ജില്ലയില്‍ കനത്ത മഴയെത്തുടര്‍ന്ന് മാറ്റിവെച്ച ഒന്നാം വര്‍ഷ ഹയര്‍സെക്കണ്ടറി ഇംപ്രൂവ്മെന്‍റ് സപ്ലിമെന്‍ററി പരീക്ഷയുടെ പുതുക്കിയ തിയതി പിന്നീട് അറിയിക്കുമെന്ന് സെക്രട്ടറി ബോര്‍ഡ് ഓഫ് ഹയര്‍സെക്കണ്ടറി  എക്സാമിനേഷന്‍സ്  അറിയിച്ചു. ഓഗസ്റ്റ് ഒന്നിനാണ് പരീക്ഷ നടത്താനിരുന്നത്. ഇന്ന് (ഓഗസ്റ്റ് രണ്ടിന്) നടക്കുന്ന പരീക്ഷകള്‍ നിലവിലെ ടൈംടേബില്‍ പ്രകാരം നടത്തും.

     സംസ്ഥാനത്തെ സര്‍ക്കാര്‍/എയ്ഡഡ് സ്കൂളുകളിലെ ഒന്ന് മുതല്‍ പത്ത് വരെയുള്ള ക്ലാസുകളിലെ  ഒ.ബി.സി പ്രീമെട്രിക് സ്കോളര്‍ഷിപ്പിന് അര്‍ഹരായ വിദ്യാര്‍ഥികളുടെ ബാങ്ക് അക്കൗണ്ട് നിലവിലുണ്ടെന്ന് ഉറപ്പാക്കാന്‍ വിദ്യാര്‍ഥികള്‍ക്ക് സ്കൂള്‍ അധ്യാപകര്‍ നിര്‍ദ്ദേശം നല്‍കണമെന്ന് പിന്നാക്ക വികസന വകുപ്പ് മേഖലാ ഡെപൂട്ടി ഡയറക്ടര്‍ അറിയിച്ചു. 

 
    വനിതാ-ശിശു വികസന വകുപ്പിന്‍റെ ആഭിമുഖ്യത്തില്‍ ലോക മുലയൂട്ടല്‍ വാരാചരണത്തിന്‍റെ ജില്ലാതല ഉദ്ഘാടനം നഗരസഭാ ടൗണ്‍ഹാളില്‍ കെ.ഡി. പ്രസേനന്‍ എം.എല്‍.എ നിര്‍വഹിച്ചു.  ജില്ലാ പഞ്ചായത്ത് പ്രസിഡന്‍റ് കെ.ശാന്തകുമാരി അധ്യക്ഷയായി.  പരിപാടിയില്‍ ജില്ലാ കലക്ടര്‍ ഡി. ബാലമുരളി മുഖ്യാതിഥിയായി. ' മുലയൂട്ടല്‍ ജീവിതത്തിന്‍റെ അടിത്തറ' എന്ന മുദ്രവാക്യവുമായി ബന്ധപ്പെട്ട പ്രവര്‍ത്തനങ്ങളുടെ അവശ്യകത സംബന്ധിച്ച് പരിപാടിയില്‍ പ്രതിപാദിച്ചു.  

പാലക്കാട് വ്യാവസായിക ട്രൈബ്യൂണലും ഇന്‍ഷുറന്‍സ് കോടതി ജഡ്ജിയും എംപ്ലോയീസ് കോമ്പന്‍സേഷന്‍ കമ്മീഷനറുമായ സാബു സെബാസ്റ്റ്യന്‍ ഓഗസ്റ്റ് ആറ്, ഏഴ്, 13, 14, 20, 21 തീയതികളില്‍ പാലക്കാട് റവന്യൂ ഡിവിഷനല്‍ മജിസ്ട്രേറ്റ് കോടതി ഹാളിലും ഒമ്പത്, 31 തീയതികളില്‍ പെരിന്തല്‍മണ്ണ സബ് ഡിവിഷനല്‍ മജിസ്ട്രേറ്റ് കോടതി ഹാളിലും മൂന്ന് 17 തീയതികളില്‍ മഞ്ചേരി ഇന്ദിരാഗാന്ധി ബസ് ടെര്‍മിനല്‍ ബില്‍ഡിങ്ങിലെ ഒന്നാം നിലയിലെ കോടതി ഹാളിലും തൊഴില്‍ തര്‍ക്ക-ഇന്‍ഷുറന്‍സ്- എംപ്ലോയീസ് കോമ്പന്‍സേഷന്‍ കേസുകള്‍ വിചാരണ ചെയ്യുമെന്ന് സെക്രട്ടറി അറിയിച്ചു.

