പെരിന്തല്‍മണ്ണ ഗവ:പോളിടെക്നിക്കില്‍ പ്രവേശനം നേടുന്നതിന്  www.polyadmission.orgല്‍ പ്രസിദ്ധീകരീച്ച രണ്ടാംഘട്ട അലോട്ട്മെന്റ് ലിസ്റ്റ് പ്രകാരം വെബസൈറ്റില്‍ നിന്ന് ലഭിക്കുന്ന അലോട്ട്മെന്റ് സ്ലിപ്പിനു പുറമെ ടി.സി, സി.സി. മറ്റു അസ്സല്‍ സര്‍ട്ടിഫിക്കറ്റുകളും നിശ്ചിത ഫീസായ 5700 രൂപയും സഹിതം കോളജില്‍ നവംബര്‍ ആറ്, ഒന്‍പത് തീയതികളില്‍ ഹാജരാവണം. നവംബര്‍ ആറിന് സിവില്‍, മെക്കാനിക്കല്‍ ബ്രാഞ്ചുകളിലുള്ളവരും നവംബര്‍ ഒന്‍പതിന് ഇലക്ട്രിക്കല്‍, ഇലക്ട്രോണിക്സ് ബ്രാഞ്ചുകളില്‍ പ്രവേശനം ലഭിച്ചവരും രാവിലെ ഒന്‍പതിനും  വൈകീട്ട് നാലിനുമിടയിലെത്തണം.

ജില്ലയിലെ ആറു സ്മാര്‍ട്ട് വില്ലേജ് ഓഫീസുകളുടെ നിര്‍മാണോദ്ഘാടനവും പട്ടയ വിതരണവും മുഖ്യമന്ത്രി പിണറായി വിജയന്‍  വീഡിയോ കോണ്‍ഫറന്‍സിലൂടെ നിര്‍വഹിച്ചു.  അങ്ങാടിക്കല്‍, കലഞ്ഞൂര്‍, കൂടല്‍, ചേത്തയ്ക്കല്‍, കൊല്ലമുള, നിരണം എന്നീ സ്മാര്‍ട്ട് വില്ലേജ് ഓഫീസുകളുടെ നിര്‍മാണോദ്ഘാടനമാണ് മുഖ്യമന്ത്രി നിര്‍വഹിച്ചത്.

പാമ്പുപിടുത്തം ശാസ്ത്രീയ പരിശീലനത്തിന് അപേക്ഷിച്ചവര്‍ക്കുള്ള ആദ്യഘട്ട പരിശീലനം ജില്ലാ പഞ്ചായത്ത് ഹാളില്‍ നടന്നു. ജില്ലാ പഞ്ചായത്ത് പ്രിസിഡന്റ് എ.പി. ഉണ്ണികൃഷ്ണന്‍ പരിശീലന പരിപാടി ഉദ്ഘാടനം ചെയ്തു. പരിശീലനത്തില്‍ രണ്ടു സ്ത്രീകളടക്കം 20 പേര്‍ പങ്കെടുത്തു. സാമൂഹ്യ വനവത്ക്കരണ വിഭാഗം, അസിസ്റ്റന്റ് ഫോറസ്റ്റ് കണ്‍സര്‍വേറ്റര്‍ എ.പി. ഇംതിയാസ് അധ്യക്ഷനായി. സോഷ്യല്‍ ഫോറസ്ട്രി ഉദ്യോഗസ്ഥരായ കെ.പി അബ്ദുള്‍ സമദ്, ശശിധരന്‍ കെ.ഡി., കെ.എഫ്.ആര്‍.ഐ.യിലെ റിസര്‍ച്ച് സ്‌കോളര്‍ സന്ദീപ്ദാസ്, വനംവകുപ്പ് എസ്.ഐ.പി.യിലെ ജോജോ എന്നവരും പരിശീലനത്തിന് നേതൃത്വം നല്‍കി.

