വെള്ളപ്പൊക്കത്തിന് ശേഷം  വീടുകളിലേക്ക് തിരിച്ചു പോകുന്ന സമയമാണ്. കുടിക്കാനുപയോഗിക്കുന്ന വെള്ളം ശുദ്ധമാക്കുക. മാലിന്യങ്ങള്‍ നീക്കുക, പരിസരം അണുവിമുക്തമാക്കുക, ലഭ്യമായ വെള്ളം അണുവിമുക്തമാകുന്നതിനുള്ള രീതികള്‍ ചുവടെ ചേര്‍ക്കുന്നു.
വീടുകളില്‍ ക്ലോറിനേഷന്‍ ചെയ്യേണ്ട രീതി:
കിണര്‍വെള്ളം ക്ലോറിനേറ്റ് ചെയ്യുന്നതിലും  എളുപ്പം  വീട്ടിലെ ടാങ്കിലെ വെള്ളം ക്ലോറിനേറ്റ് ചെയ്യുന്നതാണ്. ക്ലോറിന്‍ ടാബ്ലറ്റ്, സ്റ്റോക്ക് ക്‌ളോറിന്‍ സൊല്യൂഷന്‍, ബ്ലീച്ചിങ് പൗഡര്‍, സോഡിയം ഹൈഡ്രോകാര്‍ബൈഡ് സൊല്യൂഷന്‍, കംബൈന്‍ ക്‌ളോറിന്‍ ടാബ്ലറ്റ് തുടങ്ങിയ മാര്‍ഗ്ഗങ്ങള്‍ സ്വീകരിക്കാവുന്നതാണ്.

ജില്ലയിൽ അതിരൂക്ഷമായ വെള്ളപ്പൊക്കം മൂലം കഷ്ടപ്പെടുന്ന കുട്ടനാട് താലൂക്കിലെ ജനങ്ങളെ സുരക്ഷിതസ്ഥാനങ്ങളിലേയ്ക്ക് മാറ്റുന്നതിന്  നേവിയുടെയും കൂടുതൽ സേനയുടെയും സഹായം തേടി ജില്ലാ കളക്ടർ എസ്.സുഹാസ് സർക്കാരിന് കത്ത് അയച്ചു. കൂടുതൽ രക്ഷാദൗത്യത്തിന് ഇത് അടിയന്തിരമായി ആവശ്യമുണ്ട്. ഒരേ സമയം ബോട്ട് ഉപയോഗിച്ചും എയർലിഫ്റ്റിങ് വഴിയും ആളുകളെ ഒഴിപ്പിക്കേണ്ട സാഹചര്യമുണ്ട്. അടിയന്തിരപ്രാധാന്യത്തോടെ ഏകദേശം 200-ലധികം ബോട്ടുകൾ രക്ഷാപ്രവർത്തനങ്ങളിലേർപ്പെട്ടുവെങ്കിലും ശക്തമായ വെള്ളപ്പാച്ചിൽ മൂലം നിലവിലുള്ള ജനങ്ങളെ രക്ഷപെടുത്തുന്നതിന് ബുദ്ധിമുട്ടുകൾ ഏറിവരികയാണ്.

ചെങ്ങന്നൂരിൽ ഇന്നലെ രാവിലെ തന്നെ നാല്  ഹെലികോപ്റ്ററുകൾ രക്ഷാപ്രവർത്തനത്തിനെത്തി. ചെങ്ങന്നൂരിൻരെ വിവിധ ഭാഗങ്ങളിൽ ഭക്ഷണപ്പാക്കറ്റുകൾ വിതരണം ചെയ്തു. ചെങ്ങന്നൂർ ഭാഗങ്ങളിലേക്ക് ഭക്ഷ്യവസ്തുക്കൾ പരമാവധി സംഭരിച്ച് നൽകാൻ സപ്ലൈ ഓഫീസർമാർക്ക് ജില്ലാ കളക്ടർ  നിർദ്ദേശം നൽകി. കൊല്ലം സപ്ലൈ ഓഫീസറോടും ഇക്കാര്യം ആവശ്യപ്പെട്ടിട്ടുണ്ട്. നാല് ദുരന്ത നിവാരണ സേനയുടെ സംഘത്തെക്കൂടി ജില്ലയിലേക്ക് ഇന്നലെ ദൗത്യത്തിനായി ലഭിച്ചു.  

