കുടുംബശ്രീ ജില്ലാ മിഷന്‍റെ ആഭിമുഖ്യത്തില്‍ സംഘടിപ്പിക്കുന്ന ജില്ലാതല പാചക മത്സരം രുചിഭേദം ഇന്ന് (മാര്‍ച്ച് 29) രാവിലെ 9.30 മുതല്‍ കോട്ടയം മാമ്മന്‍ മാപ്പിള ഹാളില്‍ നടക്കും. 

      ക്ലിനിക്കല്‍ എസ്റ്റാബ്ലിഷ്മെന്‍റ് ആക്ട് 2018മായി ബന്ധപ്പെട്ട് ജില്ലയിലെ സ്വകാര്യ ആശുപത്രി അഡ്മിനിസ്ട്രേറ്റര്‍മാര്‍ക്കും ഡോക്ടര്‍മാര്‍ക്കുമായുള്ള ബോധവത്കരണ സെമിനാര്‍ മാര്‍ച്ച് 30ന് രാവിലെ 10 ന് കോട്ടയം ജനറല്‍ ആശുപത്രി കോമ്പൗണ്ടിലെ നാഷണല്‍ ഹെല്‍ത്ത് മിഷന്‍ കോണ്‍ഫറന്‍സ് ഹാളില്‍ നടക്കും.

   സൂര്യാഘാതവുമായി ബന്ധപ്പെട്ട മുന്‍കരുതലുകളുടെ ഭാഗമായി കോട്ടയം ചാലുകുന്ന്, കുടയംപടി, ബേക്കര്‍ ജംഗ്ഷന്‍ എന്നിവിടങ്ങളിലെ തൊഴിലിടങ്ങളില്‍ അസിസ്റ്റന്‍റ് ലേബര്‍ ഓഫീസറുടെ നേതൃത്വത്തില്‍ പരിശോധന നടത്തി. പകല്‍ 12 മുതല്‍ മൂന്നു വരെ  വെയിലത്തു ജോലി ചെയ്യാന്‍ പാടില്ലെന്ന് തൊഴിലാളികള്‍ക്കും തൊഴില്‍ ലുടമകള്‍ക്കും കര്‍ശന നിര്‍ദ്ദേശം നല്‍കി. 

വേനലിന്‍റെ തീവ്രത വര്‍ധിക്കുന്ന സാഹചര്യത്തില്‍ വളര്‍ത്തു മൃഗങ്ങളുടെ പരിരക്ഷ ഉറപ്പു വരുത്തുന്നതിന് മൃഗസംരക്ഷണ വകുപ്പ് കണ്‍ട്രോള്‍ റൂം തുറന്നു. ജില്ലാ വെറ്ററിനറി കേന്ദ്രത്തില്‍ ആരംഭിച്ച കണ്‍ട്രോള്‍ റും 24 മണിക്കൂറും പ്രവര്‍ത്തിക്കും. വരള്‍ച്ചമൂലം വളര്‍ത്തു മൃഗങ്ങള്‍ ചത്താല്‍  0481 2564623 എന്ന നമ്പരില്‍  വിവരം അറിയിക്കണം. 

2019ലെ ലോക്സഭാ തിരഞ്ഞെടുപ്പില്‍ മാതൃകാ പെരുമാറ്റച്ചട്ടവുമായി ബന്ധപ്പെട്ട് ഏറ്റുമാനൂര്‍ നിയമസഭാ നിയോജകമണ്ഡലത്തിലെ രാഷ്ട്രീയ പാര്‍ട്ടി പ്രതിനിധികളുടേയും വിവിധ സ്കാഡ് ലീഡര്‍മാരുടെയും യോഗം ഇന്ന് (മാര്‍ച്ച്29) രാവിലെ 11ന് ഏറ്റുമാനൂര്‍ ബ്ലോക്ക് പഞ്ചായത്ത് ഹാളില്‍ ചേരും

ലോക്സഭാ തിരഞ്ഞെടുപ്പിന്‍റെ പ്രചാരണത്തിനായി അനധികൃതമായി സ്ഥാപിച്ചിരുന്ന 27,763 സാമഗ്രികള്‍ ഡിഫേയ്സ്മെന്‍റ് സ്ക്വാഡുകള്‍ നീക്കം ചെയ്തു. ഇവയില്‍ 26509 എണ്ണം പൊതു സ്ഥലത്തും 1254 എണ്ണം സ്വകാര്യ വ്യക്തികളുടെ ഉടമസ്ഥതയിലുള്ള ഭൂമിയിലുമായിരുന്നു. 

