ഈസ്റ്റ്എളേരി ഗ്രാമപഞ്ചായത്ത് അധീനതയില്‍ ചിറ്റാരിക്കാല്‍ ടൗണില്‍ പുതുതായി പണി കഴിപ്പിച്ച ബസ്സ്റ്റാന്റ് കം ഷോപ്പിംഗ് കോംപ്ലക്‌സ് കെട്ടിടത്തിലെ ശേഷിക്കുന്ന കടമുറികള്‍ വാടകയ്ക്ക് നല്‍കുന്നതിനുളള പുനര്‍ലേലം ഏപ്രില്‍ പത്തിന് ഉച്ചയ്ക്ക് മൂന്നിന് ബസ് സ്റ്റാന്റ്പരിസരത്ത് നടത്തും. ബസ്സ്റ്റാന്റ് കം ഷോപ്പിംഗ് കോംപ്ലക്‌സിലെ ബസ്സ്റ്റാന്റ് ടോയലറ്റ് ഫീ, ബസ് ഫീ എന്നിവ 2019-20 സാമ്പത്തിക വര്‍ഷത്തേക്ക് പിരിക്കുന്നതിനുളള കുത്തകാവകാശ ലേലം ഏപ്രില്‍ പത്തിന് ഉച്ചയ്ക്ക് രണ്ടിന് പഞ്ചായത്ത് ഓഫീസില്‍ നടത്തും.  കൂടുതല്‍ വിവരങ്ങള്‍ക്ക്- 0467 2221035.

 കെട്ടിട നികുതി അടുക്കുന്നവരുടെ സൗകര്യാര്‍ത്ഥം മാര്‍ച്ച് 31നും പുത്തിഗെ ഗ്രാമപഞ്ചായത്ത് ഓഫീസ് തുറന്നു പ്രവര്‍ത്തിക്കും.

 ലേബര്‍ കമ്മീഷണറുടെ ഉത്തരവ് പ്രകാരം, ശക്തമായ സൂര്യാതപം ഏല്‍ക്കുവാന്‍ ഇടയുളള സമയമായതിനാല്‍ നേരിട്ട് വെയില്‍ ഏല്‍ക്കുന്ന രീതിയില്‍ യാതൊരു കാരണവശാലും ഉച്ചയ്ക്ക് 12 മുതല്‍ 3 മണി വരെ തൊഴിലാളികളെ ജോലി ചെയ്യിക്കുവാന്‍ പാടുളളതല്ല.  ഉത്തരവ് പാലിക്കാതെ ജോലി ചെയ്യിപ്പിക്കുന്നത് ശ്രദ്ധയില്‍പ്പെട്ടാല്‍ തൊഴിലുടമകള്‍ക്കെതിരെ കര്‍ശന നിയമ നടപടി സ്വീകരിക്കുന്നതാണെന്ന് ജില്ലാ ലേബര്‍ ഓഫീസര്‍ (എന്‍ഫോഴ്‌സ്‌മെന്റ്) അറിയിച്ചു.

 ലോക്‌സഭാ തെരഞ്ഞെടുപ്പുമായി ബന്ധപ്പെട്ട് മാതൃകാ പെരുമാറ്റച്ചട്ടം  നിലനില്‍ക്കുന്നതിനാല്‍ കെ.എസ്.ഇ.ബി ലിമിറ്റഡിന്റെ പോസ്റ്റുകളും മറ്റു പ്രതിഷ്ഠാപനങ്ങളും തെരഞ്ഞെടുപ്പു പ്രചാരണത്തിനായി ഉപയോഗിക്കാന്‍ പാടുളളതല്ലെന്ന് കാസര്‍കോട് ഇലക്ട്രിക്കല്‍ ഡിവിഷന്‍ എക്‌സിക്യൂട്ടീവ് എഞ്ചിനീയര്‍ അറിയിച്ചു. നിലവില്‍ ഇലക്ട്രിക്ക് പോസ്റ്റുകളിലും ജംഗ്ഷന്‍ ബോക്‌സുകളിലും പതിപ്പിച്ചിട്ടുളള കോടികള്‍, പോസ്സുകള്‍, തോരണങ്ങള്‍ മുതലായവ ബന്ധപ്പെട്ട രാഷ്ട്രീയ പാര്‍ട്ടികള്‍ എത്രയും പെട്ടെന്ന് അഴിച്ചുമാറ്റണം. 

 പെരിയ ഗവണ്‍മെന്റ് പോളിടെക്‌നിക്കിലും തൃക്കരിപ്പൂര്‍  ഗവര്‍മെന്റ് പോളിടെക്‌നിക്കിലും പ്രിസൈഡിങ് ഓഫീസര്‍മാര്‍ക്കും ഫസ്റ്റ് പോളിംഗ് ഓഫീസര്‍മാര്‍ക്കും 27,28 തീയ്യതികളില്‍ നടത്തിവന്ന പരിശീലനത്തില്‍ പങ്കെടുക്കാന്‍ സാധിക്കാത്ത ജീവനക്കാര്‍ക്കുളള പരിശീനം ഇന്ന് (29) രാവിലെ 9.30 ന്  പെരിയ ഗവണ്‍മെന്റ് പോളിടെക്‌നില്‍ നടത്തുമെന്ന് ജില്ലാകളക്ടര്‍ അറിയിച്ചു.

