ഏഴു ദിനങ്ങളിലായി കോട്ടക്കുന്നിനെ പുളകം കൊള്ളിച്ച മെഗാ മേളയ്ക്ക്  നാളെ (മെയ് 13) തിരശീല വീഴും. സംസ്ഥാന സര്‍ക്കാറിന്റെ നാലാം വാര്‍ഷികാഘോഷങ്ങളുടെ ഭാഗമായി മികച്ച സന്നാഹങ്ങളോടെ കോട്ടക്കുന്ന് മൈതാനത്ത് നടന്ന എന്റെ കേരളം പ്രദര്‍ശന വിപണന ഭക്ഷ്യ, കലാമേളയ്ക്ക് അഭൂതപൂര്‍വമായ തിരക്കാണ് അനുഭവപ്പെട്ടത്.  കുടുംബശ്രീ ഫുഡ്‌കോര്‍ട്ടിലും വിപണന സ്റ്റാളുകളിലുമെല്ലാം ആളുകള്‍ കുടുംബസമേതം എത്തി. സംഗീതസാന്ദ്രമായ വൈകുന്നേരത്തെ സാംസ്‌കാരിക പരിപാടികളില്‍ ഏറെ വൈകിയും നിറഞ്ഞ സദസായിരുന്നു.  ഒരു ലക്ഷത്തിലധികം ആളുകളാണ് മേള സന്ദര്‍ശിച്ചത്.

എന്റെ കേരളം പ്രദര്‍ശന വിപണന മേളയില്‍ ഭക്ഷ്യസുരക്ഷാ വകുപ്പിന്റെ 'പഞ്ചാര ബോര്‍ഡ്' ഒന്ന് കണേണ്ടത് തന്നെയാണ്. 'കുടിക്കുന്നതിനു മുന്‍പ് ചിന്തിക്കുക' എന്ന വാക്യത്തോടെ ശീതള പാനീയങ്ങളില്‍ എത്രത്തോളം പഞ്ചസാരയുടെ അളവ് ഉണ്ടെന്നു കാണിക്കുന്ന ബോര്‍ഡ് ചിലപ്പോള്‍ നിങ്ങളുടെ പഞ്ചസാര പ്രേമം ഒന്ന് കുറയ്ക്കും. കൊക്കക്കോള, മിറിന്റ, സ്പ്രൈറ്റ് തുടങ്ങി വിവിധ ശീതള പാനീയങ്ങളുടെ കുപ്പികളും അതില്‍ എത്ര ഗ്രാം പഞ്ചസാര അടങ്ങിയിരിക്കുന്നു എന്ന വിവരവുമാണ് ബോര്‍ഡില്‍ പ്രദര്‍ശിപ്പിച്ചിട്ടുള്ളത്. കൗമാരക്കാരിലും കുട്ടികളിലും വര്‍ധിച്ചുവരുന്ന പ്രമേഹ രോഗത്തിനെതിരെ അവബോധം ഉണര്‍ത്തുകയാണ് സ്റ്റാളിന്റെ ലക്ഷ്യം.

കോട്ടക്കുന്നില്‍ നടക്കുന്ന എന്റെ കേരളം വിപണന പ്രദര്‍ശന മേളയില്‍ വൈവിധ്യങ്ങളുടെ രുചി പകര്‍ന്ന് കുടുംബശ്രീയുടെ ഫുഡ് കോര്‍ട്ടുകള്‍. ദിനംപ്രതി പതിനായിരത്തോളം പേര്‍ക്കാണ് കുടുംബശ്രീ സ്വാദിഷ്ടമായ ഭക്ഷണമൊരുക്കുന്നത്. എട്ടോളം ഫുഡ് കോര്‍ട്ടുകളാണ് ഉള്ളത്. ഇതുവരെ അഞ്ച് ലക്ഷത്തിലധികം രൂപയുടെ വിറ്റുവരവുണ്ടായി. കുടുംബശ്രീയുടെ ഫുഡ് കോര്‍ട്ടില്‍ വന്‍ തിരക്കാണ് അനുഭവപ്പെടുന്നത്. കടല്‍ മത്സ്യങ്ങളും ചിക്കന്റെ വൈവിധ്യങ്ങളായ ഇനങ്ങളാലും രുചിയേറും ഭക്ഷണമാണ് കുടുംബശ്രീ ഒരുക്കിയിരിക്കുന്നത്. രാവിലെ ഒമ്പത് മുതല്‍ രാത്രി പത്ത് വരെ ഫുഡ് കോര്‍ട്ട് സജീവമാണ്.

