പോർക്കുളം ഗ്രാമപഞ്ചായത്ത് 2024-25 വാർഷിക പദ്ധതിയിൽ ഉൾപ്പെടുത്തി മെൻസ്ട്രൽ കപ്പ് വിതരണം ചെയ്തു. പോർക്കുളം കുടുംബാരോഗ്യ കേന്ദ്രത്തിൽ നടന്ന മെൻസ്ട്രൽ കപ്പിന്റെ വിതരണോദ്ഘാടനം ജില്ലാ പഞ്ചായത്ത് മെമ്പർ പത്മം വേണുഗോപാൽ നിർവഹിച്ചു. ഗ്രാമപഞ്ചായത്ത് പ്രസിഡൻ്റ് അഡ്വ. കെ രാമകൃഷ്ണൻ ചടങ്ങിന് അധ്യക്ഷത വഹിച്ചു. 

1.44 ലക്ഷം രൂപ ചിലവഴിച്ച് 469 ഗുണഭോക്താക്കൾക്കാണ് മെൻസ്ട്രൽ കപ്പ് വിതരണം ചെയ്യുന്നത്. എച്ച് എൽ എൽ പ്രൊജക്ട് അസോസിയേറ്റ് ഡോ. പി സൗമ്യ മോഹൻ ക്ലാസ് എടുത്തു.

എച്ച് ടി ലൈനില്‍ അറ്റകുറ്റപ്പണികള്‍ നടക്കുന്നതിനാല്‍ ഏപ്രില്‍ 25 ന് രാവിലെ ഒന്‍പത് മുതല്‍ വൈകുന്നേരം അഞ്ച് വരെ ജനശക്തി ട്രാന്‍സ്ഫോര്‍മര്‍ പരിധിയില്‍ ഭാഗികമായും, എച്ച് ടി എ ബി കേബിള്‍ പ്രവൃത്തി നടക്കുന്നതിനാല്‍ രാവിലെ ഒന്‍പത് മുതല്‍ ഉച്ചയ്ക്ക് മൂന്ന് വരെ ചാപ്പ, കാനച്ചേരി, കാനച്ചേരി പള്ളി, എടയില്‍ പീടിക ട്രാന്‍സ്ഫോര്‍മര്‍ പരിധിയിലും വൈദ്യുതി മുടങ്ങും.

തലശ്ശേരി ഗവ. ബ്രണ്ണന്‍ കോളേജിന്റെ 2023-24 വര്‍ഷത്തെ കോളേജ് മാഗസിന്‍ പ്രിന്റ് ചെയ്ത് വിതരണം ചെയ്യാന്‍ ക്വട്ടേഷന്‍ ക്ഷണിച്ചു. അപേക്ഷകള്‍ ഏപ്രില്‍ 30 ന് ഉച്ചയ്ക്ക് രണ്ട് വരെ സ്വീകരിക്കും. കൂടുതല്‍ വിവരങ്ങള്‍ പ്രവൃത്തി ദിവസങ്ങളില്‍ ഓഫീസില്‍ നിന്നും ലഭിക്കും.
 

പയ്യന്നൂര്‍ ബ്ലോക്ക്, കാങ്കോല്‍ ആലപ്പടമ്പ് ഗ്രാമപഞ്ചായത്തിലൂടെ കടന്നു പോകുന്ന കുണ്ടയാംകോവ്വല്‍ മഞ്ചപ്പറമ്പ് താനിച്ചേരി കാനം മാവിലാന്‍ കോളനി റോഡില്‍ കലുങ്ക് പ്രവൃത്തി നടക്കുന്നതിനാല്‍ കുണ്ടയാംകൊവ്വല്‍ മുതല്‍ വടശ്ശേരി മണല്‍ ഗണപതി അമ്പലം വരെ ഏപ്രില്‍ 26 മുതല്‍ 15 ദിവസത്തേക്ക് ഗതാഗതം പൂര്‍ണമായും നിരോധിച്ചതായി അക്രഡിറ്റ് എഞ്ചിനീയര്‍ അറിയിച്ചു.

അസാപ് കേരള സി എസ് ഡി സി സി പി സെന്റര്‍ പിലാത്തറ സെന്റ് ജോസഫ്സ് കോളജില്‍ ആരംഭിക്കുന്ന 12 ദിവസത്തെ എസെന്‍ഷ്യല്‍ ഇംഗ്ലീഷ് സ്‌കില്‍സ് കോഴ്സുകളിലേക്ക് പത്താം ക്ലാസ്  യോഗ്യതയുള്ളവര്‍ക്ക് അപേക്ഷിക്കാം. പരിശീലനം പൂര്‍ത്തിയാക്കുന്നവര്‍ക്ക് അസാപ് കേരളയുടെ സര്‍ട്ടിഫിക്കറ്റ് ലഭിക്കും. പ്രവേശനത്തിന് 8921437131 എന്ന നമ്പറില്‍ ബന്ധപ്പെടാം

