ക്രിമിനല്‍ കേസില്‍പ്പെട്ടവരെ അറസ്റ്റ് ചെയ്യുമ്പോള്‍  പ്രതികളുടെ കുടുംബത്തിലെ സ്ത്രീകളെക്കൊണ്ടു പോലീസ് ഉദ്യോഗസ്ഥര്‍ക്കെതിരെ വനിതാ കമ്മീഷനില്‍ പരാതികള്‍ നല്‍കുന്നതു വര്‍ധിച്ചുവരുന്നതായി സംസ്ഥാന വനിതാ കമ്മീഷന്‍ അഭിപ്രായപ്പെട്ടു. ആണ്‍മക്കളോ, ഭര്‍ത്താവോ, സഹോദരനോ ഏതെങ്കിലും കേസില്‍ പ്രതികളാകുമ്പോള്‍ അവരെ അറസ്റ്റ് ചെയ്യുന്ന പോലീസ് ഉദ്യോഗസ്ഥര്‍ക്കെതിരെ വീട്ടിലെ സ്ത്രീകളെക്കൊണ്ടു പരാതി നല്‍കുന്നതു  ശരിയായ നടപടിയല്ലെന്നു വനിതാ കമ്മീഷന്‍ നിരീക്ഷിച്ചു. ഇത്തരത്തില്‍ പരാതികള്‍ നല്‍കുന്നതു നിയമം നടപ്പാക്കുന്ന ഉദ്യോഗസ്ഥരുടെ മനോവീര്യം തകര്‍ക്കുമെന്നും കമ്മീഷന്‍ അഭിപ്രായപ്പെട്ടു.

വിവാഹിതരാകുന്ന സ്ത്രീകള്‍ക്കു ലഭിക്കുന്ന സ്വര്‍ണ്ണാഭരണങ്ങള്‍ ഉള്‍പ്പെടെയുള്ള സമ്മാനങ്ങള്‍ അവരുടെ സ്വത്തായി പരിഗണിക്കുന്ന നിയമം ഉണ്ടാകണമെന്നു വനിതാ കമ്മീഷന്‍ അധ്യക്ഷ എം.സി ജോസഫൈന്‍ പറഞ്ഞു. ഇന്നത്തെ സമൂഹത്തില്‍ ഭൂരിഭാഗം സ്ത്രീകള്‍ക്കും സ്വത്തുക്കളുടെ അവകാശത്തിനോ വസ്തുവകകളുടെ ക്രയവിക്രിയത്തിനോ അധികാരം ലഭിക്കുന്നില്ല. അതിനു മാറ്റമുണ്ടാകണമെന്നും എം.സി ജോസഫൈന്‍ പറഞ്ഞു. 
കാസര്‍കോട് കളക്ടറേറ്റ് കോണ്‍ഫറന്‍സ് ഹാളില്‍ വനിതാ കമ്മീഷന്‍ നടത്തിയ അദാലത്തിനുശേഷം സംസാരിക്കുകയായിരുന്നു അധ്യക്ഷ.

സാമൂഹ്യനീതി വകുപ്പിന് കീഴില്‍ പ്രവര്‍ത്തിക്കുന്ന അടിമാലി അഡീഷണല്‍  ശിശുവികസന പദ്ധതി ഓഫീസിലെ ആവശ്യത്തിനായി 2019-20 സാമ്പത്തിക വര്‍ഷത്തേക്ക് വാഹനം വാടകയ്ക്ക് നല്‍കുന്നതിന് വാഹന ഉടമകളില്‍ നിന്നും ടെണ്ടറുകള്‍ ക്ഷണിച്ചു. ടെണ്ടറുകള്‍ ജൂണ്‍ 18ന് ഉച്ചക്ക് രണ്ട് വരെ സ്വീകരിക്കുന്നതും അന്നേ ദിവസം മൂന്ന് മണിക്ക് തുറക്കുന്നതുമാണ്. കൂടുതല്‍ വിവരങ്ങള്‍ക്ക് ഫോണ്‍ 04865 265268.