ഗാര്‍ഹിക ഉപഭോക്താക്കള്‍ക്ക് സബ്‌സിഡി സ്‌കീമില്‍ സൗരോര്‍ജ നിലയം സ്ഥാപിക്കുന്നതിന് അപേക്ഷ ക്ഷണിച്ചു. www.buymysun.com എന്ന വെബ് പോര്‍ട്ടലില്‍ രജിസ്റ്റര്‍ ചെയ്ത് ആവശ്യമായ രേഖകള്‍ സമര്‍പ്പിക്കണം. ആദ്യ മൂന്ന് കിലോവാട്ടിന് 40 ശതമാനം സബ്‌സിഡിയും , അധികമായി വരുന്ന 10 കിലോവാട്ട് വരെയുള്ള നിലയങ്ങള്‍ക്ക് ഓരോ കിലോവാട്ടിനും 20 ശതമാനം സബ്‌സിഡിയും ലഭ്യമാകും. മുന്‍ഗണനാ ക്രമമനുസരിച്ച് സാധ്യത പഠനം നടത്തിയാകും നിലയങ്ങള്‍ സ്ഥാപിക്കുക.

പേര്യ സ്മാര്‍ട്ട് വില്ലേജ് ഓഫീസിന്റെ നിര്‍മ്മാണോദ്ഘാടനം  മുഖ്യമന്ത്രി പിണറായി വിജയന്‍ ഓണ്‍ലൈനായി നിര്‍വ്വഹിച്ചു. റവന്യു-ഭവന നിര്‍മ്മാണ വകുപ്പ് മന്ത്രി ഇ.ചന്ദ്രശേഖരന്‍ അദ്ധ്യക്ഷത വഹിച്ചു.  പേരിയ വില്ലേജ് ഓഫീസില്‍ നടന്ന സ്മാര്‍ട്ട് വില്ലേജ് ഓഫീസ് നിര്‍മ്മാണ ഫലകം അനാച്ഛാദന ചടങ്ങ് ഒ.ആര്‍.കേളു എം.എല്‍.എ നിര്‍വ്വഹിച്ചു.

മാറാക്കര പഞ്ചായത്തിലെ അഞ്ച് റോഡുകളുടെ നിര്‍മാണ പ്രവൃത്തികളുടെ ഉദ്ഘാടനം പ്രൊഫ. ആബിദ് ഹുസൈന്‍ തങ്ങള്‍ എം.എല്‍.എ നിര്‍വഹിച്ചു. എം.എല്‍.എയുടെ പ്രത്യേക വികസന പദ്ധതി, ആസ്തിവികസന പദ്ധതി, ഗ്രാമീണ റോഡ് പുനരുദ്ധാരണ പദ്ധതി എന്നിവയില്‍ നിന്നും ഫണ്ടനുവദിച്ച  എ.സി. നിരപ്പ് പള്ളിയാല്‍ ബൈപാസ് റോഡ്, തടത്തില്‍പ്പടി പുല്ലാട്ടില്‍ പടി റോഡ്, താണിക്കുഴി മരുതിന്‍ചിറ റോഡ്, പറപ്പൂര്‍ കാട്ടില്‍പ്പെരുവഴി ചിറക്കല്‍ കുഴി റോഡ്, പുത്തിരിക്കണ്ടം പള്ളിപ്പടി പാറക്കുളം റോഡ് എന്നിവയുടെ പ്രവൃത്തി ഉദ്ഘാടനമാണ് എം.എല്‍.എ നിര്‍വഹിച്ചത്. മാറാക്കര പഞ്ചായത്ത് പ്രസിഡന്റ് വി. മധുസൂദനന്‍ അധ്യക്ഷനായി.

പെരിന്തല്‍മണ്ണ ടെക്നിക്കല്‍ ഹയര്‍സെക്കന്‍ഡറി സ്‌കൂളില്‍ പ്ലസ് വണ്‍ ബയോളജി സയന്‍സ്, കമ്പ്യൂട്ടര്‍ സയന്‍സ്, ഇലക്ട്രോണിക്സ് സയന്‍സ് എന്നീ ഗ്രൂപ്പുകളില്‍ ഒഴിവുള്ള സീറ്റുകളിലേക്കുള്ള സ്പോട്ട് അഡ്മിഷന്‍ നവംബര്‍ ആറ് വരെ നീട്ടി. എസ്.എസ്.എല്‍.സി, ടി.എച്ച്.എസ്.എല്‍.സി, സി.ബി.സ്.ഇ, തത്തുല്യ പരീക്ഷ വിജയിച്ചവര്‍ക്ക് പ്രവേശനം നേടാം. താത്പര്യമുള്ളവര്‍ അസ്സല്‍ സര്‍ട്ടിഫിക്കറ്റുകളും, ടി.സിയും പാസ്പോര്‍ട്ട് സൈസ് ഫോട്ടോയും സഹിതം സ്‌കൂളില്‍ നേരിട്ടെത്തി പ്രവേശനം നേടണം. എസ്.സി/എസ്.ടി/ഒഇസി വിഭാഗക്കാര്‍ക്ക് പഠനം സൗജന്യമാണ്. ഫോണ്‍: 04933  225086, 8547021210.
മാറാക്കരയില്‍ അഞ്ച് റോഡുകളുടെ