    കെല്‍ട്രോണില്‍ ആരംഭിക്കുന്ന ഓട്ടോകാഡ് ടു.ഡി ആന്‍ഡ് ത്രിഡി, മെക്കാനിക്കല്‍ കാഡ്, ഇലക്ട്രിക്കല്‍ കാഡ്, ത്രിഡിസ് മാക്സ് ഫോര്‍ ആര്‍ക്കിടെക്റ്റ്സ്, ഡിപ്ലൊമ ഇന്‍ ബില്‍ഡിങ് ഡിസൈന്‍ സ്യൂട്ട്, അഡ്വാന്‍സ്ഡ് ഡിപ്ലൊമ ഇന്‍ സിവില്‍ ഡിജിറ്റല്‍ ആര്‍ക്കിടെക്ചര്‍ തൊഴിലധിഷ്ഠിത ടെക്നിക്കല്‍ കോഴ്സ് പ്രവേശനത്തിന് അപേക്ഷിക്കാം.  കുടുതല്‍ വിവരങ്ങള്‍ക്ക് 0491 25014599, 9847597587 നമ്പറുകളിലും ഹെഡ് ഓഫ് സെന്‍റര്‍, കെല്‍ട്രോണ്‍ നോളെജ് സെന്‍റര്‍, മഞ്ഞക്കുളം റോഡ്, പാലക്കാട് വിലാസത്തിലും ലഭിക്കും.  ഫോണ്‍ - 0491 2504599.

    ഓണം-ബക്രീദ് മേളയോടനുബന്ധിച്ച് ഓഗസ്റ്റ് 24 വരെ ഖാദി തുണിത്തരങ്ങള്‍ക്ക് 30 ശതമാനം റിബേറ്റ് അനുവദിച്ചതായി പ്രൊജക്ട് ഓഫീസര്‍ അറിയിച്ചു.  മേളയോടനുബന്ധിച്ച് ഖാദി ബോര്‍ഡിന് കീഴിലെ കോട്ടമൈതാനത്ത് പ്രവര്‍ത്തിക്കുന്ന ഖാദി ഗ്രാമ സൗഭാഗ്യയിലും ബോര്‍ഡ് നിയന്ത്രണത്തിലുളള വില്‍പ്പനശാലകളിലും ഖാദി കോട്ടണ്‍, സില്‍ക്ക്, സ്പണ്‍ സില്‍ക്ക്, മനില, ഷര്‍ട്ടിങ് തുണിത്തരങ്ങള്‍, കരകൗശല ഉല്‍പ്പന്നങ്ങള്‍ എന്നിവയുടെ വിപണനം നടക്കുമെന്ന് അറിയിച്ചു.

സാമൂഹിക നീതി വകുപ്പിന്‍റെ നിര്‍ഭയ ഷെല്‍ട്ടര്‍ ഹോമില്‍ കെയര്‍ ടേക്കര്‍, , അസിസ്റ്റന്‍റ് കുക്ക് സെക്യൂരിറ്റി ഒഴിവുകളിലേക്ക് ക്രമേണ പ്ലസ്ടു/പി.ഡി.സി, അഞ്ചാം ക്ലാസ്, എസ്.എസ്.എല്‍.സി യോഗ്യതയുളള വനികളെ ആവശ്യമുണ്ട്. പ്രതിമാസ ശമ്പളം ക്രമേണ 9500, 4000, 7500 എന്നിങ്ങനെയാണ്. പ്രായം 25 നും 45 നുമിടയില്‍. താത്പ്പര്യമുളളവര്‍ യോഗ്യത, പ്രായം എന്നിവയുടെ അസ്സല്‍ സര്‍ട്ടിഫിക്കറ്റുകളുമായി ഓഗസ്റ്റ് 10 ന് രാവിലെ 10 ന് പാലക്കാട് സിവില്‍ സ്റ്റേഷനിലെ ജില്ലാ സാമൂഹിക നിതി ഓഫിസില്‍ അഭിമുഖത്തിനെത്തണമെന്ന് ജില്ലാ സാമൂഹിക നീതി ഓഫിസര്‍ അറിയിച്ചു.

    കുമരംപുത്തൂര്‍ ഗ്രാമപഞ്ചായത്തില്‍ 2018-19 സാമ്പത്തിക വര്‍ഷത്തെ വ്യക്തിഗത ഗുണഭോക്തൃ ലിസ്റ്റ് പ്രസിദ്ധീകരിച്ചു. ലിസ്റ്റ് ഗ്രാമപഞ്ചായത്ത് ഓഫീസില്‍ പരിശോധിച്ച് ആക്ഷേപങ്ങള്‍ ഓഗസ്റ്റ് എട്ടിന് മുമ്പ് രേഖാമൂലം നല്‍കാമെന്ന് പഞ്ചായത്ത് സെക്രട്ടറി അറിയിച്ചു.