എന്റെ കേരളം ജില്ലാതല പ്രദര്‍ശന വിപണന മേളയില്‍ അവസാനദിവസമായ നാളെ (മെയ് 13) വമ്പന്‍ ഓഫര്‍. വൈകീട്ട് നാലു മുതല്‍ കണ്‍സ്യൂമര്‍ഫെഡിന്റെ സ്റ്റാള്‍ സന്ദര്‍ശിക്കുന്ന 100 ഉപഭോക്താക്കള്‍ക്ക് സൗജന്യമായി ഡി.പി.എന്‍ ടെസ്റ്റ്, ഡയബറ്റിക് ന്യൂറോപാത്തിക് ടെസ്റ്റ്, ഗ്ലൂക്കോമീറ്റര്‍ ടെസ്റ്റ് എന്നിവ ചെയ്ത് കൊടുക്കും. നിലവില്‍ ത്രിവേണി നോട്ട് ബുക്കുകള്‍ക്ക് 50 ശതമാനം  ഡിസ്‌ക്കൗണ്ട് സ്റ്റാളില്‍ ലഭ്യമാണ്.

കാഴ്ചയുടെ വര്‍ണ്ണ വിസ്മയങ്ങള്‍ നേരിട്ടറിയുന്നില്ലെങ്കിലും എന്റെ കേരളം പ്രദര്‍ശന വിപണന മേള തൊട്ടും കേട്ടും മനസ്സിലാക്കി തിരൂരങ്ങാടി തൃക്കുളം സ്‌കൂളിലെ ബ്രയിലി സാക്ഷരത വിദ്യാര്‍ഥികള്‍.  ആടിയും പാടിയും മത്സരങ്ങളില്‍ പങ്കെടുത്തും ഇവര്‍ മേളയുടെ ഭാഗമായി. കമ്പ്യൂട്ടര്‍ പ്രവര്‍ത്തിപ്പിച്ചും ബ്രെയിലി ലിപിയില്‍ എഴുതിയും വായിച്ചും അവര്‍ കാഴ്ചക്കാരുടെ ഹൃദയം കീഴടക്കി.  പ്രദര്‍ശന വിപണന മേള തുടങ്ങിയത് മുതല്‍ സാക്ഷരതാ മിഷന്‍ സ്റ്റാളില്‍ സ്‌കൂളിലെ നാല് വിദ്യാര്‍ഥികള്‍ മേള കാണാന്‍ എത്തുന്നവര്‍ക്ക് അവരുടെ ബ്രെയിലി ലിപിയും മറ്റ് ഉപകരണങ്ങളും പരിചയപ്പെടുത്തുന്നുണ്ട്.

പഴകിയ മത്സ്യങ്ങള്‍ വാങ്ങി കഴിച്ച് ഇനി വയറു കേടാവാന്‍ നില്‍ക്കണ്ട. ഒറ്റനോട്ടത്തില്‍ തന്നെ ഏത് സാധാരണക്കാരനും മീനിന്റെ പഴക്കം നിശ്ചയിക്കാം. അതിനുള്ള വഴികളാണ് എന്റെ കേരളം പ്രദര്‍ശന വിപണന മേളയില്‍ ഭക്ഷ്യ സുരക്ഷാ വകുപ്പ് അധികൃതര്‍ വിശദീകരിക്കുന്നത്. മായം കലര്‍ത്തിയ മറ്റ് ഭക്ഷണപദാര്‍ത്ഥങ്ങളെ പോലെ തന്നെയാണ് മത്സ്യവും. നിരവധി ഇടങ്ങളില്‍ ഇപ്പോഴും പഴകിയ മത്സ്യം പുതിയത് എന്നും പറഞ്ഞ് വില്‍ക്കുന്നുണ്ട്. എന്നാല്‍ ഇവ എളുപ്പത്തില്‍ തിരിച്ചറിയാന്‍  മൂന്നു മാര്‍ഗ്ഗങ്ങളുണ്ട്.