ജില്ലയില്‍ നാലരവര്‍ഷക്കാലയളവില്‍ 3095 പട്ടയങ്ങള്‍ വിതരണം വിതരണം ചെയ്തു. 444 പട്ടയങ്ങളുടെ വിതരണം കളക്‌ട്രേറ്റില്‍ ബുധനാഴ്ച നടന്നു. നാളിതുവരെ എല്‍.എ പട്ടയം - 402, ലക്ഷം വീട് പട്ടയം - 45, മിച്ചഭൂമി പട്ടയം -19, ദേവസ്വം പട്ടയം- 143, എല്‍.ടി പട്ടയം - 1725, മുത്തങ്ങ കൈവശ രേഖ - 84, പട്ടികവര്‍ഗ്ഗ കൈവശരേഖ- 557, വനാവകാശ രേഖ -80, കൈവശരേഖ-1, ഭൂരഹിതരില്ലാത്ത കേരളം പദ്ധതി -39 എന്നിങ്ങനെയാണ് പട്ടയങ്ങള്‍ വിതരണം ചെയ്തത്.    

അര നൂറ്റാണ്ടിലേറെയായി സ്വന്തമായി ഭൂമിയില്ലാതിരുന്ന വി.എം. പൊന്നമ്മ പട്ടയം ലഭിച്ച സന്തോഷത്തിലാണ്. ആറന്മുള എഴിക്കാട് കോളനിയില്‍ താമസിക്കുന്ന പൊന്നമ്മയ്ക്കും കുടുംബത്തിനും അഞ്ച് സെന്റ് സ്ഥലത്തിന്റെ പട്ടയമാണ് ലഭിച്ചത്.
വിധവയായ പൊന്നമ്മയ്ക്ക്  കൈവശാവകാശ സര്‍ട്ടിഫിക്കറ്റ് മാത്രമാണ് ഇതുവരെ ഉണ്ടായിരുന്നത്. മകന്‍ സുനില്‍ കുമാര്‍ കൂലിപ്പണിക്ക് പോയാണ് കുടുംബം പുലര്‍ത്തുന്നത്. മകനും ഭാര്യയും രണ്ട് പെണ്‍മക്കളുമടങ്ങുന്ന കുടുംബത്തിന്റെ കിടപ്പാടത്തിന് പട്ടയം ലഭിച്ച സന്തോഷത്തില്‍ മനസ് തുറന്ന് ചിരിക്കുകയാണ് പൊന്നമ്മ.
 

പൊന്നാനി നഗരസഭാ പരിധിയിലെ ഭിന്നശേഷി  കുട്ടികള്‍ക്കാവശ്യമായ എല്ലാ തെറാപ്പി സംവിധാനങ്ങളും ഒരുക്കി കമ്യൂനിറ്റി ഡിസബിലിറ്റി മാനേജ്‌മെന്റ് സെന്റര്‍ പൊന്നാനിയില്‍ പ്രവര്‍ത്തനമാരംഭിച്ചു. ശൈശവ കാലം മുതല്‍ ഇത്തരം കുട്ടികളെ കണ്ടെത്തി തെറാപ്പികളിലൂടെ മാറ്റിയെടുക്കുന്നതിന് കഴിഞ്ഞ രണ്ട് വര്‍ഷം മുന്‍പ് നഗരസഭ അനുയാത്ര പദ്ധതി ആരംഭിച്ചിരുന്നു. ഇതിന്റെ വിപുലീകരണമായാണ്  കാലിക്കറ്റ് യൂനിവേഴ്‌സിറ്റിയിലെ സി.ഡി.എം.ആര്‍.പിയുടെയും കാലിക്കറ്റ് യൂനിവേഴ്‌സിറ്റി ഇന്‍ഫര്‍മേഷന്‍ സെന്റര്‍ പൊന്നാനിയുടെയും സഹകരണത്തോടെ   സെന്റര്‍ പ്രവര്‍ത്തനമാരംഭിച്ചത്.