ആനക്കയം പഞ്ചായത്തില്‍ നടപ്പാക്കുന്ന കേരഗ്രാമം നാളികേര വികസന പദ്ധതി പ്രകാരം വിവിധ ആനുകൂല്യങ്ങള്‍ ലഭിക്കുന്നതിനായി പഞ്ചായത്തിലെ കേരകര്‍ഷകര്‍ നികുതി രസീതി, ബാങ്ക് പാസ്സ്ബുക്ക്, ആധാര്‍ കാര്‍ഡ് എന്നിവയുടെ പകര്‍പ്പു സഹിതം ആഗസ്റ്റ് 10 നകം അപേക്ഷ സമര്‍പ്പിക്കണമെന്ന് ആനക്കയം കൃഷി ഓഫീസര്‍ അറിയിച്ചു.

    ജൂലൈ മാസത്തെ റേഷന്‍ സാധനങ്ങള്‍ കാര്‍ഡുടമകള്‍ക്ക് റേഷന്‍ കടകളില്‍ നിന്ന്  ഇന്നു കൂടി (ആഗസ്റ്റ് രണ്ട്) വാങ്ങാവുന്നതാണെന്ന് ജില്ലാ സപ്ലൈ ഓഫീസര്‍ അറിയിച്ചു.

ജില്ലയില്‍ എ.എം.വൈ/മുന്‍ഗണനാ വിഭാഗത്തിലുള്ള 21502 റേഷന്‍ കാര്‍ഡുകള്‍ ഒന്നാംഘട്ട പരിശോധനയില്‍ പൊതുവിഭാഗത്തിലേക്ക് മാറ്റി. അര്‍ഹരായ ഇത്രയും കുടുംബങ്ങള്‍ക്ക് മുന്‍ഗണനാ കാര്‍ഡ് നല്‍കുകയും ചെയ്തു. ഏഴ് താലൂക്കുകളിലും രണ്ടാം ഘട്ട പരിശോധന ആരംഭിച്ചു.

പൊതുജനങ്ങളോട് മോശമായി പെരുമാറുകയും അഴിമതി നടത്തുകയും ചെയ്യുന്നുവെന്ന പരാതിയില്‍ വില്ലേജ് ഓഫീസിലെ ജീവനക്കാരനെ സ്ഥലം മാറ്റി. കലക്ടറേറ്റിലെ പരാതിപ്പെട്ടിയില്‍ ലഭിച്ച പരാതിയെ തുടര്‍ന്നാണ് നടപടി. ജൂലൈയില്‍ ലഭിച്ച പരാതിയെ തുടര്‍ന്ന് സംഭവം അന്വേഷിക്കാന്‍ ജില്ലാ കലക്ടര്‍ ഉത്തരവിട്ടിരുന്നു. പൊതുജനങ്ങളോട് മോശമായി പെരുമാറുന്നുവെന്നും കൈകൂലി ആവശ്യപ്പെടുന്നു വെന്നുമായിരുന്നു പരാതി. ഇതിന്റെ അടിസ്ഥാനത്തില്‍ ജീവനക്കാരനെ താക്കീത് ചെയ്യുകയും ചെയ്തു.

    സുല്‍ത്താന്‍ ബത്തേരി മുനിസിപ്പാലിറ്റിയും അല്‍ ഇത്തിഹാദ് സ്പോര്‍ട്സ് അക്കാദമിയും സംയുക്തമായി കുട്ടികള്‍ക്ക് സൗജന്യ ഫുട്ബോള്‍ പരിശീലനം നല്‍കുന്നു. സുല്‍ത്താന്‍ ബത്തേരി മുനിസിപ്പാലിറ്റിയില്‍ ജനിച്ചതും സ്ഥിരതാമസക്കാരുമായ കുട്ടികള്‍ക്കുള്ള സെലക്ഷന്‍ ട്രയല്‍സ് ആഗസ്റ്റ് അഞ്ചിന് രാവിലെ ഒമ്പതിന് സുല്‍ത്താന്‍ ബത്തേരി സെന്റ് മേരീസ് കോളജ് ഗ്രൗണ്ടില്‍ നടക്കും. 2002 ജനുവരി ഒന്നിനും 2003 ഡിസംബര്‍ 31നും മധ്യേ ജനിച്ചവരായിരിക്കണം. താല്‍പര്യമുള്ളവര്‍ 9847331075 എന്ന നമ്പറില്‍ ബന്ധപ്പെടണമെന്നു നഗരസഭ സെക്രട്ടറി അറിയിച്ചു. 
 

