർക്കുള്ള സൈഡ് വീൽ ഘടിപ്പിച്ച  സ്‌കൂട്ടറിന്റെ ് വിതരണം , പാടശേഖരസമിതികൾക്ക് പെട്ടിയും പറയും മോട്ടോറും വിതരണം,  പരമ്പരാഗത കൈത്തൊഴിൽ ഗ്രൂപ്പുകൾക്ക് ധനസഹായവിതരണം, മത്സ്യത്തൊഴിലാളി കുടുംബങ്ങളിലെ വിദ്യാർത്ഥികൾക്ക് പഠനോപകരണവിതരണം, ഭിന്നശേഷിയുള്ളവർക്കുള്ള സഹായ ഉപകരണ വിതരണം എന്നിവയാണ് മന്ത്രി നിർവഹിച്ചത്.

അമ്പലപ്പുഴ :ചിറക്കോട് കഞ്ഞിപ്പാടം കട്ടക്കുഴി ഗ്രാമീണ റോഡുകളുടെ പുനർ നിർമാണ ഉദ്ഘാടനം പൊതുമരാമത്ത് വകുപ്പ് മന്ത്രി ജി .സുധാകരൻ നിർവഹിച്ചു.ചരിത്രത്തിൽ ആദ്യമായാണ് പൊതുമരാമത്ത് വകുപ്പ് 101 കോടി രൂപ ഗ്രാമീണ റോഡുകൾക്കായി നൽകുന്നത്. ഇത് ഓരോ സാധാരക്കാരുടെയും വിജയമാണെന്ന് മന്ത്രി പറഞ്ഞു.

അമ്പലപ്പുഴ : കാക്കാഴം പാലത്തിനു താഴെയുള്ള കൈയേറ്റങ്ങൾ ഒഴിപ്പിച്ച് അവിടെ പോലീസിന്റെ വിവിധ വകുപ്പ് ഓഫീസുകൾ പണിയണമെന്ന് പൊതുമരാമത്ത് വകുപ്പ് മന്ത്രി ജി .സുധാകരൻ. കാക്കാഴം മേൽ പാലത്തിൽ  സ്ഥാപിച്ചിരിക്കുന്ന ട്രാഫിക് നിരീക്ഷണ ക്യാമറകളുടെയും ഹൈവേ ആക്ഷൻ ഫോഴ്‌സിന്റെയും ഉദ്ഘാടനം നിർവഹിച്ചു  സംസാരിക്കുകയായിരുന്നു അദ്ദേഹം. പാലങ്ങൾക്ക് മാത്രമല്ല പാലത്തിന്റെ അടിഭാഗത്തും വികസനം ഉണ്ടാകണം.

അമ്പലപ്പുഴയിൽ നാലുവരി  പാത നിർമിക്കാനുള്ള കരാറുകൾ നടത്തിക്കഴിഞ്ഞു. അപകടങ്ങളുടെ കാര്യത്തിൽ കാക്കാഴം മേൽപാലം എന്നും മുൻപന്തിയിലാണ്. നാലു വരി പാതയുടെ വരവും  ക്യാമറയുടെ സംരക്ഷണവും അപകടങ്ങളുടെ എണ്ണം കുറയ്ക്കും.