ലോകസഭ തെരഞ്ഞെടുപ്പുമായി ബന്ധപ്പെട്ട് 24 മണിക്കൂറും പ്രവര്‍ത്തിക്കുന്ന കണ്‍ട്രോള്‍ റൂം കലക്ട്രേറ്റില്‍ പ്രവര്‍ത്തനം ആരംഭിച്ചു. പെരുമാറ്റചട്ട ലംഘനങ്ങളെ സംബന്ധിച്ച് പൊതുജനങ്ങള്‍ക്കുള്ള പരാതികള്‍ ടോള്‍ ഫ്രീ നമ്പറായ 1800-425-4053, 1800-425-4054 എന്നിവയില്‍ വിളിച്ച് കണ്‍ട്രോള്‍ റൂമില്‍ അറിയിക്കാം. 

തമിഴ്നാട്ടില്‍ നിന്നു കേരളത്തിലേക്ക് രേഖകളില്ലാതെ കാറില്‍ കടത്തുകയായിരുന്ന വിദേശ കറന്‍സി പിടികൂടി. താളൂര്‍ ചെക്പോസ്റ്റില്‍ നടത്തിയ വാഹന പരിശോധനയില്‍ 10765 ഖത്തര്‍ റിയാലാണ് സുല്‍ത്താന്‍ ബത്തേരി ഫ്ളയിങ് സ്‌ക്വാഡ് പിടിച്ചെടുത്തത്. ഇതിന് രണ്ടുലക്ഷത്തോളം ഇന്ത്യന്‍ രൂപയുടെ മൂല്യമുണ്ട്. ഇന്നലെ ഉച്ചയ്ക്ക് 12ഓടെയായിരുന്നു സംഭവം. പിടിച്ചെടുത്ത കറന്‍സി എന്‍ഫോഴ്സ്മെന്റ് വിഭാഗത്തിന് കൈമാറും.

ഓഫീസ് നവീകരണ പ്രവര്‍ത്തികള്‍ നടക്കുന്നതിനാല്‍ മാനന്തവാടി താലൂക്ക് സപ്ലൈ ഓഫീസിന്റെ പ്രവര്‍ത്തനം മാനന്തവാടി ബ്ലോക്ക് ഓഫീസിന്റെ സമീപത്തുളള ട്രൈസം ഹാളിലേക്ക് മാറ്റിയതായി താലൂക്ക് സപ്ലൈ ഓഫീസര്‍ അറിയിച്ചു.    

*ചീഫ് സെക്രട്ടറി അവലോകന യോഗം നടത്തി

സൂര്യതാപം, വരൾച്ച എന്നിവയുമായി ബന്ധപ്പെട്ട കാര്യങ്ങൾ അവലോകനം ചെയ്യുന്നതിന് ചീഫ് സെക്രട്ടറി ടോം ജോസിന്റെ നേതൃത്വത്തിൽ യോഗം ചേർന്നു. വീഡിയോ കോൺഫറൻസ് മുഖേന ജില്ലാ കളക്ടർമാരുമായി ജില്ലകളിലെ സ്ഥിതിഗതികൾ വിലയിരുത്തി. മന്ത്രിസഭാ യോഗത്തിൽ മുഖ്യമന്ത്രി പിണറായി വിജയൻ നിർദ്ദേശിച്ചതിന്റെ അടിസ്ഥാനത്തിലാണ് അടിയന്തര യോഗം ചേർന്നത്. ഉന്നത ഉദ്യോഗസ്ഥരുടെ നേതൃത്വത്തിലുള്ള മൂന്ന് ടാസ്‌ക് ഫോഴ്‌സുകൾ ജില്ലകളിലെ പ്രവർത്തനം ഏകോപിപ്പിക്കും.  ജില്ലാ കളക്ടറേറ്റുകളിൽ കൺട്രോൾ റൂമുകൾ ഉടനെ തുടങ്ങണമെന്ന് ചീഫ് സെക്രട്ടറി നിർദ്ദേശം നൽകി.