ഓണാഘോഷത്തിന് സ്വരൂപിച്ച  പണം ദുരിതാശ്വാസത്തിന് നല്‍കി സുമനസ്സുകള്‍. മഞ്ചേരി ചിന്‍മയ വിദ്യാലയത്തിലെ വിദ്യാര്‍ഥികള്‍ ദുരിതാശ്വാസ ക്യാംപിലുള്ളവര്‍ക്ക് പുതപ്പും തോര്‍ത്തും നല്‍കി. ക്യാംപിലേക്ക് സഹായം ആവശ്യപ്പെട്ട് കൊണ്ട് ജില്ലാ കളകറ്ററുടെ അഭ്യര്‍ഥന ശ്രദ്ധയില്‍ പെട്ട വിദ്യാര്‍ഥികള്‍ ഓണക്കോടി വാങ്ങുന്നതിനും സ്‌കുളിലെ ആഘോഷത്തിനുമായി കരുതിയ പണം ഉപയോഗിച്ചാണ് 200 പുതപ്പും 320 തോര്‍ത്തും വാങ്ങിയത്. സ്‌കൂള്‍ പ്രിന്‍സിപ്പല്‍ കെഎച്ച് ഉഷ പ്രഭ, അധ്യാപികമാരായ വിനീത പി. ദീപ കെ, അനൂപ ജ്യോതി ,കമ്മിറ്റി അംഗങ്ങളായ ജയരാജ്, നിഷാന്ത്, ബിജു എന്നിവര്‍ ചേര്‍ന്ന് ജില്ലാ കളക്റ്റര്‍ അമിത് മീണയെ ഏല്‍പിച്ചു.

മഴക്കെടുതിയും പ്രകൃതിക്ഷോഭവും മൂലം ദുരിതത്തിലായവര്‍ക്കും ക്യാമ്പുകളില്‍ കഴിയുന്നവര്‍ക്കും വിതരണം ചെയ്യാനായി സുമനസ്സുകള്‍ സഹായം നല്‍കണമെന്ന് ജില്ലാ കലക്ടര്‍ അമിത് മീണ അഭ്യര്‍ഥിച്ചു. ആവശ്യവസ്തുക്കള്‍ നിരവധിയാളുകള്‍ നല്‍കുന്നുണ്ടെങ്കിലും ക്യാംപുകളുടെ എണ്ണം വര്‍ധിച്ചതോടെ ആവശ്യം തികയാതെ വന്നിരിക്കുകയാണ്. ക്യാംപുകളില്‍ കഴിയുന്നവര്‍ക്കും രക്ഷാപ്രവര്‍ത്തനത്തിനുമായുള്ള വസ്തുക്കളാണ് സ്വീകരിക്കുന്നത്.

കേരള കര്‍ഷകതൊഴിലാളി ക്ഷേമനിധിയില്‍ അംഗങ്ങളായവരുടെ മക്കള്‍ക്ക് ഇന്ന് (ആഗസ്ത് 18) വിതരണം ചെയ്യാനിരുന്ന വിദ്യാഭ്യാസ അവാര്‍ഡ് വിതരണം മാറ്റിവെച്ചതായി വെല്‍ഫയര്‍ ഫണ്ട് ഓഫീസര്‍ അറിയിച്ചു.

ജില്ലയില്‍ ഇന്ധനത്തിന് ക്ഷാമമുണ്ടാവില്ലെന്ന് ജില്ലാ കലക്ടര്‍ അറിയിച്ചു. ഇന്ത്യന്‍ ഓയില്‍ കോര്‍പറേഷന്റെ കീഴിലുള്ള വിവിധ പമ്പുകളിലേക്ക് വിതരണം ചെയ്യുന്നതിനായി ജില്ലയില്‍ 1.47 ലക്ഷം ലിറ്റര്‍ പെട്രോള്‍ എത്തിയിട്ടുണ്ട്. ആവശ്യത്തിനനുസരിച്ച് വീണ്ടും എത്തിക്കാനുള്ള നടപടികള്‍ സ്വീകരിച്ചിട്ടുണ്ട്.

സിവില്‍ സപ്ലൈസ് വകുപ്പിന് കീഴിലുള്ള എല്ലാ ഓഫീസുകള്‍ക്കും ഇന്ന് (ഓഗസ്റ്റ് 19) പ്രവൃത്തി ദിനമായിരിക്കുമെന്ന് ഡയറക്ടര്‍ അറിയിച്ചു.

എമര്‍ജന്‍സി ടാസ്‌ക് ഫോഴ്‌സിന്റേയും പൂനെയില്‍ നിന്നുള്ള മിലിറ്ററി എഞ്ചിനീയറിങ് വിങിന്റേയും സംഘങ്ങള്‍ ജില്ലയിലെ ദൗത്യം പൂര്‍ത്തിയാക്കി നാളെ മറ്റ് ജില്ലകളിലേക്ക് പോകും.  വെള്ളപ്പൊക്കത്തില്‍ ഒറ്റപ്പെട്ടുപോയ  അയ്യായിരത്തോളം പേരെയാണ് ജില്ലയില്‍ കഴിഞ്ഞ ദിവസങ്ങളില്‍  വിവിധ സേനകള്‍ ചേര്‍ന്ന് ദുരിതത്തില്‍ നിന്ന് രക്ഷപ്പെടുത്തിയത്. ദേശീയ ദുരന്ത നിവാരണ സേനയുടെ 22 പേരടങ്ങുന്ന മൂന്ന് സംഘങ്ങളും പൊലീസ്, ഫയര്‍ഫോഴ്‌സ്, ആര്‍ട്ടിലറി എന്നിവ ചേര്‍ന്നുള്ള രക്ഷാ പ്രവര്‍ത്തനങ്ഹല്‍ ജില്ലയുടെ പല മേഖലകളിലായി രക്ഷാ പ്രവര്‍ത്തനം തുടരുകയാണ്.