       പൊഴുതന ഗ്രാമപഞ്ചായത്തിലെ ലൈഫ് ഗുണഭോക്താക്കളായ 81 പേര്‍ക്ക് ആദ്യഗഡു വിതരണം ചെയ്തു. ധനസഹായ വിതരണോദ്ഘാടനം പഞ്ചായത്ത് അധ്യക്ഷന്‍ എന്‍.സി പ്രസാദ് നിര്‍വഹിച്ചു. യോഗത്തില്‍ വികസനകാര്യ സ്ഥിരം സമിതി അധ്യക്ഷന്‍ കെ. അച്ചപ്പന്‍ അധ്യക്ഷത വഹിച്ചു. പഞ്ചായത്ത് തല പ്ലാനിങ് ബോര്‍ഡ് വൈസ് ചെയര്‍മാന്‍ സി.എം ശിവരാമന്‍, വാര്‍ഡ് അംഗം എം.എം ജോസ്, പഞ്ചായത്ത് സെക്രട്ടറി സി.പി പ്രദീപന്‍, വില്ലേജ് എക്സറ്റന്‍ഷന്‍ ഓഫിസര്‍ ഫിലോമിന ലോറന്‍സ് എന്നിവര്‍ സംസാരിച്ചു.
 

      ജില്ലാ ആസൂത്രണ ഭവന്‍ എ.പി.ജെ ഹാളില്‍ നടന്ന വനിത കമ്മീഷന്‍ മെഗാ അദാലത്തില്‍ 18 കേസുകള്‍ തീര്‍പ്പാക്കി. കമ്മീഷന്‍ സംസ്ഥാന അദ്ധ്യക്ഷ എം.സി. ജോസഫൈനിന്റെ അദ്ധ്യക്ഷതയില്‍ ചേര്‍ന്ന അദാലത്തില്‍ 48 കേസുകള്‍ പരിഗണിച്ചു. മൂന്നു കേസുകള്‍ വനിത സെല്ലിനും ആറു കേസുകള്‍ വിവിധ വകുപ്പുകളുടെ അന്വേഷണത്തിനായും കൈമാറി. ഡിഎന്‍എ പരിശോധന ആവശ്യപ്പെട്ട കേസില്‍ കൂടുതല്‍ നിയമോപദേശത്തിനായി വിട്ടു. വിവിധ കാരണങ്ങളാല്‍ 20 കേസുകള്‍ അടുത്ത അദാലത്തിലേക്ക് മാറ്റി.
 

ലോകമുലയൂട്ടല്‍ വാരാചരണം കല്‍പ്പറ്റ എം.ജി.റ്റി ഓഡിറ്റോറിയത്തില്‍ ജില്ലാ പഞ്ചായത്ത് പ്രസിഡന്റ് കെ.ബി.നസീമ ഉദ്ഘാടനം ചെയ്തു. കുട്ടികളുടെ അവകാശമായ മുലപ്പാല്‍ നിഷേധിക്കാന്‍ അമ്മമാര്‍ക്ക് അധികാരമില്ലെന്നും, നിഷേധിക്കുന്നത് ബന്ധങ്ങളുടെ തീവ്രത കുറച്ച് രക്ഷിതാക്കളെ നടതള്ളുന്നതിന് വഴിയൊരുക്കാമെന്നും ജില്ലാ പഞ്ചയത്ത് പ്രസിഡന്റ് ഓര്‍മ്മിപ്പിച്ചു. വനിതാ ശിശു വികസന വകുപ്പ്, ആരോഗ്യ വകുപ്പ്, ജില്ലാ നിയമ സഹായ അതോറിറ്റി എന്നിവയുടെ സംയുക്ത ആഭിമുഖ്യത്തിലാണ് വാരാചരണം സംഘടിപ്പിക്കുന്നത്. ജില്ലാ പഞ്ചായത്ത് വൈസ്പ്രസിഡന്റ് എ. പ്രഭാകരന്‍ അദ്ധ്യക്ഷത വഹിച്ചു.

          അംശാദായ കുടിശ്ശിക മൂലം അഗത്വം റദ്ദായ ലോട്ടറി ക്ഷേമനിധി അംഗങ്ങള്‍ക്ക് ആഗസ്റ്റ് 16 വരെ പിഴ സഹിതം കുടിശ്ശികയടച്ച് അംഗത്വം പുനസ്ഥാപിക്കാം. അംഗങ്ങള്‍ കഴിഞ്ഞ ഒരുമാസത്തെയെങ്കിലും ടിക്കറ്റ് വില്പനയുടെ കണക്കും ബില്ലും ഹാജരാക്കണം. വഴിയോര ഭാഗ്യക്കുറി വില്പനക്കാരായ ക്ഷേമനിധി അംഗങ്ങള്‍ക്കു സൗജന്യമായി ബീച്ച് അംബ്രല്ല നല്‍കുന്നതിനുള്ള അപേക്ഷ 31 വരെ ഓഫീസില്‍ സ്വീകരിക്കുമെന്നും ജില്ലാ ലോട്ടറി ക്ഷേമനിധി ഓഫിസര്‍ അറിയിച്ചു. അപേക്ഷ ഫോറം ഓഫിസില്‍ ലഭിക്കും.