(പി.എൻ.എ 2344/2018)

സർക്കാർ ജലാശയത്തിലുള്ള എല്ലാ ബോട്ടുകളും പിടിച്ചെടുത്ത് രക്ഷാപ്രവർത്തനത്തിന് ഉപയോഗിക്കാൻ പൊതുമരാമത്ത് വകുപ്പു മന്ത്രി ജി.സുധാകരൻ നിർദ്ദേശിച്ചു. ആവശ്യമായ ബോട്ട് ലഭിക്കുന്നില്ല എന്ന പരാതി ശ്രദ്ധയിൽപ്പെട്ടതിനെത്തുടർന്നാണ് നടപടി. രാവിലെ മന്ത്രി കളക്ട്രേറ്റിലെത്തി  രക്ഷാപ്രവർത്തനങ്ങളുടെ വിശദാംശങ്ങൾ ആരാഞ്ഞു. പ്രളയക്കെടുതി തുടങ്ങി അഞ്ചുദിവസമായിട്ടും കയ്യിലുള്ള ബോട്ടുകളുടെ മൂന്നിൽ രണ്ട് ഭാഗമെങ്കിലും വിട്ടുകൊടുക്കാത്ത ബോട്ട് ഉടമകളെ അറസ്ററ് ചെയ്യാൻ ജില്ലാ കളക്ടർക്ക് നിർദ്ദേശം നൽകി. ഇതിൽ വീഴ്ചവരുത്തുന്ന ഉദ്യോഗസ്ഥരെ സസ്പൻഡ് ചെയ്യാനും മന്ത്രി നിർദ്ദേശിച്ചു.

ശക്തമായ മഴ മൂലം വീടുകളിലും മറ്റു താഴ്ന്ന പ്രദേശങ്ങളിലും ഒറ്റപ്പെട്ട നാലായിരത്തോളം ആളുകളെയാണ് ഇന്നലെ രക്ഷപ്പെടുത്തിയത്. ഫയര്‍ഫോഴ്‌സ്, ദേശീയ ദുരന്തനിവാരണ സേന, പൊലീസ്, നാട്ടുകാര്‍, വിവിധ സന്നദ്ധ സംഘടനകള്‍ എന്നിവരുടെ നേതൃത്വത്തിലാണ് രക്ഷാപ്രവര്‍ത്തനം ഊര്‍ജിതമായി നടത്തിയത്. തിരൂര്‍ പുറത്തൂരില്‍ നിന്ന് മാത്രം മൂവായിരത്തില്‍ അധികം പേരെയാണ് രക്ഷപ്പെടുത്തിയത്.

കൊണ്ടോട്ടി മണ്ഡലത്തിലെ അടിയന്തര ദുരിതാശ്വാസ പ്രവര്‍ത്തനങ്ങള്‍
ചര്‍ച്ച ചെയ്യാന്‍ ടിവി ഇബ്രാഹിം എംഎല്‍എയുടെ അധ്യക്ഷതയില്‍ ഇന്ന് (ഓഗസ്റ്റ് 18) രാവിലെ ഒമ്പതിന് കൊണ്ടോട്ടി മോയിന്‍കുട്ടി  വൈദ്യര്‍ അക്കാദമിയില്‍ യോഗം ചേരും. നഗരസഭ ചെയര്‍മാന്‍, പഞ്ചായത്ത് പ്രസിഡന്റുമാര്‍ ,വിവിധ രാഷ്ട്രിയ പാര്‍ട്ടി പ്രതിനിധികള്‍,ഉദ്യോഗസ്ഥര്‍ എന്നിവര്‍ പങ്കെടുക്കും.  

വെള്ളക്കെട്ടുകള്‍ സന്ദര്‍ശിക്കാനുള്ള യാത്രകള്‍ ഒഴിവാക്കണമെന്ന് ജില്ലാ കലക്ടര്‍ അറിയിച്ചു. അന്തരീക്ഷം ചെറുതായി തെളിഞ്ഞതിനെ തുടര്‍ന്ന് ആളുകള്‍ വെള്ളത്തിന്റെ ഒഴുക്കും വെള്ളച്ചാട്ടവും മറ്റും കാണുന്നതിനായി കുടുംബ സമേതം ഇറങ്ങുന്നതായി ശ്രദ്ധയില്‍പെട്ടിട്ടുണ്ട്. നദികളില്‍ ജലവിതാനം ഏത് സമയവും ഉയരാന്‍ സാധ്യതയുള്ളതിനാല്‍ ഇത് അപകടം ക്ഷണിച്ച് വരുത്തും. ഇത്തരം പ്രവര്‍ത്തികളില്‍ നിന്ന് ജനങ്ങള്‍ മാറി നില്‍ക്കണമെന്ന് ജില്ലാ കലക്ടര്‍ അറിയിച്ചു.