കോട്ടക്കുന്നിൽ നടക്കുന്ന എന്റെ കേരളം പ്രദർശന വിപണന മേളയിൽ ഇൻഫർമേഷൻ ആൻഡ് പബ്ലിക് റിലേഷൻ വകുപ്പിന്റെ കീഴിൽ പ്രവർത്തിക്കുന്ന ബുക്ക് സ്റ്റാൾ ശ്രദ്ധ നേടുകയാണ്. പ്രദർശനം കാണാൻ എത്തുന്നവർ ഒരു പുസ്തകമെങ്കിലും വാങ്ങാതിരിക്കുന്നില്ല. സോഷ്യൽ മീഡിയയുടെ അതിപ്രസരം വായനയെ തളർത്തി എന്ന് കരുതുന്നത് വെറുതെയാണ്. ബുക്ക്‌സ്റ്റോളിലെ അഖിൽ ധർമ്മജന്റെ പ്രശസ്ത നോവലായ 'റാം c/o ആനന്ദി', 'രാത്രി 12ന് ശേഷം', നഫീസ് കലയത്തിന്റെ 'ഖദീജ', അഞ്ചൽ താജിന്റെ 'ഇസ്‌നേഹം' എന്നീ പുസ്തകങ്ങളൊക്കെ ചൂടപ്പം പോലെയാണ് വിറ്റഴിയുന്നത്.

മലപ്പുറം ജില്ലയില്‍ നിപ ബാധിച്ച രോഗിയുടെ സമ്പര്‍ക്കപ്പട്ടികയില്‍ ഉള്‍പ്പെട്ട 2 പേരുടെ പരിശോധനാ ഫലം കൂടി നെഗറ്റീവായതായി ആരോഗ്യ വകുപ്പ് മന്ത്രി വീണാ ജോര്‍ജ്. ഇതോടെ 49 പേരുടെ പരിശോധനാ ഫലം നെഗറ്റീവായി. ഇന്ന് 40 പേരെയാണ് സമ്പര്‍ക്കപ്പട്ടികയില്‍ ഉള്‍പ്പെടുത്തിയത്. ഇതോടെ ആകെ 152 പേരാണ് സമ്പര്‍ക്കപ്പട്ടികയിലുള്ളത്. 62 പേര്‍ ഹൈ റിസ്‌കിലും 90 പേര്‍ ലോ റിസ്‌കിലുമാണുള്ളത്. മലപ്പുറം 108, പാലക്കാട് 36, കോഴിക്കോട് 3, എറണാകുളം, ഇടുക്കി, തിരുവനന്തപുരം, തൃശൂര്‍, ആലപ്പുഴ ഒന്ന് വീതം പേര്‍ എന്നിങ്ങനെയാണ് സമ്പര്‍ക്കപ്പട്ടികയിലുള്ളത്. നിലവില്‍ ഒരാള്‍ക്കാണ് നിപ സ്ഥിരീകരിച്ചിട്ടുള്ളത്. എട്ടു പേര്‍ ചികിത്സയിലുണ്ട്.

പൊന്മള എഫ്.എച്ച്.സി ലാബിലേയ്ക്ക് 2025-26 സാമ്പത്തിക വർഷത്തിൽ ലാബ് റിയേജന്റും മറ്റ് അനുബന്ധ വസ്തുക്കളും റണ്ണിംഗ് കോൺട്രാക്റ്റ് വ്യവസ്ഥയിൽ വാങ്ങുന്നതിന് വിതരണക്കാരിൽ നിന്നും ടെൻഡറുകൾ ക്ഷണിച്ചു. മെയ് 21ന് രാവിലെ പതിനൊന്നിനുള്ളിൽ ടെൻഡറുകൾ പൊന്മള എഫ് .എച്ച്.സി ഓഫീസിൽ ലഭിക്കണം. ഫോൺ: 9645521711.

താനൂര്‍ ദേവധാര്‍ ഗവ. എച്ച്.എസ്.എസില്‍ ഹയര്‍ സെക്കന്‍ഡറി വിഭാഗത്തില്‍ വിവിധ വിഷയങ്ങളില്‍ ദിവസവേതനാടിസ്ഥാനത്തില്‍ താല്‍ക്കാലിക അധ്യാപകരെ നിയമിക്കുന്നു. ഇംഗ്ലീഷ്, കമ്മ്യൂണിക്കേറ്റീവ് ഇംഗ്ലീഷ്, ഫിസിക്‌സ്, കെമിസ്ട്രി, മാത്തമാറ്റിക്സ്, കമ്പ്യൂട്ടര്‍ സയന്‍സ്, ബോട്ടണി, സുവോളജി, കോമേഴ്‌സ് എന്നീ വിഷയങ്ങളുടെ അഭിമുഖം മെയ് 15ന് രാവിലെ ഒമ്പത് മുതലും മലയാളം, ഹിന്ദി, അറബിക്, ഹിസ്റ്ററി, സോഷ്യോളജി, എക്കണോമിക്സ്, പൊളിറ്റിക്കല്‍ സയന്‍സ് എന്നിവയുടേത് അന്നേ ദിവസം ഉച്ചക്കുശേഷം രണ്ടു മുതലും നടക്കും.