കെല്‍ട്രോണിന്റെ തലശ്ശേരി, തളിപ്പറമ്പ് നോളേജ് സെന്ററുകളിലെ മൂന്ന് മാസ സര്‍ട്ടിഫിക്കറ്റ് കോഴ്‌സ് ഇന്‍ വെയര്‍ ഹൗസ് ആന്റ് ഇന്‍വെന്ററി മാനേജ്‌മെന്റ് തൊഴിലധിഷ്ഠിത കോഴ്സിലേക്ക് അപേക്ഷ ക്ഷണിച്ചു. എസ്.എസ്.എല്‍.സി യോഗ്യതയുള്ളവര്‍ക്ക് അപേക്ഷിക്കാം. ശനി, ഞായര്‍ ബാച്ചുകളും ഉണ്ടായിരിക്കും. ഫോണ്‍: 8136802304

ജില്ലാ അഗ്രി ഹോര്‍ട്ടികള്‍ച്ചറല്‍ സൊസൈറ്റി നിര്‍ധന കുടുംബത്തിന് വീട് നിര്‍മിച്ചു നല്‍കുന്നതിനുള്ള ജനകീയ കമ്മിറ്റി രൂപീകരിച്ചു. സൊസൈറ്റി സംഘടിപ്പിക്കുന്ന പുഷ്പോത്സവത്തില്‍ നിന്നുള്ള വരുമാനത്തില്‍ നിന്നാണ് വീട് ഒരുങ്ങുന്നത്. സൊസൈറ്റി സെക്രട്ടറി പി വി രത്നാകരന്‍ ജനകീയ കമ്മിറ്റി ഉദ്ഘാടനം ചെയ്തു. വൈസ് പ്രസിഡന്റ് ഡോ. കെ സി വത്സല അധ്യക്ഷയായി. കെ ഷഹറാസ്, ടി പി വിജയന്‍, പി പി കെ പ്രകാശന്‍, അബ്ദുള്‍ ജലീല്‍, കെ എം ബാലചന്ദ്രന്‍ എന്നിവര്‍ സംസാരിച്ചു.

സംസ്ഥാന മന്ത്രിസഭാ വാര്‍ഷികാഘോഷങ്ങളുടെ ഭാഗമായി മെയ് ഒന്‍പതിന് കണ്ണൂര്‍ താണ സാധു കല്യാണ മണ്ഡപത്തില്‍ നടക്കുന്ന മുഖ്യമന്ത്രിയുടെ ജില്ലാതല യോഗത്തിന്റെ സംഘാടനത്തിന് എല്‍.ഇ.ഡി വാള്‍ (12 x 6), ടി.വി (50 ഇഞ്ച് ), ഗേറ്റ് ആന്റ് സ്റ്റേജ് ഡെക്കറേഷന്‍, ലൈറ്റ് ആന്റ് 5000 വാട്ട്സ് സൗണ്ട് സിസ്റ്റം, ജനറേറ്റര്‍ (ഡീസല്‍ സഹിതം പരിപാടിയില്‍ മുഴുവന്‍ സമയം പ്രവര്‍ത്തിപ്പിക്കുന്നതിന്), ബാക്ക് ഡ്രോപ്പ്, വലിയ രണ്ട് കൂളറുകള്‍, രണ്ട് പെഡസ്ട്രിയല്‍ ഫാന്‍, നാല് കോഡ്ലെസ് മൈക്ക്, മറ്റു ക്രമീകരണങ്ങള്‍ തുടങ്ങിയവ സജ്ജീകരിക്കുന്നതിന് ക്വട്ടേഷന്‍ ക്ഷണിച്ചു.

ഭക്ഷ്യ വിഭവങ്ങൾ വിതരണം ചെയ്യുന്ന സ്ഥാപനങ്ങളിൽ ജൈവ - അജൈവ മാലിന്യങ്ങൾ തരം തിരിക്കാതെ സൂക്ഷിച്ചാൽ അയ്യായിരം രൂപ സ്‌പോട്ട് പിഴ ഈടാക്കുമെന്ന് ജില്ലാ എൻഫോഴ്‌സ്‌മെന്റ് സ്‌ക്വാഡ് അറിയിച്ചു.
 

നശാമുക്ത് ഭാരത് അഭിയാന്റെ നേതൃത്വത്തിൽ സാമൂഹ്യനീതി, ജയിൽ വകുപ്പുകളുടെ സംയുക്താഭിമുഖ്യത്തിൽ ജയിൽ അന്തേവാസികൾക്കുള്ള അവബോധ രൂപീകരണ പരിപാടി 'ലഹരി വിമുക്ത കണ്ണൂർ' കണ്ണൂർ ലീഗൽ സർവീസ് അതോറിറ്റി സെക്രട്ടറി പി മഞ്ജു ഉദ്ഘാടനം ചെയ്തു.