ലോക്‌സഭാ തെരഞ്ഞെടുപ്പില്‍ വോട്ടെടുപ്പിന് ഉപയോഗിക്കുന്ന ഇലക്‌ട്രോണിക് വോട്ടിങ് യന്ത്രങ്ങളുടെ റാന്‍ഡമൈസേഷന്‍ നടത്തി. ജില്ലാ കളക്ടര്‍ ഡോ. ഡി സജിത് ബാബുവിന്റെ നേതൃത്വത്തില്‍ പ്രത്യേക ഇവിഎം മാനേജ്‌മെന്റ് സോഫ്റ്റ്‌വെയര്‍ ഉപയോഗിച്ച് നിയമസഭാ നിയോജക മണ്ഡലാടിസ്ഥാനത്തിലായിരുന്നു റാന്‍ഡമൈസേഷന്‍ നടത്തിയത്. ഓരോ മണ്ഡലത്തിലും ആവശ്യമായ വോട്ടിങ് യന്ത്രങ്ങളിലെ കണ്‍ട്രോള്‍ യൂനിറ്റ്, ബാലറ്റ് യൂനിറ്റ് എന്നിവ 21 ശതമാനം കൂടുതല്‍ അനുവദിച്ചിട്ടുണ്ട്. വിവിപാറ്റ് യന്ത്രങ്ങള്‍ 32 ശതമാനമാണ് അധികമായി അനുവദിച്ചത്.

തെരഞ്ഞെടുപ്പ് പ്രചാരണത്തിന് പ്രിന്റ് ചെയ്യുന്ന നോട്ടീസുകള്‍, പോസ്റ്ററുകള്‍, ബ്രോഷറുകള്‍ എന്നിവയില്‍ പ്രിന്റ് ചെയ്ത  പ്രസിന്റെ പൂര്‍ണ മേല്‍വിലാസം, പബ്ലിഷറുടെ വിവരം, കോപ്പികളുടെ എണ്ണം എന്നിവ  നിര്‍ബന്ധമായും രേഖപ്പെടുത്തണമെന്ന് ജില്ലാ കളക്ടര്‍ ഡോ.ഡി.സജിത് ബാബു അറിയിച്ചു. ഇതിന് വിരുദ്ധമായി പ്രവര്‍ത്തിക്കുന്ന സ്ഥാപനങ്ങള്‍ക്കെതിരേ നടപടി സ്വീകരിക്കും. പ്രിന്ററുടെ മേല്‍വിലാസവും കോപ്പികളുടെ എണ്ണവും രേഖപ്പെടുത്താത്ത നോട്ടീസുകളും ബ്രോഷറുകളും പിടിച്ചെടുക്കാന്‍ ആന്റി ഡീഫേസ്‌മെന്റ്  സ്‌ക്വാഡിനേയും ഫ്‌ലൈയിംഗ് സ്‌ക്വാഡിനെയും നിയോഗിച്ചിട്ടുണ്ട്.

സര്‍ക്കാര്‍ ഉദ്യോഗസ്ഥര്‍ സാമൂഹ്യമാധ്യമങ്ങള്‍ മുഖേന രാഷ്ട്രീയ കക്ഷികളുമായി ബന്ധപ്പെട്ട ഉള്ളടക്കം തെരഞ്ഞെടുപ്പ് പ്രചാരണത്തിന് സമാനമായവിധം പ്രചരിപ്പിച്ചാല്‍ ശക്തമായ നടപടി കൈക്കൊള്ളുമെന്ന് ജില്ലാ കളക്ടര്‍ ഡോ.ഡി.സജിത് ബാബു അറിയിച്ചു. 

ലോക്‌സഭാ തെരഞ്ഞെടുപ്പിന്റെ ഭാഗമായി ജില്ലാതല മീഡിയ സര്‍ട്ടിഫിക്കേഷന്‍ ആന്റ് മോണിറ്ററിംഗ്  കമ്മിറ്റിയുടെ ആഭിമുഖ്യത്തില്‍ മാധ്യമ പ്രവര്‍ത്തകര്‍ക്ക് പെയ്ഡ് ന്യൂസ് ബോധവല്‍ക്കരണ സെമിനാര്‍ സംഘടിപ്പിക്കുന്നു. ഏപ്രില്‍ മൂന്നിന് രാവിലെ 11 മുതല്‍ കളക്ടറേറ്റ് മിനി കോണ്‍ഫറന്‍സ് ഹാളിലാണ് പരിപാടി. ജില്ലയിലെ അച്ചടി, ദൃശ്യ,  ഓണ്‍ ലൈന്‍ മാധ്യമങ്ങളിലെ മാധ്യമ പ്രവര്‍ത്തകര്‍ക്ക് പങ്കെടുക്കണം. ജില്ലാ കളക്ടര്‍ ഡോ.ഡി.സജിത് ബാബു ഉദ്ഘാടനം ചെയ്യും. ഇലക്ഷന്‍ ഡെപ്യൂട്ടി കളക്ടര്‍ വി.പി അബ്ദുറഹ്മാന്‍ അധ്യക്ഷത വഹിച്ചു. എംസിഎംസി മെമ്പര്‍മാര്‍ സംസാരിക്കും. കൂടുതല്‍ വിവരങ്ങള്‍ക്ക് ജില്ലാ ഇന്‍ഫര്‍മേഷന്‍ ഓഫീസില്‍ ബന്ധപ്പെടുക.

ലോക്‌സഭാ തെരഞ്ഞെടുപ്പില്‍ മാധ്യമങ്ങളിലെ പെയ്ഡ് ന്യൂസ് കര്‍ശന നിരീക്ഷണത്തില്‍. ഇതിനായി ആധുനിക നിക സംവിധാനങ്ങളോടെയുള്ള നിരീക്ഷണ കേന്ദ്രത്തിന്റെ പ്രവര്‍ത്തനം കളക്ടറേറ്റില്‍ സജീവം. 15 ജീവനക്കാരെ  ഗ്രൂപ്പുകളായി തിരിച്ച് വിവിധ മാധ്യമങ്ങളെ നിരീക്ഷിച്ചുവരുകയാണ്.