     വോട്ടിംഗില്‍  കോട്ടയത്തെ മുന്നിലെത്തിക്കാനുളള പ്രവര്‍ത്തനങ്ങളുടെ പ്രചാരക യായ ചലച്ചിത്രനടി മിയ ജോര്‍ജ് കാമ്പസിലെ വോട്ടര്‍മാരെ നേരില്‍ കാണാനെത്തി.  യുവതലമുറയില്‍ ആരും വോട്ട് ചെയ്യാതിരിക്കരുതെന്നും അത് പൗരന്‍മാരുടെ കടമയാണെന്നും ബസേലിയസ് കോളേജ് ഓഡിറ്റോറിയത്തില്‍ നടന്ന ചടങ്ങില്‍ മിയ  വിദ്യാര്‍ത്ഥികളോട് പറഞ്ഞു. 

   ലോക്‌സഭാ തെരഞ്ഞെടുപ്പിനുളള നാമനിര്‍ദ്ദേശ പത്രികാ സമര്‍പ്പണം തുടങ്ങി. ആദ്യദിനത്തില്‍ ഒരു പത്രികയാണ് വയനാട് ലോക്‌സഭാ മണ്ഡലത്തില്‍ ലഭിച്ചത്. മലപ്പുറം അരീക്കോട് സ്വദേശി എന്‍.മുജീബ് റഹ്മാനാണ്  വരണാധികാരികൂടിയായ ജില്ലാ കളക്ടര്‍ എ.ആര്‍ അജയകുമാറിന് മുമ്പാകെ നാമനിര്‍ദ്ദേശ പത്രിക സമര്‍പ്പിച്ചത്. രാവിലെ 11 മുതല്‍ 3 വരെയാണ് പത്രിക സ്വീകരിക്കുന്നത്. ഏപ്രില്‍ 4 വരെ പത്രിക സ്വീകരിക്കും. സൂക്ഷമ പരിശോധന അഞ്ചിന് നടക്കും. നാമനിര്‍ദ്ദേശ പത്രിക പിന്‍വലിക്കാനുളള അവസാനദിവസം ഏപ്രില്‍ 8 ആണ്.

സൈനിക ക്ഷേമ വകുപ്പ് വിമുക്തഭടന്‍മാര്‍, ആശ്രിതര്‍, വിധവകള്‍ എന്നിവര്‍ക്ക് സൗജന്യ കമ്പ്യൂട്ടര്‍ പരിശീലനം നല്‍കുന്നു.  ഡി.സി.എ, വേര്‍ഡ് പ്രൊസസിംഗ് ആന്‍ഡ് ഡാറ്റാ എന്‍ട്രി, ടാലി ആന്‍ഡ് എം.എസ്. ഓഫീസ് എന്നിവയാണ് കോഴ്‌സുകള്‍.  താല്‍പര്യമുള്ളവര്‍ ഏപ്രില്‍ 26നകം ജില്ലാ സൈനിക ക്ഷേമ ഓഫീസില്‍ അപേക്ഷിക്കണം.  വാര്‍ഷിക വരുമാന പരിധി രണ്ടര ലക്ഷം.  ഫോണ്‍ 04936 202668. 

ലോക്‌സഭാ തിരഞ്ഞെടുപ്പിനുള്ള വോട്ടിങ്, വിവിപാറ്റ് യന്ത്രങ്ങളുടെ ആദ്യഘട്ട റാന്‍ഡമൈസേഷന്‍ പൂര്‍ത്തിയായി. രാഷ്ട്രീയപാര്‍ട്ടി പ്രതിനിധികളുടെ സാന്നിധ്യത്തിലായിരുന്നു നടപടികള്‍. ഓരോ നിയമസഭാ നിയോജകമണ്ഡലത്തിലും ഉപയോഗിക്കുന്ന വോട്ടിങ് യന്ത്രങ്ങളും വിവിപാറ്റുകളും ഏതെന്ന് നിശ്ചയിച്ച് യന്ത്രങ്ങളുടെ സീരിയല്‍ നമ്പര്‍ സഹിതമുള്ള പട്ടിക എ.ആര്‍.ഒമാര്‍ക്കും രാഷ്ട്രീയപാര്‍ട്ടി പ്രതിനിധികള്‍ക്കും കൈമാറി. ജില്ലയിലെ 575 പോളിങ് സ്റ്റേഷനുകളിലേക്കായി 928 ബാലറ്റ് യൂണിറ്റുകളും 840 കണ്‍ട്രോള്‍ യൂണിറ്റുകളും 757 വിവിപാറ്റ് മെഷീനുകളുമടങ്ങിയ പട്ടികയാണ് കൈമാറിയിട്ടുള്ളത്.