 ജില്ലയില്‍ 10, +2  പഠനം പൂര്‍ത്തിയാക്കിയ  തൊഴില്‍രഹിതരായ  യുവതി യുവാക്കള്‍ക്ക്  കുടുംബശ്രീ ഡി.ഡി.യു.ജി.കെ.വൈ പദ്ധതിയുടെ മൊബിലൈസേഷന്‍  സംഘടിപ്പിച്ചു.  വാഴത്തോപ്പ് സെന്റ് ജോര്‍ജ്ജ് കത്തീഡ്രല്‍ പാരിഷ് ഹാളില്‍  നടന്ന പരിപാടി ഫാ. ഫ്രാന്‍സിസ് എടവക്കണ്‍ം  ഉദ്ഘാടനം ചെയ്തു.  അപ്പോളോ,  ഇസാഫ്, രാജഗിരി തുടങ്ങിയ  പദ്ധതി നിര്‍വ്വഹണ ഏജന്‍സികളില്‍ നിന്നുള്ള  പ്രതിനിധികള്‍ കോഴ്‌സുകളെകുറിച്ച് വിശദീകരിച്ചു. നാല്‍പ്പതോളം പേര്‍ പങ്കെടുത്ത പരിപാടിയില്‍   25 പേര്‍ക്ക് വിവിധ പരിശീലന സ്ഥാപനങ്ങളില്‍ അഡ്മിഷന്‍ ലഭിച്ചു.  

ജില്ലാ ചൈല്‍ഡ് പ്രൊട്ടക്ഷന്‍ യൂണിറ്റ് ശരണ്യബാല്യം പദ്ധതി ആരംഭിക്കുന്നതിന്റെ ഭാഗമായി 18 വകുപ്പുകളെ എകോപിപ്പിച്ച് ജില്ലാ ടാസ്‌ക് ഫോഴ്സ് രൂപികരിച്ച് പ്രവര്‍ത്തനങ്ങള്‍ ഏകോപിപ്പിച്ചുവരുന്നു. അതിനായി പോലീസ്, തൊഴില്‍ വകുപ്പുകളെ എകോപിച്ച് ജില്ലയിലെ വിവിധ മേഖലകളില്‍ റെസ്‌ക്യു ഡ്രൈവുകള്‍   നടത്തുന്നുണ്ട്. പദ്ധതിയുടെ ഭാഗമായി പൊതുജനങ്ങളില്‍ അവബോധം സൃഷ്ടിക്കാന്‍ തെരുവ് നാടകം സംഘടിപ്പിച്ചു.

ത്രിതല പഞ്ചായത്ത് തലത്തിലുള്ള ബാലസംരക്ഷണ സമിതികള്‍ ശാക്തീകരിക്കുവാന്‍ അഡീഷണല്‍ ഡിസ്ട്രിക്ട് മജിസ്ട്രേറ്റ് അനില്‍ ഉമ്മന്റെ അധ്യക്ഷതയില്‍ കളക്ട്രേറ്റില്‍ ചേര്‍ന്ന ജില്ലാ ചൈല്‍ഡ് പ്രൊട്ടക്ഷന്‍ സമിതി യോഗം തീരുമാനിച്ചു. ചൂഷണം ചെയ്യപ്പെടാന്‍ സാഹചര്യമുള്ള കുട്ടികളെ കണ്ടെത്തുന്നതിന് സമഗ്ര സര്‍വെ നടത്തുന്നതിനും യോഗത്തില്‍ തീരുമാനമായി. യോഗത്തില്‍ ബോധവത്കരണത്തിന്റെ സന്ദേശം പ്രചരിപ്പിക്കുന്നതിന്റെ ഭാഗമായി സന്ദേശ ബോര്‍ഡ് ചൈല്‍ഡ് വെല്‍ഫെയര്‍ കമ്മറ്റി ചെയര്‍മാന്‍ ഡോ.ജോസഫ് അഗസ്റ്റിന്‍ അഡീഷണല്‍ ഡിസ്ട്രിക്ട് മജിസ്ട്രേറ്റ് അനില്‍ ഉമ്മന് കൈമാറി.